Aposel 28:31 - Yesus Aqa Anjam Bole

³¹ Qotei a tamo uŋgasari naŋgo Mandor Koba sosiq naŋgi taqatnjreqnu anjam di aqa utru Pol na plaltoqnsiqa naŋgi sainjroqnej. Tamo Koba Yesus Kristus qa dego anjam plaltosiq sainjroqnej. Pol a anjam deqaji marqajqa ulaosaioqnej. A anjam deqaji mareqnaqa tamo bei na saidyosaioqnej.

Aposel 28:31 ပူးပေါင်းရင်းမြစ်များ

Matyu 4:23

Yesus a dena walwelosiqa Galili sawa keretoqnsiqa Juda naŋgo Qotei tal miligiq giloqnsiqa Qotei aqa anjam palontosiq minjroqnej. Qotei a tamo uŋgasari naŋgo Mandor Koba sosiq naŋgi taqatnjreqnu. Anjam bole di Yesus na palontosiq minjroqnej. Osiqa tamo ma utru segi segi so qaji naŋgi boletnjroqnej.

Mak 1:14

Bati bei Jon a tonto talq waiyonab sonaqa Yesus a olo Galili sawaq aiej. Aisiq dia Qotei aqa anjam bole palontosiq tamo uŋgasari naŋgi minjroqnej.

Luk 8:1

Bati bei Yesus a walwelosiqa qure kokba ti qure kiñilala ti dia brantoqnsiqa Qotei a tamo uŋgasari naŋgo Mandor Koba sosim naŋgi taqatnjrqas anjam bole di minjre minjre laqnej. Tamo 12-pela agi Yesus na aqa anjam mare mare laqajqa giltnjrej qaji naŋgi Yesus koba na walweloqneb.

Aposel 1:3

Nami Yesus a jaqatiŋ koba osiq moiej. Osiqa olo subq na tigelosiqa aqa segi aŋgro naŋgoq di brantoqnsiqa maŋwa gargekoba yeqnaqa naŋgi unoqneb. Unoqnsib maroqneb, “Bole, Yesus a subq na tigelqo. A ŋambile unu.” Bati 40 qa Yesus a mandamq di sosiqa aqa aŋgro naŋgoq di brantoqnej. Brantoqnsiqa Qotei a tamo uŋgasari naŋgo Mandor Koba sosiqa naŋgi taqatnjrejunu anjam di minjroqnej.

Aposel 20:25

“Deqa niŋgi quiye. E nami nuŋgo ambleq di sosimqa anjam endegsi plaltosim merŋgoqnem, ‘Qotei a nuŋgo Mandor Koba sosiq niŋgi taqatŋgeqnu.’ Ariya bini e qalieonum, e niŋgi uratŋgitqa niŋgi ijo ulatamu olo unqasai.

Aposel 23:11

Gilsib di sonab nebeosiq olo qoloonaqa Tamo Koba Yesus a bosiqa Pol aqa areq di tigelosiq minjej, “Ni are siŋgilatime. Ulaaim. Ni Jerusalem endia ijo anjam mare mare laqnum dego kere ni Rom aisim dia dego ijo anjam siŋgila na minjroqne.” Tamo Koba Yesus na Pol degsi minjej.

Aposel 28:23

Osib olo koroqajqa bati ateb. Onaqa koro bati brantonaqa Juda tamo kokba tulaŋ gargekoba naŋgi nobqolo bosib Pol aqa talq di koroeb. Koroonabqa Pol a naŋgo ambleq di tigelosiqa anjam utru atsiq anjam gargekoba naŋgi minjreqnaq gilsiq bilaqtej. Qotei a tamo uŋgasari naŋgo Mandor Koba sosiq naŋgi taqatnjreqnu anjam di aqa utru plaltosiqa minjroqnej. Moses aqa dal anjam dena ti Qotei aqa medabu o tamo naŋgo anjam nami neŋgreŋyeb qaji dena ti anjam mutu quja quja eleŋoqnsiqa naŋgo are qametnjrimqa naŋgi are bulyosib Yesus qa naŋgo areqalo siŋgilatqajqa deqa siŋgila na minjroqnej.

Aposel 28:30

Onaqa Pol aqa segi tal awaiyoqnej qaji dia wausau aiyel sonaqa tamo uŋgasari gargekoba naŋgi a unqajqa beqnabqa a na naŋgi joqoqnsiqa aqa talq dia koba na awooqnsib qairoqneb.

Aposel 4:29

O Tamo Koba Qotei, Juda tamo kokba naŋgi minjiŋ oqetnjrqoqa iga ula egwajqa anjam mergonub di ni unime. Iga ino wau tamo. Deqa ni na iga siŋgila egoqnimqa iga ino anjam maroqnqom. Iga ulaqasai.

Aposel 4:31

Naŋgi degsib Qotei pailyosib koboonaqa tal naŋgi koroesoqneb qaji di reŋgiŋyej. Onaqa Qotei aqa Mondor aisiqa naŋgi siŋgila enjrnaqa naŋgi walwelosib siŋgila na Qotei aqa anjam mare mare laqneb. Naŋgi ulaosai.

Aposel 5:42

Naŋgi Yesus aqa anjam mare mare laqajqa uratosaioqneb. Naŋgi bati gaigai Yesus aqa anjam plaltoqnsib maroqneb. Atra tal miligiq dia, tamo uŋgasari naŋgo segi segi talq dia naŋgi anjam endegsib minjroqneb, “Yesus a bole Kristus Qotei na qariŋyej qaji.”

Aposel 8:12

Ariya Qotei a tamo uŋgasari naŋgo Mandor Koba sosiq naŋgi taqatnjreqnu anjam bole di Filip a palontoqnsiqa Yesus Kristus aqa ñam mare mare laqnaqa tamo uŋgasari gargekoba naŋgi quoqnsib are bulyoqnsib Yesus qa naŋgo areqalo siŋgilatoqneb. Degyeqnabqa Filip a na naŋgi yansnjroqnej.

Filipai 1:14

E tonto talq endia unum deqa Kristen was gargekoba naŋgi kamba siŋgilaoqnsib Tamo Koba Qotei qa naŋgo areqalo siŋgilateqnub. Osib deqa naŋgi ulaosaieqnub. Naŋgi Qotei aqa anjam siŋgila na mareqnub.

2 Timoti 2:9

E anjam bole di mareqnum deqa jeu tamo naŋgi na e tamo uge bul nuboqnsib e gulube koba ebeqnub. Deqa naŋgi na e ojsib tonto talq endia waibeb unum. Ariya naŋgi Qotei aqa anjam getentqa keresai.

2 Timoti 4:17

Ariya Tamo Koba Yesus a segi na e taqbosiqa siŋgila ebej. Deqa e anjam pegiyo tamo aqa ulatamuq dia tigelosimqa Yesus aqa anjam bole mareqnamqa sawa bei bei qaji tamo naŋgi quoqneb. Qotei na e aqaryaibosiqa bauŋ juwaŋ naŋgo medabuq dena e osiq taqal waibej.