Aposel 18:12 - Yesus Aqa Anjam Bole

¹² Ariya Pol a Korin qureq di sonaqa Rom naŋgo gate koba bei aqa ñam Galio a Akaia sawa taqatoqnej. Bati deqa Juda naŋgi Pol qa minjiŋ oqetnjrnaqa a ojsib koro sawaq osi gilsib Galio aqa awo jaram namoq di tigelteb.

Aposel 18:12 ပူးပေါင်းရင်းမြစ်များ

Matyu 27:19

Ariya Pailat a une pegiyo qaji awo jaramq di awesonaqa aqa ŋauqali na anjam bei pepa mutu kiñalaq di neŋgreŋyosiq Pailat aqaq qariŋyej. A endegsi neŋgreŋyej, “Yesus aqa jejamuq di une bei saiqoji. Deqa ni a kumbra uge bei yaim. Qolo e ŋeiobilqeiosim Yesus unonum. Deqa e are tulaŋ gulubekobaibqo.”

Jon 19:13

Naŋgi na Pailat degsib minjnab qusiqa a olo Yesus osiq oqedosiqa aqa awo jaram kobaq di awoej. Pailat a gaigai tamo naŋgo une qa peginjrqa oqnsiq deqa awo jaramq dia awooqnej. Jaram so qaji sawa di aqa ñam Meniŋ Bijal. Hibru anjam na Gabata mareqnub.

Aposel 13:12

Onaqa Sergius Paulus a Tamo Koba Qotei aqa siŋgila di unsiqa Qotei aqa anjam Barnabas wo Sol wo na minjoqneb qaji di poiyonaqa tulaŋ prugugetosiq Yesus qa aqa areqalo siŋgilatej.

Aposel 13:50

Onaqa Juda tamo qudei naŋgi Pol wo Barnabas wo naŋgo kumbra di unsibqa naŋgi tulaŋ minjiŋ oqetnjrnaqa uŋa kokba qudei Qotei qa louoqneb qaji naŋgi ti qure deqa gate kokba ti naŋgo are ugetetnjrnabqa naŋgi tigelosib Pol wo Barnabas wo naŋgi tulaŋ ugeugeinjrsib naŋgi aiyel qure dia sqajqa siŋgila na saidnjrsib naŋgi winjrnab gileb.

Aposel 13:7

Rom naŋgo gate koba bei aqa ñam Sergius Paulus a qure dia soqnej. Barjisas a gaigai Sergius Paulus dauryosiq laqnej. Sergius Paulus a qalie tamo kobaquja. Barnabas wo Sol wo Pafos qureq di brantonabqa Sergius Paulus a Qotei aqa anjam quqwa marsiqa naŋgi aiyel metnjrnaqa aqa areq bosib Qotei aqa anjam minjoqneb. Minjeqnabqa quñam tamo Barjisas (Grik anjam na aqa ñam Elimas) a qusiqa are qalej, “E na Barnabas wo Sol wo naŋgo anjam gegentoqnqai. Sergius Paulus a Qotei aqa anjam di qusimqa aqa areqalo Yesus qa siŋgilato uge.”

Aposel 14:19

Onaqa Juda tamo qudei naŋgi Antiok dena ti Aikoniam dena ti walwelosib Listra qureq beb. Bosib dia tamo uŋgasari naŋgo are ugetetnjrnabqa naŋgi tigelosib Pol meniŋ na qaleb. Osib a giriŋyosib gilsib qure qalaq di ateb. Naŋgi are qaleb, “A moiqo.”

Aposel 14:2

Ariya Juda tamo qudei Pol wo Barnabas wo naŋgo anjam quqwa urateb qaji naŋgi na sawa bei bei qaji tamo naŋgo are ugetetnjrnabqa naŋgi tamo uŋgasari Yesus qa naŋgo areqalo siŋgilateb qaji naŋgi qa ugeosib misiliŋyoqneb.

Aposel 17:13

Onaqa Juda tamo uŋgasari Tesalonaika qureq di soqneb qaji naŋgi Pol a Beria qureq gilsiq dia dego Qotei aqa anjam maroqnej di qusibqa minjiŋ oqetnjrnaqa mareb, “Iga Pol qalqom.” Degsib marsibqa Beria qureq bosib dia tamo uŋgasari naŋgo are ugetetnjreb.

Aposel 17:5

Naŋgi daurnjrnab Juda tamo kokba naŋgi unsib deqa minjiŋ oqetnjrnaqa tamo uge qudei naŋgi koro sawaq dena eleŋosib minjreb, “Niŋgi na tamo uŋgasari naŋgo are ugetetnjribqa naŋgi na Pol wo Sailas wo ojqab.” Degsi minjrnabqa naŋgi na tamo uŋgasari kalil naŋgo are ugetetnjrnabqa naŋgi murqumyoqnsibqa Pol wo Sailas wo naŋgi ojqa marsib gurgur ti Jeson aqa talq gileb. Gilsib dia naŋgi aiyel itnjrsib qure deqa gate kokba naŋgo ulatamuq dia tigeltnjrqa marsib aieb.

Aposel 18:11

Yesus a na Pol anjam degsi minjnaqa a anjam di dauryosiqa Korin qureq dia wausau qujai bai 6-pela sosiqa tamo uŋgasari naŋgi Qotei aqa anjam plaltoqnsiq minjroqnej.

Aposel 18:27

Onaqa bunuqna Apolos a marej, “E Akaia sawaq gilqai.” A degsi marnaqa Yesus aqa tamo uŋgasari Efesus qureq di soqneb qaji naŋgi na odosib minjeb, “Di kere. Ni gilime.” Degsib minjsibqa anjam bei neŋgreŋyosib Apolos yonab a na osi gilsiqa Yesus aqa tamo uŋgasari Akaia sawaq di soqneb qaji naŋgi enjrej. Endegsib neŋgreŋyeb, “O gago was niŋgi quiye. Apolos a nuŋgoq bqo. Deqa niŋgi a osib geregereiyiye.” Ariya Apolos a Akaia sawaq dia Yesus aqa tamo uŋgasari naŋgi itnjrnaqa naŋgi na a osib geregereiyeb. Onaqa a na naŋgi Qotei aqa anjam minjreqnaqa aqa anjam dena naŋgo are siŋgilatetnjroqnej. Qotei a nami naŋgi qa are tulaŋ boleiyosiqa naŋgo areqalo waqtetnjrnaqa naŋgi are bulyosib Yesus qa naŋgo areqalo siŋgilateb. Apolos a bosiqa tamo uŋgasari naŋgi di are siŋgilatetnjroqnej.

Aposel 19:21

Bati bei Qotei aqa Mondor na Pol areqalo yonaqa a endegsi marej, “E Masedonia sawa ti Akaia sawa ti dia walweloqnsiyqa dena aisiy Jerusalem qureq di brantqai.” Osiqa marej, “Di koboamqa e Jerusalem uratosiy gilsiy Rom qure dego unqai.”

Aposel 25:10

Onaqa Pol na minjej, “E bini Sisar aqa awo jaram namoq endi tigelejunum. Endia ijo anjam marqai. Ni qalie, e Juda naŋgi qa une bei yosai. Deqa e kiyaqa Jerusalem aiqai?

Rom 15:26

Qotei aqa tamo uŋgasari Masedonia sawa ti Akaia sawa ti di unub qaji naŋgi na Kristen tamo uŋgasari Jerusalem dia iŋgi iŋgi qa truqueqnub qaji naŋgi aqaryainjrqa marsib silali koroiyeb unu.

Rom 16:5

Niŋgi na ijo kaiye anjam endi osib Kristen tamo uŋgasari kalil Prisila wo Akwila wo naŋgo talq dia koroosib loueqnub qaji naŋgi dego minjriye. Osib Epainetus dego ijo kaiye anjam endi minjiye. A ijo kadoi bole. A Esia sawa qaji. Nami tamo kalil Esia sawaq di unub qaji naŋgi are bulyosaisonabqa Epainetus a namoqna are bulyosiq Kristus qa aqa areqalo siŋgilatej.

1 Korin 16:15

O was qu, niŋgi tamo uŋgasari Stefanas aqa talq di unub qaji naŋgi qa qalie bole. Naŋgi tamo kalil Akaia sawaq di unub qaji naŋgi qa namoosib nami are bulyeb. Naŋgi naŋgo segi areqalo na Qotei aqa tamo uŋgasari naŋgi qa waueqnub. Deqa e niŋgi siŋgila na endegsi merŋgwai.

2 Korin 1:1

E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e merbej, “Ni ijo Aŋgro Yesus aqa wau oje.” Onaqa e Qotei aqa areqalo di dauryosim agi e Yesus aqa wau ojeqnum. Niŋgi Korin qureq dia Qotei qa loueqnub qaji. Aqo gago was Timoti wo anjam endi neŋgreŋyosim niŋgi ti Qotei aqa segi tamo uŋgasari kalil Akaia sawaq di unub qaji naŋgi qa ti qariŋyonum.

2 Korin 11:10

Kristus aqa anjam bole ijoq di unu deqa e anjam bole endegsi merŋgwai, Akaia sawa kalilq dia tamo bei na e ijo kumbra deqa ijo segi ñam soqtqajqa getentbqa keresai.

2 Korin 11:26

Bati gargekoba e sawa isaq siŋga na walweloqnem. Ya koba doqnsiqa e ya na padaltbqa jojomoqnej. E gamq di walweleqnamqa bajiŋ tamo naŋgi gam getentoqnsibqa e lubqa laqneb. Juda tamo naŋgi ti sawa bei bei qaji tamo naŋgi ti dego e lubqa laqneb. Qure qureq dia, wadau sawaq dia, yuwalq dia dego e padalqa jojomoqnem. Gisaŋ Kristen naŋgi na dego e ugeugeibqa laqneb.

2 Korin 9:2

E qalieonum, niŋgi wau di yqajqa are tulaŋ prugŋgeqnu. Deqa e gaigai Masedonia Kristen naŋgo ŋamgalaq dia nuŋgo ñam soqteqnum. Osim endegsi minjreqnum, “Wausau bei nami tamo uŋgasari Akaia sawaq di unub qaji naŋgi silali koroiyqajqa wau di tigeltqa mareb.” O was qu, niŋgi wau di yqajqa tulaŋ siŋgilaeqnub deqa e na Masedonia Kristen naŋgi minjreqnam quoqnsib naŋgi gargekoba dego wau di yqajqa are prugnjreqnu.

1 Tesalonaika 2:14

O was qu, tamo uŋgasari Judia sawaq dia Kristus Yesus beteryesosib Qotei aqa ñam qa koroosib loueqnub qaji naŋgo kumbra agi niŋgi dego degsib dauryeqnub. Agi Juda naŋgi na Qotei aqa tamo uŋgasari Judia sawaq di unub qaji naŋgi gulube koba enjroqneb dego kere niŋgi dego nuŋgo segi leŋ naŋgi na gulube koba eŋgeqnub.

1 Tesalonaika 2:16

Osib iga na sawa bei bei qaji tamo uŋgasari naŋgi Qotei aqa anjam minjrqajqa gam getentetgeqnub. Sawa bei bei qaji tamo naŋgi Qotei na eleŋaim deqa maroqnsib gam getentetgeqnub. Deqa naŋgi bati gaigai naŋgo segi une tulaŋ kobaqujateqnub. Naŋgo kumbra dena Qotei aqa minjiŋ bosiq naŋgoq di unu.

Jems 2:6

O was qu, nuŋgo kumbra di uge. Niŋgi na tamo iŋgi iŋgi saiqoji unub qaji naŋgo ñam aguq ateqnub. Niŋgi are qaliye. Tamo yai naŋgi na niŋgi ugeugeiŋgoqnsib nuŋgo jejamuq di une eŋgoqnsib niŋgi joqoqnsib anjam pegiyo tamo naŋgo ulatamuq dia niŋgi tigeltŋgeqnub? Tamo silali koba ti unub qaji naŋgi segi na kumbra di yeqnub.