Aposel 14:23 - Yesus Aqa Anjam Bole

²³ Ariya qure kalil naŋgi aiyel nami laqneb qaji deq olo giloqnsibqa Kristen gate ateleŋoqneb. Osib iŋgi ti ya ti uratosib naŋgi qa pailyosib Tamo Koba Yesus agi naŋgi a qa nami naŋgo areqalo siŋgilateb qaji aqa baŋq di ateb.

Aposel 14:23 ပူးပေါင်းရင်းမြစ်များ

Matyu 17:21

Deqa niŋgi mondor uge deqaji winjrqa osibqa Qotei pailyqa osib ya uratosib qurieŋosib sosib pailyqab dena qujai niŋgi na mondor uge winjrib jaraiqab. Gam bei na sai.”

Luk 2:37

Aqa gumbuluŋ moinaqa a segi qobul soqnej. Aqa wausau kalil 84. A qobul sosiqa a bati gaigai qolo ti qanam ti atra tal miligiq giloqnsiqa iŋgi ti ya ti uratoqnsiqa Qotei pailyoqnej. A atra tal uratosaioqnej.

Luk 23:46

Onaqa Yesus a tulaŋ koba leleŋosiqa marej, “O Abu, e na ijo qunuŋ osim ino baŋq di atonum.” Degsi marsiqa mondor titosiq moiej.

Aposel 1:22

Jon yansnjro qaji aqa bati qa Yesus na aqa wau utru atej dena bosi bosiq Qotei na Yesus yaigosiqa laŋ qureq oqej bati deqa tamo naŋgi iga koba na soqnem qaji deqaji bei giltonamqa a iga ti Yesus aqa wau ojsim Yesus a moisiq olo subq na tigelej deqa mare mare laqnqom.”

Aposel 1:24

Naŋgi aiyel giltnjrsibqa endegsib Qotei pailyeb, “O Tamo Koba Qotei, ni tamo kalil naŋgo areqalo qalie. Deqa tamo aiyel endi ni yai giltqam di iga osorgimqa tamo dena Judas aqa sawa osim aqa wau ojqas.

Aposel 11:30

Silali di naŋgi na Barnabas wo Sol wo enjrnabqa naŋgi na osi aisib Kristen gate Judia sawaq di soqneb qaji naŋgo baŋq di ateb.

Aposel 14:26

Aisib dena qobuŋ gogetosib aisib Antiok qure agi nami naŋgi aiyel dena tigelosib walweleb qaji di olo branteb. Dia nami Yesus aqa tamo uŋgasari naŋgi koroosib Qotei na naŋgi aiyel aqaryainjrim siŋgila na wauoqnqajqa deqa Qotei pailyosib naŋgi aiyel qariŋnjrnab gileb. Ariya naŋgi aiyel wau di kobotosib puluosib qure deq olo aieb.

Aposel 15:23

Yesus aqa tamo uŋgasari Jerusalem qureq di soqneb qaji naŋgi na anjam di neŋgreŋyosib naŋgi aiyel enjrnabqa Antiok qureq osi aieb. Naŋgi na anjam endegsib neŋgreŋyeb, “O Yesus aqa tamo uŋgasari kalil Antiok qureq di unub qaji, kaiye. Iga na anjam endi neŋgreŋyosim niŋgi qa qariŋyonum. Iga nuŋgo Kristen was. Iga Yesus aqa aŋgro 12-pela iga ti Kristen gate kokba iga ti anjam endi neŋgreŋyosim niŋgi qa qariŋyonum. Sawa bei bei qaji tamo Antiok qure ti Siria sawa ti Silisia sawa ti dia unub qaji niŋgi qa anjam endi qariŋyonum.

Aposel 15:4

Ariya naŋgi aisib Jerusalem qureq di brantonabqa Yesus aqa tamo uŋgasari kalil naŋgi ti Yesus aqa aŋgro 12-pela naŋgi ti Kristen gate kokba ti naŋgi na minjreb, “Niŋgi kere bonub. Bonub degamqa niŋgi sawa bei beiq dia Qotei aqa anjam qa wauoqneb deqa iga saigib iga quqwom.” Onaqa Pol wo Barnabas wo Qotei na siŋgilatnjreqnaqa sawa bei beiq dia wau kalil yoqneb qaji deqa naŋgi sainjrnab queb.

Aposel 15:6

Naŋgi degsib marnabqa Yesus aqa aŋgro 12-pela naŋgi ti Kristen gate kokba ti naŋgi anjam di qusibqa naŋgi anjam di gereiyqajqa koroosib anjam gargekoba mareleŋoqneb. Onaqa Pita a tigelosiqa naŋgi endegsi minjrej, “O ijo was kalil, e na anjam bei niŋgi merŋgit quiye. Niŋgi qalie, Qotei a nami nuŋgo ambleq dena e giltbosiqa merbej, ‘O Pita, e ni qariŋmitqa ni gilsimqa sawa bei bei qaji tamo naŋgi Tamo Koba Yesus aqa anjam bole minjroqnimqa naŋgi quoqnsibqa Yesus qa naŋgo areqalo siŋgilatoqnqab.’ Qotei na e degsi merbej.

Aposel 20:17

Deqa iga Miletus qureq di tiryosim Pol na tamo qudei naŋgi qariŋnjrnaqa naŋgi siŋga na gilsib Efesus qureq di brantosib Kristen gate naŋgi endegsi minjreb, “Niŋgi Miletus qureq aisib dia Pol itosib aqa areq di koroabqa a na niŋgi anjam bei merŋgwas.” Onaqa Kristen gate naŋgi tigelosib Miletus qureq aisib dia Pol itosib aqa areq di koroonabqa a na naŋgi anjam endegsi minjrej, “O Kristen gate niŋgi quiye. E Esia sawaq branto ŋasiti e nuŋgoq bosim niŋgi koba na soqnem. Sosimqa e bati gaigai Tamo Koba Yesus aqa anjam niŋgi merŋgoqnem. E ijo segi ñam soqtqajqa are qalosaioqnem. Ijo kumbra di niŋgi qalie. E niŋgi koba na sosimqa gulube gargekoba itoqnsim akamoqnem. Bati gargekoba Juda naŋgi na e lubsib moiotbqa mareqnab dena e are gulubekobaiboqnej.

Aposel 20:32

“Bini e niŋgi Qotei aqa baŋq di ateleŋitqa a na niŋgi geregere taqatŋgoqnqas. Qotei a niŋgi qa are boleiyosiqa eleŋej anjam di niŋgi siŋgila na ojesoqnibqa anjam dena nuŋgo are siŋgilatetŋgoqnqas. Niŋgi Qotei aqa segi tamo uŋgasari a na nami gilteleŋej qaji. Deqa mondoŋ a na niŋgi iŋgi bole bole eŋgoqnqas.

2 Korin 8:19

Di segi sai. Kristen tamo uŋgasari qure qure kalilq di unub qaji naŋgi na was di gilteb deqa a iga ti koba na walweloqnsim silali koroiyqajqa wau di taqateqnum. Wau di aqa utru agiende. Qotei a Kristen naŋgi qa are tulaŋ boleiyosiq aqaryainjrej deqa naŋgi silali di koroiyeb. Wau di iga na taqateqnum. Di kiyaqa? Iga wau dena Tamo Koba Yesus aqa ñam soqtimqa tamo kalil naŋgi unsib qalieqab, bole, iga wau di yqajqa are tulaŋ pruggeqnu.

1 Timoti 5:1

Ni na tamo qeli naŋgi ŋiriŋtnjroqnaim. Ni lawo na naŋgi tingitnjroqne. Ni naŋgi tingitnjrqa osimqa naŋgi ino abu bul lawo na tingitnjroqne. Aŋgro meli naŋgi ti aŋgro wala naŋgi ti dego lawo na tingitnjroqne. Ni naŋgi tingitnjrqa osimqa naŋgi ino was bul lawo na tingitnjroqne.

1 Timoti 5:22

Ni Kristen naŋgo gate bei atqa osimqa ino baŋ aqa gateq di urur ataim. Ni grotqam di a bunuqna une yimqa ni a ombla une oqam. Deqa ni ino segi so geregere taqatosim Qotei aqa ŋamgalaq di tamo bole une saiqoji soqne.

2 Timoti 1:12

Deqa uŋgum, e gulube oqnsiy sqai. E deqa jemaibqasai. E Yesus qa ijo areqalo siŋgilateqnum deqa e a qa bole qalieonum. A segi na wau endi ijo baŋq di atej deqa e qalieonum, a na wau di geregere taqatoqnqas. Taqatsim gilsim a olo bqajqa bati brantqas.

2 Timoti 2:2

Anjam kalil e tamo gargekoba naŋgo ŋamgalaq di palonteqnam ni quoqnem qaji di ni na osim olo tamo qudei Qotei aqa anjam siŋgila na ojeqnub qaji naŋgi di minjroqne. Yimqa naŋgi kamba anjam di olo tamo qudei naŋgi dego minjroqnqab.

Taitus 1:5

O Taitus, Krit nuiq dia Qotei aqa wau qudei koboosaiunu. Deqa ni na wau di kobotosim qure segi segiq dia Kristen naŋgo gate ateleŋ. E deqa ni Krit nuiq di uratmem unum. Agi e nami wau deqa ni mermem.

Jems 5:14

Nuŋgo ambleq di tamo qudei naŋgi mainjreqnu kio? Degamqa niŋgi na minjribqa naŋgi Kristen gate naŋgi metnjrib bosib Tamo Koba Qotei aqa ñam na naŋgo gateq di baŋ atetnjrsib goreŋ bilentosib naŋgi qa pailyebe.

1 Pita 5:1

O Kristen gate, e niŋgi anjam endegsi merŋgwai. E dego Kristen gate deqa Kristus a ijo ŋamgalaq dia jaqatiŋ osiq moinaq e unem. Mondoŋ Kristus a olo siŋgila ti ñam koba ti brantimqa bati deqa Qotei na laŋ qure qa iŋgi bole bole e ti niŋgi ti egwas. Deqa Kristen gate, niŋgi wau endegyoqniye.

1 Pita 5:10

Qotei a bati gaigai iga qa are tulaŋ boleiyeqnu. A Kristus Yesus aqa ñam na niŋgi metŋgej deqa mondoŋ niŋgi Kristus ombla aqa riaŋ ti so bole gaigai sqab. Deqa niŋgi mandamq endia sokiñala jaqatiŋ oqnsib koboamqa Qotei a na niŋgi olo boletŋgsim siŋgilatŋgimqa niŋgi gaigai siŋgila na tigelesqab.

2 Jon 1:1

E Kristen naŋgo gate. Ni uŋa Qotei na giltmej qaji. E na anjam endi neŋgreŋyosim ino aŋgro naŋgi qa ti ni qa ti qariŋyonum. E bole merŋgwai. E niŋgi tulaŋ qalaqalaiŋgeqnum. E segi na sai. Tamo uŋgasari kalil anjam bole qalieonub qaji naŋgi dego niŋgi tulaŋ qalaqalaiŋgeqnub.

3 Jon 1:1

E Kristen naŋgo gate. O ijo was bole Gaius, e na anjam endi neŋgreŋyosim ni qa qariŋyonum. E ni bole mermqai. E ni tulaŋ qalaqalaimeqnum.