2 Timoti 4:1 - Yesus Aqa Anjam Bole

¹ Qotei wo Kristus Yesus wo naŋgo ŋamgalaq di e ni siŋgila na endegsi mermqai. Mondoŋ Kristus Yesus a laŋ qureq dena brantosim bati deqa a na tamo uŋgasari kalil ŋambile so qaji naŋgi ti tamo uŋgasari nami moreŋeb qaji naŋgi ti naŋgo kumbra qa peginjrqas. Osim a bati gaigai naŋgo Mandor Koba sqas.

2 Timoti 4:1 ပူးပေါင်းရင်းမြစ်များ

Matyu 16:27

E Tamo Aŋgro. Mondoŋ e ijo Abu aqa riaŋ ti sosiy aqa laŋ aŋgro naŋgi joqsiy bosiy tamo uŋgasari kalil naŋgo kumbra segi segi qa peginjrsiy naŋgo segi segi awai keretsiy enjrqai.

Luk 19:12

Naŋgi degsib are qaleb. Di kiyaqa? Yesus a Jerusalem qure jojomyej deqa. Onaqa Yesus a yawo anjam bei endegsi minjrej, “Tamo kobaquja bei a sawa isaq gilej. Tamo di a are qalej, ‘E sawa deq gilitqa sawa deqaji tamo uŋgasari naŋgi na e mandor koba atqab. Yibqa e olo puluosiy bosiy ijo segi tamo uŋgasari naŋgo mandor koba sosiy naŋgi taqatnjrqai.’ A degsi are qalsiqa sawa isaq gilej.

Luk 19:15

Degsi minjrnab qusibqa naŋgo anjam uratosib tamo di mandor koba ateb. Onaqa bunuqna tamo di a olo puluosiq aqa segi qureq aisiqa wau tamo 10-pela naŋgi wau qa silali enjrej qaji naŋgi metnjrej. Metnjrnaqa naŋgi aqa areq bonabqa a na minjrej, ‘E nami silali eŋgem qaji dena waueb olo silali di osorbiye.’

Luk 23:42

A degsi marsiqa Yesus minjej, “O Yesus, mondoŋ ni olo bosim Mandor Koba sosimqa ni e qa are qalsim e ame.”

Aposel 10:42

Yesus a na nami iga endegsi mergej, ‘Niŋgi na tamo uŋgasari naŋgi e qa endegsib minjroqniye, “Yesus a segi qujai Qotei na giltej qaji. Deqa mondoŋ a na qujai tamo ŋambile unub qaji ti tamo nami moreŋeb qaji naŋgi ti naŋgo une qa peginjrsim naŋgi ŋamyuoq wainjrqas.” ’ Yesus a na nami iga degsi mergej.

Aposel 17:31

Qotei a na bati atej unu. Bati di brantimqa a na tamo uŋgasari kalil naŋgo une qa peginjrqas. Aqa segi kumbra bole na ti aqa Ŋiri Yesus Kristus giltej qaji aqa baŋ na ti naŋgo une qa peginjrqas. Tamo uŋgasari naŋgi di qalieqajqa deqa Qotei na Yesus subq na olo tigeltej.”

Kolosi 3:4

Kristus a segi nuŋgo ŋambile qa utru. Mondoŋ a laŋ goge dena boleq dimqa niŋgi dego a koba na Qotei aqa riaŋ ti wala ti boleq dqab.

2 Tesalonaika 2:8

A boleq dimqa Tamo Koba Yesus a riaŋ koba ti bosim aqa me mondor medabuq na puyimqa jagwa koba dosim dal anjam gotraŋyo qaji tamo di qalsim moiotqas. O was qu, Yesus aqa riaŋ dena tamo di tulaŋ padaltougetqas.

1 Timoti 5:21

O Timoti, Qotei ti aqa laŋ aŋgro naŋgi ti Kristus Yesus ombla na naŋgo ŋamgalaq dia e siŋgila na anjam endegsi ni mermqai. Wau kalil e ino baŋq di atem qaji di ni geregere taqatosim wauoqne. Ni na ino was naŋgi ti tamo kokba ti naŋgi segi gereinjroqnaim. Ni tamo kalil naŋgi turtnjrsim gereinjroqnime.

2 Timoti 1:10

Ariya bini bati endeqa Kristus Yesus agi iga eleŋej qaji a boleq dej. Osiqa iga qa moiej aqa wau dena Qotei a iga qa are tulaŋ boleiyej. Kumbra di dego boleq dej. Kristus Yesus a moio aqa siŋgila kobotej. Iga aqa anjam bole marsim laqnum gam dena tamo uŋgasari kalil naŋgi endegsi poinjreqnu, “Bole, iga ŋambile gaigai sqom.”

2 Timoti 2:14

O Timoti, ni na gaigai tamo uŋgasari naŋgo areqalo tigeltetnjroqnimqa naŋgi anjam deqa are qaloqnqab. Ni Qotei aqa ŋamgalaq di naŋgi endegsi minjroqne, “Niŋgi anjam kiñilala qudei qa laŋa laŋa ŋiriŋoqnsib ñam qudei qa anjam na qotoqnaib. Nuŋgo anjam dena tamo naŋgi aqaryainjrqa keresai. Anjam di tamo naŋgi quoqnsib dena naŋgo areqalo ugetetnjreqnu.” O Timoti, ni na naŋgi degsi minjroqne.

2 Timoti 4:18

Deqa e qalieonum. Jeu tamo naŋgi boqnsib kumbra uge uge ebqa maroqnib Qotei na e aqaryaiboqnsim naŋgo baŋq dena e oqnsim taqal waiboqnqas. Osim bunuqna a na e laŋ qureq osi oqsim dia e taqatboqnsim ijo Mandor Koba sqas. Deqa iga bati gaigai aqa ñam soqtoqnqom. Bole.

2 Timoti 4:8

Tamo naŋgi gurgu-roqnsib bubuŋeqnub di naŋgi awai oqajqa. Ariya ijo awai bole agi Qotei a laŋ goge dia atej unu. E awai di oqajqa deqa tariŋoqnsim unum. Ijo awai agiende. Mondoŋ Tamo Koba Qotei na e tamo bole une saiqoji qa merbqas. Di ijo awai bole. Tamo Koba Qotei a kumbra tiŋtiŋ na tamo uŋgasari naŋgo kumbra qa naŋgi peginjreqnu. Ariya Qotei na naŋgi peginjrqajqa batiamqa a na awai bole di e ebqas. A e segi awai ebqasai. Tamo kalil Yesus a laŋ goge dena brantim unqajqa deqa areboleboleinjreqnaqa tariŋeqnub qaji naŋgi ti awai bole egwas.

Taitus 2:13

Osim iŋgi tulaŋ boledamu iga mondoŋ oqom qaji di unqajqa areboleboleigoqnimqa tariŋoqnsim sqom. Yesus Kristus a segi Qotei. A siŋgila koba. A na iga eleŋej. Mondoŋ a wala bole ti riaŋ koba ti Qotei aqa siŋgila ti di osim laŋ qureq dena bqas. Iga di unqajqa tariŋoqnsim unum.

1 Pita 1:7

Niŋgi gulube eqnub dena Qotei a nuŋgo areqalo uneqnu. Niŋgi Kristus qa nuŋgo areqalo bole siŋgilateqnub kio sai kio di Qotei a uneqnu. Iga qalie, gol a iŋgi tulaŋ boledamu. Ariya tamo naŋgi ŋamyuo na gol koitoqnsib dena qalieeqnub, gol di bole kio sai kio. Dego kere nuŋgo areqalo Kristus qa siŋgilateqnub qaji di tulaŋ bolequja. Areqalo dena gol tulaŋ buŋyejunu. Di kiyaqa? Gol a ugeosim koboqas. Deqa gulube bei bei niŋgi qa boqnsim dena niŋgi osorŋgwas, niŋgi Kristus qa nuŋgo areqalo bole siŋgila-teqnub. Niŋgi bole siŋgilatqab di mondoŋ diŋo batiamqa Yesus Kristus a boleq dosim bati deqa a niŋgi qa tulaŋ areboleboleiyim ñam kobaquja niŋgi eŋgwas.

1 Pita 4:5

Ariya mondoŋ tamo naŋgi di Qotei aqa ulatamuq dia tigelosib naŋgo une di palontqab. Bati deqa Qotei na tamo ŋambile so qaji ti tamo moreŋo qaji naŋgi ti naŋgo kumbra qa peginjrsimqa naŋgi awai segi segi enjrqas.

1 Pita 5:4

Niŋgi kumbra degyibqa mondoŋ kaja naŋgo Mandor Koba Yesus a laŋ qureq na olo brantimqa bati deqa niŋgi awai tulaŋ boledamu oqab. Awai di ugeqa keresai. Gaigai sqas.

2 Pita 1:11

Qotei na gam waqtetŋgimqa niŋgi laŋ qureq oqibqa gago Tamo Koba Yesus Kristus agi iga eleŋej qaji a nuŋgo Mandor Koba sosim niŋgi taqatŋgimqa niŋgi so bole gaigai sqab.

2 Pita 1:17

Abu Qotei a na Yesus ñam kobaquja yosiqa aqa segi riaŋ aqaq di atej. Qotei a segi laŋ qaji riaŋq di sosiqa Yesus qa endegsi marej, “Endi ijo Aŋgro e na tulaŋ qalaqalaiyeqnum qaji. E a qa tulaŋ areboleboleibeqnu.”

1 Jon 2:28

Od, ijo aŋgro, niŋgi Kristus beteryosib soqniye. Yim deqa mondoŋ a olo brantimqa iga jemaigwasai. Iga are siŋgilatosim aqa ulatamuq di tigelesqom.

Uli Anjam 1:7

Niŋgi uniye. Yesus a laŋbi ambleq na boqnimqa tamo kalil naŋgi a unqab. Tamo kalil nami a qaja na qameb qaji naŋgi dego a unqab. Tamo uŋgasari kalil mandamq endi unub qaji naŋgi a qa are ugeinjrimqa tulaŋ akamugetqab. Od, kumbra di brantqas. Bole.