2 Timoti 3:2 - Yesus Aqa Anjam Bole

² Bati di tamo naŋgi naŋgo segi jejamu qa areboleboleinjroqnim sqab. Sosib silali koba oqnqajqa are prugnjroqnqas. Naŋgi naŋgo segi ñam soqtoqnsib diqoqnsib ŋiriŋ anjam koba maroqnsib tamo naŋgi misiliŋnjroqnqab. Naŋgi naŋgo ai wo abu wo naŋgo anjam gotraŋyoqnqab. Tamo uŋgasari qudei naŋgi na naŋgi kumbra bole bole enjroqnibqa di uratoqnsib olo naŋgi qa are boleinjrqasai. Naŋgi Qotei aqa kumbra kalil qoreiyoqnqab.

2 Timoti 3:2 ပူးပေါင်းရင်းမြစ်များ

Matyu 15:6

A degsi minjqas di niŋgi marqab, ‘A keretqo. A na aqa ai wo abu wo naŋgi aqaryainjraiq.’ Niŋgi degsib marqab. Nuŋgo kumbra dena niŋgi Qotei aqa anjam gotraŋyoqnsibqa olo nuŋgo segi moma naŋgo kumbra soqteqnub.

Luk 12:15

Degsi minjsiqa tamo uŋgasari kalil naŋgi endegsi minjrej, “Niŋgi ñoro koba ti sqajqa deqa are koba qaloqnaib. Niŋgi ñoro koba ti sqab dena niŋgi ŋambile bole oqa keresai. Niŋgi ijo anjam deqa geregere are qaliye.”

Luk 16:14

Yesus a na aqa aŋgro naŋgi anjam degsi minjrnaqa Farisi naŋgi qusib deqa Yesus yomuiyeb. Farisi naŋgi bati gaigai silali koba oqnqajqa are qaloqneb. Utru deqa naŋgi Yesus yomuiyeb.

Luk 6:35

Deqa niŋgi ijo anjam endi quiye. Tamo qudei naŋgi na niŋgi jeutŋgoqnibqa niŋgi na kamba naŋgi jeutnjraib. Niŋgi naŋgi qa olo boleoqnsib naŋgi gereinjroqniye. Osib iŋgi bole bole enjroqnsib naŋgi na kamba olo eŋgwajqa minjroqnaib. Niŋgi kumbra degyqab di niŋgi Qotei laŋ goge di unu qaji aqa aŋgro bole sqab. Sosibqa awai tulaŋ boledamu oqab. Niŋgi qalie, tamo qudei naŋgi Qotei biŋiyosaieqnub. Tamo qudei naŋgi kumbra uge uge yeqnub. Ariya tamo naŋgi di Qotei na kamba kumbra uge uge enjrosaieqnu. A na olo naŋgi kumbra bole bole enjreqnu. Deqa niŋgi dego Qotei aqa kumbra di dauryosib tamo bole ti tamo uge ti naŋgi turtnjroqnsib kumbra bole bole enjroqniye. Niŋgi kumbra degyqab di niŋgi Qotei aqa aŋgro bole sqab.

Aposel 5:36

Niŋgi qalie, nami yala tamo bei aqa ñam Teudas a tigelosiqa aqa segi ñam soqtoqnsiqa maroqnej, ‘E tamo kobaquja.’ Degsi mareqnaqa tamo 400 a dauryoqneb. Onaqa Rom naŋgi na bosib a qalnab moinaqa tamo naŋgi a dauryoqneb qaji kalil segi segi jaraionab aqa wau koboej.

Rom 11:18

Deqa niŋgi endegsib are qalaib, “Iga tamo bole deqa iga na ŋamtaŋ oliv qure qaji aqa dani naŋgi buŋnjrejunum.” Niŋgi degsib are qalqab di niŋgi mati olo endegsib are qaliye. Ŋamtaŋ oliv aqa jirim na niŋgi namur eŋgeqnu. Niŋgi na ŋamtaŋ oliv aqa jirim namur yosaieqnub.

2 Korin 5:15

Iga ŋambile unum deqa iga gago segi jejamu qa are qalsim walwelqasai. Utru deqa a iga qa moiej. A gago sawa osiq moisiq olo subq na tigelej deqa iga a qa are qalsim walweloqnqom.

Filipai 2:21

Tamo kalil naŋgi naŋgo segi jejamu qa are koba qaleqnub. Naŋgi Yesus Kristus aqa wau qa are qalosaieqnub.

Kolosi 3:5

Deqa niŋgi mandam qaji kumbra kalil nuŋgo are miligiq di unu qaji di moiotiye. Mandam qaji kumbra agi ubtsiy merŋgwai. Sambala kumbra ti kumbra jiga ti kumbra uge uge yqajqa are prugŋgoqa, mandam qa iŋgi iŋgi qa maulŋgoqa. Tamo naŋgi mandam qa iŋgi iŋgi qa mamaulnjreqnu qaji naŋgi gisaŋ qotei naŋgi qa louobuleqnub.

2 Tesalonaika 2:4

Satan aqa tamo di a na qotei gisaŋ kalil naŋgi jeutnjroqnqas. Osim a diqoqnsim aqa segi ñam soqtoqnsim qotei gisaŋ naŋgi di tulaŋ buŋnjrqas. Deqa a Qotei aqa atra tal koba miligiq gilsim di awoosim marqas, “E segi Qotei.”

1 Timoti 1:20

Agi Himeneus wo Aleksander wo naŋgi aiyel kumbra uge degsib yeqnub. Deqa e na naŋgi aiyel Satan aqa baŋq di atem. Yim dena naŋgi endegsib qalieqab, “Bole, iga olo Qotei misiliŋyqasai.”

1 Timoti 1:9

Qotei a tamo naŋgi kumbra bole bole yeqnub qaji naŋgi qa osiq dal anjam atosai. Tamo naŋgi dal anjam gotraŋyoqnsib diqeqnub qaji naŋgi qa osiq dal anjam atej. Tamo naŋgi di naŋgo kumbra agiende. Naŋgi Qotei qoreiyoqnsib une ateqnub. Osib Qotei aqa kumbra dauryqa uratoqnsib olo mandam qa kumbra uge uge yeqnub. Naŋgi naŋgo ai wo abu wo ñumsib moiotnjreqnub. Osib tamo qudei naŋgi dego ñumeqnub.

1 Timoti 3:3

A ya uyoqnsim nanarioqnaiq. A urur minjiŋ oqim qotoqnaiq. A lawo soqnem. A silali koba ti sqajqa are qaloqnaiq.

1 Timoti 6:10

Tamo deqaji naŋgi silali koba oqajqa tulaŋ arearetnjreqnu. Naŋgo kumbra di agi kumbra uge uge kalil naŋgo utru. Kumbra dena tamo qudei naŋgi titnjreqnaqa naŋgi Yesus qa naŋgo areqalo siŋgilatqa uratoqnsib gulube gargekoba iteqnub.

1 Timoti 6:4

Deqa iga qalieonum, tamo deqaji naŋgi naŋgo segi areqalo dauryqajqa tulaŋ arearetnjreqnaqa diqoqnsib laqnub. Deqa naŋgi powo saiqoji sosibqa anjam kiñilala qudei qa laŋa ŋiriŋoqnsib ñam qudei qa anjam na qotoqnsib unub. Naŋgi anjam degsib mareqnub deqa naŋgi tamo naŋgi qa are ugeinjreqnaqa laŋa qoto itnjroqnsibqa misiliŋ anjam koba minjroqnsib naŋgi qa areqalo uge ti laqnub.

2 Timoti 3:4

Naŋgi naŋgo segi kadoi naŋgi ugeugeinjroqnqab. Osib naŋgo segi areqalo nanari urur dauryoqnsib naŋgo segi ñam soqtoqnsib mandam qa iŋgi iŋgi qa tulaŋ areboleboleinjroqnqas. Naŋgi Qotei qa arearetnjroqnqasai.

Jems 2:8

Qotei a gago Mandor Koba unu. Aqa dal anjam bei nami endegsib neŋgreŋyeb unu, “Niŋgi nuŋgo segi jejamu gereiyeqnub dego kere nuŋgo was qu dego degsib gereinjroqniye.” O was qu, niŋgi dal anjam di dauryqab di niŋgi kumbra tulaŋ boledamu yqab.

Jems 4:16

Ariya niŋgi olo nuŋgo segi ñam soqtoqnsib nuŋgo segi wau qa diqoqnsib laqnub. Nuŋgo kumbra di uge.

Jems 4:6

Ariya Qotei a iga qa are tulaŋ boleiyeqnu. Deqa aqa anjam bei nami endegsib neŋgreŋyeb unu, “Tamo naŋgi naŋgo segi ñam soqteqnub qaji naŋgi Qotei na olo jeutnjreqnu. Ariya tamo naŋgi naŋgo segi ñam aguq ateqnub qaji naŋgi qa Qotei a olo are boleiyoqnsiq gereinjreqnu.”

1 Pita 5:5

O aŋgro wala, niŋgi Kristen gate naŋgo sorgomq di soqniye. Sosib niŋgi kalil nuŋgo segi ñam aguq atoqnsib Qotei aqa tamo uŋgasari naŋgo sorgomq di soqniye. Agi Qotei aqa anjam bei nami endegsib neŋgreŋyeb unu, “Tamo naŋgi naŋgo segi ñam soqteqnub qaji naŋgi Qotei na olo jeutnjreqnu. Ariya tamo naŋgi naŋgo segi ñam aguq ateqnub qaji naŋgi qa Qotei a olo are boleiyoqnsiq gereinjreqnu.”

2 Pita 2:10

Tamo qudei naŋgi awai tulaŋ ugedamu oqab. Tamo naŋgi di sambala kumbra tulaŋ jigat yqajqa are prugnjreqnu. Osib naŋgi endegsib are qaleqnub, “Tamo Koba Qotei aqa anjam di laŋa sa anjam. Deqa iga dauryqasai.” Tamo uge deqaji naŋgi nuŋgo ambleq di tigelosib tulaŋ diqoqnsib naŋgo segi areqalo dauryeqnub. Deqa naŋgi laŋ aŋgro kokba naŋgi misiliŋnjrqajqa ulaosaieqnub.

2 Pita 2:12

Tamo uge deqaji naŋgi wagme bul tulaŋ nanariosib laqnub. Naŋgi naŋgo segi jejamu aqa areqalo dauryeqnub. Naŋgi wagme juwaŋ bul. Anjam naŋgi poinjrosai qaji di naŋgi olo misiliŋyeqnub. Iga na wagme juwaŋ naŋgi ojeleŋoqnsim ñumeqnum dego kere mondoŋ Qotei na tamo uge naŋgi di ñumougetqas.

2 Pita 2:18

Tamo naŋgi di naŋgo segi medabu waqtoqnsib diqoqnsib anjam uge uge mareqnub. Naŋgi na tamo qudei naŋgi walawalainjreqnab naŋgi sambala kumbra yoqnsib naŋgo segi jejamu aqa kumbra uge uge dauryeqnub. Tamo naŋgi di ya ya endi are bulyosib tamo uge naŋgo kumbra urateb. Ariya tamo uge naŋgi na olo naŋgi titnjreqnab naŋgi kumbra uge uge dauryeqnub.

2 Pita 2:3

Tamo naŋgi di mamaul ani. Deqa naŋgi na bosib gisaŋ anjam gargekoba niŋgi merŋgoqnsib dena nuŋgo silali iŋgi iŋgi yaiŋgoqnqab. Ariya tulaŋ nami Qotei na tamo naŋgi di peginjrqa bati atsiqa naŋgi qa endegsi marej, “E na tamo naŋgi di padaltnjrougetqai.” Od, tamo naŋgi di bole padalqab. Qotei a naŋgo padalqa bati qa tariŋeqnu.

Jut 1:16

Tamo naŋgi di gaigai are ugeinjreqnaqa laŋa laŋa tamo naŋgo jejamuq di anjam qameleŋeqnub. Osib naŋgo segi areqalo uge uge dauryeqnub. Naŋgi naŋgo medabu waqtoqnsib diqoqnsib naŋgo segi ñam soqteqnub. Osib tamo uŋgasari naŋgo ñam dego laŋa soqtetnjroqnsib naŋgi walawala-injreqnub. Yim naŋgi na naŋgo areqalo dauryqajqa deqa.

Uli Anjam 13:1

Onaqa e olo ŋam atsimqa wagme juwaŋ bei yuwalq dena brantonaq unem. Aqa gate 7-pela ti aqa qala 10-pela ti soqnej. Aqa qalaq di gate tatal 10-pela soqneb. Gate tatal di mandor kokba naŋgi na ateqnub deqaji bul. Aqa gateq di ñam qudei neŋgreŋyonab soqnej. Ñam di Qotei misiliŋyo qaji ñam.

Uli Anjam 16:11

Naŋgo jaqatiŋ qa ti yu uge kalil naŋgo jejamuq di bumbraŋ-yeleŋeb qaji deqa ti naŋgi tulaŋ minjiŋ oqetnjrnaqa Qotei laŋ qureq di unu qaji a misiliŋyoqneb. Naŋgo kumbra uge uge yoqneb qaji di naŋgi uratosai. Deqa naŋgo are bulyosai dego.

Uli Anjam 16:21

Bati deqa ais oŋgol kokba awa bul aieleŋej. Ais oŋgol di tulaŋ kokba. Ais oŋgol segi segi naŋgo gulube 50 kilogram. Ais di laŋ goge dena tamo naŋgo jejamuq aisiqa naŋgi tulaŋ ugeugeinjrej. Qotei na ais di qariŋyej deqa tamo naŋgi minjiŋ oqetnjrnaqa Qotei misiliŋyoqneb.

Uli Anjam 16:9

Seŋ aqa ŋamyuo di tulaŋ kaŋkaŋosiq tamo naŋgo jejamu koitetnjrej. Deqa naŋgi Qotei aqa ñam misiliŋyoqneb. Qotei a na gulube di qariŋyej deqa naŋgi aqa ñam misiliŋyoqnsib aqa ñam soqtqa urateb. Uratosib naŋgo are bulyosai.