2 Timoti 3:10 - Yesus Aqa Anjam Bole

¹⁰ Ariya Timoti, ni nami e ombla soqnem deqa ijo anjam kalil e na tamo uŋgasari naŋgi minjre minjre laqnem qaji di ni qalie. Ijo walwel ti ijo kumbra ti di ni qalie. E Qotei qa ijo areqalo siŋgilatoqnsim ijo are miligi dego gaigai siŋgilatoqnsim waukobaoqnsim tamo uŋgasari naŋgi qalaqalainjroqnsim siŋgila na tigeloqnsim gulube qoboiyeqnum di dego ni qalie.

2 Timoti 3:10 ပူးပေါင်းရင်းမြစ်များ

Luk 1:3

Deqa e dego anjam di neŋgreŋyosiy ni qa qariŋyqa are qalem. Are qalsimqa anjam aqa utru geregere qalieqajqa deqa nenemosim laqnem. Nenemosim laqnsimqa anjam aqa utru geregere qalieosim neŋgreŋyosim agi ni qa qariŋyonum.

Aposel 11:23

Aisiqa Qotei a naŋgi qa dego are boleiyoqnsiqa aqaryainjroqnej di unej. Unsiqa tulaŋ areboleboleiyej. Deqa a na naŋgi kalil are siŋgilatetnjroqnsiqa minjroqnej, “Niŋgi Tamo Koba Yesus gaigai dauryoqnsib soqniye.”

Aposel 2:42

Tamo uŋgasari Yesus qa naŋgo areqalo siŋgilateb qaji naŋgi bati gaigai Yesus aqa aŋgro 12-pela naŋgo anjam quoqnsib dauryoqneb. Naŋgi bati gaigai are qujaitoqnsib bem gentosib uyoqnsibqa Qotei pailyosib soqneb.

Aposel 26:4

“Juda tamo kokba kalil naŋgi ijo kumbra qa qalie unub. E aŋgro wala qa sosimqa e Judia sawaq dia kumbra kie yoqnem di naŋgi qalie. Bunuqna e Jerusalem qureq gilsim dia e kumbra kie yoqnem di dego naŋgi qalie.

Rom 16:17

O was qu, nuŋgo ambleq di tamo qudei naŋgi Qotei aqa anjam niŋgi nami qusib dauryeb qaji di gotraŋyoqnsib olo bulbulyoqnsib naŋgo kumbra dena naŋgi na Kristen tamo uŋgasari naŋgi potoaiyeltnjroqnsib uneq breinjreqnub. Deqa e niŋgi siŋgila na endegsi merŋgwai. Niŋgi tamo deqaji naŋgi qa geregere ŋam atoqniye. Osib naŋgi qoreinjroqniye.

2 Korin 1:17

Ariya niŋgi kiersib are qaleqnub? Niŋgi endegsib are qaleqnub kio, “Pol aqa anjam di a dauryosai deqa a na iga gisaŋgej. A mandam tamo naŋgo kumbra dauryosiq deqa a anjam bei maroqnsiq olo urateqnu. A laŋa odoqnsiqa olo saideqnu.” O was qu, niŋgi e qa degsib are qalaib.

Efesus 4:14

Deqa iga olo aŋgro kiñilala bul sqasai. Tamo qudei naŋgi gisaŋ kumbra ti maqu kumbra ti tulaŋ qalieosib yeqnub. Deqa naŋgi gisaŋ anjam koba marsib laqnub. Jagwa na yuwal tigelteqnaqa oqe aieqnu dego kere anjam dena tamo qudei naŋgo areqalo niñaqyetnjreqnu. Ariya iga aŋgro kiñilala bul sqasai deqa anjam dena gago areqalo niñaqyetgwasai.

Filipai 2:20

Timoti a gaigai niŋgi qa are qaloqnsiq deqa a na niŋgi aqaryaiŋgwajqa gam ŋameqnu. Tamo deqaji bei endi sosai. Aqo Timoti wo segi niŋgi qa are qaleqnum.

Filipai 2:22

Timoti aqa kumbra tulaŋ boledamu di niŋgi qalie. Niŋgi qalie, a na e aqaryaiboqnsiqa Yesus aqa anjam bole mare mare laqnu. Aŋgro naŋgi na naŋgo abu naŋgi aqaryainjreqnub dego kere Timoti a na e aqaryaibeqnu.

1 Tesalonaika 1:5

Iga nami Kristus aqa anjam bole nuŋgoq osi bem. Iga laŋa anjam maro na osi bosai. Iga Qotei aqa siŋgila na ti aqa Mondor Bole aqa kumbra na ti osi bem. Bati deqa iga gago areqalo Kristus qa siŋgilatonamqa niŋgi di uneb. Iga nuŋgo ambleq di sosimqa niŋgi aqaryaiŋgoqnem. Gago kumbra di niŋgi segi qalie.

1 Timoti 1:3

E Masedonia sawaq gilqa osimqa ni endegsi mermem, “Ni Efesus qureq di soqne.” Ariya bini e anjam di olo pulutsiy ni mermqai. Ni Efesus qureq di ololo soqne. Qure dia tamo qudei naŋgi Qotei aqa anjam marqa oqnsib gisaŋ anjam bei ti turtoqnsib tamo uŋgasari naŋgi minjreqnub. Deqa ni Efesus qureq di sosimqa tamo naŋgi di siŋgila na endegsi minjre, “Niŋgi gisaŋ anjam di tamo uŋgasari naŋgi minjraib.”

1 Timoti 4:6

O Timoti, ijo anjam di ni na Kristen was qu naŋgi olo minjroqne. Ni minjroqnqam di ni Kristus Yesus aqa wau tamo boledamu sqam. Deqa anjam bole ni ino areqaloq di siŋgilatejunum qaji dena ti powo bole ni osim dauryeqnum qaji dena ti ni olo torei siŋgilatmesqas.

1 Timoti 6:11

Ariya Timoti, ni Qotei aqa tamo deqa ni kumbra uge kalil deqaji torei qoreiyosim taqat ate. Osim ni kumbra tiŋtiŋ yoqnsim Qotei aqa kumbra dauryoqnsim a qa ino areqalo siŋgilatoqnsim tamo naŋgi qalaqalainjroqne. Osim ni gulube kalil qa siŋgila na tigeloqnsim tamo uŋgasari naŋgi lawo kumbra enjroqne.

2 Timoti 2:22

Deqa areqalo uge uge kalil aŋgro wala naŋgo are miligiq dena branteqnu qaji di ni na qoreiye. Osim ni kumbra tiŋtiŋ yqajqa wauoqnsim Qotei qa ino areqalo siŋgilatoqnsim tamo kalil naŋgi qalaqalainjroqnsim are lawo na soqne. Ni ti tamo kalil are bole na Tamo Koba Qotei qa louoqnsib aqa ñam na pailyeqnub qaji naŋgi ti kumbra di yoqniye.

2 Timoti 4:2

Deqa ni Kristus aqa anjam palontqajqa siŋgilaoqne. Yimqa tamo qudei naŋgi ino anjam quqwa arearetnjroqnqas. Ariya tamo qudei naŋgi ino anjam quqwa asginjroqnqas. Di uŋgum. Ni gaigai Kristus aqa anjam naŋgi siŋgila na minjroqne. Osim anjam dena naŋgo are qametnjroqnsim naŋgo areqalo tigeltetnjroqne. Yim naŋgi are bulyoqnsib Qotei aqa kumbra dauryoqnqab. Deqa ni gaigai kumbra lawo na naŋgi gereinjroqnsim Qotei aqa kumbra naŋgi osornjroqne.

2 Timoti 4:3

Ni que. Bunuqna tamo gargekoba naŋgi Qotei aqa anjam quqwa asginjroqnimqa naŋgi anjam utru bei bei quqwajqa are prugnjroqnim naŋgo segi areqalo na tamo qudei naŋgi metnjroqnib bosib gisaŋ anjam minjroqnib qusib arearetnjroqnqas.

2 Timoti 4:7

Tamo naŋgi gurguroqnsib bubuŋeqnub dego kere e nami siŋgila na ururosim Kristus dauryoqnem agi e degsi unum. Ariya bini e ijo wau kobotonum. E Qotei qa ijo areqalo siŋgilatoqnem di e uratosai-oqnem. Agi bini e siŋgila na ojejunum.

Taitus 2:7

O Taitus, ni kumbra bei yqa osimqa kumbra bole segi yoqne. Yimqa aŋgro meli naŋgi ino kumbra di unsib dauryoqnqab. Ariya ni gisaŋ anjam maroqnaim. Ni anjam palontqa osimqa anjam bole segi palontoqne. Alaŋ anjam koba maroqnaim. Diqaim. Gaigai kumbra bole segi yoqnsim anjam bole palontoqne.

Hibru 13:9

Deqa tamo qudei naŋgi bosib anjam utru segi segi na nuŋgo are tigeltetŋgibqa niŋgi naŋgo anjam di dauryaib. Osib Qotei aqa gam urataib. Qotei a iga qa are tulaŋ boleiyeqnu anjam dena iga gago are siŋgilatoqnqom. Tamo qudei naŋgo iŋgi uyo qa anjam mareqnub. Anjam di gisaŋ. Anjam di laŋa jejamu qa anjam. Deqa anjam dena iga gago are siŋgilatqa keresai. Tamo uŋgasari naŋgi iŋgi uyo qa anjam di dauryeqnub ariya kumbra dena naŋgi yala aqaryainjrosaieqnu.

2 Pita 3:11

Ariya niŋgi are qaliye. Iŋgi iŋgi kalil degsi koboqas deqa niŋgi kumbra kie dauryqajqa merŋgwai? Niŋgi kumbra endegyiye. Niŋgi nuŋgo segi jejamu Qotei yekritosib aqa segi kumbra boleq di sosib dauryoqniye.