2 Timoti 2:9 - Yesus Aqa Anjam Bole

⁹ E anjam bole di mareqnum deqa jeu tamo naŋgi na e tamo uge bul nuboqnsib e gulube koba ebeqnub. Deqa naŋgi na e ojsib tonto talq endia waibeb unum. Ariya naŋgi Qotei aqa anjam getentqa keresai.

2 Timoti 2:9 ပူးပေါင်းရင်းမြစ်များ

Luk 23:32

Ariya qaja tamo naŋgi na Yesus osi giloqnsibqa bajiŋ tamo aiyel naŋgi dego ŋamburbasq di ñumib moreŋqajqa deqa koba na joqsib giloqneb.

Aposel 21:33

Onaqa qaja tamo naŋgo gate koba a bosiqa Pol ojsiqa aqa qaja tamo naŋgi minjrej, “Sil siŋgila kokba aiyel osi bosib a tontiye.” Onaqa naŋgi bosib Pol tontonabqa qaja tamo naŋgo gate koba a na tamo uŋgasari kalil naŋgi endegsi nenemnjrej, “Tamo endi yai? A une kie yqo deqa niŋgi a qaloqnab?”

Aposel 28:31

Qotei a tamo uŋgasari naŋgo Mandor Koba sosiq naŋgi taqatnjreqnu anjam di aqa utru Pol na plaltoqnsiqa naŋgi sainjroqnej. Tamo Koba Yesus Kristus qa dego anjam plaltosiq sainjroqnej. Pol a anjam deqaji marqajqa ulaosaioqnej. A anjam deqaji mareqnaqa tamo bei na saidyosaioqnej.

Aposel 9:16

A ijo ñam qa gulube gargekoba itoqnqas. Gulube di e na osoryoqnitqa itoqnqas.”

Efesus 3:1

Qotei na niŋgi kumbra tulaŋ boledamu eŋgej anjam di e marsim laqnem deqa jeu tamo naŋgi na e ojsib tonto talq endia ateb unum. E Pol. E na niŋgi sawa bei bei qaji tamo niŋgi aqaryaiŋgwa osim deqa Kristus Yesus aqa wau di ojeqnum. Utru deqa e tonto talq endi unum.

Filipai 1:17

Ariya tamo qudei naŋgi naŋgo segi ñam soqtqajqa deqa are qaloqnsib Kristus aqa anjam mare mare laqnub. Naŋgi tamo aqaryainjrqajqa deqa are qalosaieqnub. E tonto talq endi soqnit naŋgi ijo are olo ugetetbqajqa deqa are qaloqnsib anjam mare mare laqnub.

Filipai 1:7

Niŋgi ijo are miligiq di unub deqa e kere niŋgi qa degsim are qaleqnum. E tonto talq endi sqai kio e Kristus aqa anjam bole siŋgilatoqnsiy laqnqai kio di uŋgum. Qotei a e qa are tulaŋ boleiyosiq wau ebej deqa niŋgi kalil e beterbosib e ti koba na Qotei aqa wau ojeqnum.

Kolosi 4:18

E Pol. Ijo anjam bosiq endi koboqo. Deqa e ijo segi baŋ na kaiye anjam endi neŋgreŋyosim niŋgi qa qariŋyonum. E tonto talq endi unum deqa niŋgi e uratbaib. Niŋgi e qa are qalsib soqniye. O was qu, Qotei a niŋgi qa are boleiyeme.

Kolosi 4:3

Niŋgi iga qa dego Qotei pailyoqniye. Niŋgi endegsib pailyoqniye, “O Abu, ni na Pol aqa wau qujai naŋgi ti gam waqtetnjroqnimqa naŋgi medabu waqtoqnsib Kristus aqa anjam nami uliesoqnej qaji di marsib laqnqab.” O was qu, jeu tamo naŋgi Kristus aqa anjam di quqwa asginjreqnu deqa naŋgi e ojsib tonto talq endia waibeb unum.

1 Tesalonaika 1:8

Agi niŋgi Tamo Koba Kristus aqa anjam marsib laqnab anjam di gilsiq Masedonia sawa ti Akaia sawa ti dia brantej. Sawa dia segi sai. Sawa sawa kalilq dia dego niŋgi Qotei qa nuŋgo areqalo siŋgilateqnub anjam di tamo uŋgasari naŋgi quekriteb. Deqa uŋgum, iga olo aitentosim naŋgi minjrqasai.

2 Tesalonaika 3:1

Ariya was qu, gago anjam qujai bei unu. Anjam agiende. Niŋgi iga qa Qotei pailyoqniye. Yimqa Qotei na iga aqaryaigimqa iga Tamo Koba Yesus aqa anjam geregere mare mare laqnqom. Yimqa aqa anjam di tulaŋ kobaosim sawa sawa kalil keretoqnimqa tamo tulaŋ gargekoba naŋgi quoqnsib Yesus aqa ñam soqtoqnqab. Nami Yesus aqa anjam nuŋgo ambleq di tulaŋ kobaej dego kere.

2 Timoti 1:12

Deqa uŋgum, e gulube oqnsiy sqai. E deqa jemaibqasai. E Yesus qa ijo areqalo siŋgilateqnum deqa e a qa bole qalieonum. A segi na wau endi ijo baŋq di atej deqa e qalieonum, a na wau di geregere taqatoqnqas. Taqatsim gilsim a olo bqajqa bati brantqas.

2 Timoti 1:16

E endegsi Qotei pailyeqnum, “O Tamo Koba, ni Onesiforus aqa tal qujai naŋgi qa ti dulame.” O Timoti, Onesiforus a bati gargekoba ijo are boletetboqnej. E tonto talq di soqnem bati deqa a e qa jemaiyosai.

2 Timoti 1:8

Deqa ni gago Tamo Koba Yesus aqa anjam marsim laqajqa jemaimaiq. E segi Yesus aqa anjam marsim laqnem deqa jeu tamo naŋgi na e ojsib tonto talq endia e waibeb unum. Deqa ni e qa dego jemaimaiq. Ni Qotei aqa siŋgila osim Yesus aqa anjam bole marsim laqne. Osim dena ni e ombla gulube oqnsim sqom.

2 Timoti 2:3

Ni Kristus Yesus aqa qoto tamo bulosim aqo ombla gulube qoboiyesqom.

2 Timoti 4:17

Ariya Tamo Koba Yesus a segi na e taqbosiqa siŋgila ebej. Deqa e anjam pegiyo tamo aqa ulatamuq dia tigelosimqa Yesus aqa anjam bole mareqnamqa sawa bei bei qaji tamo naŋgi quoqneb. Qotei na e aqaryaibosiqa bauŋ juwaŋ naŋgo medabuq dena e osiq taqal waibej.

1 Pita 2:12

Bini niŋgi sawa bei bei qaji tamo naŋgo ambleq di sosib deqa niŋgi naŋgo ŋamgalaq dia kumbra bole bole dauryoqniye. Yimqa mondoŋ tamo uŋgasari peginjrqa batiamqa naŋgi nuŋgo kumbra bole di unsibqa naŋgo yomu anjam niŋgi qa maroqneb qaji di uratosib Qotei aqa ñam soqtoqnqab.

1 Pita 2:14

Osib gate kokba naŋgo anjam dego niŋgi dauryoqniye. Gate kokba naŋgi agi mandor kokba naŋgi na wau enjreqnab giloqnsib tamo naŋgi kumbra uge uge yeqnub qaji naŋgi kamba awai uge enjreqnub. Osib tamo naŋgi kumbra bole bole yeqnub qaji naŋgo ñam olo soqtetnjreqnub.

1 Pita 3:16

Ariya niŋgi anjam siŋgila na minjraib. Niŋgi lawo kumbra na ti kumbra bole na ti naŋgi anjam minjroqniye. Osib niŋgi gaigai Qotei aqa ŋamgalaq di une saiqoji soqniye. Bole, niŋgi Kristus dauryoqnib jeu tamo naŋgi nuŋgo kumbra bole di unsib deqa niŋgi anjam uge merŋgoqnsib misiliŋgoqnqab. Ariya bunuqna naŋgi naŋgo anjam deqa olo jemainjrqas.

1 Pita 4:15

Niŋgi geregere ŋam atsib soqniye. Niŋgi tamo ñumibqa kio bajiŋibqa kio kumbra uge yibqa kio tamo bei aqa wau ugetibqa kio tamo qudei naŋgi na nuŋgo kumbra di unsib deqa jaqatiŋ eŋgwab di uge. Niŋgi degyaib.