2 Timoti 2:24 - Yesus Aqa Anjam Bole

²⁴ Ni na Tamo Koba Qotei aqa wau tamo naŋgi minjrimqa naŋgi anjam na qotoqnsib ŋiriŋoqnaib. Naŋgi na tamo kalil naŋgi kumbra bole enjroqnebe. Tamo qudei naŋgi na bosib naŋgi gulube enjribqa naŋgi deqa ŋiriŋaib. Naŋgi kamba olo Qotei aqa kumbra bole naŋgi osornjroqnebe.

2 Timoti 2:24 ပူးပေါင်းရင်းမြစ်များ

Matyu 12:19

A ŋiriŋ anjam maroqnqasai. A leleŋkobaoqnqasai. Gamq dia tamo uŋgasari naŋgi aqa kakoro quoqnqasai.

Jon 6:52

Onaqa Juda naŋgi Yesus aqa anjam di qusib segi segi ŋiriŋosib maroqneb, “Tamo di a kiersimqa aqa segi jejamu iga anaigim uyqom?”

Aposel 15:2

Degsi minjrnabqa Pol wo Barnabas wo naŋgi qusibqa ŋiriŋkobaosib naŋgi ti anjam na qotoqneb. Onaqa Kristen tamo uŋgasari naŋgi di qusibqa naŋgi koroosib anjam endegsib kereteb, “Iga na Pol wo Barnabas wo Yesus aqa tamo qudei ti naŋgi qariŋnjrim Jerusalem qureq aisib dia Yesus aqa aŋgro 12-pela naŋgi ti Kristen gate ti koba na koroosib anjam di gereiyqab.”

Aposel 23:9

Deqa naŋgi poeleŋosib ŋiriŋosib murqumyoqneb. Onaqa Farisi naŋgo dal anjam qalie tamo qudei naŋgi tigelosib siŋgila na mareb, “Iga Pol aqa anjam quonum di a une saiqoji. Mondor bei na kio laŋ aŋgro bei na kio anjam minjonubqa a degsi marqo.”

Aposel 7:26

Nebeonaqa Moses a olo walwelosi gilsiq Israel tamo aiyel qoteqnab unjrsiqa naŋgi aiyel potnjrsiq minjrej, ‘Niŋgi aiyel was wo. Kiyaqa niŋgi qoteqnub?’

2 Korin 10:1

Tamo qudei naŋgi e qa yomuosib endegsib mareqnub, “Pol a iga koba na sosiqa a aqa segi ñam aguq atoqnsiqa laesoqnej. Ariya a sawa isaq di sosiqa a anjam siŋgila na neŋgreŋyosiq iga qa ŋiriŋeqnu.” Tamo qudei naŋgi e qa degsib yomueqnub. Ariya niŋgi mati Kristus aqa kumbra qa are qaliye. A aqa segi ñam aguq atoqnsiqa tamo uŋgasari naŋgi lawo kumbra osornjroqnej. Deqa niŋgi ijo anjam endeqa geregere are qaliye.

2 Korin 10:4

Qotei a qoto qa iŋgi iŋgi egej di mandam qaji iŋgi iŋgi sai. Iŋgi iŋgi di Qotei aqa siŋgila ti unu. Iga dena qotoqnsim gago jeu tamo naŋgo siŋgila gotraŋyeqnum.

2 Korin 6:4

Iga Qotei aqa wau tamo deqa iga gaigai tamo uŋgasari kalil naŋgo ŋamgalaq di kumbra bole yeqnum. Gulube bei bei gagoq di branteqnaqa iga siŋgila na tigeloqnsim gulube di qoboiyeqnum. Tamo qudei naŋgi na iga ugeugeigeqnab iga naŋgi qa ulaosaieqnum. Une bei bei na iga padaltgwa laqnaqa iga na olo gotraŋyeqnum.

Galesia 5:22

Ariya Qotei aqa Mondor na iga kumbra bole endeqaji yqajqa are tigeltetgeqnu. Qalaqalaiyo kumbra dauryoqa, areboleboleiyoqa, lawo kumbra yoqa, was naŋgi aqaryainjroqnsim kumbra bole bole enjroqa, kumbra bole tiŋtiŋ dauryoqa,

Efesus 4:2

Osib niŋgi Kristen tamo uŋgasari naŋgo sorgomq di geregere sosibqa naŋgi lawo kumbra enjroqniye. Naŋgi niŋgi une bei eŋgibqa niŋgi kamba olo naŋgi qa urur minjiŋ oqaiq. Niŋgi olo naŋgi qalaqalainjroqnsib gulube naŋgi na niŋgi eŋgeqnub qaji di qoboiyetnjroqniye.

Filipai 2:14

Ariya kumbra kalil niŋgi yeqnub qaji di niŋgi lawo na sosib yoqniye. Niŋgi anjam laŋa laŋa maroqnsib anjam na qotoqnaib. Niŋgi kumbra bole yoqniye.

Filipai 2:3

Niŋgi nuŋgo segi jejamu qa are qalaib. Niŋgi nuŋgo segi ñam soqtqa are qalsib wauaib. Niŋgi nuŋgo segi ñam aguq atoqnsib endegsib are qaloqniye, “Ijo Kristen was qudei naŋgo kumbra tulaŋ boledamu. Naŋgo kumbra dena ijo kumbra buŋyejunu.”

Kolosi 3:13

Kristen tamo bei na niŋgi gulube eŋgimqa uŋgum gulube di qoboiyosib aqa une kobotetiye. Tamo Koba Kristus a na nuŋgo une kobotetŋgej deqa niŋgi dego degyiye.

1 Tesalonaika 2:7

Bole, iga Kristus aqa wau tamo deqa iga na niŋgi endegsi merŋgwa kere, “Niŋgi na silali iŋgi iŋgi qa iga aqaryaigiye.” Ariya iga degosai. Iga niŋgi koba na aŋgro kiñilala bul lawo soqnem. Ai naŋgi na naŋgo aŋgro mom naŋgi muŋgum anainjreqnub dego kere iga nuŋgo ai bul sosim niŋgi geregereiŋgoqnem.

1 Timoti 6:11

Ariya Timoti, ni Qotei aqa tamo deqa ni kumbra uge kalil deqaji torei qoreiyosim taqat ate. Osim ni kumbra tiŋtiŋ yoqnsim Qotei aqa kumbra dauryoqnsim a qa ino areqalo siŋgilatoqnsim tamo naŋgi qalaqalainjroqne. Osim ni gulube kalil qa siŋgila na tigeloqnsim tamo uŋgasari naŋgi lawo kumbra enjroqne.

Taitus 1:1

E Pol. E Qotei aqa wau tamo. Yesus Kristus na e qariŋbej deqa e aqa anjam marsim laqnum. Tamo uŋgasari Qotei na aqa segi qa giltnjrej qaji naŋgi aqa anjam minjroqnitqa naŋgi Yesus qa naŋgo areqalo siŋgilatqajqa deqa qariŋbej. E na naŋgi aqaryainjritqa naŋgi Qotei aqa anjam qalie boleosib aqa kumbra dauryosib sqajqa deqa ti qariŋbej. Qotei aqa anjam di gisaŋ sai. Di anjam bole.

Taitus 1:7

Ni qalie, Kristen naŋgo gate naŋgi Qotei aqa wau taqateqnub. Deqa ni tamo bei a gate atqa osimqa ni aqa kumbra endeqaji unsim ate. A tamo uŋgasari naŋgo ŋamgalaq di une saiqoji unu. A aqa segi ñam soqtosiq tamo uŋgasari naŋgi siŋgila na taqatnjro-saieqnu di ni unsim a gate ate. A urur minjiŋ oqetosaieqnu. A ya uysiq nanariosaieqnu. A qoto ani tamo sai. A silali koba oqnqajqa tulaŋ arearetosaieqnu.

Taitus 1:9

A Yesus aqa anjam bole iga na palonteqnum qaji di siŋgila na ojeqnu di ni unsim a gate ate. Atimqa a wau di ojsim a na kamba anjam bole kalil di palontoqnsim dena tamo uŋgasari naŋgo are tigeltetnjroqnim naŋgi dauryoqnqab. Tamo qudei naŋgi Yesus aqa anjam di gotraŋyoqnib a siŋgila na naŋgi minjroqnim naŋgi naŋgo segi une qa poinjroqnqas.

Taitus 3:2

Niŋgi tamo qudei naŋgi misiliŋ anjam minjroqnaib. Osib anjam na qotoqnaib. Gaigai lawo na sosib tamo uŋgasari kalil naŋgi kumbra bole enjroqniye.” O Taitus, ni na tamo uŋgasari naŋgi anjam degsim minjroqne.

Jems 1:1

E Jems. E Qotei wo Tamo Koba Yesus Kristus wo naŋgo wau tamo. Niŋgi Israel naŋgo moma utru 12-pela naŋgo leŋ deqaji. Niŋgi nuŋgo segi segi qure utru uratosib jaraiosib sawa sawa kalil keretosib di unub. Deqa e na anjam endi neŋgreŋyosim niŋgi qa qariŋyonum. O was niŋgi kaiye.

Jems 3:17

Ariya tamo naŋgi Qotei aqaq dena areqalo bole ti powo ti eqnub qaji naŋgi kumbra tulaŋ boledamu yeqnub. Naŋgi kumbra jigat dauryosaieqnub. Naŋgi lawo na sosib tamo naŋgi jiŋga na gereinjroqnsib naŋgi qa duloqnsib kumbra bole bole enjreqnub. Naŋgi na tamo kalil naŋgi turtnjroqnsib kumbra qujai enjreqnub. Naŋgi gisaŋoqnsib laŋa babaŋ na kumbra bole dauryosaieqnub. Naŋgi bole dauryeqnub.

Jems 4:2

Niŋgi iŋgi iŋgi koba oqajqa tulaŋ arearetŋgeqnu. Ariya niŋgi iŋgi di osaieqnub. Deqa niŋgi tamo ñumeqnub. Niŋgi iŋgi iŋgi oqajqa mamaulŋgeqnu. Ariya niŋgi osaieqnub. Deqa niŋgi ŋiriŋko-baoqnsib qoto tigelteqnub. Niŋgi iŋgi iŋgi qa Qotei pailyo-saieqnub. Utru deqa niŋgi osaieqnub.

1 Pita 3:8

Ariya e na ijo anjam endi kobotqa osiy niŋgi endegsi merŋgwai. Niŋgi kalil koba na geregere are qujaitosib soqniye. Sosibqa tamo kalil naŋgi qa duloqnsib Qotei aqa tamo uŋgasari naŋgi dego qalaqalainjroqnsib naŋgi qa are boleiŋgoqneme. Osib nuŋgo segi ñam aguq atoqniye.

Jut 1:3

O ijo was bole, Qotei na iga kalil padalo sawaq dena eleŋej wau di aqa utru e na neŋgreŋyosiy niŋgi qa qariŋyqajqa are koba unu. Ariya e anjam bei dego neŋgreŋyosiy niŋgi qa qariŋyqa are qaleqnum. Anjam agiende. Jeu tamo naŋgi bosib Kristus aqa anjam bole ugeugeiyqa laqnib nuŋgo areqalo Kristus qa siŋgilateqnub qaji di niŋgi olo siŋgila na ojsibqa jeu tamo naŋgi di gotraŋnjroqniye. Iga Qotei aqa tamo uŋgasari unum deqa Qotei na gago areqalo tigeltetgonaqa iga Kristus aqa anjam bole gago areqaloq di siŋgilatejunum. Deqa tamo bei na anjam di olo bulyqa keresai.