2 Timoti 2:18 - Yesus Aqa Anjam Bole

¹⁸ Naŋgi aiyel anjam bole qa gam uratosib gisaŋ anjam endegsib mareqnub, “Tamo uŋgasari kalil naŋgi nami subq na tigeleb koboqo. Deqa iga olo bunuqna subq na tigelqasai.” Naŋgo gisaŋ anjam dena naŋgi na tamo uŋgasari qudei nami Yesus qa naŋgo areqalo siŋgilateb qaji naŋgo areqalo olo ugetetnjreqnub.

2 Timoti 2:18 ပူးပေါင်းရင်းမြစ်များ

Matyu 15:13

Onaqa Yesus na minjrej, “Ijo Abu laŋ qureq di unu qaji a iŋgi wau ejunu. Ŋam kalil a yagosai qaji di a na jirim qoji otorosim taqal breinjrqas.

Matyu 22:29

Onaqa Yesus na minjrej, “Qotei aqa anjam nami neŋgreŋyeb qaji di aqa damu niŋgi poiŋgosai. Qotei aqa siŋgila dego niŋgi poiŋgosai. Deqa niŋgi anjam grotonub. Grotosib agi nenembonub.

Luk 8:13

Saga yago qudei mandam lanjaq di aieb qaji di aqa utru endegsi unu. Tamo qudei naŋgi Qotei aqa anjam qusib tulaŋ areboleboleinjrimqa anjam di oqujatosib naŋgo areq atqab. Ariya naŋgi bati truquyala Qotei qa naŋgo areqalo siŋgilatibqa bunuqna une bei bei naŋgoq bamqa naŋgi Qotei olo uratosib uloŋqab. Di kiyaqa? Naŋgi Qotei aqa anjam naŋgo are miligiq di unu qaji di siŋgila na ojosai deqa.

Aposel 5:39

Ariya naŋgi Qotei aqa areqalo na wauqab di niŋgi na naŋgi kobotnjrqa keresai. Niŋgi naŋgi ñumqab di niŋgi Qotei ti qotqab.” Gamaliel a na Juda tamo kokba naŋgi anjam degsi minjrnaqa naŋgi aqa anjam di qusib dauryosib Yesus aqa aŋgro 12-pela naŋgi ñumqa urateb.

1 Korin 11:19

Di kiyaqa? E endegsi are qalonum. Niŋgi pupoabqa dena niŋgi poiŋgwas, nuŋgo ambleq di tamo yai naŋgi Qotei aqa kumbra bole tiŋtiŋ dauryeqnub.

1 Korin 15:12

Kristus a moinaqa Qotei na olo subq na tigeltej anjam di iga gaigai palontosim laqnum. Ariya kiyaqa niŋgi qudei mareqnub, “Tamo moreŋeb qaji naŋgi olo subq na tigelqasai”?

Kolosi 3:1

O was qu, Qotei a niŋgi Kristus koba na subq na tigeltŋgej. Deqa niŋgi laŋ goge qaji iŋgi iŋgi oqajqa deqa wauoqniye. Kristus agi laŋ goge oqsiq Qotei aqa baŋ woq di awejunu.

1 Timoti 1:19

Gotraŋysimqa ino areqalo Yesus qa bole siŋgilat. Osim Qotei aqa ŋamgalaq di ni une saiqoji soqne. Tamo qudei naŋgi segi qalie, naŋgi une yeqnub. Ariya Qotei na naŋgo kumbra tingitetnjrqa laqnaq naŋgi olo urateqnub. Deqa naŋgi Yesus qa naŋgo areqalo siŋgilatqa asginjreqnaqa qobuŋ a sargumq di paraqas dego kere naŋgi areqalo uge ugeiysib laqnub. Kumbra dena naŋgi tulaŋ ugetnjrqas.

1 Timoti 6:10

Tamo deqaji naŋgi silali koba oqajqa tulaŋ arearetnjreqnu. Naŋgo kumbra di agi kumbra uge uge kalil naŋgo utru. Kumbra dena tamo qudei naŋgi titnjreqnaqa naŋgi Yesus qa naŋgo areqalo siŋgilatqa uratoqnsib gulube gargekoba iteqnub.

1 Timoti 6:21

Naŋgi mareqnub, “Iga powo ti unum.” Di sai. Naŋgi Kristus qoreiyoqnsib a qa naŋgo areqalo siŋgilatqa urateqnub. O was qu, Qotei a niŋgi kalil qa are boleiyeme.

2 Timoti 2:14

O Timoti, ni na gaigai tamo uŋgasari naŋgo areqalo tigeltetnjroqnimqa naŋgi anjam deqa are qaloqnqab. Ni Qotei aqa ŋamgalaq di naŋgi endegsi minjroqne, “Niŋgi anjam kiñilala qudei qa laŋa laŋa ŋiriŋoqnsib ñam qudei qa anjam na qotoqnaib. Nuŋgo anjam dena tamo naŋgi aqaryainjrqa keresai. Anjam di tamo naŋgi quoqnsib dena naŋgo areqalo ugetetnjreqnu.” O Timoti, ni na naŋgi degsi minjroqne.

Taitus 1:11

Tamo naŋgi di tamo uŋgasari naŋgo silali ti ñoro ti yainjrqajqa deqa marsib kumbra uge uge iga yqa keresai qaji di naŋgi yqajqa minjreqnub. Kumbra dena naŋgi na tamo uŋgasari qudei naŋgo aŋgro ti naŋgo was naŋgi ti areqalo ugetetnjreqnabqa naŋgi Qotei aqa gam bole olo urateqnub. Deqa Taitus, ni na tamo uge uge deqaji naŋgo medabu getentsim saidnjre.

Hibru 3:10

Deqa e naŋgi qa minjiŋ oqnaqa marem, ‘Naŋgo are miligi na e daurbosaieqnub. Naŋgi gaigai ijo gam bole urateqnub.’

Jems 5:19

O ijo was qu, nuŋgo ambleq di was bei a Qotei aqa anjam bole dauryqa uratimqa tamo bei na olo Qotei aqa anjam minjimqa a are bulyqas di tamo dena kumbra boledamu yqo. Niŋgi ijo anjam deqa geregere are qaliye. Tamo bei a une ti soqnimqa was bei na gilsim aqaryaiyimqa a gam uge di uratosim olo Qotei aqa areq bqas di was dena aqa qunuŋ moio sawaq dena oqo. Deqa tamo di a moiqasai. Qotei na aqa une gargekoba kobotetqas.

1 Jon 2:19

Jeu tamo naŋgi di nami gago ambleq di soqneb. Sosib olo bunuqna iga uratgosib jaraieb. Di kiyaqa? Naŋgi Kristen tamo bolesai deqa. Naŋgi Kristen tamo bole qamu naŋgi iga ti unum qamu. Ariya naŋgi iga uratgosib jaraieb deqa iga qalieonum, naŋgi Kristen tamo bolesai.