2 Timoti 1:3 - Yesus Aqa Anjam Bole

³ Ijo moma utru naŋgi nami kumbra tiŋtiŋ na Qotei aqa wau ojoqneb dego kere e bini kumbra qujai dena Qotei aqa wau ojeqnum. Ijo are miligiq di e qalieonum, e Qotei aqa ŋamgalaq di une bei saiqoji. E qolo ti qanam ti Qotei pailyoqnsim ni qa are qaloqnsim Qotei biŋiyeqnum.

2 Timoti 1:3 ပူးပေါင်းရင်းမြစ်များ

Luk 2:37

Aqa gumbuluŋ moinaqa a segi qobul soqnej. Aqa wausau kalil 84. A qobul sosiqa a bati gaigai qolo ti qanam ti atra tal miligiq giloqnsiqa iŋgi ti ya ti uratoqnsiqa Qotei pailyoqnej. A atra tal uratosaioqnej.

Aposel 22:3

“E Juda tamo. Ijo qure utru Tarsus. Tarsus a Silisia sawaq di unu. E dia ŋambabonam ijo ai wo abu wo naŋgi na e Jerusalem qureq osi bonabqa e endia tamo kobaqujaem. Kobaqujaosimqa Gamaliel aqa skul kobaq gilem. Gilsim di sonamqa a na gago moma naŋgo dal anjam kalil geregere plaltosiq osorboqnej. Deqa e Qotei aqa kumbra kalil dauryqajqa tulaŋ siŋgilaoqnem. Niŋgi bini Qotei aqa kumbra kalil dauryqajqa siŋgilaeqnub dego kere e dego dauryqajqa tulaŋ siŋgilaoqnem.

Aposel 23:1

Onaqa Pol a Juda tamo kokba naŋgi koqnjrsiqa endegsi minjrej, “O ijo was niŋgi quiye. E nami Qotei aqa ŋamgalaq dia kumbra bole bole yoqnem agi bini yoqnsim unum. Deqa e are gulube saiqoji.”

Aposel 24:14

“Ijo une qujai agiende. E Yesus aqa gam dauryeqnum. Juda tamo kokba naŋgi mareqnub, ‘Gam di bolesai. Gam dena tamo uŋgasari naŋgi ŋiriŋoqnsib poeleŋeqnub.’ Gam di qujai e dauryoqnsimqa gago moma naŋgo Qotei qa louoqnsimqa Moses aqa dal anjam ti Qotei aqa medabu o tamo naŋgo anjam nami neŋgreŋyeb qaji deqa ti ijo areqalo siŋgilatejunum.

Aposel 24:16

E subq na tigelo bati qa tariŋeqnum deqa e bati gaigai ijo segi so geregere taqatoqnsimqa Qotei aqa ŋamdamuq dia, tamo uŋgasari kalil naŋgo ŋamdamuq dia kumbra bole bole yoqnsim laqnum.

Aposel 26:4

“Juda tamo kokba kalil naŋgi ijo kumbra qa qalie unub. E aŋgro wala qa sosimqa e Judia sawaq dia kumbra kie yoqnem di naŋgi qalie. Bunuqna e Jerusalem qureq gilsim dia e kumbra kie yoqnem di dego naŋgi qalie.

Aposel 27:23

Ya qolo ijo Qotei agi e bati gaigai a qa loueqnum qaji aqa laŋ aŋgro bei bosiqa ijo areq di tigelosiq merbej, ‘O Pol, ni ulaaim. Ni Mandor Koba Sisar aqa ulatamuq di tigelqam. Deqa Qotei na ni taqatmim ni padalqasai. Tamo kalil ni ombla qobuŋ na gileqnub qaji naŋgi dego taqatnjrim naŋgi padalqasai.’ Laŋ aŋgro na e degsi merbej.

Rom 9:1

E Kristus aqa tamo deqa e niŋgi anjam bole merŋgwai. E niŋgi gisaŋ anjam merŋgwasai. Qotei aqa Mondor na e areqalo ebeqnu deqa e qalieonum, ijo anjam endi bole.

2 Korin 1:12

O was qu, e ijo kumbra bei endeqa tulaŋ areboleboleibqo. Ijo are miligiq di e qalieonum, e kumbra bole tiŋtiŋ segi dauryoqnsim yeqnum. Kumbra Qotei na osorbej qaji di segi e dauryoqnsim yeqnum. E mandam tamo naŋgoq dena powo osim kumbra di yosaieqnum. Qotei a e qa are boleiyosiq kumbra di osorbej deqa e yeqnum. Deqa e tamo uŋgasari kalil naŋgo ambleq dia kumbra di yeqnum. Agi e nuŋgo ambleq di dego nami kumbra di tulaŋ koba yoqnem.

Galesia 1:14

E ijo moma naŋgo kumbra kalil dauryqajqa tulaŋ siŋgilaoqnem. Ijo kumbra dena e na ijo kadoi naŋgi tulaŋ buŋnjroqnem. Ijo kadoi naŋgi agi Juda tamo naŋgi.

Efesus 1:16

Deqa e Qotei pailyoqnsimqa e gaigai niŋgi qa are qaloqnsim Qotei biŋiyeqnum.

1 Tesalonaika 3:10

Iga qanam ti qolo ti endegsi Qotei pailyeqnum, “O Abu, ni na iga odgimqa iga Tesalonaika Kristen naŋgi qa gilsim unjrqom. Unjrsim naŋgo areqalo Yesus qa siŋgilateqnub qaji di truquinjrimqa iga na olo siŋgilatetnjrqom.” Iga degsim Qotei pailyeqnum.

1 Timoti 1:19

Gotraŋysimqa ino areqalo Yesus qa bole siŋgilat. Osim Qotei aqa ŋamgalaq di ni une saiqoji soqne. Tamo qudei naŋgi segi qalie, naŋgi une yeqnub. Ariya Qotei na naŋgo kumbra tingitetnjrqa laqnaq naŋgi olo urateqnub. Deqa naŋgi Yesus qa naŋgo areqalo siŋgilatqa asginjreqnaqa qobuŋ a sargumq di paraqas dego kere naŋgi areqalo uge ugeiysib laqnub. Kumbra dena naŋgi tulaŋ ugetnjrqas.

1 Timoti 1:5

Ariya Qotei na iga aqa wau ojqajqa mergeqnu. Aqa wau agiende. Iga na tamo uŋgasari naŋgi Yesus aqa anjam minjroqnim naŋgi a qa naŋgo areqalo siŋgilatosib dena naŋgi Qotei aqa ŋamgalaq di une saiqoji sqab. Sosib kumbra dena naŋgo areqalo tigeltetnjroqnim naŋgi qalaqalaiyo kumbra dauryoqnqab.

1 Timoti 5:5

Ariya uŋa qobul qudei naŋgi aŋgro saiqoji unub. Naŋgi segi unub deqa naŋgi Qotei qa naŋgo areqalo siŋgilatoqnsib a na naŋgi geregereinjrqajqa deqa tariŋoqnsib qolo ti qanam ti pailyoqnsib unub.

2 Timoti 1:5

Nami ino moma Lois naŋgi ino ai Yunis wo Kristus qa naŋgo areqalo siŋgilatoqneb dego kere bini ni dego Kristus qa ino areqalo siŋgilatejunum. E deqa are qaloqnsim unum.

2 Timoti 3:15

Ni qalie, nami ni aŋgro kiñala sosim bati deqa ni Qotei aqa anjam neŋgreŋq di so qaji di qalieosim bosi bosim agi qalieosim unum. Anjam dena ni areqalo bole emej. Deqa bati di ni Kristus Yesus qa ino areqalo siŋgilatonamqa Qotei na ni padalo sawaq dena ej.

Hibru 13:8

Yesus Kristus a gaigai degsi unu. A nami soqnej, bini unu, bati gaigai degsi sqas.