2 Tesalonaika 3:6 - Yesus Aqa Anjam Bole

⁶ Ariya was qu, gago Tamo Koba Yesus Kristus aqa ñam na iga anjam bei niŋgi endegsi merŋgwom. Was qudei naŋgi gago anjam iga nami niŋgi merŋgoqnem qaji di dauryqa uratosib wauqajqa asginjreqnu. Deqa niŋgi na was naŋgi di qoreinjrsib isaq giliye. Niŋgi naŋgi koba na saib.

2 Tesalonaika 3:6 ပူးပေါင်းရင်းမြစ်များ

Matyu 18:17

Ariya a naŋgo anjam dego quetnjrosaiamqa ni na Yesus aqa tamo uŋgasari kalil naŋgi metnjrim koroosib ni taqmosib ino was aqa une di olo minjqab. Ariya a naŋgo anjam dego quetnjrosaiamqa ni na a qoreiye. Une tamo ti takis o qaji tamo ti naŋgi qoreinjreqnub dego kere ni na ino was di qoreiye.

Rom 16:17

O was qu, nuŋgo ambleq di tamo qudei naŋgi Qotei aqa anjam niŋgi nami qusib dauryeb qaji di gotraŋyoqnsib olo bulbulyoqnsib naŋgo kumbra dena naŋgi na Kristen tamo uŋgasari naŋgi potoaiyeltnjroqnsib uneq breinjreqnub. Deqa e niŋgi siŋgila na endegsi merŋgwai. Niŋgi tamo deqaji naŋgi qa geregere ŋam atoqniye. Osib naŋgi qoreinjroqniye.

1 Korin 11:2

E qalieonum, niŋgi gaigai e qa are qaloqnsib deqa anjam kalil e nami niŋgi merŋgoqnem qaji di niŋgi geregere ojsib dauryeqnub. Deqa e niŋgi qa tulaŋ areboleboleibqo.

1 Korin 5:4

Deqa e niŋgi endegsi merŋgwai. Niŋgi gago Tamo Koba Yesus aqa ñam na korooiye. Yim koroq dia e niŋgi ti sobulitqa Tamo Koba Yesus aqa siŋgila dego nuŋgoq di sqas.

1 Korin 5:9

E nami anjam endegsi neŋgreŋyosim niŋgi qa qariŋyem, “Niŋgi sambala tamo naŋgi koba na laqnaib.”

2 Korin 2:10

Ariya niŋgi na tamo di aqa une kobotetqab di e kamba dego aqa une kobotetqai. E tamo bei aqa une kobotetqai di e Kristus aqa ŋamgalaq dia kobotetqai. E niŋgi aqaryaiŋgwa osiy deqa kobotetqai.

Efesus 4:17

Deqa e Tamo Koba Yesus aqa ñam na niŋgi siŋgila na endegsi merŋgwai. Niŋgi sawa bei bei qaji tamo naŋgo kumbra uge uge olo dauryosib walwelaib. Di kiyaqa? Naŋgo areqalo tulaŋ niñaqejunu deqa.

Kolosi 3:17

Nuŋgo anjam maro na ti nuŋgo wau na ti nuŋgo kumbra kalil na ti niŋgi Tamo Koba Yesus aqa ñam na yoqniye. Osib niŋgi aqa ñam na Qotei Abu biŋiyoqniye.

1 Tesalonaika 4:1

O was qu, kumbra bole kalil Qotei a tulaŋ areareteqnu qaji di iga nami niŋgi osorŋgoqnem agi niŋgi dauryeqnub. Ariya bini iga nuŋgo are miligi siŋgilatetŋgosim Tamo Koba Yesus aqa ñam na endegsi merŋgwom. Niŋgi kumbra di olo torei siŋgilatosib yoqniye.

1 Tesalonaika 4:11

Osib lawo na sosib nuŋgo segi iŋgi iŋgi taqatosib nuŋgo segi baŋ na wauoqniye. Anjam di iga nami niŋgi merŋgoqnem.

1 Tesalonaika 5:14

O was qu, iga na nuŋgo are tigeltetŋgimqa niŋgi na tamo naŋgi wauqajqa asginjreqnu qaji naŋgo kumbra olo tingi-tetnjroqniye. Osib tamo naŋgi ulaeqnub qaji naŋgo are siŋgila-tetnjroqniye. Osib tamo siŋgila saiqoji unub qaji naŋgi olo aqaryainjroqniye. Osib tamo kalil naŋgi lawo na geregereinjroq-niye.

2 Tesalonaika 2:15

Deqa was qu, niŋgi siŋgila na tigeloqnsib Qotei aqa anjam kalil iga nami niŋgi merŋgoqnem qaji di dauryosib soqniye. Anjam kalil iga neŋgreŋyosim niŋgi qa qariŋyoqnem qaji di dego niŋgi dauryoqniye.

2 Tesalonaika 3:7

Niŋgi gago kumbra segi dauryoqnsib soqniye. Niŋgi gago kumbra qalie. Gago kumbra agiende. Iga nami niŋgi koba na sosimqa iga wauqajqa asgigosaioqnej.

1 Timoti 5:21

O Timoti, Qotei ti aqa laŋ aŋgro naŋgi ti Kristus Yesus ombla na naŋgo ŋamgalaq dia e siŋgila na anjam endegsi ni mermqai. Wau kalil e ino baŋq di atem qaji di ni geregere taqatosim wauoqne. Ni na ino was naŋgi ti tamo kokba ti naŋgi segi gereinjroqnaim. Ni tamo kalil naŋgi turtnjrsim gereinjroqnime.

1 Timoti 6:5

Osib naŋgi gaigai ŋiriŋ anjam koba mareleŋeqnub. Tamo deqaji naŋgi areqalo tulaŋ uge na laqnub. Naŋgi Qotei aqa anjam bole qaliesai bolesai. Deqa naŋgi endegsib are qaleqnub, “Iga Qotei aqa kumbra dauryqom dena iga ñoro koba ti sqom.” O Timoti, naŋgo anjam di gisaŋ.

2 Timoti 3:5

Naŋgi laŋa babaŋ na Qotei aqa kumbra dauryobulosib sqab. Qotei aqa kumbra bole di siŋgila ti unu. Ariya siŋgila di naŋgi poinjrqasai. O Timoti, ni na tamo naŋgi deqaji beternjraim. Torei uratnjrsim isaq gile.

2 Timoti 4:1

Qotei wo Kristus Yesus wo naŋgo ŋamgalaq di e ni siŋgila na endegsi mermqai. Mondoŋ Kristus Yesus a laŋ qureq dena brantosim bati deqa a na tamo uŋgasari kalil ŋambile so qaji naŋgi ti tamo uŋgasari nami moreŋeb qaji naŋgi ti naŋgo kumbra qa peginjrqas. Osim a bati gaigai naŋgo Mandor Koba sqas.

2 Jon 1:10

Tamo bei a niŋgi qa bosim ariya a Kristus aqa anjam ti bqasai di niŋgi a baŋ ojaib. Niŋgi a osib nuŋgo talq osi gilaib.