2 Tesalonaika 1:9 - Yesus Aqa Anjam Bole

⁹ Osim naŋgi awai ugedamu enjrqas. Naŋgo awai uge agiende. Naŋgi Tamo Koba Yesus a ombla sqasai. Naŋgi aqa siŋgila koba ti riaŋ ti unqasai dego. Naŋgi tulaŋ isaq di sosibqa bati gaigai padalosi sqab.

2 Tesalonaika 1:9 ပူးပေါင်းရင်းမြစ်များ

Matyu 16:27

E Tamo Aŋgro. Mondoŋ e ijo Abu aqa riaŋ ti sosiy aqa laŋ aŋgro naŋgi joqsiy bosiy tamo uŋgasari kalil naŋgo kumbra segi segi qa peginjrsiy naŋgo segi segi awai keretsiy enjrqai.

Matyu 22:13

Onaqa mandor koba a na aqa kaŋgal tamo naŋgi minjrej, ‘Tamo di siŋga ti baŋ ti tontetosib oqeq waiyibqa sawa ambruq di soqnem. Sawa dia tamo naŋgi akamkobayoqnsib pailoqnsib naŋgo jaqatiŋ qa qalagei anjam ateqnu.’

Matyu 24:30

Bati deqa e Tamo Aŋgro bqai. Ijo toqor a laŋ goge dia brantimqa tamo uŋgasari sawa sawa kalilq di unub qaji naŋgi e qa akamugetqab. E Tamo Aŋgro siŋgila ti riaŋ ti laŋbiq na boqnit tamo uŋgasari kalil naŋgi e nubqab.

Matyu 25:41

“Ariya tamo uge ijo baŋ qonaŋq di unub qaji naŋgi endegsi minjrqai, ‘Niŋgi tamo tulaŋ ugedamu. Deqa niŋgi jaraiiye. Jaraiosib aisib ŋamyuo gaigai yuejunu qaji dia soqniye. Satan aqa laŋ aŋgro naŋgi ti dia sqab. Naŋgi dia sqajqa deqa Qotei a nami ŋamyuo di gereiyej.

Matyu 25:46

E na tamo uge ijo baŋ qonaŋq di unub qaji naŋgi degsi minjrsiyqa naŋgo awai uge enjrsiy breinjrit ŋamyuoq aiqab. Dia naŋgi bati gaigai jaqatiŋ oqnsib sqab. Ariya tamo bole ijo baŋ woq di unub qaji naŋgi ŋambile gaigai sqab.”

Matyu 26:24

Niŋgi quiye. E Tamo Aŋgro moiqai. Nami Qotei aqa anjam degsib neŋgreŋyeb unu. Deqa uŋgum. E anjam di dauryosiy moiqai. Ariya tamo e ojsim jeu tamo naŋgo baŋq di atqas qaji a tulaŋ padalougetqas. A nami ŋambabosai qamu di kere.”

Matyu 7:23

Yimqa bati deqa e boleq na minjrqai, ‘Niŋgi tal qabe? E niŋgi qaliesai. Deqa niŋgi jaraiiye. Niŋgi kumbra uge yo qaji tamo.’ E naŋgi degsi minjrqai.”

Luk 13:27

Degsi minjibqa a na kamba merŋgwas, ‘Niŋgi tal qabe? E niŋgi qaliesai. Deqa niŋgi kalil jaraiiye. Niŋgi kumbra uge yo qaji tamo.’

Jon 5:14

Onaqa nebeonaq Yesus a atra tal miligiq gilsiqa tamo a na boletej qaji a di sonaqa itosiqa minjej, “Ni que. E ni boletmonum. Deqa ni olo une bei ataim. Gulube kobaquja bei ino jejamuq di olo branto uge.”

Filipai 3:19

Tamo naŋgi di naŋgo segi jejamu qa are qaloqnsib dauryeqnub. Naŋgo areqalo di naŋgo gisaŋ qotei bul ateqnub. Naŋgi bati gaigai mandam qa iŋgi iŋgi oqajqa are tulaŋ prugnjreqnu. Naŋgi jemai kumbra yqajqa tulaŋ areboleboleinjreqnu. Deqa mondoŋ tamo naŋgi di ŋamyuoq di torei padalqab.

1 Tesalonaika 5:3

Tamo uŋgasari naŋgi endegsib maroqnqab, “Bini bati bole. Iga bole unum.” Degsib maroqnibqa gulube kobaquja naŋgoq di brantoqujatqas. Uŋa aŋgrotqa osim jaqatiŋ eqnu dego kere. Gulube di naŋgi gotraŋyqa keresai.

2 Tesalonaika 2:8

A boleq dimqa Tamo Koba Yesus a riaŋ koba ti bosim aqa me mondor medabuq na puyimqa jagwa koba dosim dal anjam gotraŋyo qaji tamo di qalsim moiotqas. O was qu, Yesus aqa riaŋ dena tamo di tulaŋ padaltougetqas.

Taitus 2:13

Osim iŋgi tulaŋ boledamu iga mondoŋ oqom qaji di unqajqa areboleboleigoqnimqa tariŋoqnsim sqom. Yesus Kristus a segi Qotei. A siŋgila koba. A na iga eleŋej. Mondoŋ a wala bole ti riaŋ koba ti Qotei aqa siŋgila ti di osim laŋ qureq dena bqas. Iga di unqajqa tariŋoqnsim unum.

Hibru 10:29

Ariya tamo bei a Qotei aqa Ŋiri qoreiyosim aqa ñam ugeugeiyqas di niŋgi kiersib are qalqab? Tamo di aqa une deqa a gulube tulaŋ kobaquja oqas. Kristus aqa leŋ na Qotei aqa anjam bunuj siŋgilatej deqa tamo di a anjam di dauryosiq a Qotei aqa segi tamo tiŋtiŋ soqnej. Ariya bunuqna a olo Yesus aqa leŋ di ugeugeiyosim Qotei aqa Mondor iga qa are boleiyeqnu qaji aqa ñam ugetqas di a une tulaŋ kobaquja yqas.

2 Pita 2:17

Tamo uge naŋgi di ya robu bul jeŋo qaji. Jagwa na awa puyeqnaqa urur koboeqnu dego kere tamo naŋgi di babaŋ na tamo bole ariya naŋgi kumbra bole babtosaieqnub. Deqa mondoŋ Qotei na naŋgi sawa ambruq breinjrqas. Sawa di Qotei na nami naŋgi gereiyetnjrej unu.

2 Pita 3:7

Ariya bini laŋ ti mandam ti tariŋoqnsib unub. Mondoŋ Qotei a olo anjam marimqa laŋ ti mandam ti ŋamyuo na yusib koboqab. Bati deqa Qotei na tamo naŋgi a qoreiyeqnub qaji naŋgo une qa peginjrsim naŋgi torei padaltnjrqas.

Jut 1:13

Jagwa na yuwal tigelteqnaqa yuwal korkorteqnaqa mormaŋ aieqnu dego kere tamo naŋgi di kumbra uge uge babteleŋoqnsib naŋgi naŋgo kumbra uge deqa jemainjrosaieqnu. Naŋgi bongar bul laŋ goge dia naŋgo gam grotoqnsib laŋa laŋa laqnub dego kere. Deqa mondoŋ Qotei na tamo naŋgi di breinjrim sawa ambruq aieleŋosib bati gaigai dia sqab. Sawa ambru di Qotei na nami naŋgi gereiyetnjrej unu.

Uli Anjam 20:11

Ariya e olo ŋam atsimqa awo jaram kobaquja tulaŋ qat unem. Qotei a awo jaram dia awesonaqa aqa ulatamuq dena mandam ti laŋ ti jaraiosib loumnab unjrem.

Uli Anjam 20:14

Osiqa moio ti moio qure ti osiq ŋamyuo kobaq wainjrej. Ŋamyuo koba di moio bunu qaji.

Uli Anjam 21:8

“Ariya tamo naŋgi ulakobaoqnsib Yesus qa naŋgo areqalo siŋgilatosaieqnub qaji naŋgi kalil ŋamyuo kobaq aiqab. Tamo kumbra uge yo qaji, leŋ ojo qaji, sambala kumbra yo qaji, gumaniŋo qaji, quñam qalo qaji, qotei gisaŋ biŋinjro qaji, gisaŋ anjam maro qaji naŋgi kalil ŋamyuoq aieleŋqab. Ŋamyuoq dia meniŋ kalil yusiq ñaŋgaeqnu. Ŋamyuo di moio bunu qaji.”

Uli Anjam 22:15

Tamo naŋgi kumbra uge uge yeqnub qaji naŋgi Qotei aqa qure koba di miligiq gilqasai. Naŋgi oqeq di sqab. Tamo gumaniŋo qaji, quñam qalo qaji, sambala kumbra yo qaji, leŋ ojo qaji, gisaŋ qotei biŋinjro qaji, gisaŋ kumbra dauryqajqa tulaŋ arearetnjro qaji naŋgi Qotei aqa qure koba di miligiq gilqasai. Naŋgi oqeq di sqab.