2 Pita 3:1 - Yesus Aqa Anjam Bole

^1-2 O ijo was bole, e nami anjam neŋgreŋyosim niŋgi qa qariŋyem agi bini olo anjam qariŋyonum. E nuŋgo are tigeltetŋgitqa niŋgi iŋgi bole bole mondoŋ brantqas qaji deqa olo are qalqajqa deqa osim neŋgreŋyonum. Nami Qotei aqa medabu o qaji tamo naŋgi iŋgi deqa anjam palontoqnsib laqneb. Tamo Koba Yesus agi iga eleŋej qaji aqa dal anjam qa dego niŋgi are qalqajqa deqa e anjam endi neŋgreŋyonum. Dal anjam di Yesus aqa wau tamo naŋgi nami niŋgi qa bosib palontosib niŋgi merŋgeqnab quoqneb.

2 Pita 3:1 ပူးပေါင်းရင်းမြစ်များ

Matyu 5:8

“Tamo uŋgasari naŋgo are miligiq di jiga bei saiqoji unub qaji naŋgi dego tulaŋ areboleboleinjreme. Di kiyaqa? Mondoŋ naŋgi Qotei aqa ulatamu unqab.

2 Korin 13:2

E nami niŋgi qa bosim niŋgi uratŋgsim bati bei e olo niŋgi qa bosim tamo une atoqneb qaji naŋgi di ŋiriŋ anjam minjrem. Ariya bini e sawa isaq endi sosiy tamo une atoqneb qaji naŋgi ti niŋgi kalil ti anjam endegsi merŋgwai, “E bunuqna niŋgi qa olo bosiy tamo une atoqneb qaji naŋgi di naŋgo une tingitetnjrsiy ŋolawotnjrqai.”

1 Timoti 5:22

Ni Kristen naŋgo gate bei atqa osimqa ino baŋ aqa gateq di urur ataim. Ni grotqam di a bunuqna une yimqa ni a ombla une oqam. Deqa ni ino segi so geregere taqatosim Qotei aqa ŋamgalaq di tamo bole une saiqoji soqne.

2 Timoti 1:6

Nami e ijo baŋ ino gateq di atnamqa Qotei na ni siŋgila emej. Yim ni aqa wau ojqajqa deqa. Deqa e olo ino areqalo tigeltetmitqa ni siŋgila deqa are qalsim ino wau di siŋgilat. Tamo a ŋam puyim puloŋosim kobaqas dego kere ni na ino wau di olo siŋgilatim kobaqas.

Hibru 6:9

O gago was bole, iga na anjam siŋgila niŋgi merŋgonum. Ariya iga qalieonum, niŋgi degsib padalqasai. Qotei na niŋgi aqaryaiŋgosim oqas.

1 Pita 1:22

Niŋgi nami Qotei aqa anjam bole dauryoqneb. Kumbra dena niŋgi Qotei aqa ŋamgalaq di tamo bole une saiqoji soqneb. Utru deqa bini niŋgi na Qotei aqa tamo uŋgasari naŋgi tulaŋ qalaqalainjreqnub. Ariya kumbra di niŋgi olo torei siŋgilatosib nuŋgo Kristen was naŋgi siŋgila na qalaqalainjroqniye.

1 Pita 2:11

O ijo kadoi bole, nuŋgo qure bole agi laŋ goge di unu. Deqa niŋgi mandamq endia yauŋ tamo bulosib unub. Deqa e na niŋgi endegsi merŋgwai. Niŋgi nami nuŋgo areqalo namij dauryqajqa are prugŋgoqnej. Ariya areqalo namij di nuŋgo qunuŋ ti ombla qoteqnub. Deqa niŋgi nuŋgo areqalo namij di uratosib qoreiyiye.

2 Pita 3:14

O ijo was bole, niŋgi iŋgi iŋgi di brantqajqa tariŋeqnub deqa niŋgi Qotei aqa ŋamgalaq di tamo bole une saiqoji sqajqa siŋgila na wauoqniye. Osib niŋgi Qotei ombla na areqalo qujaitosib soqniye. Soqnibqa mondoŋ Tamo Koba Kristus a olo bqajqa batiamqa Qotei a nuŋgo kumbra bole kalil di unekritqas.

2 Pita 3:17

O ijo was bole, niŋgi diŋo bati qa anjam di bole qalieonub deqa niŋgi geregere ŋam atoqniye. Niŋgi ŋam atqasai di dal anjam gotraŋyo qaji tamo naŋgi bosib niŋgi gisaŋgosib titŋgibqa niŋgi siŋgila na tigelesqa uratosib uloŋo uge.

2 Pita 3:8

O ijo was bole, niŋgi ijo anjam bei endi geregere qusib olo are walŋgaiq. Qotei aqa areqalo agiende. Bati qujai a wausau 1,000 dego kere. Wausau 1,000 a bati qujai dego kere. Bati qujai ti wausau 1,000 ti naŋgi ombla kerekere. Qotei aqa areqalo agide.

Jut 1:5

Niŋgi Tamo Koba Qotei qa qalie. Nami Israel tamo uŋgasari naŋgi Isip sawaq di sonabqa Qotei na naŋgi joqsiq gilej. Joqsiq gilsiqa ariya tamo uŋgasari a qa naŋgo areqalo siŋgilatosai qaji naŋgi a na padaltnjrej. Niŋgi di nami qalieeb. Ariya niŋgi deqa olo are qalqajqa deqa e nuŋgo areqalo tigeltetŋgonum.