2 Pita 2:3 - Yesus Aqa Anjam Bole

³ Tamo naŋgi di mamaul ani. Deqa naŋgi na bosib gisaŋ anjam gargekoba niŋgi merŋgoqnsib dena nuŋgo silali iŋgi iŋgi yaiŋgoqnqab. Ariya tulaŋ nami Qotei na tamo naŋgi di peginjrqa bati atsiqa naŋgi qa endegsi marej, “E na tamo naŋgi di padaltnjrougetqai.” Od, tamo naŋgi di bole padalqab. Qotei a naŋgo padalqa bati qa tariŋeqnu.

2 Pita 2:3 ပူးပေါင်းရင်းမြစ်များ

Matyu 23:14

O dal anjam qalie tamo ti Farisi ti niŋgi ŋam atiye. Niŋgi anjam maro aiyelteqnub qaji tamo. Deqa niŋgi uŋa qobul naŋgi gisaŋnjroqnsibqa naŋgo tal ti iŋgi iŋgi ti laŋa yainjreqnub. Niŋgi qure ambleq dia tigeloqnsibqa pail olekokba yeqnub. Di gisaŋ koba. Deqa mondoŋ une pegiyo bati qa Qotei a na niŋgi gulube tulaŋ kobaquja eŋgwas.

Luk 18:8

E niŋgi merŋgwai. Qotei a na aqa segi tamo uŋgasari naŋgi urur aqaryainjroqujatqas. Ariya mondoŋ e Tamo Aŋgro laŋ goge dena bosiyqa tamo uŋgasari mandamq endi unub qaji naŋgi kumbra kieryoqnsib soqnibqa e unjrqai. Naŋgi e qa naŋgo areqalo siŋgilatosib sqab kio sai kio di geregere unqai.”

Luk 20:20

Deqa naŋgi Yesus laŋa koqyesoqneb. Osib endegsib are qaleb, “Iga tamo qudei qariŋnjrnam naŋgi Yesus aqa areq gilsib anjam bei nenemyibqa a anjam grotimqa di iga qusim ojqom. Ojsim Rom naŋgo gate koba aqa baŋq di atqom.” Naŋgi degsi are qalsibqa tamo qudei minjreb, “Niŋgi na Yesus gisaŋyosib anjam bei nenemyibqa a niŋgi tamo bole edegwas. Osim anjam bei grotqas. Yimqa iga na ojqom.”

Luk 22:47

Ariya Yesus aqa aŋgro 12-pela naŋgi deqaji bei agi Judas a na qaja tamo gargekoba naŋgi joqsiqa Yesus aqa areq di branteb. Brantonabqa Judas a Yesus aqa areq bosiq kundoqyej.

Jon 2:16

Osiqa tamo naŋgi binoŋ qariŋyoqnsibqa dena silali oqneb qaji naŋgi endegsi minjrej, “Niŋgi binoŋ di eleŋosib jaraiiye. Ijo Abu aqa tal endi awaiyo tal sai.”

Rom 16:18

Tamo deqaji naŋgi gago Tamo Koba Kristus aqa wau ojosaieqnub. Naŋgi naŋgo segi jejamu qa are qaloqnsib deqa waueqnub. Osib tamo uŋgasari naŋgi walawalainjroqnsib gisa gisaŋnjroqnsibqa naŋgi nanaritnjreqnub. Deqa kumbra bole ti kumbra uge ti di naŋgi geregere poinjrosaieqnu.

2 Korin 2:17

Ariya iga tamo gargekoba naŋgi bul sai. Agi tamo gargekoba naŋgi Qotei aqa anjam mareqnub di naŋgi silali oqajqa deqa osib waueqnub. Ariya iga degyosaieqnum. Qotei na iga wau egej deqa iga gisaŋ na wauosaieqnum. Iga Kristus koba na areqalo qujaitosim Qotei aqa ŋamgalaq di aqa anjam bole geregere marsim laqnum.

1 Tesalonaika 2:5

Niŋgi qalie, iga na walawala anjam bei niŋgi merŋgosaioqnem. Osim nuŋgo iŋgi iŋgi qa maulgonaq anjam bole bei laŋa gisaŋ na niŋgi merŋgosaioqnem. Gago kumbra di Qotei a segi qalie.

1 Tesalonaika 5:3

Tamo uŋgasari naŋgi endegsib maroqnqab, “Bini bati bole. Iga bole unum.” Degsib maroqnibqa gulube kobaquja naŋgoq di brantoqujatqas. Uŋa aŋgrotqa osim jaqatiŋ eqnu dego kere. Gulube di naŋgi gotraŋyqa keresai.

1 Timoti 3:3

A ya uyoqnsim nanarioqnaiq. A urur minjiŋ oqim qotoqnaiq. A lawo soqnem. A silali koba ti sqajqa are qaloqnaiq.

1 Timoti 3:8

Kristen naŋgo wau tamo naŋgi dego areqalo bole ti sosib wauoqnebe. Naŋgi medabu aiyeltaib. Naŋgi ya uysib nanarioqnaib. Naŋgi na tamo naŋgo silali yainjrqajqa are koba qalaib.

1 Timoti 6:5

Osib naŋgi gaigai ŋiriŋ anjam koba mareleŋeqnub. Tamo deqaji naŋgi areqalo tulaŋ uge na laqnub. Naŋgi Qotei aqa anjam bole qaliesai bolesai. Deqa naŋgi endegsib are qaleqnub, “Iga Qotei aqa kumbra dauryqom dena iga ñoro koba ti sqom.” O Timoti, naŋgo anjam di gisaŋ.

Taitus 1:11

Tamo naŋgi di tamo uŋgasari naŋgo silali ti ñoro ti yainjrqajqa deqa marsib kumbra uge uge iga yqa keresai qaji di naŋgi yqajqa minjreqnub. Kumbra dena naŋgi na tamo uŋgasari qudei naŋgo aŋgro ti naŋgo was naŋgi ti areqalo ugetetnjreqnabqa naŋgi Qotei aqa gam bole olo urateqnub. Deqa Taitus, ni na tamo uge uge deqaji naŋgo medabu getentsim saidnjre.

Taitus 1:7

Ni qalie, Kristen naŋgo gate naŋgi Qotei aqa wau taqateqnub. Deqa ni tamo bei a gate atqa osimqa ni aqa kumbra endeqaji unsim ate. A tamo uŋgasari naŋgo ŋamgalaq di une saiqoji unu. A aqa segi ñam soqtosiq tamo uŋgasari naŋgi siŋgila na taqatnjro-saieqnu di ni unsim a gate ate. A urur minjiŋ oqetosaieqnu. A ya uysiq nanariosaieqnu. A qoto ani tamo sai. A silali koba oqnqajqa tulaŋ arearetosaieqnu.

1 Pita 2:8

Qotei aqa anjam bei dego nami endegsib neŋgreŋyeb unu, “Tamo qudei naŋgi tal aqa ai di quraqyoqnsib maŋgaleqnub.” O was qu, tamo naŋgi di Qotei aqa anjam gotraŋyeqnub. Utru deqa naŋgi tal aqa ai di quraqyoqnsib maŋgaleqnub. Naŋgi kumbra uge uge yeqnub deqa Qotei na naŋgi padaltnjrqas. Qotei a nami naŋgi qa degsi marej.

1 Pita 5:2

Qotei aqa tamo uŋgasari naŋgi kaja du du bul deqa a na naŋgi joqsiqa nuŋgo baŋq di atej unub. Deqa niŋgi na naŋgi geregere taqatnjroqniye. Qotei na niŋgi wau di eŋgej deqa niŋgi are bole na wau di yoqniye. Tamo qudei naŋgi siŋgila na niŋgi waiŋgibqa niŋgi deqa wau di yaib. Niŋgi silali qa osib wau di yaib. Niŋgi are bole na wau di yoqniye.

2 Pita 1:16

Iga nami gago Tamo Koba Yesus Kristus aqa siŋgila qa ti aqa bqajqa bati qa ti niŋgi merŋgeqnam niŋgi quoqneb. Ariya iga Kristus aqa anjam di merŋgoqnsim bati deqa iga mandam tamo naŋgo sa anjam dauryosaioqnem. Iga gago segi ŋamdamu na Yesus aqa riaŋ ti aqa siŋgila ti unsim deqa niŋgi merŋgoqnem.

2 Pita 2:1

Bole, nami tamo qudei naŋgi Israel naŋgo ambleq di tigelosib naŋgo segi ñam soqtoqnsib naŋgi segi Qotei aqa medabu o qaji tamo degsib maroqnsib wauoqneb. Ariya naŋgi Qotei aqa medabu o qaji tamo sai. Naŋgi gisaŋ tamo. Dego kere bunuqna tamo deqaji qudei naŋgi lumu na bosib nuŋgo ambleq di dego tigelosib naŋgi segi Qotei aqa medabu o qaji tamo degsib maroqnsib gisaŋ anjam gargekoba niŋgi merŋgoqnqab. Yimqa niŋgi qudei qusib bole edegosib naŋgi daurnjrsib Qotei aqa anjam olo uratosib uloŋqab. Tamo naŋgi di Tamo Koba Yesus na awainjrej. Ariya naŋgi na olo a qoreiyqab. Osib deqa mondoŋ naŋgi urur padalqab.

2 Pita 2:9

Ariya was qu, Tamo Koba Qotei a nami degsiqa tamo uge uge naŋgo une qa maroqnsiq naŋgi padaltnjroqnej. Deqa iga qalieonum, tamo naŋgi Qotei dauryeqnub qaji naŋgi gulube iteqnabqa a na olo naŋgi eleŋeqnu. Naŋgi eleŋqajqa gam di Qotei a bole qalie. Tamo uge uge naŋgo kumbra di dego Qotei a qalie. Deqa mondoŋ a na naŋgi osim naŋgo une qa peginjrsim awai uge enjrqas.

Jut 1:11

Tamo naŋgi di tulaŋ padalougetqab. Kein a nami kumbra uge yoqnej dego kere tamo naŋgi di Kein dauryosib kumbra uge yeqnub. Naŋgi silali koba oqajqa deqa maroqnsib gam grotosib Balam aqa kumbra uge dauryosib laqnub. Kora agi nami Qotei aqa anjam gotraŋyoqnej qaji aqa kumbra uge di dego naŋgi dauryeqnub. Deqa naŋgi padalougetqab.

Jut 1:15

Bosim tamo kalil Qotei qoreiyeqnub qaji naŋgo une qa peginjrsim ugeugeinjrqas. Osim naŋgo kumbra uge di naŋgi osornjrimqa naŋgi deqa are qalsib gulube koba oqab. Tamo qudei une yeqnub qaji naŋgi Qotei tulaŋ qoreiyoqnsib a misiliŋyoqnsib kumbra tulaŋ uge uge yeqnub. Deqa Qotei na naŋgi dego naŋgo kumbra uge di osornjrimqa naŋgi deqa are qalsib gulube koba oqab.” Enok a nami degsi marej.

Jut 1:16

Tamo naŋgi di gaigai are ugeinjreqnaqa laŋa laŋa tamo naŋgo jejamuq di anjam qameleŋeqnub. Osib naŋgo segi areqalo uge uge dauryeqnub. Naŋgi naŋgo medabu waqtoqnsib diqoqnsib naŋgo segi ñam soqteqnub. Osib tamo uŋgasari naŋgo ñam dego laŋa soqtetnjroqnsib naŋgi walawala-injreqnub. Yim naŋgi na naŋgo areqalo dauryqajqa deqa.

Jut 1:4

Jeu tamo qudei naŋgi uliosib nuŋgo ambleq aieb. Qotei a nami naŋgi qa marej, “Mondoŋ e na naŋgo une qa peginjrsiy padaltnjrqai.” Es was qu, jeu tamo naŋgi di Qotei qoreiyeqnub. Qotei a iga qa are tulaŋ boleiyeqnu aqa anjam di jeu tamo naŋgi dena olo bulbulyoqnsib mareqnub, “Qotei a iga qa laŋa are boleiyeqnu. Deqa uŋgum, iga kumbra uge uge yoqnqom.” Degsib maroqnsib gago Gate Koba Yesus Kristus dego qoreiyeqnub.

Jut 1:7

Nami Sodom ti Gomora ti qure kalil jojomq di soqneb qaji naŋgi ti laŋ aŋgro uge naŋgo kumbra di dauryoqnsib sambala kumbra tulaŋ ugedamu yoqneb. Naŋgo sambala kumbra di tulaŋ bei. Deqa mondoŋ Qotei na naŋgi ŋamyuo kobaq di breinjrim naŋgi bati gaigai dia sqab. Deqa was qu, iga kumbra uge deqa are qaloqnsim ulaoqnqom. Osim kumbra uge di dauryqa uratqom.