2 Pita 2:2 - Yesus Aqa Anjam Bole

² Tamo deqaji gargekoba naŋgi bosib kumbra uge uge dauryoqnqab. Yimqa tamo qudei naŋgi na naŋgi unjrsib naŋgi daurnjrsib Qotei aqa gam bole misiliŋyqab.

2 Pita 2:2 ပူးပေါင်းရင်းမြစ်များ

Matyu 22:16

Qairosib anjam kereonaq naŋgo aŋgro qudei Herot aqa wau tamo qudei ti qariŋnjrnab Yesus aqa areq bosib gisaŋyosib minjeb, “O Qalie Tamo Koba, iga qalie, ni anjam bole maro qaji tamo. Ni anjam bole segi tamo uŋgasari naŋgi minjroqnsim Qotei aqa kumbra osornjreqnum. Ni tamo bei ulaiyosaieqnum. Ni tamo ñam ti naŋgi anjam bei minjroqnsim olo tamo ñam saiqoji naŋgi anjam bei minjrosaieqnum. Ni anjam qujai tamo kalil naŋgi minjreqnum.

Matyu 24:24

Di kiyaqa? Tamo qudei naŋgi bosib gisaŋosib marqab, ‘E Kristus.’ Qudei naŋgi marqab, ‘E Qotei aqa medabu o qaji tamo bole.’ Degsib maroqnsib maŋwa kokba gargekoba babtoqnqab. Naŋgo maŋwa dena naŋgi na tamo uŋgasari kalil naŋgi ugeugeinjrqajqa deqa wauoqnqab. Osib Qotei aqa segi tamo uŋgasari nami giltnjrej qaji naŋgi dego ugeugeinjrqajqa wauoqnqab.

Matyu 7:14

Niŋgi siraŋme kiñalaq dena miligiq gilqab di niŋgi gam kiñala dauryosib ŋambile gaigai sqajqa sawaq di brantqab. Tamo quja quja segi gam di itosib dauryeqnub.”

Mak 13:22

Tamo qudei naŋgi bosib gisaŋosib marqab, ‘E Kristus.’ Qudei naŋgi marqab, ‘E Qotei aqa medabu o qaji tamo bole.’ Degsib maroqnsib maŋwa kokba gargekoba babtoqnqab. Naŋgo maŋwa dena naŋgi na tamo uŋgasari kalil naŋgi ugeugeinjrqajqa deqa wauoqnqab. Osib Qotei aqa segi tamo uŋgasari nami giltnjrej qaji naŋgi dego ugeugeinjrqajqa wauoqnqab.

Jon 14:6

Onaqa Yesus na minjej, “E segi gam. E segi anjam bole qa utru. E segi ŋambile qa utru dego. Deqa tamo bei a gam bei na ijo Abu aqaq oqwa keresai. Ijo Abu aqaq oqwajqa gam agi e segi qujai.

Aposel 14:2

Ariya Juda tamo qudei Pol wo Barnabas wo naŋgo anjam quqwa urateb qaji naŋgi na sawa bei bei qaji tamo naŋgo are ugetetnjrnabqa naŋgi tamo uŋgasari Yesus qa naŋgo areqalo siŋgilateb qaji naŋgi qa ugeosib misiliŋyoqneb.

Aposel 16:17

Iga Pol koba na aieqnamqa uŋa di a iga daurgoqnsiqa tulaŋ koba leleŋoqnsiqa maroqnej, “Tamo naŋgi di Tamo Koba Qotei aqa wau tamo. Qotei a niŋgi oqajqa gam di naŋgi na osorŋgeqnub.”

Aposel 18:26

Deqa bati bei a Juda naŋgo Qotei tal miligiq dia siŋgila na anjam minjreqnaqa Prisila wo Akwila wo naŋgi aqa anjam qusibqa a osib Qotei aqa gam bole geregere osoryonab a poiyej.

Aposel 19:9

Degyeqnaqa Juda tamo uŋgasari qudei naŋgi Pol aqa anjam di qusibqa naŋgi a qa ugeosib aqa anjam dauryqa uratosib ŋambile gaigai sqajqa gam Yesus na nami iga osorgej qaji di qoreiyosib tamo uŋgasari naŋgi minjroqneb, “Yesus aqa gam di uge.” Deqa Pol a naŋgi uratnjrsiqa tamo uŋgasari Yesus qa naŋgo areqalo siŋgilateb qaji naŋgi segi joqsiqa tamo bei aqa ñam Tiranus aqa skul kobaq gileb. Gilsib dia Pol a bati gaigai Qotei aqa anjam plaltoqnsiq minjroqnej.

Aposel 22:4

Deqa e na tamo uŋgasari Yesus aqa gam dauryoqneb qaji naŋgi tulaŋ ugeugeinjroqnsim tontnjroqnsim tonto talq di breinjreqnam qaja tamo naŋgi na ñumeqnab moreŋoqneb.

Aposel 24:14

“Ijo une qujai agiende. E Yesus aqa gam dauryeqnum. Juda tamo kokba naŋgi mareqnub, ‘Gam di bolesai. Gam dena tamo uŋgasari naŋgi ŋiriŋoqnsib poeleŋeqnub.’ Gam di qujai e dauryoqnsimqa gago moma naŋgo Qotei qa louoqnsimqa Moses aqa dal anjam ti Qotei aqa medabu o tamo naŋgo anjam nami neŋgreŋyeb qaji deqa ti ijo areqalo siŋgilatejunum.

Rom 2:24

Agi Qotei aqa anjam bei nami niŋgi qa endegsib neŋgreŋyeb unu, “Nuŋgo kumbra uge di sawa bei bei qaji naŋgi unoqnsib mareqnub, ‘Naŋgo Qotei di bolesai.’ Osib naŋgi Qotei aqa ñam misiliŋyeqnub.”

1 Timoti 5:14

Deqa e are qalonum, uŋa qobul meli naŋgi olo tamo osib aŋgrotoqnsib naŋgo segi tal gereiyoqnqab di kere. Naŋgi degyqab di jeu tamo naŋgi na naŋgo kumbra di unoqnsib deqa naŋgi Qotei aqa ñam misiliŋyqa keresai.

Taitus 2:5

Qalaqalainjroqnsib naŋgo areqalo geregere taqatosib Qotei aqa ŋamgalaq di une saiqoji sqab. Sosib naŋgo tal ti naŋgo iŋgi iŋgi ti geregere taqatosib naŋgo tamo ti naŋgo aŋgro ti naŋgi dego geregereinjroqnqab. Osib naŋgo tamo naŋgo sorgomq di geregere sosib naŋgo anjam dauryoqnqab. Naŋgi kumbra bole degsib yoqnibqa naŋgo tamo naŋgi na naŋgo kumbra di unoqnsib Qotei aqa anjam qa yomuoqnqasai.” O Taitus, ni na uŋa qeli naŋgi anjam degsim minjroqnime.

Taitus 2:8

Ni anjam bole segi tamo naŋgi minjroqnimqa naŋgi ino anjam di qusib uge qa marqa keresai. Jeu tamo naŋgi dego ino anjam di qusib deqa iga yomuigwa keresai. Naŋgi naŋgo segi areqalo uge qa jemainjrqas.

1 Pita 2:12

Bini niŋgi sawa bei bei qaji tamo naŋgo ambleq di sosib deqa niŋgi naŋgo ŋamgalaq dia kumbra bole bole dauryoqniye. Yimqa mondoŋ tamo uŋgasari peginjrqa batiamqa naŋgi nuŋgo kumbra bole di unsibqa naŋgo yomu anjam niŋgi qa maroqneb qaji di uratosib Qotei aqa ñam soqtoqnqab.

2 Pita 2:12

Tamo uge deqaji naŋgi wagme bul tulaŋ nanariosib laqnub. Naŋgi naŋgo segi jejamu aqa areqalo dauryeqnub. Naŋgi wagme juwaŋ bul. Anjam naŋgi poinjrosai qaji di naŋgi olo misiliŋyeqnub. Iga na wagme juwaŋ naŋgi ojeleŋoqnsim ñumeqnum dego kere mondoŋ Qotei na tamo uge naŋgi di ñumougetqas.

2 Pita 2:15

Naŋgi Qotei aqa gam bole uratosib nanariosib laqnub. Osib naŋgi Beor aqa aŋgro Balam aqa gam dauryeqnub. Balam agi nami une atej. Osiqa aqa une di aqa awai oqajqa tulaŋ areare-toqnej.

2 Pita 2:18

Tamo naŋgi di naŋgo segi medabu waqtoqnsib diqoqnsib anjam uge uge mareqnub. Naŋgi na tamo qudei naŋgi walawalainjreqnab naŋgi sambala kumbra yoqnsib naŋgo segi jejamu aqa kumbra uge uge dauryeqnub. Tamo naŋgi di ya ya endi are bulyosib tamo uge naŋgo kumbra urateb. Ariya tamo uge naŋgi na olo naŋgi titnjreqnab naŋgi kumbra uge uge dauryeqnub.

2 Pita 2:21

Naŋgi nami kumbra bole qa gam di qaliesai qamu di kere. Ariya naŋgi gam di qalieosib Qotei aqa dal anjam osib olo bunuqna naŋgi qoreiyeb.

2 Pita 2:7

Ariya Lot a kumbra tiŋtiŋ dauryo qaji tamo. Deqa a Sodom qureq di sosiqa tamo uge uge naŋgi kumbra ugeteqnabqa di unoqnsiqa are gulubekobaiyoqnej. Deqa Qotei na Lot olo osiqa sawa boleq di atnaqa a padalosai.

Jut 1:10

Ariya tamo uge naŋgi di tulaŋ diqoqnsib kumbra naŋgi poinjrosai qaji di olo misiliŋyeqnub. Naŋgi wagme juwaŋ bul tulaŋ nanariosib naŋgo segi jejamu qa areboleboleinjreqnaqa areqalo bole dauryqa urateqnub. Naŋgo kumbra deqa mondoŋ Qotei na naŋgi tulaŋ ñumougetqas.

Jut 1:15

Bosim tamo kalil Qotei qoreiyeqnub qaji naŋgo une qa peginjrsim ugeugeinjrqas. Osim naŋgo kumbra uge di naŋgi osornjrimqa naŋgi deqa are qalsib gulube koba oqab. Tamo qudei une yeqnub qaji naŋgi Qotei tulaŋ qoreiyoqnsib a misiliŋyoqnsib kumbra tulaŋ uge uge yeqnub. Deqa Qotei na naŋgi dego naŋgo kumbra uge di osornjrimqa naŋgi deqa are qalsib gulube koba oqab.” Enok a nami degsi marej.

Jut 1:4

Jeu tamo qudei naŋgi uliosib nuŋgo ambleq aieb. Qotei a nami naŋgi qa marej, “Mondoŋ e na naŋgo une qa peginjrsiy padaltnjrqai.” Es was qu, jeu tamo naŋgi di Qotei qoreiyeqnub. Qotei a iga qa are tulaŋ boleiyeqnu aqa anjam di jeu tamo naŋgi dena olo bulbulyoqnsib mareqnub, “Qotei a iga qa laŋa are boleiyeqnu. Deqa uŋgum, iga kumbra uge uge yoqnqom.” Degsib maroqnsib gago Gate Koba Yesus Kristus dego qoreiyeqnub.

Jut 1:7

Nami Sodom ti Gomora ti qure kalil jojomq di soqneb qaji naŋgi ti laŋ aŋgro uge naŋgo kumbra di dauryoqnsib sambala kumbra tulaŋ ugedamu yoqneb. Naŋgo sambala kumbra di tulaŋ bei. Deqa mondoŋ Qotei na naŋgi ŋamyuo kobaq di breinjrim naŋgi bati gaigai dia sqab. Deqa was qu, iga kumbra uge deqa are qaloqnsim ulaoqnqom. Osim kumbra uge di dauryqa uratqom.

Uli Anjam 12:9

Qotei aqa laŋ aŋgro naŋgi na amal di osib waiyonab mandamq aiej. Amal di nami soqnej qaji. Aqa ñam Satan. Aqa ñam bei, “Tamo Uŋgasari Kalil Naŋgo Ñam Ugetetnjro Qaji Tamo.” A na tamo uŋgasari kalil mandamq di so qaji naŋgi gisa gisaŋnjroqnej. A ti aqa laŋ aŋgro naŋgi ti kalil wainjrnab mandamq aieb.

Uli Anjam 13:14

A na maŋwa di wagme juwaŋ e nami unem qaji aqa ŋamgalaq di yoqnsiqa kumbra dena tamo uŋgasari mandamq di unub qaji naŋgi gisa gisaŋnjroqnej. Osiqa naŋgi endegsi minjroqnej, “Niŋgi na sulum gereiyiye. Gereiyqa osibqa wagme juwaŋ aqa ulatamu bul gereiyosib aqa ñam soqtoqniye.” Wagme juwaŋ di agi nami serie na qalnab moisiq olo tigelosiqa ŋambile soqnej.

Uli Anjam 13:8

Deqa tamo uŋgasari kalil mandamq endi unub qaji naŋgi na wagme juwaŋ di biŋiyoqnsib aqa ñam tulaŋ koba soqtoqneb. Tamo uŋgasari naŋgi di Qotei a nami mandam atosaisosiqa naŋgi ŋambile gaigai sqajqa saidosiq ŋambile qa buk miligiq di naŋgo ñam neŋgreŋyosai. Buk di agi Kaja Du nami qalnab moiej qaji aqa segi buk.