2 Pita 1:8 - Yesus Aqa Anjam Bole

⁸ Niŋgi gago Tamo Koba Yesus Kristus qa bole qalieonub deqa kumbra kalil deqaji nuŋgoq di sosim kobaqujaosim tulaŋ siŋgilaqas di nuŋgo qalie di loumqa keresai. A nuŋgoq di tulaŋ siŋgilaesosim gei gargekoba ateleŋqas.

2 Pita 1:8 ပူးပေါင်းရင်းမြစ်များ

Matyu 13:22

Saga yago qudei sil luwit ambleq aieb qaji di aqa utru endegsi unu. Tamo qudei naŋgi Qotei aqa anjam qusibqa naŋgo areqalo miligiq di esoqnibqa ariya bunuqna naŋgi olo mandam qa iŋgi iŋgi qa are koba qaloqnsibqa silali koba oqnqajqa are prugnjroqnqas. Yimqa naŋgo areqalo dena naŋgi wala walainjrsim Qotei aqa anjam naŋgo are miligiq di tentimqa di loumqas. Deqa a gei boletosai.

Matyu 20:3

Seŋ kiñala goge oqnaqa wau lanja a koro sawaq gilsiqa dia tamo qudei naŋgi laŋa tigelesonab unjrsiqa minjrej,

Matyu 20:6

“Seŋ bilaqtonaqa wau lanja a gilsiqa gamq dia tamo qudei naŋgi laŋa tigelesonab unjrsiqa nenemnjrej, ‘Niŋgi kiyaqa laŋa tigelesonab seŋ bilaqtqo?’

Matyu 25:26

“Onaqa aqa tamo koba na minjej, ‘Ni wau tamo uge. Ni lola ani. Ni nami qalieem, tamo qudei naŋgi iŋgi yageqnab melieqnaqa e segi na otorosim uyeqnum. Tamo qudei naŋgi saga yago breiyeqnab boleeqnaq e segi na gei koroiyosim uyeqnum. Ni nami e qa degsim qalieem.

Jon 15:2

Ijo dani qudei naŋgi gei bole atqasai di ijo Abu na naŋgi giŋgeŋnjrsim taqal breinjrqas. Ijo dani gei bole ateleŋeqnub qaji di ijo Abu na gereinjreqnaqa naŋgi olo gei koba ateleŋeqnub.

Jon 17:3

Ŋambile gaigai sqajqa kumbra agiende. Tamo ŋambile gaigai sqab qaji naŋgi ni qa qalieqab. Agi ni segi Qotei bole. E Yesus Kristus qa dego naŋgi qalieqab. Agi ni na e qariŋbonam bem.

Jon 5:42

Ariya e niŋgi qa qalieonum. Nuŋgo are miligiq dia niŋgi Qotei qalaqalaiyosaieqnub.

Rom 12:11

Niŋgi gaigai siŋgila na Qotei aqa wau ojoqniye. Qotei aqa Mondor a nuŋgoq aioqnsim are tigeltetŋgoqnim niŋgi Tamo Koba Yesus aqa wau ojqajqa tulaŋ siŋgilaoqniye.

1 Korin 15:58

Deqa ijo was bole, niŋgi siŋgila na soqniye. Sosib niŋgi Tamo Koba Yesus qa waukobaoqniye. Niŋgi wau di urataib. Niŋgi qalie, niŋgi Tamo Koba Yesus aqa wau ojeqnub di uloŋqa keresai. Deqa niŋgi gaigai Tamo Koba Yesus aqa wau siŋgila na yoqniye.

2 Korin 13:5

Niŋgi Kristus qa nuŋgo areqalo bole siŋgilateqnub kio sai kio deqa are qalsib nuŋgo segi kumbra tenemtoqniye. Niŋgi qaliesai kio, Yesus Kristus a nuŋgo are miligiq di unu? A niŋgi koba na sqasai di niŋgi a qa nuŋgo areqalo siŋgilaboletosai deqa.

2 Korin 8:2

Masedonia Kristen naŋgi gulube koba esoqneb dena naŋgi are tulaŋ gulubeinjrej. Bati deqa naŋgi iŋgi iŋgi tulaŋ saiqoji soqneb. Ariya Qotei na naŋgi siŋgilatnjrej deqa naŋgi olo areboleboleinjrnaqa Kristen tamo qudei naŋgi silali qa aqaryainjrqa marsib silali koba koroiyeb unu.

2 Korin 8:7

O was qu, bati gaigai niŋgi kumbra tulaŋ boledamu yeqnub. Agi niŋgi Qotei qa nuŋgo areqalo siŋgilatoqnsib aqa anjam palontqajqa waukobaeqnub. Niŋgi Qotei qa qalie koba ti sosib deqa niŋgi aqa wau ojqajqa tulaŋ siŋgilaeqnub. Osib niŋgi iga dego tulaŋ qalaqalaigeqnub. Ariya Qotei a niŋgi qa are tulaŋ boleiyosiq aqaryaiŋgej deqa niŋgi nuŋgo kumbra di olo buŋyosib silali koroiyqajqa wau di dego yoqnsib silali atib soqnem.

2 Korin 9:14

Osib qalieqab, Qotei a niŋgi qa are tulaŋ boleiyeqnu. Deqa naŋgi na niŋgi tulaŋ qalaqalaiŋgosib niŋgi qa Qotei pailyoqnqab.

Filipai 1:9

E bati gaigai niŋgi qa endegsi Qotei pailyeqnum, “O Abu, ni na Filipai Kristen naŋgi aqaryainjrimqa qalaqalaiyo kumbra naŋgo are miligiq di tulaŋ siŋgilatoqnsib dauryoqnqab. Osib naŋgi powo koba osib areqalo bole ti sqab.”

Filipai 2:5

Niŋgi Kristus Yesus aqa areqalo ojsib dauryoqniye.

Filipai 3:8

E Juda naŋgo kumbra uratqa segi marosai. E mandam qa kumbra kalil dego uratqa maronum. E ijo Tamo Koba Kristus Yesus qa bole qalieonum. Ijo qalie di tulaŋ bolequja e degsi unonum. Deqa e qalieonum, mandam qa kumbra kalil di qalam jiri bul. Deqa e Kristus segi dauryqajqa are unu. E mandam qa kumbra kalil di uratekritosiy Kristus segi ojqai.

Kolosi 1:10

Osib naŋgo walwel ti naŋgo kumbra ti Tamo Koba Yesus aqa walwel ti aqa kumbra ti keretqab. Yim deqa ni naŋgo kumbra kalil qa tulaŋ areboleboleimoqnqas. O Abu, ni na Kolosi Kristen naŋgi aqaryainjroqnim naŋgi kumbra bole bole degsib yoqnsib ni qa geregere qalieoqnib naŋgo qalie di tulaŋ kobaoqnqas.”

Kolosi 2:7

Mandam na ŋam jirim ojesonaqa ŋam a siŋgila na tigelejunu dego kere niŋgi Kristus osib nuŋgo are miligiq di siŋgilatosib aqa kumbra dauryoqniye. Kristus aqa anjam bole iga nami niŋgi merŋgoqnem qaji di niŋgi osib nuŋgo areqaloq di siŋgilatosib soqniye. Osib niŋgi gaigai Qotei biŋiyoqniye.

Kolosi 3:16

Osib niŋgi Kristus aqa anjam osib nuŋgo are miligiq di siŋgilatib soqnem. Osib niŋgi na nuŋgo Kristen was qu naŋgi areqalo bole ti powo ti osornjroqniye. Yim naŋgi kumbra bole bole yoqnqajqa deqa. Niŋgi nuŋgo are miligiq di Qotei biŋiyoqnsib a qa louoqniye. Lou qudei neŋgreŋq di unu qaji dena ti lou qudei Qotei aqa Mondor na nuŋgo are miligiq di ateqnu qaji dena ti niŋgi Qotei qa louoqniye.

1 Tesalonaika 3:12

Gago areqalo bei dego agiende. Tamo Koba Qotei a na niŋgi siŋgilatŋgimqa qalaqalaiyo kumbra nuŋgoq di tulaŋ kobaamqa niŋgi na Qotei aqa segi tamo uŋgasari naŋgi ti tamo kalil naŋgi ti tulaŋ qalaqalainjroqnqab. Agi iga na niŋgi tulaŋ qalaqalaiŋgeqnum dego kere.

1 Tesalonaika 4:1

O was qu, kumbra bole kalil Qotei a tulaŋ areareteqnu qaji di iga nami niŋgi osorŋgoqnem agi niŋgi dauryeqnub. Ariya bini iga nuŋgo are miligi siŋgilatetŋgosim Tamo Koba Yesus aqa ñam na endegsi merŋgwom. Niŋgi kumbra di olo torei siŋgilatosib yoqniye.

2 Tesalonaika 1:3

O was qu, iga gaigai niŋgi qa are qaloqnsim deqa Qotei biŋiyeqnum. Iga kere degyeqnum. Di kiyaqa? Nuŋgo areqalo Yesus qa siŋgilateqnub qaji di tulaŋ kobaqujaeqnu. Niŋgi segi segi na nuŋgo Kristen was qu naŋgi qalaqalainjreqnub. Nuŋgo kumbra di dego tulaŋ kobaqujaeqnu.

1 Timoti 5:13

Naŋgo kumbra bei agiende. Naŋgi lalie kobaeqnub. Naŋgi wauqa asginjreqnaqa ta talq giloqnsib anjam laŋa laŋa maroqnsib yomu anjam quqwajqa tulaŋ arearetnjreqnu. Deqa anjam uge uge iga marqa keresai qaji di naŋgi olo mare mare laqnub.

Taitus 3:14

Ni na Kristen tamo uŋgasari naŋgi gam osornjroqnimqa naŋgi wau bole yoqnqajqa geregere qalieqab. Qalieosib tamo uŋgasari iŋgi iŋgi qa truqueqnub qaji naŋgi aqaryainjroqnqab. Naŋgi laŋa sosib Qotei aqa kumbra dauryosaio uge.

Filemon 1:6

Ni iga ti beterosim iga koba na Kristus qa gago areqalo siŋgilateqnum deqa e endegsi Qotei pailyeqnum, “O Abu, ni na iga aqaryaigimqa iga powo bole osim iŋgi bole bole Kristus na iga egeqnu qaji di geregere poigwas.”

Hibru 6:12

Niŋgi asgiŋgaiq. Tamo qudei naŋgi Qotei qa naŋgo areqalo siŋgilatoqnsib asginjrosaieqnu. Naŋgo kumbra di niŋgi dego degsib dauryoqniye. Tamo naŋgi di agi iŋgi bole bole Qotei na nami aqa aŋgro naŋgi enjrqa marej qaji di oqab.

2 Pita 1:2

Niŋgi Qotei wo gago Tamo Koba Yesus wo naŋgi qa bole qalieonub. Deqa Qotei a niŋgi qa are tulaŋ boleiyimqa niŋgi geregere lawo na soqniye.

2 Pita 1:3

Yesus Kristus a segi Qotei. A siŋgila koba ti unu. Aqa siŋgila dena a na gago ŋambile siŋgilatetgwajqa deqa marsiq iŋgi iŋgi tulaŋ boledamu iga egej. Aqa kumbra dena a na iga aqaryaigej deqa iga Qotei aqa kumbra geregere dauryeqnum. Iga Kristus qa bole qalieonum deqa iga kumbra degyeqnum. Aqa segi ñam koba na ti aqa siŋgila na ti aqa kumbra bole na ti a na iga metgej.

2 Pita 2:20

Bole, tamo naŋgi di nami gago Tamo Koba Yesus Kristus agi iga eleŋej qaji a qa bole qalieeb. Naŋgo qalie dena naŋgi mandam qa kumbra jigat kalil urateb. Ariya bunuqna naŋgi olo puluosib kumbra uge di olo dauryeb deqa kumbra uge dena naŋgi siŋgila na ojesonaq naŋgo so tulaŋ ugeej. Naŋgo so uge namij dego sai. Naŋgo so olo tulaŋ ugedamuej.

2 Pita 3:18

Gago Tamo Koba Yesus Kristus agi iga eleŋej qaji a niŋgi qa are boleiyeqnu. Niŋgi a qa bole qalieonub. Ariya a niŋgi qa are boleiyeqnu aqa kumbra dena niŋgi olo siŋgilatŋgimqa niŋgi aqaq dena qalie koba oqniye. Kristus a ñam koba ti unu deqa iga bini bati endeqa aqa ñam soqtoqnqom. Osim bati gaigai aqa ñam soqtoqnsim sqom. Bole.