2 Pita 1:6 - Yesus Aqa Anjam Bole

⁶ Osib dena niŋgi nuŋgo jejamu aqa kumbra geregere taqatesoqniye. Osib dena niŋgi gulube qoboiyoqnsib siŋgila na tigelesoqniye. Osib dena niŋgi Qotei aqa segi kumbra boleq di sosib walweloqniye.

2 Pita 1:6 ပူးပေါင်းရင်းမြစ်များ

Luk 21:19

Deqa niŋgi ijo ñam siŋgila na ojsib soqnib soqnib Qotei na niŋgi eleŋqas. Amqa niŋgi ŋambile gaigai sqab.

Luk 8:15

Ariya saga yago qudei mol mandam boledamuq di aieb qaji di aqa utru endegsi unu. Tamo qudei naŋgi Qotei aqa anjam qusib ojsib dauryoqnqab. Naŋgo are miligi bolequja deqa naŋgi siŋgila na tigelesosib gei bole ateleŋqab.”

Aposel 24:25

Kumbra bole bole dauryoqnqajqa deqa ti gago segi segi so geregere taqatoqnqajqa deqa ti Feliks minjnaq quej. Mondoŋ Qotei na tamo uŋgasari naŋgo une qa peginjrqajqa deqa ti Pol na Feliks minjnaq quej. Qusiqa ulaosiq Pol minjej, “Ni mati aisim ino warumq di soqne. Bunuqna e bati atsiy olo ni metmit bosim anjam di merbqam.”

Rom 15:4

Qotei aqa anjam kalil naŋgi nami neŋgreŋyeb qaji di iga Qotei aqa gam osorgwajqa deqa osib neŋgreŋyeb. Anjam dena gago areqalo siŋgilatetgim iga siŋgila na tigelosim Qotei na mondoŋ iga oqajqa deqa tariŋoqnsim sqom. Utru deqa neŋgreŋyeb.

Rom 2:7

Tamo uŋgasari qudei naŋgo kumbra tulaŋ boledamu. Naŋgi siŋgila na kumbra bole bole dauryoqnsib laŋ qure qa gam itqajqa waukobaeqnub. Naŋgi laŋ qureq dia ñam koba oqajqa ti ŋambile gaigai sqajqa ti waukobaeqnub. Deqa Qotei na tamo uŋgasari naŋgi di ŋambile enjrim naŋgi so bole gaigai sqab.

Rom 8:25

Ariya iga qalie, iga iŋgi di osaiunum deqa iga mondoŋ oqom. Deqa iga are siŋgilatoqnsim tariŋoqnsim unum.

1 Korin 9:25

Tamo gurgureqnub qaji naŋgi awai oqa marsib deqa gurgur qalieqa osib mati naŋgo segi jejamu siŋgilateqnub. Yim gurgur batiamqa naŋgi siŋgila na gurgurqab. Ariya naŋgo awai di mandam qaji awai. Deqa naŋgo awai di koboqas. Ariya laŋ qaji awai iga oqa mareqnum qaji di koboqasai. Di gaigai sqas.

2 Korin 6:4

Iga Qotei aqa wau tamo deqa iga gaigai tamo uŋgasari kalil naŋgo ŋamgalaq di kumbra bole yeqnum. Gulube bei bei gagoq di branteqnaqa iga siŋgila na tigeloqnsim gulube di qoboiyeqnum. Tamo qudei naŋgi na iga ugeugeigeqnab iga naŋgi qa ulaosaieqnum. Une bei bei na iga padaltgwa laqnaqa iga na olo gotraŋyeqnum.

Galesia 5:23

lawo na soqa, gago segi jejamu taqatosim areqalo namij dauryqa uratoqa. O was qu, iga kumbra bole deqaji yoqnqom di dal anjam na iga getentgwa keresai.

Kolosi 1:11

O was qu, iga niŋgi qa degsim Qotei pailyeqnum. Osim olo endegsi pailyeqnum, “O Abu, ni na ino segi siŋgila kobaquja osim Kolosi Kristen naŋgi enjroqnim naŋgi siŋgila na tigeloqnsib gulube kalil qoboiyoqnqab. Osib lawo na sosib gulube di koboqajqa bati qa tariŋoqnsib tulaŋ areboleboleinjroqnim sqab.”

1 Tesalonaika 1:3

Niŋgi Kristus qa nuŋgo areqalo siŋgilateqnub deqa niŋgi kumbra bole bole yeqnub. Agi niŋgi na tamo kalil naŋgi tulaŋ qalaqalainjroqnsib naŋgi qa wau bole yeqnub. Mondoŋ gago Tamo Koba Yesus Kristus a olo bqas anjam di niŋgi nuŋgo are miligiq di siŋgilatoqnsib a qa tariŋeqnub. Iga nuŋgo kumbra deqa are qaloqnsim deqa iga nuŋgo ñam maroqnsim gago Abu Qotei biŋiyeqnum.

2 Tesalonaika 1:4

Utru deqa iga qure kalilq di laqnsimqa tamo uŋgasari Qotei louqa koroeqnub qaji naŋgi niŋgi qa sainjroqnsim nuŋgo ñam soqteqnum. Kumbra uge kalil jeu tamo naŋgi na niŋgi eŋgeqnub qaji deqa ti gulube kalil niŋgi qa branteqnu qaji deqa ti iga na naŋgi sainjroqnsim endegsi minjreqnum, “Tesalonaika Kristen naŋgi Yesus qa naŋgo areqalo tulaŋ siŋgilatoqnsib deqa naŋgi gulube ti jaqatiŋ ti kalil di qoboiyoqnsib siŋgila na tigelejunub.”

2 Tesalonaika 3:5

Gago areqalo agiende. Tamo Koba Qotei a na nuŋgo areqalo gereiyetŋgimqa niŋgi aqa qalaqalaiyo kumbra geregere qalieosib dauryoqniye. Osib Kristus a nami siŋgila na tigelosiq gulube qoboiyoqnej dego kere niŋgi dego siŋgila na tigeloqnsib gulube qoboiyoqniye.

1 Timoti 2:10

Ni na uŋgasari naŋgi minjrimqa naŋgi Qotei aqa anjam dauryqa marsib wau bole bole yoqnebe. Di naŋgo wala bole agide.

1 Timoti 2:2

Ni na Kristen tamo uŋgasari naŋgi minjroqnimqa naŋgi mandor kokba ti sawa taqato qaji tamo kalil naŋgi qa ti Qotei pailyoqnib a na naŋgi aqaryainjroqnqas. Yim deqa iga kalil are lawo sosim kumbra Qotei a areareteqnu qaji di dauryoqnqom.

1 Timoti 3:16

Iga bole qalieonum, Qotei aqa kumbra nami ulitesoqnej qaji di tulaŋ kobaquja. Kumbra di Qotei na iga osorgonaq unem. Aqa kumbra di agiende. A segi tamo bulyonaqa tamo uŋgasari naŋgi a unoqneb. Mondor Bole a na aqa kumbra bole babtosiq osorgej. Osiq mergej, “Aqa kumbra di tulaŋ tiŋtiŋo.” Laŋ aŋgro naŋgi dego a unoqneb. Tamo naŋgi sawa bei beiq giloqnsibqa aqa anjam mare mare laqneb. Deqa tamo uŋgasari mandamq endi unub qaji naŋgi a qa naŋgo areqalo siŋgilatoqneb. Ariya Qotei na a olo osiq laŋ qureq osi oqnaqa a dia ñam kobaquja osiq unu.

1 Timoti 6:11

Ariya Timoti, ni Qotei aqa tamo deqa ni kumbra uge kalil deqaji torei qoreiyosim taqat ate. Osim ni kumbra tiŋtiŋ yoqnsim Qotei aqa kumbra dauryoqnsim a qa ino areqalo siŋgilatoqnsim tamo naŋgi qalaqalainjroqne. Osim ni gulube kalil qa siŋgila na tigeloqnsim tamo uŋgasari naŋgi lawo kumbra enjroqne.

1 Timoti 6:3

Iga gago Tamo Koba Yesus Kristus aqa anjam dauryqom di iga Qotei aqa kumbra geregere qalieqom. Ariya tamo qudei naŋgi Yesus aqa anjam di dauryqa uratoqnsib olo anjam bei Yesus aqa anjam ti ombla kerekereosai qaji di tamo naŋgi minjreqnub.

1 Timoti 6:6

Bole, iga Qotei aqa kumbra dauryqom di iga laŋ qaji iŋgi koba oqom. Iga mandamq endia sosimqa jejamu qa iŋgi iŋgi Qotei na egeqnu qaji di iga oqnsim mareqnum, “Iŋgi di iga qa kere.” Gago kumbra dena mondoŋ iga laŋ qaji iŋgi bole oqom.

2 Timoti 3:5

Naŋgi laŋa babaŋ na Qotei aqa kumbra dauryobulosib sqab. Qotei aqa kumbra bole di siŋgila ti unu. Ariya siŋgila di naŋgi poinjrqasai. O Timoti, ni na tamo naŋgi deqaji beternjraim. Torei uratnjrsim isaq gile.

Taitus 1:1

E Pol. E Qotei aqa wau tamo. Yesus Kristus na e qariŋbej deqa e aqa anjam marsim laqnum. Tamo uŋgasari Qotei na aqa segi qa giltnjrej qaji naŋgi aqa anjam minjroqnitqa naŋgi Yesus qa naŋgo areqalo siŋgilatqajqa deqa qariŋbej. E na naŋgi aqaryainjritqa naŋgi Qotei aqa anjam qalie boleosib aqa kumbra dauryosib sqajqa deqa ti qariŋbej. Qotei aqa anjam di gisaŋ sai. Di anjam bole.

Taitus 1:8

Tamo laŋaj naŋgi aqa meq beqnabqa oqnsiq geregereinjreqnu di ni unsim a gate ate. A kumbra bole bole dauryqajqa are qaloqnsiq areqalo bole ti unu di ni unsim a gate ate. A kumbra tiŋtiŋ ti Qotei aqa segi kumbra bole bole ti di dauryqajqa tulaŋ areareteqnu di ni unsim a gate ate. A aqa segi so geregere taqateqnu di ni unsim a gate ate.

Taitus 2:2

Osim tamo qeli naŋgi anjam endegsim minjroqne, “Niŋgi ya uysib nanarioqnaib. Nuŋgo kumbra geregere taqatoqnsib kumbra bole yqajqa are qaloqnsib areqalo bole dauryoqniye. Osib Qotei aqa anjam bole geregere qalieosib tamo uŋgasari naŋgi qalaqalainjroqniye. Osib gulube kalil qoboiyosib siŋgila na tigelesoqniye.” O Taitus, ni na tamo qeli naŋgi anjam degsim minjroqne.

Hibru 10:36

Niŋgi siŋgila na tigelesoqniye. Niŋgi degyqab di niŋgi Qotei aqa areqalo dauryqab. Osib mondoŋ iŋgi bole bole Qotei a nami niŋgi eŋgwa marej qaji di niŋgi oqab.

Hibru 12:1

Tamo nami soqneb qaji naŋgi di Qotei qa naŋgo areqalo siŋgilatoqneb. Naŋgi laŋbi bul iga agutgesonab iga naŋgo kumbra di uneqnum. Qotei na iga giltgej deqa iga siŋgila na gurguroqnqom. Gurguroqnimqa iŋgi iŋgi qudei na iga Qotei aqa kumbra dauryqa gam getentetgwa laqnimqa iga iŋgi iŋgi di olo gotraŋyoqnqom. Une kalil gagoq di beterqajqa laqnu qaji di dego iga gotraŋyoqnsim Qotei aqa kumbra dauryqajqa siŋgilaoqnqom.

Hibru 6:12

Niŋgi asgiŋgaiq. Tamo qudei naŋgi Qotei qa naŋgo areqalo siŋgilatoqnsib asginjrosaieqnu. Naŋgo kumbra di niŋgi dego degsib dauryoqniye. Tamo naŋgi di agi iŋgi bole bole Qotei na nami aqa aŋgro naŋgi enjrqa marej qaji di oqab.

Hibru 6:15

Onaqa Abraham a Qotei aqa anjam di qusiqa aqa areqaloq di siŋgilatosiq tariŋosiq soqnej. A tariŋqa asgiyosai. A tariŋesosiq sosiq bunuqna iŋgi bole Qotei na a yqa minjej qaji di a na ej.

2 Pita 1:3

Yesus Kristus a segi Qotei. A siŋgila koba ti unu. Aqa siŋgila dena a na gago ŋambile siŋgilatetgwajqa deqa marsiq iŋgi iŋgi tulaŋ boledamu iga egej. Aqa kumbra dena a na iga aqaryaigej deqa iga Qotei aqa kumbra geregere dauryeqnum. Iga Kristus qa bole qalieonum deqa iga kumbra degyeqnum. Aqa segi ñam koba na ti aqa siŋgila na ti aqa kumbra bole na ti a na iga metgej.

2 Pita 3:11

Ariya niŋgi are qaliye. Iŋgi iŋgi kalil degsi koboqas deqa niŋgi kumbra kie dauryqajqa merŋgwai? Niŋgi kumbra endegyiye. Niŋgi nuŋgo segi jejamu Qotei yekritosib aqa segi kumbra boleq di sosib dauryoqniye.

Uli Anjam 1:9

E nuŋgo was Jon. E ti niŋgi ti Yesus aqa tamo unum deqa iga kalil gulube koba qoboiyoqnsim jaqatiŋ eleŋeqnum. Qotei a gago Mandor Koba sosiq iga taqatgeqnu. Deqa iga kalil koba na siŋgila na tigeloqnsimqa gulube qoboiyejunum. E Qotei aqa anjam ti Yesus aqa anjam ti palontsim laqnem deqa jeu tamo naŋgi na e taqal waibosib nui ñam Patmos endia e ateb unum.

Uli Anjam 13:10

Qotei a tamo bei tonto talq di waiyqa marimqa tamo di osib tonto talq di waiyebe. Tamo bei na tamo bei sebru na qalqas di a kamba sebru na qalib moiqas. Kumbra di brantimqa Qotei aqa segi tamo uŋgasari naŋgi unsibqa siŋgila na tigelosib naŋgo areqalo Yesus qa siŋgilatosib soqnebe.

Uli Anjam 14:12

Kumbra di brantimqa Qotei aqa segi tamo uŋgasari naŋgi unsibqa siŋgila na tigelesoqnebe. Tamo uŋgasari naŋgi di agi Qotei aqa dal anjam geregere dauryoqnsibqa naŋgo areqalo Yesus qa siŋgilateqnub.

Uli Anjam 2:2

Ino kumbra ti ino wau ti di e qalieonum. E qalie, ni siŋgila na tigeloqnsimqa tamo uge naŋgi qa tulaŋ asgimeqnu. Tamo naŋgi di endegsib mermeqnub, “Iga dego Qotei aqa anjam marqajqa deqa qariŋgwo.” Di gisaŋ. Qotei na naŋgi qariŋnjrosai. Ni naŋgo anjam di tenemtosim ni qalieonum, naŋgi gisaŋ tamo. Ni keretsim qalieonum.