2 Pita 1:4 - Yesus Aqa Anjam Bole

⁴ Osiqa laŋ goge qaji iŋgi bole bole kalil a nami iga egwa marej qaji di iga egej. Are prugwajqa kumbra mandamq endi tulaŋ koba unu. Kumbra dena iga ugeugeigeqnu. Ariya Kristus a na laŋ goge qaji iŋgi bole bole di iga egej. Aqa kumbra dena a na niŋgi aqaryaiŋgimqa niŋgi kumbra uge uge kalil di uratosib ŋambile osib Qotei aqa segi kumbra bole ti soqniye.

2 Pita 1:4 ပူးပေါင်းရင်းမြစ်များ

Rom 9:4

Jekop aqa leŋ naŋgi Israel tamo. Deqa Qotei na naŋgi aqa segi aŋgro qa minjrej. Naŋgi Qotei aqa riaŋ ti aqa siŋgila ti uneb. A na aqa anjam bunuj ti aqa dal anjam ti louqajqa kumbra ti naŋgi enjrej. Osiqa iŋgi bole kalil a na nami naŋgi enjrqa marej qaji di enjrej.

2 Korin 1:20

Anjam di aqa utru agiende. Qotei a nami iŋgi iŋgi gargekoba iga egwajqa marej. Kristus a odeqnu deqa Qotei na iŋgi iŋgi di iga egeqnu. Deqa iga Qotei aqa anjam di quoqnsim iga Kristus aqa ñam na mareqnum, “Di anjam bole.” Osim iga Qotei aqa ñam soqteqnum.

2 Korin 3:18

Deqa gago ulatamu olo kabuesosai. Iga kalil Tamo Koba Qotei aqa riaŋ di ya jeqiloq di unobuleqnam riaŋ di gagoq di tulaŋ kobaqujaeqnaqa dena iga Qotei a segi buloqnsim unum. Tamo Koba Yesus a na kumbra di iga egeqnu. Tamo Koba a segi Qotei aqa Mondor Bole.

2 Korin 6:17

Tamo Koba Qotei a nami degsi marsiqa olo anjam bei dego endegsi marej, “‘Niŋgi na tamo uŋgasari e qa qaliesai qaji naŋgi uratnjrsib sasaloiye. Niŋgi kumbra jigat bei ojaib. Yim deqa e niŋgi eleŋosiy geregereiŋgoqnqai.

Galesia 3:16

Ariya Qotei aqa kumbra bole mondoŋ brantqas qaji a deqa nami anjam marsiq siŋgilatej. Anjam di a na Abraham aqa moma bei wo minjrej. A Abraham aqa moma gargekoba naŋgi minjrosai. A aqa moma qujai segi minjej. Anjam di agi neŋgreŋq di unu. Aqa moma qujai di agi Kristus.

Galesia 6:8

Tamo bei na aqa areqalo namij dauryqas di aqa areqalo namij dena kumbra uge babtqas. Yim a padalqas. Ariya tamo bei a Qotei aqa Mondor aqa kumbra dauryqas di Mondor na a ŋambile yimqa a so bole gaigai sqas.

Efesus 4:13

Kristus aqa wau di gilsi gilsim bunuqna iga Kristen tamo uŋgasari kalil iga a qa gago areqalo siŋgilaboletosim koba na are qujaitosim sqom. Sosim bati deqa iga kalil Qotei aqa Ŋiri qa bole qalieqom. Kumbra dena iga tulaŋ boleoqnsim siŋgilaoqnsim Kristus aqa segi kumbra bole keretosim dauryqom.

Kolosi 3:10

Niŋgi so bunujq di unub. Qotei a segi na nuŋgo so bunuj di gereiyej. Osiq a na gaigai niŋgi powo bole eŋgeqnu. Qotei a na niŋgi a bul sqa marsiq deqa nuŋgo so bunuj di gereiyetŋgej.

Hibru 12:10

Gago mandam qaji abu naŋgi sokiñala sosib naŋgo segi areqalo dauryosib iga tingitgoqneb. Ariya Qotei a na iga tulaŋ aqaryaigwajqa deqa marsiq iga tingitgeqnu. Yim iga aqa segi kumbra boleq di sqajqa deqa.

Hibru 9:15

Yesus aqa leŋ na iga aqaryaigej deqa iga Qotei aqa ŋamgalaq di tamo bole unum. Aqa wau dena a Qotei aqa anjam bunuj siŋgilatqa osiqa Qotei ti iga ti gago ambleq di tigelejunu. Tamo uŋgasari naŋgi anjam namij aqa sorgomq di sosib bati deqa naŋgi une yoqnsib laqneb. Onaqa Yesus a naŋgi qa moisiq wau dena a naŋgi olo awainjrsiqa naŋgo une kobotetnjrej. Deqa tamo uŋgasari kalil Qotei na metnjreqnaq qusib dauryeqnub qaji naŋgi ŋambile gaigai sqab. Ŋambile di agi Qotei a nami aqa aŋgro naŋgi enjrqa marej.

Jems 1:27

Iga Kristen tamo uŋgasari iga kumbra bole endeqaji yoqnqom. Iga na aŋgro mandum naŋgi ti uŋa qobul naŋgi ti geregereinjroqnsim naŋgo gulube kalil qoboiyetnjroqnqom. Osim iga gago segi walwel geregere taqatosim mandam endeqa kumbra jigat kalil uratekritqom. Iga kumbra degsi yoqnqom di iga Qotei aqa ŋamgalaq di Kristen tamo boledamu une saiqoji sqom.

2 Pita 1:1

E Saimon Pita. E Yesus Kristus aqa wau tamo. A na e qariŋbej deqa e aqa anjam marsim laqnum. Kristus a gago Qotei. A na iga padalo sawaq dena eleŋej. Niŋgi ti iga ti gago areqalo qujai. Agi iga kalil Yesus qa gago areqalo siŋgilateqnum. Yesus Kristus a kumbra tiŋtiŋ yeqnu qaji tamo. Aqa kumbra dena niŋgi a qa nuŋgo areqalo siŋgilateqnub. Agi iga a qa gago areqalo siŋgilateqnum dego kere.

2 Pita 3:13

Ariya Qotei a nami endegsi marej, “E na laŋ bunuj ti mandam bunuj ti olo gereiyqai.” A degsi marej deqa iga di unqajqa tariŋoqnsim unum. Laŋ bunuj ti mandam bunuj ti dia kumbra bole tiŋtiŋ gaigai sqas.

2 Pita 3:9

Tamo qudei naŋgi endegsib mareqnub, “Tamo Koba Qotei aqa anjam nami marej qaji di a olo dauryqajqa tariŋoqnsiq laŋa sokobaiyeqnu.” Di sai. A na tamo naŋgi padaltnjrqajqa arearetosaieqnu. A na tamo kalil naŋgi are bulyqajqa marsiq deqa a jiŋga na niŋgi qa tariŋoqnsiq unu.

1 Jon 2:25

Nami Kristus a na iga endegsi mergonaq quem, “E na niŋgi ŋambile eŋgitqa niŋgi ŋambile gaigai sqab.”

1 Jon 3:2

O ijo kadoi bole, bini iga Qotei aqa segi aŋgro tiŋtiŋ unum. Ariya mondoŋ iga kiersi sqom di iga qalieosaiunum. Ariya iga qalie, Kristus a olo bamqa iga a unsimqa iga a bul sqom.