2 Pita 1:12 - Yesus Aqa Anjam Bole

¹² Bole, niŋgi ijo anjam bole di qalieonub deqa agi niŋgi siŋgila na ojejunub. Ariya niŋgi anjam deqa olo are walŋgaim deqa e bati gaigai niŋgi olo merŋgwajqa are qaleqnum.

2 Pita 1:12 ပူးပေါင်းရင်းမြစ်များ

Aposel 16:5

Bati deqa Pol wo Sailas wo naŋgi na Yesus aqa tamo uŋgasari naŋgi itnjroqnsibqa Qotei aqa anjam minjreqnab anjam dena naŋgo are siŋgilatetnjroqnej. Deqa bati gaigai tamo uŋgasari gargekoba naŋgi are bulyoqnsibqa Yesus aqa tamo uŋgasari naŋgo miligiq aieqnab naŋgi tulaŋ kobaoqneb.

Filipai 3:1

Ariya was qu, e ijo anjam getentqai. E anjam qujai bei unu. Anjam agiende. Niŋgi Tamo Koba Yesus qa tulaŋ areboleboleiŋgim soqniye. E anjam di olo neŋgreŋyosiy niŋgi qa qariŋyqa asgibosaieqnu. Di kiyaqa? E are qalonum, anjam dena niŋgi aqaryaiŋgwas.

Kolosi 2:7

Mandam na ŋam jirim ojesonaqa ŋam a siŋgila na tigelejunu dego kere niŋgi Kristus osib nuŋgo are miligiq di siŋgilatosib aqa kumbra dauryoqniye. Kristus aqa anjam bole iga nami niŋgi merŋgoqnem qaji di niŋgi osib nuŋgo areqaloq di siŋgilatosib soqniye. Osib niŋgi gaigai Qotei biŋiyoqniye.

1 Timoti 4:6

O Timoti, ijo anjam di ni na Kristen was qu naŋgi olo minjroqne. Ni minjroqnqam di ni Kristus Yesus aqa wau tamo boledamu sqam. Deqa anjam bole ni ino areqaloq di siŋgilatejunum qaji dena ti powo bole ni osim dauryeqnum qaji dena ti ni olo torei siŋgilatmesqas.

2 Timoti 1:6

Nami e ijo baŋ ino gateq di atnamqa Qotei na ni siŋgila emej. Yim ni aqa wau ojqajqa deqa. Deqa e olo ino areqalo tigeltetmitqa ni siŋgila deqa are qalsim ino wau di siŋgilat. Tamo a ŋam puyim puloŋosim kobaqas dego kere ni na ino wau di olo siŋgilatim kobaqas.

Hibru 10:32

Ariya niŋgi are qaliye. Nami Qotei na nuŋgo areqalo suwaŋtetŋgonaqa bati deqa jeu tamo naŋgi na gulube ti jaqatiŋ ti gargekoba niŋgi eŋgoqneb. Ariya bati deqa niŋgi siŋgila na tigeloqnsibqa gulube di gotraŋyoqneb. Di niŋgi keretoqneb.

Hibru 13:9

Deqa tamo qudei naŋgi bosib anjam utru segi segi na nuŋgo are tigeltetŋgibqa niŋgi naŋgo anjam di dauryaib. Osib Qotei aqa gam urataib. Qotei a iga qa are tulaŋ boleiyeqnu anjam dena iga gago are siŋgilatoqnqom. Tamo qudei naŋgo iŋgi uyo qa anjam mareqnub. Anjam di gisaŋ. Anjam di laŋa jejamu qa anjam. Deqa anjam dena iga gago are siŋgilatqa keresai. Tamo uŋgasari naŋgi iŋgi uyo qa anjam di dauryeqnub ariya kumbra dena naŋgi yala aqaryainjrosaieqnu.

1 Pita 5:10

Qotei a bati gaigai iga qa are tulaŋ boleiyeqnu. A Kristus Yesus aqa ñam na niŋgi metŋgej deqa mondoŋ niŋgi Kristus ombla aqa riaŋ ti so bole gaigai sqab. Deqa niŋgi mandamq endia sokiñala jaqatiŋ oqnsib koboamqa Qotei a na niŋgi olo boletŋgsim siŋgilatŋgimqa niŋgi gaigai siŋgila na tigelesqab.

1 Pita 5:12

Anjam truquyala endi Sailas na e aqaryaibosiqa neŋgreŋyosiq niŋgi qa qariŋyqo. E qalieonum, Sailas a gago Kristen was bole. O was qu, Qotei a niŋgi qa are tulaŋ boleiyeqnu. E segi qalieo-num, Qotei a bati gaigai aqa kumbra di niŋgi osorŋgeqnu. E aqa kumbra deqa osim anjam endi neŋgreŋyonum. Deqa ijo anjam endena e na nuŋgo are tigeltetŋgitqa niŋgi siŋgila na tigelesoqniye.

2 Pita 1:13

E mandamq endi sosiy nuŋgo areqalo tigeltetŋgitqa niŋgi ijo anjam deqa olo are qalqajqa deqa e niŋgi merŋgonum. E are qalonum, ijo kumbra di bole.

2 Pita 1:15

Deqa e siŋgila na anjam di niŋgi geregere merŋgoqnqai. Yim bunuqna e moiitqa niŋgi ijo anjam deqa gaigai are qaloqnsib sqab.

2 Pita 3:1

O ijo was bole, e nami anjam neŋgreŋyosim niŋgi qa qariŋyem agi bini olo anjam qariŋyonum. E nuŋgo are tigeltetŋgitqa niŋgi iŋgi bole bole mondoŋ brantqas qaji deqa olo are qalqajqa deqa osim neŋgreŋyonum. Nami Qotei aqa medabu o qaji tamo naŋgi iŋgi deqa anjam palontoqnsib laqneb. Tamo Koba Yesus agi iga eleŋej qaji aqa dal anjam qa dego niŋgi are qalqajqa deqa e anjam endi neŋgreŋyonum. Dal anjam di Yesus aqa wau tamo naŋgi nami niŋgi qa bosib palontosib niŋgi merŋgeqnab quoqneb.

2 Pita 3:17

O ijo was bole, niŋgi diŋo bati qa anjam di bole qalieonub deqa niŋgi geregere ŋam atoqniye. Niŋgi ŋam atqasai di dal anjam gotraŋyo qaji tamo naŋgi bosib niŋgi gisaŋgosib titŋgibqa niŋgi siŋgila na tigelesqa uratosib uloŋo uge.

1 Jon 2:21

Niŋgi anjam bole qaliesai e deqa osim anjam endi neŋgreŋyosai. Niŋgi anjam bole qalieonub e deqa osim anjam endi neŋgreŋyonum. Niŋgi qalie, iga anjam bole marqom dena iga gisaŋ anjam bei babtqa keresai.

2 Jon 1:2

Anjam bole di gagoq di unu. Anjam di bati gaigai gagoq di sqas. Deqa iga niŋgi tulaŋ qalaqalaiŋgeqnum.

Jut 1:17

Ariya ijo was bole, niŋgi kumbra mondoŋ brantqas qaji deqa are qaloqniye. Nami gago Tamo Koba Yesus Kristus a na aqa anjam maro tamo naŋgi qariŋnjreqnaqa niŋgi qa boqnsib anjam merŋgoqneb. Naŋgo anjam deqa niŋgi olo are qaloqniye.

Jut 1:3

O ijo was bole, Qotei na iga kalil padalo sawaq dena eleŋej wau di aqa utru e na neŋgreŋyosiy niŋgi qa qariŋyqajqa are koba unu. Ariya e anjam bei dego neŋgreŋyosiy niŋgi qa qariŋyqa are qaleqnum. Anjam agiende. Jeu tamo naŋgi bosib Kristus aqa anjam bole ugeugeiyqa laqnib nuŋgo areqalo Kristus qa siŋgilateqnub qaji di niŋgi olo siŋgila na ojsibqa jeu tamo naŋgi di gotraŋnjroqniye. Iga Qotei aqa tamo uŋgasari unum deqa Qotei na gago areqalo tigeltetgonaqa iga Kristus aqa anjam bole gago areqaloq di siŋgilatejunum. Deqa tamo bei na anjam di olo bulyqa keresai.

Jut 1:5

Niŋgi Tamo Koba Qotei qa qalie. Nami Israel tamo uŋgasari naŋgi Isip sawaq di sonabqa Qotei na naŋgi joqsiq gilej. Joqsiq gilsiqa ariya tamo uŋgasari a qa naŋgo areqalo siŋgilatosai qaji naŋgi a na padaltnjrej. Niŋgi di nami qalieeb. Ariya niŋgi deqa olo are qalqajqa deqa e nuŋgo areqalo tigeltetŋgonum.