2 Korin 8:19 - Yesus Aqa Anjam Bole

¹⁹ Di segi sai. Kristen tamo uŋgasari qure qure kalilq di unub qaji naŋgi na was di gilteb deqa a iga ti koba na walweloqnsim silali koroiyqajqa wau di taqateqnum. Wau di aqa utru agiende. Qotei a Kristen naŋgi qa are tulaŋ boleiyosiq aqaryainjrej deqa naŋgi silali di koroiyeb. Wau di iga na taqateqnum. Di kiyaqa? Iga wau dena Tamo Koba Yesus aqa ñam soqtimqa tamo kalil naŋgi unsib qalieqab, bole, iga wau di yqajqa are tulaŋ pruggeqnu.

2 Korin 8:19 ပူးပေါင်းရင်းမြစ်များ

Aposel 14:23

Ariya qure kalil naŋgi aiyel nami laqneb qaji deq olo giloqnsibqa Kristen gate ateleŋoqneb. Osib iŋgi ti ya ti uratosib naŋgi qa pailyosib Tamo Koba Yesus agi naŋgi a qa nami naŋgo areqalo siŋgilateb qaji aqa baŋq di ateb.

Aposel 15:22

Jems a na naŋgi kalil anjam degsi minjrnaqa Yesus aqa aŋgro 12-pela naŋgi ti Kristen gate kokba ti Yesus aqa tamo uŋgasari kalil naŋgi ti anjam di qusib kereonaq koba na gereiyeb. Gereiyosib naŋgo ambleq dena tamo aiyel giltnjreb. Tamo aiyel di qariŋnjrib Pol wo Barnabas wo daurnjrsib Antiok qureq aisib anjam gereiyeb qaji di Yesus aqa tamo uŋgasari Antiok qureq di soqneb qaji naŋgi deqa sainjrqajqa giltnjreb. Tamo aiyel giltnjreb qaji naŋgo ñam Judas aqa ñam bei Barsabas wo Sailas wo. Naŋgi aiyel Kristen gate kokba soqneb.

Aposel 15:25

Deqa iga kalil koroosim areqalo qujaitosim tamo aiyel giltnjrsimqa agi niŋgi qa qariŋnjronum. Naŋgo ñam Judas wo Sailas wo. Naŋgi aiyel gago was boledamu aiyel Barnabas wo Pol wo naŋgi daurnjrsib nuŋgoq bonub.

Aposel 19:22

Pol a degsi marsiqa tamo aiyel a koba na wauo qaji Timoti wo Erastus wo naŋgi qariŋnjrnaqa namoosib Masedonia sawaq gileb. Pol a segi Esia sawaq di soqnej. A bunuqna Masedonia sawaq gilqa marsiq deqa naŋgi aiyel namoqna qariŋnjrnaq gileb.

Aposel 19:29

Naŋgi anjam degsib mareqnabqa tamo uŋgasari kalil Efesus qureq di soqneb qaji naŋgi qusibqa naŋgi dego tulaŋ murqumyoqnsibqa Masedonia tamo aiyel Pol dauryosib beb qaji naŋgo ñam Gaius wo Aristarkus wo naŋgi ojsib giriŋnjrosib qure deqa gate kokba naŋgo ulatamuq dia tigeltnjrqa marsib gurgur ti koro sawaq joqsib gileb.

Rom 5:11

Anjam bei dego unu. Gago Tamo Koba Yesus Kristus aqa siŋgila na iga Qotei ombla geregere unum deqa iga tulaŋ areboleboleigeqnu.

Rom 5:3

Ariya iga deqa segi areboleboleigosai. Iga gulube oqnsim unum deqa ti areboleboleigeqnu. Di kiyaqa? Iga qalieonum, gulube dena gago are siŋgilatetgeqnaqa iga siŋgila na tigeleqnum.

2 Korin 4:15

E degsi maronum. Di kiyaqa? E qalieonum, kumbra kalil gagoq di branteqnu qaji di niŋgi aqaryaiŋgwajqa deqa. Qotei a iga qa are tulaŋ boleiyeqnu aqa kumbra di tamo uŋgasari gargekoba naŋgi qa gileqnu. Deqa tamo uŋgasari naŋgi di Qotei aqa kumbra di unsib a tulaŋ biŋiyoqnsib aqa ñam soqtoqnqab.

2 Korin 8:11

Ariya bini niŋgi wau di olo kobotqa siŋgilaoiye. Niŋgi degyqab di bolequja. Nami niŋgi wau di yqajqa are tulaŋ prugŋgoqnej. Deqa bini niŋgi silali yala soqnim siŋgilaosib wau di kobotiye.

2 Korin 8:12

Niŋgi silali koroiyqa are soqnim niŋgi koroiyiye. Yim Qotei a niŋgi qa tulaŋ areboleboleiyqas. Niŋgi silali saiamqa di uŋgum. Koroiyaib. Qotei a deqa ŋiriŋqasai. Niŋgi silali soqnim di niŋgi koroiyiye.

2 Korin 8:20

Iga silali di taqateqnum deqa tamo qudei naŋgi iga qa yomuqab kio. Degaib deqa iga na was bei di osim koba na silali di taqateqnum.

2 Korin 9:2

E qalieonum, niŋgi wau di yqajqa are tulaŋ prugŋgeqnu. Deqa e gaigai Masedonia Kristen naŋgo ŋamgalaq dia nuŋgo ñam soqteqnum. Osim endegsi minjreqnum, “Wausau bei nami tamo uŋgasari Akaia sawaq di unub qaji naŋgi silali koroiyqajqa wau di tigeltqa mareb.” O was qu, niŋgi wau di yqajqa tulaŋ siŋgilaeqnub deqa e na Masedonia Kristen naŋgi minjreqnam quoqnsib naŋgi gargekoba dego wau di yqajqa are prugnjreqnu.

2 Korin 9:8

Qotei a na iŋgi bole bole niŋgi keretsim eŋgoqnqa kere. Yim niŋgi iŋgi koba ti sqab. Deqa niŋgi gaigai iŋgi iŋgi kere na sosibqa dena wau bole bole yoqniye.