2 Korin 6:6 - Yesus Aqa Anjam Bole

⁶ Iga gaigai kumbra bole jiga saiqoji dauryeqnum. Iga Qotei qa qalie bole unum. Iga urur minjiŋ oqosaieqnu. Iga na tamo uŋgasari naŋgi kumbra bole enjreqnum. Iga Qotei aqa Mondor Bole aqa siŋgila oqnsim unum. Iga na tamo kalil naŋgi qalaqalaiyo kumbra osornjreqnum. Iga laŋa medabu na naŋgi qalaqalainjrosaieqnum.

2 Korin 6:6 ပူးပေါင်းရင်းမြစ်များ

Rom 12:9

O was qu, niŋgi na tamo uŋgasari naŋgi bole qalaqalainjroqniye. Niŋgi gisaŋ na naŋgi qalaqalainjraib. Niŋgi kumbra uge kalil torei uratosib kumbra bole segi beteryosib yoqniye.

1 Korin 12:8

Qotei aqa Mondor na tamo qudei naŋgi siŋgila enjreqnu deqa naŋgi areqalo bole babtoqnsib tamo uŋgasari naŋgi minjreqnub. Mondor qujai dena tamo qudei naŋgi siŋgila enjreqnaqa naŋgi Qotei aqa qalie bole babtoqnsib tamo uŋgasari naŋgi osornjreqnub.

1 Korin 13:4

Tamo naŋgi qalaqalaiyo kumbra dauryqab di naŋgi naŋgo was naŋgi qa urur minjiŋ oqoqnqasai. Naŋgi lawo na tamo kalil naŋgi kumbra bole enjroqnqab. Naŋgo was bei a iŋgi iŋgi koba ti soqnim naŋgi a qa are ugeinjrqasai. Naŋgi naŋgo segi ñam soqtoqnqasai dego.

1 Korin 2:16

Agi Qotei aqa anjam bei nami endegsib neŋgreŋyeb unu, “Tamo yai a Qotei aqa areqalo qalieqa kere? Osim a gam osoryqa kere? Tamo dego bei sosai.” Ariya was qu, iga mandam qaji tamo sai. Kristus aqa areqalo gagoq di unu deqa iga Qotei aqa areqalo qalieqa kere.

1 Korin 2:4

Anjam e palontoqnem qaji di e powo tamo naŋgo kumbra na palontosai. E ijo segi powo kobaquja na palontosai. Yim dena niŋgi are bulyqajqa e deqa are qalosai. E Qotei aqa Mondor aqa siŋgila niŋgi osorŋgoqnem.

2 Korin 1:23

O was qu, Qotei na ijo anjam siŋgilateqnu deqa e aqa ñam na bole maronum, e niŋgi gulube eŋgaim deqa e olo Korin qureq bosai.

2 Korin 11:11

E kiyaqa ijo segi ñam soqteqnum? E niŋgi qalaqalaiŋgosaieqnum deqa kio e ijo segi ñam soqteqnum? Deqa sai. Qotei a qalieqo, e niŋgi tulaŋ qalaqalaiŋgeqnum.

2 Korin 11:4

E ulaonum. Di kiyaqa? E qalieonum, tamo qudei naŋgi niŋgi qa boqnsib gisaŋgoqnsib Yesus bei qa anjam palontosib merŋgeqnub. Yesus deqa iga nami anjam palontosaioqnem. Tamo naŋgi di mondor bei qa dego niŋgi merŋgeqnub. Di gisaŋ mondor. Mondor deqa iga nami niŋgi merŋgosaioqnem. Yesus aqa anjam bole iga nami niŋgi merŋgoqnem qaji di dego tamo qudei naŋgi bulbulyoqnsib olo anjam bei niŋgi merŋgeqnub. E qalieonum, naŋgi anjam di niŋgi merŋgeqnab niŋgi quoqnsib bole edegoqnsib dauryeqnub. O was qu, niŋgi degaib.

2 Korin 11:6

E anjam marqajqa medabu gulubeibeqnu di uŋgum. E powo qa truquosaieqnum. Agi ijo kumbra kalil e nuŋgo ambleq di yoqnem qaji di niŋgi unoqnsib dena poiŋgoqnej, e powo koba ti unum.

2 Korin 12:15

E na ijo iŋgi iŋgi kalil ti ijo jejamu dego niŋgi torei eŋgwajqa areboleboleibqo. E niŋgi tulaŋ qalaqalaiŋgeqnum. Ariya kiyaqa niŋgi kamba olo e kiñala segi qalaqalaibeqnub?

2 Korin 13:10

Tamo Koba Qotei a na e siŋgila ebej deqa e aqa wau taqateqnum. E isaq endi sosim anjam neŋgreŋyonum. Di kiyaqa? E niŋgi qa bosiy e nuŋgo kumbra tingitetŋgwa osiy e anjam siŋgila na merŋgwasai. Tamo Koba Qotei na e niŋgi siŋgilatŋgwajqa deqa wau ebej. E niŋgi ugetŋgwajqa deqa wau ebosai.

2 Korin 2:10

Ariya niŋgi na tamo di aqa une kobotetqab di e kamba dego aqa une kobotetqai. E tamo bei aqa une kobotetqai di e Kristus aqa ŋamgalaq dia kobotetqai. E niŋgi aqaryaiŋgwa osiy deqa kobotetqai.

2 Korin 2:4

Bole, e are gulube ti akam ti sosim deqa anjam di neŋgreŋyem. Ariya e niŋgi are gulube eŋgwa osim anjam di neŋgreŋyosai. E niŋgi tulaŋ qalaqalaiŋgeqnum di niŋgi qalieqajqa deqa are qalsim anjam di neŋgreŋyem.

2 Korin 3:3

Gago wau na Kristus a anjam di neŋgreŋyosiq qariŋyej. Neŋgreŋ di boleq di unu. A Kristus aqaq na bej. Neŋgreŋ di agi niŋgi segi. Kristus a tamo bei aqa wau na neŋgreŋyosai. A Qotei ŋambile gaigai unu qaji aqa Mondor aqa wau na neŋgreŋyej. A meniŋq di neŋgreŋyosai. A tamo uŋgasari naŋgo are miligiq di neŋgreŋyej.

2 Korin 4:6

Tulaŋ nami Qotei a iŋgi iŋgi kalil gereiyqa osiqa a endegsi marej, “Ambruq dena suwaŋ brantqas.” Ariya bunuqna Qotei aqa suwaŋ di iga qa bosiqa gago are miligi suwantetgej deqa iga Kristus aqa ulatamu uneqnum. Dena iga suwaŋ bole unsimqa Qotei aqa riaŋ ti aqa siŋgila ti geregere poigeqnu.

2 Korin 7:2

Niŋgi nuŋgo are miligi waqtosib iga qalaqalaigoqniye. Niŋgi iga qa qalie. Iga tamo bei kumbra uge bei yosaioqnem. Iga tamo bei ugeugeiyosaioqnem. Iga tamo bei aqa iŋgi iŋgi gisaŋ na yaiyosaioqnem.

Galesia 3:2

Ijo nenem qujai agiende. Niŋgi gam kie na Qotei aqa Mondor eb? Niŋgi dal anjam dauryeb gam dena Mondor eb kio niŋgi Kristus aqa anjam bole qusib a qa nuŋgo areqalo siŋgilateb gam dena niŋgi Mondor eb kio?

Galesia 3:5

Qotei a na aqa Mondor niŋgi eŋgej deqa a nuŋgo ambleq di maŋwa kokba babteleŋeqnu. A kiyaqa degyeqnu? Niŋgi dal anjam dauryeqnub a deqa are qalsiq degyeqnu kio niŋgi Kristus aqa anjam bole qusib a qa nuŋgo areqalo siŋgilateb a deqa are qalsiq degyeqnu kio? Niŋgi segi mariye.

Galesia 5:22

Ariya Qotei aqa Mondor na iga kumbra bole endeqaji yqajqa are tigeltetgeqnu. Qalaqalaiyo kumbra dauryoqa, areboleboleiyoqa, lawo kumbra yoqa, was naŋgi aqaryainjroqnsim kumbra bole bole enjroqa, kumbra bole tiŋtiŋ dauryoqa,

Efesus 3:4

Ariya niŋgi anjam endi sisiyosib endegsib qalieqab, Kristus aqa anjam nami ulitesoqnej qaji di aqa utru e geregere poibeqnu.

Efesus 4:2

Osib niŋgi Kristen tamo uŋgasari naŋgo sorgomq di geregere sosibqa naŋgi lawo kumbra enjroqniye. Naŋgi niŋgi une bei eŋgibqa niŋgi kamba olo naŋgi qa urur minjiŋ oqaiq. Niŋgi olo naŋgi qalaqalainjroqnsib gulube naŋgi na niŋgi eŋgeqnub qaji di qoboiyetnjroqniye.

Efesus 4:32

Osib nuŋgo Kristen was naŋgi kumbra bole bole enjroqnsib naŋgi qalaqalainjroqnsib naŋgo une kobotetnjroqniye. Qotei a Kristus aqa ñam na nuŋgo une kalil kobotetŋgej deqa niŋgi na kamba olo nuŋgo was naŋgo une dego kobotetnjroqniye.

Kolosi 1:27

Qotei aqa segi areqalo na uli anjam di boleq atsiqa iga aqa segi tamo uŋgasari iga osorgej. Yim iga endegsi poigwajqa, Qotei aqa uli anjam di tulaŋ boledamu. Anjam dena Qotei na tamo uŋgasari kalil sawa bei beiq di unub qaji naŋgi aqaryainjrqas. Uli anjam di aqa damu agiende. Kristus a nuŋgo ambleq di unu. A na niŋgi eleŋosim laŋ qureq osi oqimqa dia niŋgi aqa iŋgi bole bole oqab.

Kolosi 2:3

Qalie ti powo ti kalil di Kristus aqaq di uliejunu.

Kolosi 3:12

Qotei a niŋgi aqa segi tamo uŋgasari sqa marsiq giltŋgej deqa a na niŋgi tulaŋ qalaqalaiŋgeqnu. Deqa niŋgi kumbra endegyoqniye. Niŋgi nuŋgo Kristen was naŋgi qa duloqnsib kumbra bole bole enjroqniye. Osib niŋgi nuŋgo segi ñam tentoqnsib tamo naŋgi lawo na gereinjroqniye. Tamo qudei naŋgi na niŋgi une bei eŋgibqa niŋgi kamba olo naŋgi qa urur minjiŋ oqaiq.

1 Tesalonaika 2:10

Iga na niŋgi tamo uŋgasari Kristus qa nuŋgo areqalo siŋgilateqnub qaji niŋgi kumbra bole osorŋgoqnem. Iga kumbra uge bei osorŋgosai. Iga Qotei aqa ŋamgalaq dia kumbra bole tiŋtiŋ nuŋgo ambleq di yoqnem. Di niŋgi qalie. Qotei a dego qalie.

1 Timoti 4:12

Tamo qudei naŋgi ni qa mareqnub, ni aŋgro kiñala. O Timoti, tamo naŋgi dena ino ñam ugetetmaib. Ni kumbra bole segi yoqnimqa Kristen tamo naŋgi na ni numoqnsib daurmoqnqab. Ino anjam maro na ti ino walwel na ti ni kumbra bole segi yoqne. Osim qalaqalaiyo kumbra dauryoqnsim Qotei qa ino areqalo siŋgila-toqnsim Qotei aqa ŋamgalaq di tamo bole une saiqoji soqne.

1 Timoti 5:2

Uŋa qeli naŋgi dego tingitnjrqa osimqa naŋgi ino ai bul lawo na tingitnjroqne. Duŋgeŋge naŋgi dego tingitnjrqa osimqa naŋgi ino jaja bul lawo na tingitnjroqne. Ni Qotei aqa ŋamgalaq di kumbra bole na duŋgeŋge naŋgi tingitnjroqne.

2 Timoti 3:10

Ariya Timoti, ni nami e ombla soqnem deqa ijo anjam kalil e na tamo uŋgasari naŋgi minjre minjre laqnem qaji di ni qalie. Ijo walwel ti ijo kumbra ti di ni qalie. E Qotei qa ijo areqalo siŋgilatoqnsim ijo are miligi dego gaigai siŋgilatoqnsim waukobaoqnsim tamo uŋgasari naŋgi qalaqalainjroqnsim siŋgila na tigeloqnsim gulube qoboiyeqnum di dego ni qalie.

2 Timoti 4:2

Deqa ni Kristus aqa anjam palontqajqa siŋgilaoqne. Yimqa tamo qudei naŋgi ino anjam quqwa arearetnjroqnqas. Ariya tamo qudei naŋgi ino anjam quqwa asginjroqnqas. Di uŋgum. Ni gaigai Kristus aqa anjam naŋgi siŋgila na minjroqne. Osim anjam dena naŋgo are qametnjroqnsim naŋgo areqalo tigeltetnjroqne. Yim naŋgi are bulyoqnsib Qotei aqa kumbra dauryoqnqab. Deqa ni gaigai kumbra lawo na naŋgi gereinjroqnsim Qotei aqa kumbra naŋgi osornjroqne.

Taitus 2:7

O Taitus, ni kumbra bei yqa osimqa kumbra bole segi yoqne. Yimqa aŋgro meli naŋgi ino kumbra di unsib dauryoqnqab. Ariya ni gisaŋ anjam maroqnaim. Ni anjam palontqa osimqa anjam bole segi palontoqne. Alaŋ anjam koba maroqnaim. Diqaim. Gaigai kumbra bole segi yoqnsim anjam bole palontoqne.

Jems 3:17

Ariya tamo naŋgi Qotei aqaq dena areqalo bole ti powo ti eqnub qaji naŋgi kumbra tulaŋ boledamu yeqnub. Naŋgi kumbra jigat dauryosaieqnub. Naŋgi lawo na sosib tamo naŋgi jiŋga na gereinjroqnsib naŋgi qa duloqnsib kumbra bole bole enjreqnub. Naŋgi na tamo kalil naŋgi turtnjroqnsib kumbra qujai enjreqnub. Naŋgi gisaŋoqnsib laŋa babaŋ na kumbra bole dauryosaieqnub. Naŋgi bole dauryeqnub.

1 Pita 1:12

Ariya Qotei a na naŋgi kamba endegsi minjrej, “Anjam niŋgi mareqnub qaji di aqa damu nuŋgo bati qa brantqasai. A bunuqna brantqas.” O was qu, Qotei na niŋgi oqajqa anjam di Qotei aqa medabu o qaji tamo naŋgi maroqneb. Ariya bunuqna Qotei na aqa Mondor Bole qariŋyonaqa laŋ goge dena aisiq Qotei aqa anjam maro tamo naŋgi siŋgilatnjroqnej. Yeqnaqa naŋgi Kristus aqa anjam bole palontoqnsib niŋgi merŋgoqneb. Qotei aqa laŋ aŋgro naŋgi dego kumbra bole kalil Qotei na niŋgi eŋgeqnu qaji deqa geregere qalieqa osib utru ŋameqnub.

1 Pita 1:22

Niŋgi nami Qotei aqa anjam bole dauryoqneb. Kumbra dena niŋgi Qotei aqa ŋamgalaq di tamo bole une saiqoji soqneb. Utru deqa bini niŋgi na Qotei aqa tamo uŋgasari naŋgi tulaŋ qalaqalainjreqnub. Ariya kumbra di niŋgi olo torei siŋgilatosib nuŋgo Kristen was naŋgi siŋgila na qalaqalainjroqniye.

1 Jon 3:18

O ijo aŋgro kalil, niŋgi quiye. Iga laŋa anjam maro na segi Kristen tamo naŋgi qalaqalainjrqom di keresai. Iga naŋgi bole qalaqalainjrsim kumbra bole bole enjroqnqom.