2 Korin 6:5 - Yesus Aqa Anjam Bole

⁵ Gago jeu tamo naŋgi toqoŋ na iga lugoqnsib tonto talq di breigeqnub. Osib murqumyoqnsib iga qa anjam uge uge mareleŋeqnub. Iga gaigai ŋes na ti jaqatiŋ na ti waukobaeqnum. Iga geregere ŋeiosaieqnum. Iga bati gaigai mam ti laqnum.

2 Korin 6:5 ပူးပေါင်းရင်းမြစ်များ

Matyu 14:10

Deqa a na aqa qaja tamo naŋgi qariŋnjrnaqa gilsib tonto talq dia Jon aqa kakoro genteteb.

Matyu 14:3

Herot a na nami aqa aube Filip aqa ŋauqali Herodias yaiysiq ej. Deqa Jon na Herot minjoqnej, “Ni ino segi was aqa uŋa em di kumbra bolesai. Ni kumbra ugetonum.” Jon a na Herot degsi minjoqnej. Deqa Herot a Jon qa minjiŋ oqetonaqa aqa qaja tamo qudei naŋgi qariŋnjrnaqa gilsib Jon ojsib sil na qosisib tonto talq waiyeb.

Matyu 9:15

Onaqa Yesus na kamba minjrej, “Tamo bei a uŋa baŋ ojqa bati qa a aqa was naŋgi ti soqnimqa naŋgi are gulubeinjrqas e? Sai. Ariya bunuqna naŋgo was yainjribqa bati deqa naŋgi are gulubeinjrimqa qurieŋosib sqab.

Aposel 13:3

Onaqa naŋgi Qotei pailyqa osibqa iŋgi ti ya ti uratosib naŋgo aiyel gateq di baŋ atsib pailyosib Qotei aqa Mondor na anjam minjrej qaji di naŋgi dauryosib naŋgi aiyel qariŋnjrnab gileb.

Aposel 14:19

Onaqa Juda tamo qudei naŋgi Antiok dena ti Aikoniam dena ti walwelosib Listra qureq beb. Bosib dia tamo uŋgasari naŋgo are ugetetnjrnabqa naŋgi tigelosib Pol meniŋ na qaleb. Osib a giriŋyosib gilsib qure qalaq di ateb. Naŋgi are qaleb, “A moiqo.”

Aposel 14:23

Ariya qure kalil naŋgi aiyel nami laqneb qaji deq olo giloqnsibqa Kristen gate ateleŋoqneb. Osib iŋgi ti ya ti uratosib naŋgi qa pailyosib Tamo Koba Yesus agi naŋgi a qa nami naŋgo areqalo siŋgilateb qaji aqa baŋq di ateb.

Aposel 17:5

Naŋgi daurnjrnab Juda tamo kokba naŋgi unsib deqa minjiŋ oqetnjrnaqa tamo uge qudei naŋgi koro sawaq dena eleŋosib minjreb, “Niŋgi na tamo uŋgasari naŋgo are ugetetnjribqa naŋgi na Pol wo Sailas wo ojqab.” Degsi minjrnabqa naŋgi na tamo uŋgasari kalil naŋgo are ugetetnjrnabqa naŋgi murqumyoqnsibqa Pol wo Sailas wo naŋgi ojqa marsib gurgur ti Jeson aqa talq gileb. Gilsib dia naŋgi aiyel itnjrsib qure deqa gate kokba naŋgo ulatamuq dia tigeltnjrqa marsib aieb.

Aposel 20:31

Deqa niŋgi geregere ŋam atsib sosibqa ijo kumbra e bati gaigai nuŋgo ambleq di yoqnem qaji deqa are qalsib dauryoqniye. Agi wausau qalub e niŋgi koba na sosimqa niŋgi padalaib deqa qolo ti qanam ti Qotei aqa anjam niŋgi merŋgoqnsim akamoqnem. E wau di uratosaioqnem. Niŋgi ijo kumbra deqa geregere are qalsib dauryoqniye.

Aposel 23:10

Onaqa Sadyusi naŋgi anjam di qusibqa naŋgi tulaŋ ŋiriŋkobaosib Pol qalqajqa laqnabqa qaja tamo naŋgo gate koba a di unsiqa are qalej, “Naŋgi Pol ojsib aqa jejamu tulaŋ ugeugeiyqab.” A degsi are qalsiqa ulaosiq aqa qaja tamo naŋgi metnjrnaqa bosib Sadyusi naŋgo baŋq dena Pol yainjrsib naŋgo ŋeio talq olo osi gileb.

Aposel 23:35

Degsi minjnaqa Feliks na olo minjej, “Tamo naŋgi ino jejamuq di une qameqnub qaji naŋgi babqa e ino anjam geregere quqwai.” Osiqa qaja tamo naŋgi minjrnaqa naŋgi na Pol osib tamo koba Herot aqa talq di waiysib taqatoqneb.

Aposel 24:27

Wausau aiyel koboonaqa Feliks a Judia sawa taqato wau di uratonaqa tamo bei aqa ñam Porsius Festus a kamba Feliks aqa wau di osiqa Judia sawa taqatesoqnej. Onaqa Feliks a na Juda tamo kokba naŋgo are boletetnjrqajqa deqa a Pol tonto talq di uratonaq soqnej.

Aposel 26:10

E Jerusalem qureq dia kumbra uge di yoqnem. Agi atra tamo kokba naŋgi na e odbeqnabqa e na Qotei aqa tamo uŋgasari naŋgi ojeleŋoqnsim tonto talq di breinjroqnem. Juda tamo kokba naŋgi na naŋgi ñumsib moiotnjrqa mareqnabqa e dego naŋgi koba na areqalo qujaitosim maroqnem, ‘Naŋgi ñumsib moiotnjriye.’

Aposel 26:29

Onaqa Pol na minjej, “Ni endego are bulyqam di kere. Sokobaiyosim are bulyqam di dego kere. Deqa e ni qa ti tamo kalil endia sosib ijo anjam queqnub qaji naŋgi qa ti endegsi Qotei pailyeqnum, ‘O Abu, ni na naŋgi are bulyetnjrimqa naŋgi e unum degsib sqab. Ariya e sil na tontbeb unum naŋgi degsib sqajqa e ni pailmosai.’ O Mandor Koba Agripa, e degsim Qotei pailyeqnum.”

Aposel 28:30

Onaqa Pol aqa segi tal awaiyoqnej qaji dia wausau aiyel sonaqa tamo uŋgasari gargekoba naŋgi a unqajqa beqnabqa a na naŋgi joqoqnsiqa aqa talq dia koba na awooqnsib qairoqneb.

1 Korin 15:10

Ariya Qotei a e qa are boleiyej deqa bini e aqa anjam maro tamo unum. A e qa are boleiyej aqa kumbra di laŋa uloŋosai. E aqa kumbra di osim siŋgila na waukobaoqnsim Qotei aqa anjam maro tamo kalil naŋgi tulaŋ buŋnjreqnum. Ariya e ijo segi siŋgila na wau di yosaieqnum. Qotei a e qa are boleiyej deqa a na e siŋgila ebeqnaqa e wau di yeqnum.

1 Korin 4:11

Iga nami mam ti ya qar ti soqnem agi bini unum. Iga gara bolesai dego. Tamo qudei naŋgi na iga ugeugeigeqnub. Iga tal saiqoji.

1 Korin 7:5

Deqa niŋgi nuŋgo jejamu getentaib. Ariya bati bei niŋgi nuŋgo uŋa wo ombla areqalo qujaitosib pailyqa bati atsib di niŋgi nuŋgo jejamu getentosib pailyoqniye. Ariya bunuqna pailyo bati koboamqa niŋgi nuŋgo jejamu olo turtiye. Niŋgi degyqasai di niŋgi nuŋgo segi jejamu geregere taqatqa keresai deqa Satan a na niŋgi osim sambala kumbraq olo waiŋgwas.

2 Korin 11:27

E ŋes na ti jaqatiŋ na ti waukobaoqnem. Qolo gargekoba e waukobaoqnsim ŋeiosaioqnem. E mam ti laqnem. E ya qarboqnej. Bati gargekoba e iŋgi saiqoji soqnem. Bati gargekoba e yorbeqnaqa e ijo jejamu kabutqajqa gara saiqoji soqnem.

Efesus 3:1

Qotei na niŋgi kumbra tulaŋ boledamu eŋgej anjam di e marsim laqnem deqa jeu tamo naŋgi na e ojsib tonto talq endia ateb unum. E Pol. E na niŋgi sawa bei bei qaji tamo niŋgi aqaryaiŋgwa osim deqa Kristus Yesus aqa wau di ojeqnum. Utru deqa e tonto talq endi unum.

Filipai 1:13

Deqa tonto tal taqato tamo naŋgi ti tonto tamo kalil ti naŋgi qalieonub, e Kristus Yesus aqa wau ojeqnum deqa jeu tamo naŋgi na e tonto talq endia waibeb unum.

1 Tesalonaika 2:9

O was qu, niŋgi qalie, iga niŋgi koba na sosim Qotei aqa anjam bole niŋgi merŋgoqnem bati deqa iga waukobaoqnem. Iga na niŋgi gulube eŋgwa uratosim deqa iga gago segi baŋ na qanam ti qolo ti tulaŋ siŋgila na wauoqnsim dena gago segi iŋgi iŋgi awaiyosim uyoqnem. Niŋgi na iga silali qa aqaryaigwajqa iga deqa merŋgosaioqnem.

1 Timoti 4:10

Qotei agi ŋambile gaigai unu qaji a na tamo uŋgasari kalil naŋgi oqajqa waueqnu. Od, a na iga tamo uŋgasari a qa gago areqalo siŋgilateqnum qaji iga bole eleŋej koboqo. Mondoŋ a na iga joqsim laŋ qureq oqwas. Iga deq oqwajqa tariŋoqnsim a qa gago areqalo siŋgilate-junum. Utru deqa iga gaigai Qotei aqa wau siŋgila na ojeqnum.

2 Timoti 1:8

Deqa ni gago Tamo Koba Yesus aqa anjam marsim laqajqa jemaimaiq. E segi Yesus aqa anjam marsim laqnem deqa jeu tamo naŋgi na e ojsib tonto talq endia e waibeb unum. Deqa ni e qa dego jemaimaiq. Ni Qotei aqa siŋgila osim Yesus aqa anjam bole marsim laqne. Osim dena ni e ombla gulube oqnsim sqom.

2 Timoti 2:9

E anjam bole di mareqnum deqa jeu tamo naŋgi na e tamo uge bul nuboqnsib e gulube koba ebeqnub. Deqa naŋgi na e ojsib tonto talq endia waibeb unum. Ariya naŋgi Qotei aqa anjam getentqa keresai.

2 Timoti 4:5

Ariya Timoti, ni gaigai areqalo bole na sosimqa gulube ti jaqatiŋ ti qoboiyoqnsim siŋgila na tigelesoqne. Osim ni na Yesus aqa anjam bole tamo uŋgasari naŋgi minjroqnsim laqne. Ni naŋgi aqaryainjrqajqa wau ti unum deqa ni wau di yoqne.

Hibru 11:36

Ariya jeu tamo naŋgi na Qotei aqa tamo qudei naŋgi misiliŋnjroqnsib kumbaiŋnjroqneb. Osib naŋgi tonto talq di breinjroqnsib sil siŋgila koba dena naŋgi tontnjroqneb.

Hibru 13:17

Nuŋgo Kristen gate naŋgi na nuŋgo qunuŋ taqateqnub. Deqa mondoŋ Qotei a naŋgo wau deqa nenemnjrimqa naŋgi kamba a minjqab. Deqa niŋgi naŋgo medabu geregere dauryoqnsib naŋgo sorgomq di soqniye. Niŋgi degyqab di naŋgi arebolebole na niŋgi taqatŋgwab. Naŋgi are gulube ti niŋgi taqatŋgwasai. Ariya naŋgi are gulube ti niŋgi taqatŋgwab di naŋgi na niŋgi geregere aqaryaiŋgwa keresai.

Hibru 13:23

E niŋgi endegsi merŋgwai. Gago was Timoti a tonto talq dena uratonab oqedej. Deqa a e qa urur bqas di aqo aiyel ombla na niŋgi qa bosim nuŋgwom.

Uli Anjam 2:10

Bunuqna ni jaqatiŋ koba oqam. Ni deqa ulaaim. Ni que. Satan a na niŋgi qudei ojeleŋosim tonto talq breiŋgwas. Breiŋgimqa niŋgi ijo ñam geregere ojqab kio ijo ñam uratosib uloŋqab kio di Satan a nuŋgo areqalo unsim qalieqajqa deqa niŋgi tonto talq breiŋgwas. Niŋgi bati 10-pela gulube ti jaqatiŋ ti sqab. Ariya niŋgi e qa nuŋgo areqalo siŋgilatosib soqniye. Sosib sosib gilsib jeu tamo naŋgi na niŋgi liŋgib moreŋqab. Amqa e na niŋgi ŋambile eŋgwai. Ŋambile di nuŋgo awai boledamu.