2 Korin 6:4 - Yesus Aqa Anjam Bole

⁴ Iga Qotei aqa wau tamo deqa iga gaigai tamo uŋgasari kalil naŋgo ŋamgalaq di kumbra bole yeqnum. Gulube bei bei gagoq di branteqnaqa iga siŋgila na tigeloqnsim gulube di qoboiyeqnum. Tamo qudei naŋgi na iga ugeugeigeqnab iga naŋgi qa ulaosaieqnum. Une bei bei na iga padaltgwa laqnaqa iga na olo gotraŋyeqnum.

2 Korin 6:4 ပူးပေါင်းရင်းမြစ်များ

Luk 21:19

Deqa niŋgi ijo ñam siŋgila na ojsib soqnib soqnib Qotei na niŋgi eleŋqas. Amqa niŋgi ŋambile gaigai sqab.

Jon 16:33

Niŋgi na e beterbosib are lawo na sqajqa deqa e na anjam endi niŋgi merŋgonum. Niŋgi mandamq endia sosib niŋgi gulube koba oqnqab. Deqa uŋgum. Niŋgi are siŋgilatiye. E segi na mandam endeqa siŋgila kalil gotraŋyosim tigelejunum.”

Aposel 2:22

“Deqa Israel tamo uŋgasari, niŋgi ijo anjam endi quiye. Niŋgi qalie, Qotei na Yesus Nasaret qaji a qariŋyonaq mandamq aisiqa kumbra gargekoba nuŋgo ambleq di yoqnej. Kumbra yeqnaqa niŋgi unoqnsib maroqneb, ‘Bole, Qotei na Yesus qariŋyonaq bej.’

Aposel 20:34

Niŋgi qalie, e iŋgi bei qa truquoqnsimqa e segi wauoqnsim iŋgi awaiyoqnsim tamo naŋgi e ombla na wauoqnem qaji naŋgi iŋgi anainjroqnem.

Aposel 9:16

A ijo ñam qa gulube gargekoba itoqnqas. Gulube di e na osoryoqnitqa itoqnqas.”

Rom 14:18

Tamo naŋgi kumbra dena Kristus aqa wau ojoqnqab di Qotei a naŋgi qa tulaŋ arearetoqnqas. Yim tamo kalil naŋgi na naŋgi unjrsib marqab, “Naŋgi tamo bole.”

Rom 16:10

Niŋgi Apeles dego ijo kaiye anjam endi minjiye. Iga qalieonum, a bole Kristus dauryeqnu. Ariya niŋgi ijo kaiye anjam endi osib Aristobulus aqa leŋ naŋgi ti dego minjriye.

Rom 3:5

Deqa was qu, niŋgi na kamba olo e endegsib merbqab kio, “Iga kumbra uge yoqnqom dena Qotei aqa kumbra tiŋtiŋ olo brantoqnqas di iga kiersi marqom? Qotei a gago une qa minjiŋ oqim awai uge egwas di a kumbra uge yqo. Degsi marqom e?” O was qu, iga degsi marqasai. Qotei a gaigai kumbra tiŋtiŋ segi yeqnu. A kumbra tiŋtiŋ yqasai di a kiersim tamo uŋgasari naŋgo kumbra qa peginjrqas? Nuŋgo areqalo di mandam tamo naŋgo areqalo.

Rom 5:8

Ariya iga une tamo sonamqa Kristus a iga qa moiej. Aqa kumbra dena Qotei na iga osorgwo, a iga tulaŋ qalaqalaigeqnu.

1 Korin 3:5

Apolos di tamo yai? E Pol e segi tamo yai? Aqo aiyel Qotei aqa wau tamo segi. Agi Tamo Koba Qotei na aqo aiyel wau segi segi egej deqa iga Kristus aqa anjam niŋgi merŋgoqnem. Onaqa niŋgi quoqnsib Kristus qa nuŋgo areqalo siŋgilateb.

1 Korin 4:1

O was qu, aqo Apolos wo Kristus aqa wau tamo. Iga Qotei aqa uli anjam taqatejunum. Niŋgi iga qa degsib are qaliye.

1 Korin 9:11

O was qu, iga Qotei aqa anjam qa niŋgi aqaryaiŋgoqnem. Di nuŋgo qunuŋ qa. Ariya niŋgi na kamba jejamu qa iŋgi iŋgi qa olo iga aqaryaigwajqa merŋgwom di iga une yonum e? Iga nuŋgo are miligiq di iŋgi yagobulem. Iŋgi di meliqo deqa niŋgi na olo otorosib egwajqa merŋgwom di iga une yonum e? Sai.

2 Korin 11:23

Naŋgi mareqnub, “Iga Kristus aqa wau tamo.” Ariya e nanari tamo bulosiy anjam endegsi marqai. E dego Kristus aqa wau tamo. Agi e na tamo naŋgi di tulaŋ buŋnjrsimqa ŋes na ti jaqatiŋ na ti Kristus aqa wau ojeqnum. Bati gargekoba jeu tamo naŋgi na e tonto talq di waiboqneb. Osib e lubogargekobatoqneb. Gulube dena e na tamo naŋgi di tulaŋ buŋnjroqnem. Bati gargekoba e moiqa jojomem.

2 Korin 11:27

E ŋes na ti jaqatiŋ na ti waukobaoqnem. Qolo gargekoba e waukobaoqnsim ŋeiosaioqnem. E mam ti laqnem. E ya qarboqnej. Bati gargekoba e iŋgi saiqoji soqnem. Bati gargekoba e yorbeqnaqa e ijo jejamu kabutqajqa gara saiqoji soqnem.

2 Korin 11:9

E nuŋgo ambleq di sosimqa e iŋgi iŋgi qa truquoqnsimqa e deqa tamo bei gulube yosaioqnem. Kristen was qudei Masedonia sawaq dena Korin qureq beleŋeb qaji naŋgi na e taqatbosib iŋgi iŋgi qa aqaryaiboqneb. E niŋgi gulube eŋgwajqa tulaŋ uratoqnem agi bini e degsim unum.

2 Korin 12:10

Deqa e Kristus aqa ñam qa siŋgila saiqoji sqai kio tamo qudei naŋgi na e misiliŋboqnqab kio e gulube oqnqai kio jeu tamo naŋgi na e ugeugeiboqnqab kio e waukobaoqnqai kio di uŋgum. E deqa areboleboleibqas. Di kiyaqa? E siŋgila saiqoji sqai bati di e Kristus aqa siŋgila ti sqai.

2 Korin 12:12

Agi e nuŋgo ambleq di sosimqa e maŋwa gargekoba babteqnam dena niŋgi qalieeb, Qotei na e qariŋbej. Agi e siŋgila na tigeloqnsim gulube qoboiyeqnam dena maŋwa ti wau siŋgila ti gargekoba nuŋgo ambleq di brantoqnej. Kumbra dena niŋgi osorŋgej, e Qotei aqa wau tamo bole.

2 Korin 2:17

Ariya iga tamo gargekoba naŋgi bul sai. Agi tamo gargekoba naŋgi Qotei aqa anjam mareqnub di naŋgi silali oqajqa deqa osib waueqnub. Ariya iga degyosaieqnum. Qotei na iga wau egej deqa iga gisaŋ na wauosaieqnum. Iga Kristus koba na areqalo qujaitosim Qotei aqa ŋamgalaq di aqa anjam bole geregere marsim laqnum.

2 Korin 3:6

Gago wau agiende. Iga Kristus aqa anjam bunuj aqa leŋ na siŋgilatej qaji di palontosim laqnum. Qotei a segi na iga siŋgilatgeqnu deqa iga wau di ojeqnum. Kristus aqa anjam bunuj di a dal anjamq di neŋgreŋyosai. Anjam bunuj di Qotei aqa Mondor Bole aqa segi anjam. Tamo naŋgi dal anjam dauryqa marqab di naŋgi moreŋqab. Ariya tamo naŋgi Qotei aqa Mondor dauryqab di a na naŋgi ŋambile enjrqas.

2 Korin 4:17

Di kiyaqa? Iga qalieonum, gulube ti jaqatiŋ ti iga bini eqnum qaji di tulaŋ kokba sai. Naŋgi sokiñalayosib koboqab. Iga gulube di eqnum deqa mondoŋ iga laŋ qureq dia so bole gaigai sqom. Iga qalieonum, iŋgi bole bole iga mondoŋ oqom qaji di tulaŋ boledamu. Iŋgi iŋgi dena mandam qa iŋgi iŋgi kalil tulaŋ buŋnjresqas.

2 Korin 4:2

Kumbra uge uge kalil tamo naŋgi ulitosib yeqnub qaji di iga qoreiyeqnum. Iga gisaŋ kumbra na walwelosaieqnum. Iga Qotei aqa anjam bulbulyo-saieqnum. Iga boleq di anjam bole segi mareqnum. Yim tamo kalil naŋgi gago kumbra di unsib naŋgo are miligiq di qalieqab, bole, iga Qotei aqa ŋamgalaq di wau bole yeqnum.

2 Korin 4:8

Sawa sawa kalilq dia gulube gargekoba iga qa beqnu. Ariya gulube dena gago siŋgila kobotetgosaieqnu. Iŋgi iŋgi gargekoba na gago areqalo niñaqyetgeqnu. Ariya iŋgi iŋgi dena gago areqalo torei ugetetgosaieqnu.

2 Korin 7:11

Niŋgi geregere are qaliye. Are gulube Qotei na niŋgi eŋgej qaji dena niŋgi siŋgilatŋgej deqa niŋgi are bulyosib agi kumbra bole bole yeqnub. Are gulube dena Qotei na nuŋgo are tigeltetŋgonaqa niŋgi nuŋgo une gereiyosib tamo qujai une yej qaji di a ŋiriŋteb. Osib niŋgi Qotei ulaiyosib aqa sorgomq di soqneb. Qotei na nuŋgo are tigeltetŋgej deqa niŋgi iga qa are koba qaleqnub. Osib niŋgi tamo qujai une yej qaji di aqa une olo gereiyetqa dego are qaleqnub. Niŋgi segi na nuŋgo une di gereiyqajqa are qaleqnub. Nuŋgo kumbra dena iga qalieonum, bole, niŋgi une saiqoji.

Kolosi 1:11

O was qu, iga niŋgi qa degsim Qotei pailyeqnum. Osim olo endegsi pailyeqnum, “O Abu, ni na ino segi siŋgila kobaquja osim Kolosi Kristen naŋgi enjroqnim naŋgi siŋgila na tigeloqnsib gulube kalil qoboiyoqnqab. Osib lawo na sosib gulube di koboqajqa bati qa tariŋoqnsib tulaŋ areboleboleinjroqnim sqab.”

Kolosi 1:24

E niŋgi aqaryaiŋgwa osim deqa e jaqatiŋ koba eqnum. E ijo jaqatiŋ deqa tulaŋ areboleboleibeqnu. E na Kristus aqa segi tamo uŋgasari naŋgi aqaryainjreqnum. Naŋgi aqa segi jejamu bul. A naŋgo gate. A na naŋgi aqaryainjrqa marsiq jaqatiŋ koba ej. Aqa jaqatiŋ di koboosaiunu. Deqa e dego tamo uŋgasari naŋgi qa osimqa ijo segi jejamuq di jaqatiŋ koba eqnum. Ijo kumbra dena e na Kristus aqa jaqatiŋ dauryosim kereteqnum.

1 Tesalonaika 3:7

O was qu, niŋgi Yesus qa degsib nuŋgo areqalo siŋgilaboleteqnub anjam di Timoti a bosiq mergonaqa iga qusim dena gago gulube kalil qa gago are siŋgilatetgej.

1 Tesalonaika 5:14

O was qu, iga na nuŋgo are tigeltetŋgimqa niŋgi na tamo naŋgi wauqajqa asginjreqnu qaji naŋgo kumbra olo tingi-tetnjroqniye. Osib tamo naŋgi ulaeqnub qaji naŋgo are siŋgila-tetnjroqniye. Osib tamo siŋgila saiqoji unub qaji naŋgi olo aqaryainjroqniye. Osib tamo kalil naŋgi lawo na geregereinjroq-niye.

1 Timoti 2:15

Ariya ni na uŋgasari naŋgi minjrimqa naŋgi aŋgrotoqnsib aŋgro qa wauoqnebe. Naŋgi wau di yoqnsib gaigai Kristus qa naŋgo areqalo siŋgilatoqnsib naŋgo segi ŋambile a yekritosib aqa kumbra boleq di sosib qalaqalaiyo kumbra dauryosib kumbra bole bole yoqnebe. Yim deqa Qotei a na naŋgi oqas.

1 Timoti 4:6

O Timoti, ijo anjam di ni na Kristen was qu naŋgi olo minjroqne. Ni minjroqnqam di ni Kristus Yesus aqa wau tamo boledamu sqam. Deqa anjam bole ni ino areqaloq di siŋgilatejunum qaji dena ti powo bole ni osim dauryeqnum qaji dena ti ni olo torei siŋgilatmesqas.

1 Timoti 6:11

Ariya Timoti, ni Qotei aqa tamo deqa ni kumbra uge kalil deqaji torei qoreiyosim taqat ate. Osim ni kumbra tiŋtiŋ yoqnsim Qotei aqa kumbra dauryoqnsim a qa ino areqalo siŋgilatoqnsim tamo naŋgi qalaqalainjroqne. Osim ni gulube kalil qa siŋgila na tigeloqnsim tamo uŋgasari naŋgi lawo kumbra enjroqne.

2 Timoti 1:8

Deqa ni gago Tamo Koba Yesus aqa anjam marsim laqajqa jemaimaiq. E segi Yesus aqa anjam marsim laqnem deqa jeu tamo naŋgi na e ojsib tonto talq endia e waibeb unum. Deqa ni e qa dego jemaimaiq. Ni Qotei aqa siŋgila osim Yesus aqa anjam bole marsim laqne. Osim dena ni e ombla gulube oqnsim sqom.

2 Timoti 2:24

Ni na Tamo Koba Qotei aqa wau tamo naŋgi minjrimqa naŋgi anjam na qotoqnsib ŋiriŋoqnaib. Naŋgi na tamo kalil naŋgi kumbra bole enjroqnebe. Tamo qudei naŋgi na bosib naŋgi gulube enjribqa naŋgi deqa ŋiriŋaib. Naŋgi kamba olo Qotei aqa kumbra bole naŋgi osornjroqnebe.

2 Timoti 4:5

Ariya Timoti, ni gaigai areqalo bole na sosimqa gulube ti jaqatiŋ ti qoboiyoqnsim siŋgila na tigelesoqne. Osim ni na Yesus aqa anjam bole tamo uŋgasari naŋgi minjroqnsim laqne. Ni naŋgi aqaryainjrqajqa wau ti unum deqa ni wau di yoqne.

Hibru 12:1

Tamo nami soqneb qaji naŋgi di Qotei qa naŋgo areqalo siŋgilatoqneb. Naŋgi laŋbi bul iga agutgesonab iga naŋgo kumbra di uneqnum. Qotei na iga giltgej deqa iga siŋgila na gurguroqnqom. Gurguroqnimqa iŋgi iŋgi qudei na iga Qotei aqa kumbra dauryqa gam getentetgwa laqnimqa iga iŋgi iŋgi di olo gotraŋyoqnqom. Une kalil gagoq di beterqajqa laqnu qaji di dego iga gotraŋyoqnsim Qotei aqa kumbra dauryqajqa siŋgilaoqnqom.

Uli Anjam 1:9

E nuŋgo was Jon. E ti niŋgi ti Yesus aqa tamo unum deqa iga kalil gulube koba qoboiyoqnsim jaqatiŋ eleŋeqnum. Qotei a gago Mandor Koba sosiq iga taqatgeqnu. Deqa iga kalil koba na siŋgila na tigeloqnsimqa gulube qoboiyejunum. E Qotei aqa anjam ti Yesus aqa anjam ti palontsim laqnem deqa jeu tamo naŋgi na e taqal waibosib nui ñam Patmos endia e ateb unum.

Uli Anjam 3:10

Ni ijo anjam geregere dauryoqnsimqa gulube kalil qoboiyoqnsim siŋgila na tigelejunum deqa e ni taqatmesoqnitqa Satan a bosim tamo uŋgasari kalil sawa sawa kalilq di unub qaji naŋgi gulube enjrqa batiamqa gulube di ni qa bqasai.