2 Korin 4:5 - Yesus Aqa Anjam Bole

⁵ Niŋgi quiye. Iga gago segi kumbra qa marosaieqnum. Iga endegsi mareqnum, “Kristus Yesus a gago Tamo Koba. Iga Yesus aqa anjam dauryeqnum deqa iga nuŋgo wau tamo unum.” Iga degsi segi mareqnum.

2 Korin 4:5 ပူးပေါင်းရင်းမြစ်များ

Matyu 23:8

Ariya tamo qudei naŋgi na niŋgi endegsib merŋgaib, ‘O Qalie Tamo.’ Tamo qujai a segi nuŋgo qalie tamo. Niŋgi kalil was qu.

Matyu 3:11

“Niŋgi are bulyqajqa deqa e ya na niŋgi laŋa yansŋgeqnum. Ariya Tamo Koba a bunuqna ijo qoreq na bqas. A tamo siŋgila koba. Ijo siŋgila aqa siŋgila ti keresai. Deqa e a kaŋgalyqajqa e tamo bolesai. A bosimqa Qotei aqa Mondor aqa siŋgila na ti ŋamyuo na ti niŋgi yansŋgwas.

Jon 7:18

Tamo bei aqa segi areqalo na anjam marqas di a aqa segi ñam soqtqa osim deqa anjam marqas. Ariya Qotei agi e qariŋbej qaji aqa ñam e soqtqa osim deqa anjam mareqnum. Deqa e tamo bole. E gisaŋ tamo sai.

Aposel 10:36

Bole, nami Qotei na aqa anjam bole qariŋyonaqa Israel naŋgo segiq aiej. Anjam di aqa damu endegsi unu. Tamo uŋgasari naŋgi Qotei ti jeu sonabqa Yesus Kristus na jeu kobotej. Yesus a tamo kalil naŋgo Tamo Koba.

Aposel 2:36

“Deqa Israel tamo uŋgasari, niŋgi kalil ijo anjam endi geregere qusib poiŋgem. Yesus agi niŋgi na ŋamburbasq di qalnab moiej qaji a Qotei na olo osiqa gago Tamo Koba Kristus atej.” (Ñam Kristus di aqa damu, “Tamo Qotei na nami giltej qaji”) Pita a na tamo uŋgasari naŋgi anjam degsi minjrej.

Aposel 5:31

Yesus qujai di Qotei na laŋ qureq osi oqsiqa aqa baŋ woq di awotej. Deqa Yesus a gago Tamo Koba. A na qujai iga eleŋamqa iga padalqasai. Yesus qujai dena iga Israel tamo uŋgasari are bulyetgsim gago une kobotetgwas.

1 Korin 1:23

Ariya Kristus a ŋamburbasq di moiej anjam di iga palontsim laqnam Juda naŋgi quoqnsib gisaŋ qa mareqnub. Grik naŋgi dego anjam di quoqnsib nanari qa mareqnub.

1 Korin 10:33

E dego tamo uŋgasari kalil naŋgi kumbra bole bole enjreqnam naŋgi ijo kumbra di unoqnsib arearetnjreqnu. E ijo segi jejamu qa are qalosaieqnum. E tamo uŋgasari gargekoba naŋgi qa are qaloqnsim aqaryainjreqnum. Yim Qotei na naŋgi oqajqa deqa.

1 Korin 12:3

Deqa niŋgi ijo anjam endeqa geregere are qaliye. Qotei aqa Mondor a tamo bei aqaq di sosim aqa medabu siŋgilatetimqa a endegsi marqa keresai, “Yesus a tamo uge deqa Qotei na a qoreiyem.” Ariya tamo bei a Qotei aqa Mondor ti sqasai di a endegsi marqa keresai, “Yesus a Tamo Koba.”

1 Korin 15:47

Qotei na Adam namij a mandam na gereiyej. Deqa Adam a mandam qaji tamo. Ariya Adam bunuj a laŋ qureq na bej.

1 Korin 2:2

E endegsi are qalem. E nuŋgo ambleq di sosiyqa e Yesus Kristus qa segi niŋgi merŋgoqnqai. A ŋamburbasq di moiej anjam di segi niŋgi merŋgoqnqai. E anjam bei niŋgi merŋgwasai. E degsi are qalem.

1 Korin 4:15

Tamo 10,000 naŋgi na Kristus aqa kumbra niŋgi osorŋgoqnqab di uŋgum. Niŋgi abu gargekoba sai. Agi e segi qujai nuŋgo abu. E qujai namo Kristus Yesus aqa anjam niŋgi merŋgonam qusib are bulyeb. Dena e nuŋgo abuem.

1 Korin 8:6

Iga qalieonum, Qotei qujai unu. A gago Abu. A iŋgi iŋgi kalil qa utru. Iga aqa segi tamo uŋgasari tiŋtiŋ unum. Tamo Koba qujai dego unu. Di Yesus Kristus. A iŋgi iŋgi kalil ateleŋej. Iga kalil aqaq dena ŋambile em.

2 Korin 1:19

Nami e na Sailas na Timoti na iga qalub Qotei aqa Ŋiri Yesus Kristus aqa anjam palontosim niŋgi merŋgoqnem. Niŋgi qalie, Yesus a dego laŋa odoqnsiq olo saidosaieqnu. A gaigai Qotei aqa ñam na odeqnu.

2 Korin 1:24

Niŋgi Yesus qa nuŋgo areqalo siŋgilateqnub nuŋgo areqalo di iga na taqatgwajqa e deqa merŋgosai. Iga qalieonum, niŋgi nuŋgo areqalo di siŋgila na ojsib tigelejunub. O was qu, niŋgi tulaŋ areboleboleiŋgwajqa deqa iga niŋgi ti waueqnum.

Galesia 5:13

O was qu, Kristus a na niŋgi eleŋej deqa dal anjam na niŋgi olo bunu taqatŋgwasai. Qotei a deqa are qalsiq niŋgi metŋgej. Ariya niŋgi endegsib are qalaib, “Iga dal anjam aqa sorgomq di sosai deqa uŋgum, iga olo gago areqalo namij dauryosim kumbra uge uge yoqnqom.” Niŋgi degsib are qalaib. Niŋgi nuŋgo Kristen was naŋgo kaŋgal tamo bul sosib naŋgi qalaqalainjroqniye.

Filipai 1:15

Bole, tamo qudei naŋgi na ijo ñam tentib aguq aiqajqa deqa are qaloqnsib naŋgo are uge na Kristus aqa anjam mare mare laqnub. Ariya tamo qudei naŋgi are bole na Kristus aqa anjam mare mare laqnub.

Filipai 2:11

Osib naŋgo medabu qujaitosib maroqnqab, “Yesus Kristus a segi Tamo Koba.” Yim kumbra dena naŋgi na Abu Qotei aqa ñam tulaŋ soqtoqnqab.

2 Timoti 2:10

Deqa e na ijo are miligi siŋgilatoqnsim gulube kalil di qoboiyoqnsim unum. E tamo uŋgasari Qotei na aqa segi qa giltnjrej qaji naŋgi aqaryainjrqajqa deqa osim gulube di qoboiyeqnum. Yimqa Qotei na naŋgi eleŋamqa naŋgi dego Kristus Yesus aqa ñam na ŋambile osib a ombla gaigai sqajqa deqa.

Taitus 1:11

Tamo naŋgi di tamo uŋgasari naŋgo silali ti ñoro ti yainjrqajqa deqa marsib kumbra uge uge iga yqa keresai qaji di naŋgi yqajqa minjreqnub. Kumbra dena naŋgi na tamo uŋgasari qudei naŋgo aŋgro ti naŋgo was naŋgi ti areqalo ugetetnjreqnabqa naŋgi Qotei aqa gam bole olo urateqnub. Deqa Taitus, ni na tamo uge uge deqaji naŋgo medabu getentsim saidnjre.

2 Pita 2:3

Tamo naŋgi di mamaul ani. Deqa naŋgi na bosib gisaŋ anjam gargekoba niŋgi merŋgoqnsib dena nuŋgo silali iŋgi iŋgi yaiŋgoqnqab. Ariya tulaŋ nami Qotei na tamo naŋgi di peginjrqa bati atsiqa naŋgi qa endegsi marej, “E na tamo naŋgi di padaltnjrougetqai.” Od, tamo naŋgi di bole padalqab. Qotei a naŋgo padalqa bati qa tariŋeqnu.