2 Korin 4:4 - Yesus Aqa Anjam Bole

⁴ Mandam endeqa qotei gisaŋ Satan a na tamo uŋgasari Kristus qa naŋgo areqalo siŋgilatosaieqnub qaji naŋgo areqalo getentejunu deqa Kristus aqa anjam bole naŋgo are miligiq aiqa keresai. Deqa naŋgi Kristus aqa suwaŋ unosaieqnub. Kristus a segi Qotei. A segi ñam koba ti unu.

2 Korin 4:4 ပူးပေါင်းရင်းမြစ်များ

Matyu 13:22

Saga yago qudei sil luwit ambleq aieb qaji di aqa utru endegsi unu. Tamo qudei naŋgi Qotei aqa anjam qusibqa naŋgo areqalo miligiq di esoqnibqa ariya bunuqna naŋgi olo mandam qa iŋgi iŋgi qa are koba qaloqnsibqa silali koba oqnqajqa are prugnjroqnqas. Yimqa naŋgo areqalo dena naŋgi wala walainjrsim Qotei aqa anjam naŋgo are miligiq di tentimqa di loumqas. Deqa a gei boletosai.

Jon 1:14

Anjam di a tamo yusiqa gago ambleq di soqnej. Onaqa iga aqa ñam koba ti aqa siŋgila ti di unem. Aqa ñam agiende. A segi qujai Qotei aqa Ŋiri. A iga qa are tulaŋ boleiyeqnu. A segi anjam bole qa utru.

Jon 1:18

Tamo bei na Qotei aqa ulatamu unosai. Qotei aqa Ŋiri qujai a segi Qotei. A aqa Abu Qotei aqa areq di sosiqa beteryejunu. A na qujai iga Qotei osorgej.

Jon 12:31

Niŋgi quiye. Qotei a tamo uŋgasari mandamq endi unub qaji naŋgo une qa naŋgi peginjrqajqa bati brantqo. Qotei na mandam endeqa gate koba Satan taqal waiyqajqa bati agi brantqo.

Jon 12:35

Onaqa Yesus na minjrej, “Puloŋ a nuŋgo ambleq di sokiñalaysim niŋgi olo uratŋgwas. Puloŋ a nuŋgo ambleq endi unu. Deqa niŋgi puloŋ di osib puloŋq na laqniye. Yimqa ambruiŋgwasai. Tamo ambruq na laqnu qaji a ambruq di sosim qabitqas kio? Di a qalieqasai.

Jon 12:40

“Qotei a naŋgo ŋamdamu getentetnjrej. A naŋgo are miligi dego getentetnjrej. Deqa naŋgi naŋgo ŋamdamu na Qotei aqa kumbra bei unqa keresai. Naŋgi naŋgo are miligiq na Qotei aqa anjam dego poinjrqa keresai. Deqa naŋgi are bulyosib e qa bqa keresai. Deqa e na naŋgi olo boletnjrqasai.”

Jon 12:45

Tamo bei a e nubqas di a ijo Abu e qariŋbej qaji di dego unqas.

Jon 14:30

“Mandam endeqa gate koba Satan a beqnu. Deqa e olo anjam olekoba titsiy merŋgoqnsiy sqasai. Satan a na e gulube bei ebqa keresai.

Jon 15:24

E wau bunuj tamo bei na nami yosaioqnej qaji di naŋgo ambleq di yosai qamu naŋgi une saiqoji qamu. Ariya e naŋgo ambleq di wau bunuj yeqnamqa naŋgi unoqneb. Deqa naŋgi na aqo ijo Abu wo jeutgeqnub.

Jon 16:11

Qotei na tamo naŋgo une qa peginjrqas kumbra di aqa utru agiende. Mandam endeqa gate koba Satan aqa une qa Qotei na pegiyosim a ŋamyuoq waiyqas.

Jon 8:12

Yesus a uŋa degsi minjnaq gileqnaqa a na tamo uŋgasari naŋgi olo endegsi minjrej, “E mandam endeqa puloŋ. Tamo a e daurbqas di a ambruq di walwelqasai. A suwaŋoq di walweloqnsim ŋambile gaigai sqas.”

Aposel 26:18

Ni naŋgoq gilsim ijo anjam minjroqnimqa naŋgi e qa poinjroqnim ambru uratosib suwaŋoq bqab. Satan a na naŋgi joqej unu. Deqa ni na naŋgi are bulyetnjroqnimqa naŋgi Satan aqa siŋgila uratosib Qotei aqaq giloqnqab. Amqa e na naŋgo une kalil kobotetnjritqa naŋgi tamo uŋgasari nami e qa naŋgo areqalo siŋgilateb qaji naŋgi ti koba na ijo segi tamo uŋgasari boledamu sqab.’

Aposel 26:23

Agi Qotei aqa medabu o qaji tamo naŋgi nami anjam endegsib neŋgreŋyeb, ‘Kristus a jaqatiŋ koba osim moiqas. Moisimqa tamo kalil qa namoosim olo subq na tigelqas. Osim Juda tamo ti sawa bei bei qaji tamo naŋgi ti ambruq di soqnibqa naŋgi anjam minjroqnimqa naŋgi are bulyosib ambru uratosib suwaŋoq boqnqab.’”

1 Korin 10:20

E endegsi maronum. Sulum atrainjro qaji iŋgi iŋgi di sawa bei bei qaji tamo naŋgi na oqnsib mondor uge naŋgi atrainjreqnub. Naŋgi Qotei bole atraiyosaieqnub. Deqa was qu, niŋgi iŋgi iŋgi di uratiye. Uratqasai di niŋgi mondor uge uge naŋgi ti beterqab.

2 Korin 2:11

E degyqai. Di kiyaqa? Tamo uge Satan a na iga gisaŋgosim ugeugeigo uge. Satan aqa areqalo ti aqa uli kumbra ti di iga bole qalieonum.

2 Korin 2:12

Ariya was qu, e Kristus aqa anjam bole palontqa osimqa walwelosim gilsim Troas qureq di brantem. Brantonam Tamo Koba Qotei na gam waqtetbonaqa e dia aqa wau ojoqnem.

2 Korin 3:11

Wau namij di a gaigai sqa keresai. A koboqas. Ariya a Qotei aqa riaŋ ti bej. Deqa iga qalieonum, wau bunuj gaigai sqas qaji a olo tulaŋ riaŋ koba ti sqas. A na wau namij aqa riaŋ tulaŋ buŋyqas.

2 Korin 3:14

Israel naŋgo areqalo geteŋnjresoqnej deqa naŋgi dal anjam namij sisiyoqneb di naŋgi anjam aqa utru poinjrosaioqnej. Naŋgi nami degsib soqneb agi bini unub. Naŋgo areqalo gara mutu na kabutobulejunu. Tamo bei na gara di taqal atqa keresai. Kristus aqa wau na segi Qotei na gara di olo taqal ateqnu.

2 Korin 3:18

Deqa gago ulatamu olo kabuesosai. Iga kalil Tamo Koba Qotei aqa riaŋ di ya jeqiloq di unobuleqnam riaŋ di gagoq di tulaŋ kobaqujaeqnaqa dena iga Qotei a segi buloqnsim unum. Tamo Koba Yesus a na kumbra di iga egeqnu. Tamo Koba a segi Qotei aqa Mondor Bole.

2 Korin 4:6

Tulaŋ nami Qotei a iŋgi iŋgi kalil gereiyqa osiqa a endegsi marej, “Ambruq dena suwaŋ brantqas.” Ariya bunuqna Qotei aqa suwaŋ di iga qa bosiqa gago are miligi suwantetgej deqa iga Kristus aqa ulatamu uneqnum. Dena iga suwaŋ bole unsimqa Qotei aqa riaŋ ti aqa siŋgila ti geregere poigeqnu.

Galesia 1:4

Kristus a gago Abu Qotei aqa areqalo dauryosiq deqa a gago une kobotqa marsiqa aqa segi ŋambile uratosiq moiej. A na iga eleŋamqa iga mandam qa kumbra uge kalil uratqajqa deqa marsiq iga qa moiej.

Efesus 2:2

Bati deqa niŋgi mandam qa kumbra uge uge na walweloqneb. Niŋgi mondor uge uge laŋ goge di unub qaji naŋgo gate koba Satan aqa kumbra dauryoqneb. Satan a mondor uge siŋgila koba deqa a tamo naŋgi Qotei aqa anjam gotraŋyeqnub qaji naŋgo are miligiq di siŋgila na waueqnu.

Efesus 6:12

Niŋgi geregere are qaliye. Iga mandam tamo uŋgasari naŋgi ti qotosaieqnum. Iga Satan aqa mondor uge uge naŋgi ti aqa gate kokba ti iŋgi iŋgi kalil siŋgila ejunub qaji naŋgi ti qoteqnum. Gate kokba naŋgi di ambru qa bati endeqa mandam taqatoqnsib unub. Iga mondor uge uge kalil laŋ goge di unub qaji naŋgi ti qoteqnum.

Filipai 2:6

Kristus a segi Qotei. Ariya a deqa are qalosaioqnej.

Kolosi 1:15

Gago ŋamdamu na iga Qotei unqa keresai. Ariya Qotei aqa Ŋiri a segi Qotei. Iŋgi iŋgi kalil Qotei na gereiyej qaji di Yesus a segi deqa utru.

Kolosi 1:27

Qotei aqa segi areqalo na uli anjam di boleq atsiqa iga aqa segi tamo uŋgasari iga osorgej. Yim iga endegsi poigwajqa, Qotei aqa uli anjam di tulaŋ boledamu. Anjam dena Qotei na tamo uŋgasari kalil sawa bei beiq di unub qaji naŋgi aqaryainjrqas. Uli anjam di aqa damu agiende. Kristus a nuŋgo ambleq di unu. A na niŋgi eleŋosim laŋ qureq osi oqimqa dia niŋgi aqa iŋgi bole bole oqab.

1 Timoti 1:11

Qotei aqa anjam di gisaŋ sai. Di Yesus aqa anjam bole Qotei na e marsiy laqajqa ebej qaji. Anjam bole di aqa utru agiende. Qotei a riaŋ koba ti siŋgila koba ti unu. Anjam di tulaŋ boledamu. Anjam di iga areboleboleigwajqa utru.

Taitus 2:13

Osim iŋgi tulaŋ boledamu iga mondoŋ oqom qaji di unqajqa areboleboleigoqnimqa tariŋoqnsim sqom. Yesus Kristus a segi Qotei. A siŋgila koba. A na iga eleŋej. Mondoŋ a wala bole ti riaŋ koba ti Qotei aqa siŋgila ti di osim laŋ qureq dena bqas. Iga di unqajqa tariŋoqnsim unum.

Hibru 1:3

Yesus a na Qotei aqa riaŋ koba iga osorgeqnu. Yesus aqa so ti Qotei aqa so ti ombla kerekere. Aqa anjam siŋgila ti unu deqa anjam dena a na iŋgi iŋgi kalil siŋgilatejunu. A na gago une kobotetgosiqa laŋ qureq oqsiq Qotei siŋgila koba ti unu qaji aqa baŋ woq di awejunu.

Hibru 6:4

Tamo qudei naŋgi Qotei aqa suwaŋ uneb. Naŋgi laŋ qureq oqwajqa gam geregere qalieeb. Naŋgi Qotei aqa Mondor esoqneb. Naŋgi Qotei aqa anjam pegiyosib deqa naŋgi qalieeb, aqa anjam bolequja. Naŋgi Qotei aqa siŋgila mondoŋ brantqas qaji di dego qalieosib ojesoqneb.

2 Pita 1:19

Deqa iga bole qalieonum, Qotei aqa medabu o qaji tamo naŋgi nami anjam maroqneb di naŋgi anjam bole maroqneb. Deqa niŋgi dego naŋgo anjam di torei ojiye. Niŋgi ojqab di bolequja. Naŋgo anjam di waŋal bul sawa ambruq di puloŋesosiqa nebe qa burbas oqeqnu dego kere nuŋgo are miligiq di suwaŋejunu.

1 Jon 2:11

Ariya tamo bei a aqa was bei qa are ugeiyqas di iga unsim qalieqom, tamo di a ambruq di sosiq walweleqnu. Ambru na aqa ŋamdamu getentetqo deqa a sawa qabiteqnu di a qalieqasai.

1 Jon 2:8

Ariya dal anjam e neŋgreŋyosim niŋgi qa qariŋyonum qaji endi dal anjam bunuj dego. Dal anjam bunuj endi Kristus a segi dauryoqnej. Niŋgi dego dauryeqnub. Di kiyaqa? Ambru a koboqa laqnaqa suwaŋ a olo brantej unu.

1 Jon 5:19

Iga qalie, iga Qotei aqa aŋgro unum. Ariya tamo uŋgasari kalil mandamq endi unub qaji naŋgi tamo uge Satan aqa sorgomq di unub deqa a na naŋgi siŋgila na taqatnjreqnu.