2 Korin 3:8 - Yesus Aqa Anjam Bole

⁸ Ariya Qotei na aqa Mondor Bole tamo uŋgasari naŋgi enjrej aqa wau dena dal anjam aqa wau tulaŋ buŋyejunu. Deqa wau di Qotei aqa riaŋ ti aqa siŋgila ti sqas.

2 Korin 3:8 ပူးပေါင်းရင်းမြစ်များ

Jon 1:17

Bole, nami Qotei a Moses aqa baŋ na iga dal anjam egej. Ariya Yesus Kristus aqa wau na Qotei a iga qa are tulaŋ boleiyeqnu. A segi anjam bole qa utru.

Jon 7:39

Yesus a ya qa marej di a Qotei aqa Mondor qa sigitosiqa yawo anjam marej. Yesus a laŋ qureq oqsiq ñam koba osaisoqnej deqa Qotei aqa Mondor bosaisoqnej. A bunuqna oqsim Qotei aqa Mondor qariŋyim bamqa tamo naŋgi Yesus qa naŋgo areqalo siŋgilatqab qaji naŋgi Qotei aqa Mondor oqab. Deqa Yesus a yawo anjam degsi marej.

1 Korin 3:16

Niŋgi Qotei aqa segi tal bul. Qotei aqa Mondor a nuŋgo miligiq di unu. Di niŋgi qaliesai kio?

2 Korin 11:4

E ulaonum. Di kiyaqa? E qalieonum, tamo qudei naŋgi niŋgi qa boqnsib gisaŋgoqnsib Yesus bei qa anjam palontosib merŋgeqnub. Yesus deqa iga nami anjam palontosaioqnem. Tamo naŋgi di mondor bei qa dego niŋgi merŋgeqnub. Di gisaŋ mondor. Mondor deqa iga nami niŋgi merŋgosaioqnem. Yesus aqa anjam bole iga nami niŋgi merŋgoqnem qaji di dego tamo qudei naŋgi bulbulyoqnsib olo anjam bei niŋgi merŋgeqnub. E qalieonum, naŋgi anjam di niŋgi merŋgeqnab niŋgi quoqnsib bole edegoqnsib dauryeqnub. O was qu, niŋgi degaib.

2 Korin 3:17

Tamo Koba Yesus a segi Qotei aqa Mondor Bole. Tamo bei a Tamo Koba Yesus aqa Mondor ti sqas di aqa une na a olo ojqa keresai. A bole sqas.

2 Korin 3:6

Gago wau agiende. Iga Kristus aqa anjam bunuj aqa leŋ na siŋgilatej qaji di palontosim laqnum. Qotei a segi na iga siŋgilatgeqnu deqa iga wau di ojeqnum. Kristus aqa anjam bunuj di a dal anjamq di neŋgreŋyosai. Anjam bunuj di Qotei aqa Mondor Bole aqa segi anjam. Tamo naŋgi dal anjam dauryqa marqab di naŋgi moreŋqab. Ariya tamo naŋgi Qotei aqa Mondor dauryqab di a na naŋgi ŋambile enjrqas.

2 Korin 3:7

Niŋgi are qaliye. Dal anjam aqa wau agiende. A na tamo uŋgasari naŋgi moiotnjreqnu. Dal anjam di Qotei a meniŋq di neŋgreŋyonaqa a Qotei aqa riaŋ ti bej. Deqa Moses aqa ulatamu riaŋonaqa Israel tamo uŋgasari naŋgi aqa ulatamu koqyqa keresai. Ŋam qamotnjrej. Ariya bunuqna riaŋ di olo koboej.

2 Korin 3:9

Dal anjam aqa wau agiende. Dal anjam na iga gago une qa mergoqnsiq iga padaltgeqnu. Wau di Qotei aqa riaŋ ti bej. Ariya iga qalieonum, iga na tamo uŋgasari naŋgi Qotei aqa ŋamgalaq di tamo bole une saiqoji sqajqa gam osornjreqnum wau di olo tulaŋ riaŋ koba ti bqas. A na dal anjam aqa riaŋ tulaŋ buŋyqas.

Galesia 3:14

Qotei a nami Abraham kumbra bole yej deqa a olo sawa bei bei qaji tamo uŋgasari naŋgi dego kumbra bole enjrqa marej. Marsiq deqa bini a Kristus Yesus aqa wau na sawa bei bei qaji tamo uŋgasari naŋgi kumbra bole enjreqnu. Deqa iga Kristus qa gago areqalo siŋgilatqom di iga Qotei aqa Mondor oqom. Agi Mondor di Qotei a nami iga egwa marej.

Galesia 5:5

Ariya iga degyosaieqnum. Iga Qotei aqa Mondor aqa siŋgila na Qotei qa gago areqalo siŋgilatoqnsim mondoŋ a na iga tamo bole une saiqoji qa mergwajqa deqa tariŋoqnsim unum.

Efesus 2:18

Kristus aqa wau na iga koba na Mondor qujai ejunum. Deqa iga are qujaitosim unum. Mondor dena gam waqtetgej deqa iga gaigai gago Abu Qotei aqa ulatamuq di brantoqnqom.

2 Tesalonaika 2:13

Ariya was qu, Tamo Koba Yesus a na niŋgi tulaŋ qalaqalaiŋgeqnu. Deqa bati gaigai iga niŋgi qa are qaloqnsim Qotei biŋiyeqnum. Namoqna Qotei na niŋgi oqajqa deqa marsiq niŋgi giltŋgej. Aqa Mondor Bole na niŋgi siŋgilatŋgimqa niŋgi aqa segi tamo uŋgasari boledamu sosib aqa anjam bole nuŋgo areqaloq di siŋgilatib kumbra dena Qotei na niŋgi oqajqa deqa marsiq niŋgi giltŋgej.

1 Pita 1:2

Tulaŋ nami Qotei Abu a niŋgi qa qalieosiq deqa niŋgi aqa segi tamo uŋgasari sqa marsiqa niŋgi giltŋgej. Qotei aqa Mondor Bole a na niŋgi Qotei aqa segi kumbra boleq di atimqa niŋgi nuŋgo jejamu Qotei yekritosib Yesus Kristus aqa anjam geregere dauryosib sqajqa deqa osiqa niŋgi aqaryaiŋgej. Yim Yesus aqa leŋ na niŋgi yansŋgimqa niŋgi Qotei aqa ŋamgalaq di une saiqoji sqajqa deqa. Qotei a niŋgi qa are tulaŋ boleiyimqa niŋgi geregere lawo na soqniye.