2 Korin 3:1 - Yesus Aqa Anjam Bole

¹ Iga gago segi ñam olo soqteqnum e? Sai. Tamo qudei naŋgi kumbra endegyeqnub. Naŋgi tamo bei minjib a naŋgi qa anjam endegsi neŋgreŋyqas, “Naŋgi tamo bole.” Yim niŋgi anjam di sisiyosib naŋgo ñam soqtetnjrqajqa deqa. O naŋgi niŋgi merŋgib niŋgi naŋgi qa anjam endegsib neŋgreŋyqab, “Naŋgi tamo bole.” Yim tamo qudei naŋgi anjam di sisiyosib naŋgo ñam soqtetnjrqajqa deqa. Tamo qudei naŋgi kumbra degyeqnub. Ariya iga kumbra degyosaieqnum.

2 Korin 3:1 ပူးပေါင်းရင်းမြစ်များ

Aposel 18:27

Onaqa bunuqna Apolos a marej, “E Akaia sawaq gilqai.” A degsi marnaqa Yesus aqa tamo uŋgasari Efesus qureq di soqneb qaji naŋgi na odosib minjeb, “Di kere. Ni gilime.” Degsib minjsibqa anjam bei neŋgreŋyosib Apolos yonab a na osi gilsiqa Yesus aqa tamo uŋgasari Akaia sawaq di soqneb qaji naŋgi enjrej. Endegsib neŋgreŋyeb, “O gago was niŋgi quiye. Apolos a nuŋgoq bqo. Deqa niŋgi a osib geregereiyiye.” Ariya Apolos a Akaia sawaq dia Yesus aqa tamo uŋgasari naŋgi itnjrnaqa naŋgi na a osib geregereiyeb. Onaqa a na naŋgi Qotei aqa anjam minjreqnaqa aqa anjam dena naŋgo are siŋgilatetnjroqnej. Qotei a nami naŋgi qa are tulaŋ boleiyosiqa naŋgo areqalo waqtetnjrnaqa naŋgi are bulyosib Yesus qa naŋgo areqalo siŋgilateb. Apolos a bosiqa tamo uŋgasari naŋgi di are siŋgilatetnjroqnej.

Rom 16:1

Niŋgi gago jaja Fibi osib geregereiyiye. A na Kristen tamo uŋgasari Senkria qureq di unub qaji naŋgi qa waueqnu.

1 Korin 10:33

E dego tamo uŋgasari kalil naŋgi kumbra bole bole enjreqnam naŋgi ijo kumbra di unoqnsib arearetnjreqnu. E ijo segi jejamu qa are qalosaieqnum. E tamo uŋgasari gargekoba naŋgi qa are qaloqnsim aqaryainjreqnum. Yim Qotei na naŋgi oqajqa deqa.

1 Korin 16:3

E botqa niŋgi na tamo qudei naŋgi giltnjrib e na neŋgreŋ bei naŋgi enjrsiy qariŋnjrit naŋgi silali di osib Jerusalem qureq osi gilqab.

1 Korin 3:10

Qotei a e qa are boleiyosiq wau ebej deqa e tal gereiyo qaji tamo bulosim e tal gereiyqajqa qalie bole. Deqa e tal aqa utru atem. Ariya bini tamo qudei naŋgi kamba olo tal aqa ai gogeq di tal ateqnub. Ariya e na tamo kalil naŋgi endegsi minjreqnum, “Niŋgi tal ateqnub deqa niŋgi geregere atoqniye.”

1 Korin 4:15

Tamo 10,000 naŋgi na Kristus aqa kumbra niŋgi osorŋgoqnqab di uŋgum. Niŋgi abu gargekoba sai. Agi e segi qujai nuŋgo abu. E qujai namo Kristus Yesus aqa anjam niŋgi merŋgonam qusib are bulyeb. Dena e nuŋgo abuem.

2 Korin 10:12

Tamo qudei naŋgi diqoqnsib naŋgo segi ñam soqteqnub qaji iga naŋgi unub dego sai. Gago kumbra ti naŋgo kumbra ti kerekere unub iga degsi marqa keresai. Tamo naŋgi di naŋgo segi kumbra na naŋgo kumbra laŋa pegiyeqnub. Osib tamo qudei naŋgo kumbra na dego naŋgo segi kumbra olo pegiyeqnub. Tamo naŋgi kumbra degyeqnub qaji naŋgi tulaŋ powo saiqoji.

2 Korin 10:18

Iga qalie, tamo bei a aqa segi ñam soqtqas di a Qotei aqa ŋamgalaq di ñam saiqoji sqas. Ariya Tamo Koba Qotei na tamo bei aqa ñam soqtetqas di a ñam bole oqas.

2 Korin 10:8

Tamo Koba Yesus a na iga siŋgila egej deqa iga aqa wau ojeqnum. Di kiyaqa? Iga na nuŋgo areqalo Yesus qa siŋgilateqnub qaji di olo siŋgilatetŋgwajqa deqa. Iga niŋgi ugeugeiŋgwajqa deqa sai. Deqa e gago wau endeqa areboleboleibim gago ñam yala soqtqai di e deqa jemaibqasai.

2 Korin 12:11

Anjam e mareqnum endi nanari anjam. Di nuŋgo une. Agi niŋgi na ijo areqalo tigeltetbeqnub deqa e nanari anjam endi mareqnum. Niŋgi ijo kumbra bole qa marqa kere. Ariya niŋgi marqa urateqnub. Deqa e segi ijo kumbra bole qa mareqnum. Bole, e tamo bolesai. Ariya niŋgi na olo tamo qudei naŋgo ñam soqtoqnsib mareqnub, “Tamo naŋgi di Qotei aqa wau tamo bolequja.” Ariya tamo naŋgi dena e buŋbosai.

2 Korin 12:19

Niŋgi gago anjam kalil endi sisiyosib iga qa endegsib are qalaib, “Naŋgi anjam neŋgreŋyeqnub di naŋgo segi jejamu une saiqoji qa marsib deqa neŋgreŋyeqnub.” Di sai. Iga Kristus aqa tamo deqa iga Qotei aqa ŋamgalaq di anjam endi neŋgreŋyeqnum. O ijo was bole, anjam kalil iga neŋgreŋyeqnum qaji endi niŋgi siŋgilatŋgwajqa deqa neŋgreŋyeqnum.

2 Korin 2:17

Ariya iga tamo gargekoba naŋgi bul sai. Agi tamo gargekoba naŋgi Qotei aqa anjam mareqnub di naŋgi silali oqajqa deqa osib waueqnub. Ariya iga degyosaieqnum. Qotei na iga wau egej deqa iga gisaŋ na wauosaieqnum. Iga Kristus koba na areqalo qujaitosim Qotei aqa ŋamgalaq di aqa anjam bole geregere marsim laqnum.

2 Korin 5:12

Gago anjam dena iga na niŋgi walawalaiŋgosai. Yim niŋgi are qalqab, iga tamo bole. Iga degosai. Niŋgi gago kumbra qa tulaŋ areboleboleiŋgwajqa deqa iga anjam di neŋgreŋyonum. Tamo qudei naŋgi tamo naŋgo ñam qa laŋa areboleboleinjreqnu. Naŋgo kumbra naŋgo are miligiq di unu qaji naŋgi deqa areboleboleinjrosaieqnu. Deqa gago areqalo agiende. Niŋgi na kamba tamo naŋgi di ŋiriŋtnjriye.