2 Korin 12:16 - Yesus Aqa Anjam Bole

¹⁶ Ariya niŋgi qudei ijo kumbra qa endegsib mareqnub, “Bole, Pol a gago iŋgi iŋgi boleq na yaigosaioqnej. Ariya a na iga walawalaigoqnsiq gago iŋgi iŋgi gisaŋ na yaigoqnej.”

2 Korin 12:16 ပူးပေါင်းရင်းမြစ်များ

2 Korin 1:12

O was qu, e ijo kumbra bei endeqa tulaŋ areboleboleibqo. Ijo are miligiq di e qalieonum, e kumbra bole tiŋtiŋ segi dauryoqnsim yeqnum. Kumbra Qotei na osorbej qaji di segi e dauryoqnsim yeqnum. E mandam tamo naŋgoq dena powo osim kumbra di yosaieqnum. Qotei a e qa are boleiyosiq kumbra di osorbej deqa e yeqnum. Deqa e tamo uŋgasari kalil naŋgo ambleq dia kumbra di yeqnum. Agi e nuŋgo ambleq di dego nami kumbra di tulaŋ koba yoqnem.

2 Korin 11:20

Nuŋgo kumbra agiende. Tamo bei na niŋgi ojsim wau koba eŋgimqa kio nuŋgo iŋgi iŋgi saitimqa kio nuŋgo iŋgi iŋgi gisaŋ na yaiŋgimqa kio aqa segi ñam soqtimqa kio nuŋgo ula poŋyimqa kio niŋgi a odyibqa aqa segi areqalo dauryoqnsim degyoqnqas.

2 Korin 12:13

Kumbra e qure qureq dia Kristen tamo uŋgasari naŋgo ambleq di yeqnum qaji di e nuŋgo ambleq di dego yoqnem. Ariya kumbra qujai e nuŋgo ambleq di yosai qaji agiende. E niŋgi gulube eŋgwa uratosim deqa e niŋgi silali iŋgi iŋgi qa merŋgosaioqnem. Di e une yoqnem e? Sai. Ariya e une yoqnem bole edegosib ijo une di olo kobotetbiye.

2 Korin 4:2

Kumbra uge uge kalil tamo naŋgi ulitosib yeqnub qaji di iga qoreiyeqnum. Iga gisaŋ kumbra na walwelosaieqnum. Iga Qotei aqa anjam bulbulyo-saieqnum. Iga boleq di anjam bole segi mareqnum. Yim tamo kalil naŋgi gago kumbra di unsib naŋgo are miligiq di qalieqab, bole, iga Qotei aqa ŋamgalaq di wau bole yeqnum.

2 Korin 6:8

Tamo qudei naŋgi gago ñam soqteqnub. Ariya tamo qudei naŋgi gago ñam ugeteqnub. Tamo qudei naŋgi iga qa yomueqnub. Ariya tamo qudei naŋgi olo gago kumbra bole babteqnub. Tamo qudei naŋgi are qaleqnub, iga gisaŋ tamo. Sai. Iga anjam bole segi mareqnum.

2 Korin 7:2

Niŋgi nuŋgo are miligi waqtosib iga qalaqalaigoqniye. Niŋgi iga qa qalie. Iga tamo bei kumbra uge bei yosaioqnem. Iga tamo bei ugeugeiyosaioqnem. Iga tamo bei aqa iŋgi iŋgi gisaŋ na yaiyosaioqnem.

1 Tesalonaika 2:3

Bati deqa iga niŋgi metŋgosim endegsi merŋgoqnem, “Niŋgi Yesus qa nuŋgo areqalo siŋgilatiye.” Bati di iga anjam uge bei merŋgosaioqnem. Iga nuŋgo ambleq di sosim kumbra jiga ti gisaŋ kumbra ti yosaioqnem.

1 Tesalonaika 2:5

Niŋgi qalie, iga na walawala anjam bei niŋgi merŋgosaioqnem. Osim nuŋgo iŋgi iŋgi qa maulgonaq anjam bole bei laŋa gisaŋ na niŋgi merŋgosaioqnem. Gago kumbra di Qotei a segi qalie.

1 Pita 2:3

Tamo Koba Yesus aqa kumbra a niŋgi qa yeqnu qaji di niŋgi uyo oneiyonub deqa niŋgi qalieonub, Tamo Koba Yesus a tamo tulaŋ boledamu.