2 Korin 12:10 - Yesus Aqa Anjam Bole

¹⁰ Deqa e Kristus aqa ñam qa siŋgila saiqoji sqai kio tamo qudei naŋgi na e misiliŋboqnqab kio e gulube oqnqai kio jeu tamo naŋgi na e ugeugeiboqnqab kio e waukobaoqnqai kio di uŋgum. E deqa areboleboleibqas. Di kiyaqa? E siŋgila saiqoji sqai bati di e Kristus aqa siŋgila ti sqai.

2 Korin 12:10 ပူးပေါင်းရင်းမြစ်များ

Luk 6:22

“Niŋgi ijo ñam oqnsib e daurbeqnub deqa bunuqna tamo qudei naŋgi na niŋgi jeutŋgoqnsib misiliŋgoqnsib nuŋgo ñam ugeugeiyoqnqab. Nami naŋgo moma naŋgi na Qotei aqa medabu o qaji tamo naŋgi degsib ugeugeinjroqneb. Dego kere bunuqna naŋgi niŋgi dego ugeugeiŋgoqnqab. Di kiyaqa? Niŋgi na e Tamo Aŋgro daurbeqnub deqa. Di uŋgum. Naŋgi niŋgi ugeugeiŋgibqa niŋgi tulaŋ areboleboleiŋgeme. Niŋgi quiye. Nuŋgo awai bole agi laŋ goge di unu. Bunuqna niŋgi oqsib awai di itqab.

Jon 15:21

Ariya jeu tamo naŋgi ijo Abu e qariŋbej qaji a qa qaliesai. Deqa naŋgi na niŋgi ugeugeiŋgoqnqab. Di kiyaqa? Niŋgi ijo ñam ejunub deqa.

Aposel 5:41

Onaqa naŋgi areboleboleinjrnaqa koro sawa di uratosib gileb. Naŋgi Yesus aqa ñam qa jaqatiŋ eb deqa Qotei a naŋgi qa marej, “Naŋgi Yesus aqa ñam qa siŋgilaonub deqa naŋgi jaqatiŋ oqa kere.” Qotei a naŋgi qa degsi marej deqa naŋgi areboleboleinjrnaq gileb.

Rom 5:3

Ariya iga deqa segi areboleboleigosai. Iga gulube oqnsim unum deqa ti areboleboleigeqnu. Di kiyaqa? Iga qalieonum, gulube dena gago are siŋgilatetgeqnaqa iga siŋgila na tigeleqnum.

1 Korin 4:10

Iga Kristus aqa ñam osi laqnum deqa iga nanari tamo bul unum. Ariya niŋgi Kristus aqa kumbra qa tulaŋ qalie unub. Iga siŋgila saiqoji unum. Ariya niŋgi siŋgila ti unub. Iga ñam saiqoji unum. Ariya niŋgi ñam ti unub.

2 Korin 1:4

Deqa a gago gulube kalil qa gago are latetgeqnu. Yeqnaqa aqa kumbra dena iga na olo kamba tamo uŋgasari gulube ti unub qaji naŋgo are latetnjreqnum.

2 Korin 10:18

Iga qalie, tamo bei a aqa segi ñam soqtqas di a Qotei aqa ŋamgalaq di ñam saiqoji sqas. Ariya Tamo Koba Qotei na tamo bei aqa ñam soqtetqas di a ñam bole oqas.

2 Korin 12:9

Onaqa Qotei a saidosiq endegsi merbej, “E ni qa are boleiboqnimqa ni siŋgilatmoqnqai dena ni keretmqas. Di kiyaqa? Ni siŋgila saiqoji unum deqa ijo siŋgila ni qa brantoqnsim ni siŋgilatmoqnqas.” Qotei na e degsi merbej. Deqa e siŋgila saiqoji unum deqa areboleboleiboqnqas. Yim Kristus aqa siŋgila ijoq di sqas.

2 Korin 13:4

Bole, Kristus a ŋamburbasq di gaiŋesoqnej bati deqa a siŋgila saiqoji soqnej. Ariya bini a olo Qotei aqa siŋgila na ŋambile unu. Iga Kristus beteryejunum deqa iga dego siŋgila saiqoji unum. Ariya iga Qotei aqa siŋgila na olo Kristus ombla ŋambile sqom. Iga niŋgi qa bosim siŋgila di niŋgi osorŋgwom.

2 Korin 13:9

Deqa iga siŋgila saiqoji soqnim niŋgi siŋgila ti sqab di iga areboleboleigwas. Iga gaigai niŋgi qa endegsi Qotei pailyeqnum, “O Abu, ni na Korin Kristen naŋgi siŋgilatnjrimqa naŋgi torei siŋgila na sqab.”

2 Korin 4:17

Di kiyaqa? Iga qalieonum, gulube ti jaqatiŋ ti iga bini eqnum qaji di tulaŋ kokba sai. Naŋgi sokiñalayosib koboqab. Iga gulube di eqnum deqa mondoŋ iga laŋ qureq dia so bole gaigai sqom. Iga qalieonum, iŋgi bole bole iga mondoŋ oqom qaji di tulaŋ boledamu. Iŋgi iŋgi dena mandam qa iŋgi iŋgi kalil tulaŋ buŋnjresqas.

2 Korin 4:5

Niŋgi quiye. Iga gago segi kumbra qa marosaieqnum. Iga endegsi mareqnum, “Kristus Yesus a gago Tamo Koba. Iga Yesus aqa anjam dauryeqnum deqa iga nuŋgo wau tamo unum.” Iga degsi segi mareqnum.

2 Korin 5:15

Iga ŋambile unum deqa iga gago segi jejamu qa are qalsim walwelqasai. Utru deqa a iga qa moiej. A gago sawa osiq moisiq olo subq na tigelej deqa iga a qa are qalsim walweloqnqom.

2 Korin 5:20

Deqa iga Kristus aqa medabu osim aqa anjam marsim laqnum. Qotei a gago medabu na tamo kalil naŋgi metnjreqnu. Iga na tamo kalil naŋgi Kristus aqa anjam palontosim endegsi minjreqnum, “Niŋgi jeu kumbra uratosib Qotei ombla are qujaitosib soqniye.”

2 Korin 6:4

Iga Qotei aqa wau tamo deqa iga gaigai tamo uŋgasari kalil naŋgo ŋamgalaq di kumbra bole yeqnum. Gulube bei bei gagoq di branteqnaqa iga siŋgila na tigeloqnsim gulube di qoboiyeqnum. Tamo qudei naŋgi na iga ugeugeigeqnab iga naŋgi qa ulaosaieqnum. Une bei bei na iga padaltgwa laqnaqa iga na olo gotraŋyeqnum.

2 Korin 7:4

E qalieonum, niŋgi tamo bole deqa e anjam bei ulitqasai. E anjam kalil boleq na merŋgwai. E niŋgi qa tulaŋ areboleboleibqo. Ijo are miligi niŋgi qa tulaŋ laejunu. Iga gulube koba eqnum di uŋgum, e niŋgi qa are qaloqnsim dena ijo are miligiq di e tulaŋ areboleboleibqo.

Efesus 6:10

Ariya e ijo anjam getentqai. Niŋgi Tamo Koba Yesus beteryejunub deqa niŋgi aqa siŋgila kobaquja qa are qaloqnsib siŋgila na tigelesoqniye.

Filipai 1:29

Niŋgi quiye. Qotei na niŋgi giltŋgej deqa niŋgi Kristus aqa wau ojeqnub. Niŋgi a qa nuŋgo areqalo siŋgilatqajqa deqa segi niŋgi giltŋgosai. Niŋgi aqa ñam qa jaqatiŋ oqajqa deqa ti niŋgi giltŋgej.

Kolosi 1:24

E niŋgi aqaryaiŋgwa osim deqa e jaqatiŋ koba eqnum. E ijo jaqatiŋ deqa tulaŋ areboleboleibeqnu. E na Kristus aqa segi tamo uŋgasari naŋgi aqaryainjreqnum. Naŋgi aqa segi jejamu bul. A naŋgo gate. A na naŋgi aqaryainjrqa marsiq jaqatiŋ koba ej. Aqa jaqatiŋ di koboosaiunu. Deqa e dego tamo uŋgasari naŋgi qa osimqa ijo segi jejamuq di jaqatiŋ koba eqnum. Ijo kumbra dena e na Kristus aqa jaqatiŋ dauryosim kereteqnum.

2 Tesalonaika 1:4

Utru deqa iga qure kalilq di laqnsimqa tamo uŋgasari Qotei louqa koroeqnub qaji naŋgi niŋgi qa sainjroqnsim nuŋgo ñam soqteqnum. Kumbra uge kalil jeu tamo naŋgi na niŋgi eŋgeqnub qaji deqa ti gulube kalil niŋgi qa branteqnu qaji deqa ti iga na naŋgi sainjroqnsim endegsi minjreqnum, “Tesalonaika Kristen naŋgi Yesus qa naŋgo areqalo tulaŋ siŋgilatoqnsib deqa naŋgi gulube ti jaqatiŋ ti kalil di qoboiyoqnsib siŋgila na tigelejunub.”

2 Timoti 3:11

Ni qalie, Antiok qure ti Aikoniam qure ti Listra qure ti dia jeu tamo naŋgi na e kumbra uge uge ebeqnabqa e jaqatiŋ koba oqnem. Qure dia kumbra uge kalil e qa brantoqnej qaji di ni qalie. Ariya bati deqa Tamo Koba Qotei na e aqaryaiboqnsiqa gulube kalilq dena e oqnsiq taqal atoqnej. Deqa bini e bole unum.

Jems 1:2

O ijo was qu, gulube utru segi segi gargekoba niŋgi qa boqnimqa uŋgum niŋgi endegsib are qaloqniye, “Iga gulube deqa areboleboleigim sqom.”

Uli Anjam 2:3

Ni ijo ñam ojejunum deqa tamo qudei naŋgi na ni numoqnsib ugeugei-meqnub. Ariya e qalieonum, ni siŋgila na tigeloqnsimqa gulube di qoboiyeqnum. Ni asgimosaieqnu.