Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -




2 Korin 11:3 - Yesus Aqa Anjam Bole

3 Ariya e amal uge Satan qa are qalsim deqa e niŋgi qa ulaonum. A gisaŋ ani tamo deqa a nami Iv gisaŋyonaqa a une atej. Une di niŋgi qa bosim nuŋgo areqalo ugetetŋgimqa niŋgi Kristus a segi qujai qalaqalaiyqajqa urataib deqa e niŋgi qa ulaonum.

အခန်းကိုကြည့်ပါ။ ကော်ပီ




2 Korin 11:3
47 ပူးပေါင်းရင်းမြစ်များ  

Di kiyaqa? Tamo qudei naŋgi bosib gisaŋosib marqab, ‘E Kristus.’ Qudei naŋgi marqab, ‘E Qotei aqa medabu o qaji tamo bole.’ Degsib maroqnsib maŋwa kokba gargekoba babtoqnqab. Naŋgo maŋwa dena naŋgi na tamo uŋgasari kalil naŋgi ugeugeinjrqajqa deqa wauoqnqab. Osib Qotei aqa segi tamo uŋgasari nami giltnjrej qaji naŋgi dego ugeugeinjrqajqa wauoqnqab.


Niŋgi nuŋgo abu Satan aqa aŋgro. Niŋgi nuŋgo abu Satan aqa areqalo dauryqajqa tulaŋ siŋgilaeqnub. Satan a nami tamo qalo qaji tamo soqnej agi bini unu. A kumbra bole dauryosaieqnu. Di kiyaqa? A kumbra bole dauryqajqa torei urateqnu. A anjam marqas di a gisaŋ anjam segi marqas. A gisaŋ anjam qa utru. A gisaŋ tamo. A gisaŋ anjam kalil aqa abu.


A na tamo qudei naŋgi aqa segi tamo uŋgasari naŋgo areqalo siŋgilatetnjrqajqa powo enjrej deqa naŋgi naŋgo areqalo geregere siŋgilatetnjroqnebe. A na tamo qudei naŋgi silali iŋgi iŋgi jeisib tamo uŋgasari iŋgi qa truqueqnub qaji naŋgi enjrqajqa powo enjrej deqa naŋgi silali iŋgi iŋgi koba koroiyosib jeisib enjroqnebe. A na tamo qudei naŋgi aqa wau taqatqajqa powo enjrej deqa naŋgi na wau di geregere taqatoqnebe. A na tamo qudei naŋgi aqa segi tamo uŋgasari naŋgi qa dulosib geregereinjrqajqa powo enjrej deqa naŋgi arebolebole na naŋgi geregereinjroqnebe.


O was qu, e ijo kumbra bei endeqa tulaŋ areboleboleibqo. Ijo are miligiq di e qalieonum, e kumbra bole tiŋtiŋ segi dauryoqnsim yeqnum. Kumbra Qotei na osorbej qaji di segi e dauryoqnsim yeqnum. E mandam tamo naŋgoq dena powo osim kumbra di yosaieqnum. Qotei a e qa are boleiyosiq kumbra di osorbej deqa e yeqnum. Deqa e tamo uŋgasari kalil naŋgo ambleq dia kumbra di yeqnum. Agi e nuŋgo ambleq di dego nami kumbra di tulaŋ koba yoqnem.


Nuŋgo kumbra agiende. Tamo bei na niŋgi ojsim wau koba eŋgimqa kio nuŋgo iŋgi iŋgi saitimqa kio nuŋgo iŋgi iŋgi gisaŋ na yaiŋgimqa kio aqa segi ñam soqtimqa kio nuŋgo ula poŋyimqa kio niŋgi a odyibqa aqa segi areqalo dauryoqnsim degyoqnqas.


Deqa Kristen was bei aqa siŋgila saiamqa e was deqa are koba qalsiy e segi dego siŋgila saibqas. Iŋgi bei na Kristen was bei a uneq waiyimqa e was deqa are koba qalsiy are ugeibqas.


Ariya iga tamo gargekoba naŋgi bul sai. Agi tamo gargekoba naŋgi Qotei aqa anjam mareqnub di naŋgi silali oqajqa deqa osib waueqnub. Ariya iga degyosaieqnum. Qotei na iga wau egej deqa iga gisaŋ na wauosaieqnum. Iga Kristus koba na areqalo qujaitosim Qotei aqa ŋamgalaq di aqa anjam bole geregere marsim laqnum.


Kumbra uge uge kalil tamo naŋgi ulitosib yeqnub qaji di iga qoreiyeqnum. Iga gisaŋ kumbra na walwelosaieqnum. Iga Qotei aqa anjam bulbulyo-saieqnum. Iga boleq di anjam bole segi mareqnum. Yim tamo kalil naŋgi gago kumbra di unsib naŋgo are miligiq di qalieqab, bole, iga Qotei aqa ŋamgalaq di wau bole yeqnum.


Kristus a niŋgi qa are tulaŋ boleiyej aqa kumbra dena Qotei na niŋgi aqa segi tamo uŋgasari sqa marsiq metŋgej. Ariya niŋgi olo urur Qotei qoreiyosib Kristus aqa anjam bole dauryqa uratosib olo anjam bei dauryeqnub. E nuŋgo kumbra deqa tulaŋ prugugetonum.


Bole, Kristen tamo qudei naŋgi uli na gago koro miligiq aieb. Naŋgi Kristen tamo bolesai. Naŋgi gisaŋ tamo. Nami iga dal anjam aqa sorgomq di soqnem bati deqa Kristus Yesus a na iga olo eleŋej deqa dal anjam na iga olo taqatgosai. Ariya tamo naŋgi di gago kumbra di lumu na unqajqa deqa gago koro miligiq aieb. Naŋgi na iga olo osib dal anjam aqa sorgomq di atqajqa deqa are qalsib gago koro miligiq aieb.


O Galesia tamo, niŋgi tulaŋ nanari. Iga nami niŋgi Yesus Kristus osorŋgem. Kumbra dena niŋgi a ŋamburbasq di gaiŋesonaq unobuleb. Ariya tamo yai na nuŋgo areqalo olo niñaqyetŋgej deqa niŋgi Kristus aqa anjam olo urateqnub?


E nuŋgo kumbra deqa are qalsim deqa e ulaeqnum. Wau kalil e nami nuŋgo ambleq di yoqnem qaji di laŋa uloŋaim deqa e niŋgi qa are koba qaleqnum.


Deqa iga olo aŋgro kiñilala bul sqasai. Tamo qudei naŋgi gisaŋ kumbra ti maqu kumbra ti tulaŋ qalieosib yeqnub. Deqa naŋgi gisaŋ anjam koba marsib laqnub. Jagwa na yuwal tigelteqnaqa oqe aieqnu dego kere anjam dena tamo qudei naŋgo areqalo niñaqyetnjreqnu. Ariya iga aŋgro kiñilala bul sqasai deqa anjam dena gago areqalo niñaqyetgwasai.


Nami niŋgi dego so namijq di sosib walweloqneb. So namij dena niŋgi gisa gisaŋgeqnaqa niŋgi kumbra uge uge yqajqa are prugŋgoqnej. Nuŋgo kumbra dena niŋgi padalqa gamq di soqneb. Ariya bini niŋgi so namij di torei uratosib


Tamo kalil gago Tamo Koba Yesus Kristus qalaqalaiyqa uratosaieqnub qaji naŋgi qa Qotei a are boleiyeme.


Tamo qudei naŋgi na niŋgi endegsib merŋgwab, “Niŋgi nuŋgo segi ñam tentoqnsib olo laŋ aŋgro naŋgi qa louoqniye. Iga ŋeiobilqei na kumbra di unsim deqa niŋgi degsi merŋgonum.” O was qu, niŋgi tamo di naŋgo anjam quetnjraib. Tamo deqaji naŋgi naŋgo areqalo namij dauryoqnsib endegsib mareqnub, “Iga powo bole ti unum.”


Tamo bei na bosim niŋgi gisaŋgosim walawala anjam bei niŋgi merŋgimqa niŋgi qusib dauryaib deqa e na anjam endi niŋgi merŋgonum.


O was qu, niŋgi geregere ŋam atsib soqniye. Tamo qudei naŋgi bosib naŋgo segi powo na ti gisaŋ anjam na ti nuŋgo areqalo bulyetŋgosib niŋgi naŋgo anjam dauryqajqa walawala-iŋgoqnqab. Deqa niŋgi naŋgo anjam di dauryaib. Tamo naŋgi di naŋgo moma naŋgi ti mondor uge uge laŋ ti mandam ti taqatejunub qaji naŋgi ti naŋgo anjam dauryeqnub. Naŋgi Kristus aqa areqalo dauryosaieqnub.


Utru deqa e niŋgi qa tariŋqa keresai. Deqa e Timoti qariŋyonam niŋgi qa bej. E endegsi are qalem. Walawalaiyo tamo Satan a na niŋgi uneq waiŋgwoqa niŋgi na gago wau di laŋa ulontosib nuŋgo areqalo Yesus qa siŋgilatqa uratonub kio? E di qalieqajqa deqa Timoti qariŋyonam niŋgi qa bej.


E Masedonia sawaq gilqa osimqa ni endegsi mermem, “Ni Efesus qureq di soqne.” Ariya bini e anjam di olo pulutsiy ni mermqai. Ni Efesus qureq di ololo soqne. Qure dia tamo qudei naŋgi Qotei aqa anjam marqa oqnsib gisaŋ anjam bei ti turtoqnsib tamo uŋgasari naŋgi minjreqnub. Deqa ni Efesus qureq di sosimqa tamo naŋgi di siŋgila na endegsi minjre, “Niŋgi gisaŋ anjam di tamo uŋgasari naŋgi minjraib.”


Satan a na Adam gisaŋ anjam bei minjosai. A na Iv gisaŋ anjam minjnaq qusiq dauryej. Osiq deqa a une atej.


Tamo uge uge naŋgi ti gisaŋ tamo naŋgi ti brantoqnsib tamo uŋgasari naŋgi gisa gisaŋnjroqnqab. Deqa Satan a na kamba dego gisaŋ tamo naŋgi di gisa gisaŋnjroqnqas. Yim naŋgo kumbra di tulaŋ ugedamuqas.


O Taitus, Krit nuiq dia anjam gotraŋyo qaji tamo gargekoba unub. Deqa ni na tamo bole bole naŋgi unjrsim gate ateleŋ. Anjam gotraŋyo qaji tamo naŋgi di anjam laŋa laŋa maroqnsib dena tamo uŋgasari naŋgi gisa gisaŋnjreqnub. Tamo naŋgi di Juda tamo. Deqa naŋgi tamo muluŋ breinjrqajqa tulaŋ siŋgi-laeqnub.


Deqa tamo qudei naŋgi bosib anjam utru segi segi na nuŋgo are tigeltetŋgibqa niŋgi naŋgo anjam di dauryaib. Osib Qotei aqa gam urataib. Qotei a iga qa are tulaŋ boleiyeqnu anjam dena iga gago are siŋgilatoqnqom. Tamo qudei naŋgo iŋgi uyo qa anjam mareqnub. Anjam di gisaŋ. Anjam di laŋa jejamu qa anjam. Deqa anjam dena iga gago are siŋgilatqa keresai. Tamo uŋgasari naŋgi iŋgi uyo qa anjam di dauryeqnub ariya kumbra dena naŋgi yala aqaryainjrosaieqnu.


O ijo was bole, niŋgi diŋo bati qa anjam di bole qalieonub deqa niŋgi geregere ŋam atoqniye. Niŋgi ŋam atqasai di dal anjam gotraŋyo qaji tamo naŋgi bosib niŋgi gisaŋgosib titŋgibqa niŋgi siŋgila na tigelesqa uratosib uloŋo uge.


Ariya ijo anjam kobaquja bei unu. E na niŋgi merŋgit poiŋgem. Mondoŋ diŋo bati jojomoqnimqa meqe meqem tamo naŋgi bosib naŋgo segi areqalo uge uge dauryosib misiliŋ anjam endegsib merŋgoqnqab,


O ijo aŋgro, diŋo bati jojomqo. Niŋgi nami queb, Kristus aqa jeu tamo Satan a bqas. Bini Kristus aqa jeu tamo gargekoba naŋgi agi bosib unub. Deqa iga qalieonum, diŋo bati jojomqo.


O ijo kadoi bole, tamo gargekoba naŋgi mandamq endia laqnsibqa gisaŋ anjam endegsib mareqnub, “Qotei aqa Mondor na gago medabu siŋgilatetgeqnaqa iga anjam mareqnum.” Tamo gargekoba naŋgi anjam degsib mareqnub di gisaŋ. Deqa niŋgi mati mondor kalil naŋgi peginjrsib naŋgi Qotei aqaq dena beb kio sai kio di niŋgi qalieqab. Qalieosib naŋgo anjam di qusib nuŋgo areqaloq di siŋgilataib.


Jeu tamo qudei naŋgi uliosib nuŋgo ambleq aieb. Qotei a nami naŋgi qa marej, “Mondoŋ e na naŋgo une qa peginjrsiy padaltnjrqai.” Es was qu, jeu tamo naŋgi di Qotei qoreiyeqnub. Qotei a iga qa are tulaŋ boleiyeqnu aqa anjam di jeu tamo naŋgi dena olo bulbulyoqnsib mareqnub, “Qotei a iga qa laŋa are boleiyeqnu. Deqa uŋgum, iga kumbra uge uge yoqnqom.” Degsib maroqnsib gago Gate Koba Yesus Kristus dego qoreiyeqnub.


Onaqa e olo ŋam atsimqa amal aqa medabuq na ya beqynaqa ya meli do bulosiqa uŋa di dauryonaq unem. Ya dena uŋa di qalsim moiotqajqa deqa amal na ya di beqyej.


Qotei aqa laŋ aŋgro naŋgi na amal di osib waiyonab mandamq aiej. Amal di nami soqnej qaji. Aqa ñam Satan. Aqa ñam bei, “Tamo Uŋgasari Kalil Naŋgo Ñam Ugetetnjro Qaji Tamo.” A na tamo uŋgasari kalil mandamq di so qaji naŋgi gisa gisaŋnjroqnej. A ti aqa laŋ aŋgro naŋgi ti kalil wainjrnab mandamq aieb.


Aisiq amal kobaquja di ojsiq sil dena tontej. A wausau 1,000 tontim sqas. Amal di nami soqnej qaji. Aqa ñam Satan. Aqa ñam bei, “Tamo Kalil Naŋgo Ñam Ugetnjro Qaji Tamo.”


ကြှနျုပျတို့နောကျလိုကျပါ:

ကြော်ငြာတွေ


ကြော်ငြာတွေ