2 Korin 11:15 - Yesus Aqa Anjam Bole

¹⁵ A kumbra degyeqnu deqa aqa wau tamo naŋgi dego naŋgo kumbra bulyoqnsib tamo naŋgi kumbra bole dauryoqnsib waueqnub qaji naŋgi buleqnub. Iga deqa tulaŋ prugwasai. Mondoŋ Qotei na tamo naŋgi di naŋgo kumbra deqa kambatnjrsim awai ugedamu enjrqas.

2 Korin 11:15 ပူးပေါင်းရင်းမြစ်များ

Rom 2:6

Osimqa bati deqa Qotei a tamo uŋgasari kalil naŋgo kumbra keretosim awai segi segi enjrqas.

Rom 3:8

Tamo qudei naŋgi anjam uge deqaji endegsib mareqnub, “Uŋgum, iga kumbra uge uge yoqnqom. Yimqa gam dena kumbra bole brantoqnqas. Pol a anjam degsi palontosiq iga mergeqnu.” O was qu, tamo qudei naŋgi degsib iga yomuigosib mareqnub. Di gisaŋ. Naŋgo kumbra uge deqa Qotei na naŋgi awai ugedamu enjrqas.

1 Korin 9:11

O was qu, iga Qotei aqa anjam qa niŋgi aqaryaiŋgoqnem. Di nuŋgo qunuŋ qa. Ariya niŋgi na kamba jejamu qa iŋgi iŋgi qa olo iga aqaryaigwajqa merŋgwom di iga une yonum e? Iga nuŋgo are miligiq di iŋgi yagobulem. Iŋgi di meliqo deqa niŋgi na olo otorosib egwajqa merŋgwom di iga une yonum e? Sai.

2 Korin 11:13

Tamo naŋgi di Qotei na qariŋnjrosai. Naŋgi wau tamo bolesai. Naŋgi gisaŋoqnsib naŋgo segi kumbra bulyoqnsib tamo bole buleqnub. Yim tamo uŋgasari naŋgi unsib marqab, “Naŋgi Kristus aqa wau tamo bole.”

2 Korin 11:23

Naŋgi mareqnub, “Iga Kristus aqa wau tamo.” Ariya e nanari tamo bulosiy anjam endegsi marqai. E dego Kristus aqa wau tamo. Agi e na tamo naŋgi di tulaŋ buŋnjrsimqa ŋes na ti jaqatiŋ na ti Kristus aqa wau ojeqnum. Bati gargekoba jeu tamo naŋgi na e tonto talq di waiboqneb. Osib e lubogargekobatoqneb. Gulube dena e na tamo naŋgi di tulaŋ buŋnjroqnem. Bati gargekoba e moiqa jojomem.

2 Korin 3:9

Dal anjam aqa wau agiende. Dal anjam na iga gago une qa mergoqnsiq iga padaltgeqnu. Wau di Qotei aqa riaŋ ti bej. Ariya iga qalieonum, iga na tamo uŋgasari naŋgi Qotei aqa ŋamgalaq di tamo bole une saiqoji sqajqa gam osornjreqnum wau di olo tulaŋ riaŋ koba ti bqas. A na dal anjam aqa riaŋ tulaŋ buŋyqas.

Efesus 6:12

Niŋgi geregere are qaliye. Iga mandam tamo uŋgasari naŋgi ti qotosaieqnum. Iga Satan aqa mondor uge uge naŋgi ti aqa gate kokba ti iŋgi iŋgi kalil siŋgila ejunub qaji naŋgi ti qoteqnum. Gate kokba naŋgi di ambru qa bati endeqa mandam taqatoqnsib unub. Iga mondor uge uge kalil laŋ goge di unub qaji naŋgi ti qoteqnum.

Filipai 3:19

Tamo naŋgi di naŋgo segi jejamu qa are qaloqnsib dauryeqnub. Naŋgo areqalo di naŋgo gisaŋ qotei bul ateqnub. Naŋgi bati gaigai mandam qa iŋgi iŋgi oqajqa are tulaŋ prugnjreqnu. Naŋgi jemai kumbra yqajqa tulaŋ areboleboleinjreqnu. Deqa mondoŋ tamo naŋgi di ŋamyuoq di torei padalqab.

2 Pita 2:3

Tamo naŋgi di mamaul ani. Deqa naŋgi na bosib gisaŋ anjam gargekoba niŋgi merŋgoqnsib dena nuŋgo silali iŋgi iŋgi yaiŋgoqnqab. Ariya tulaŋ nami Qotei na tamo naŋgi di peginjrqa bati atsiqa naŋgi qa endegsi marej, “E na tamo naŋgi di padaltnjrougetqai.” Od, tamo naŋgi di bole padalqab. Qotei a naŋgo padalqa bati qa tariŋeqnu.

Jut 1:4

Jeu tamo qudei naŋgi uliosib nuŋgo ambleq aieb. Qotei a nami naŋgi qa marej, “Mondoŋ e na naŋgo une qa peginjrsiy padaltnjrqai.” Es was qu, jeu tamo naŋgi di Qotei qoreiyeqnub. Qotei a iga qa are tulaŋ boleiyeqnu aqa anjam di jeu tamo naŋgi dena olo bulbulyoqnsib mareqnub, “Qotei a iga qa laŋa are boleiyeqnu. Deqa uŋgum, iga kumbra uge uge yoqnqom.” Degsib maroqnsib gago Gate Koba Yesus Kristus dego qoreiyeqnub.

Uli Anjam 13:14

A na maŋwa di wagme juwaŋ e nami unem qaji aqa ŋamgalaq di yoqnsiqa kumbra dena tamo uŋgasari mandamq di unub qaji naŋgi gisa gisaŋnjroqnej. Osiqa naŋgi endegsi minjroqnej, “Niŋgi na sulum gereiyiye. Gereiyqa osibqa wagme juwaŋ aqa ulatamu bul gereiyosib aqa ñam soqtoqniye.” Wagme juwaŋ di agi nami serie na qalnab moisiq olo tigelosiqa ŋambile soqnej.

Uli Anjam 13:2

Wagme juwaŋ e unem qaji di pusi juwaŋ bul kobaquja. Pusi di aqa ñam lepat. Aqa siŋga bea aqa siŋga bul. Aqa medabu laion aqa medabu bul. Amal uge kobaquja a na aqa segi siŋgila wagme juwaŋ di yosiqa minjej, “Ni e ombla mandor kokba sqom.” Osiqa a siŋgila kobaquja yej.

Uli Anjam 9:11

Sis naŋgo mandor koba agi laŋ aŋgro sub guma koba taqatejunu qaji agi a di. Aqa ñam Hibru anjam na Abadon. Gago anjam na Tamo Padaltnjro Qaji Tamo.