2 Korin 10:18 - Yesus Aqa Anjam Bole

¹⁸ Iga qalie, tamo bei a aqa segi ñam soqtqas di a Qotei aqa ŋamgalaq di ñam saiqoji sqas. Ariya Tamo Koba Qotei na tamo bei aqa ñam soqtetqas di a ñam bole oqas.

2 Korin 10:18 ပူးပေါင်းရင်းမြစ်များ

Luk 16:15

Onaqa Yesus na kamba Farisi naŋgi minjrej, “Niŋgi mareqnub, ‘Iga kumbra bole yo qaji tamo. Tamo uŋgasari naŋgo ŋamdamuq dia iga kumbra bole bole yeqnum.’ Niŋgi degsib mareqnub. Ariya nuŋgo are miligi di Qotei a segi qalie. Di kiyaqa? Kumbra qudei tamo naŋgi arearetnjreqnu qaji di Qotei aqa ŋamdamuq di tulaŋ ugedamu.

Jon 12:43

Naŋgi degsib are qaleb. Di kiyaqa? Naŋgi tamo na naŋgo ñam soqtqajqa arearetnjroqnej. Naŋgi Qotei na naŋgo ñam soqtqajqa arearetnjrosaioqnej.

Aposel 2:22

“Deqa Israel tamo uŋgasari, niŋgi ijo anjam endi quiye. Niŋgi qalie, Qotei na Yesus Nasaret qaji a qariŋyonaq mandamq aisiqa kumbra gargekoba nuŋgo ambleq di yoqnej. Kumbra yeqnaqa niŋgi unoqnsib maroqneb, ‘Bole, Qotei na Yesus qariŋyonaq bej.’

Rom 14:18

Tamo naŋgi kumbra dena Kristus aqa wau ojoqnqab di Qotei a naŋgi qa tulaŋ arearetoqnqas. Yim tamo kalil naŋgi na naŋgi unjrsib marqab, “Naŋgi tamo bole.”

Rom 16:10

Niŋgi Apeles dego ijo kaiye anjam endi minjiye. Iga qalieonum, a bole Kristus dauryeqnu. Ariya niŋgi ijo kaiye anjam endi osib Aristobulus aqa leŋ naŋgi ti dego minjriye.

Rom 2:29

Tamo a are bulyosim aqa are miligiq na Juda tamo sqas di a Juda tamo bole. A are miligiq na muluŋ aiqas di aqa muluŋ bole. A na aqa jejamu laŋa osim dal anjam dauryqas di keresai. Ariya Qotei aqa Mondor na siŋgila yimqa dena aqa are miligiq na muluŋ aiqas di a muluŋ bole aiqo. Deqa a Qotei aqa ŋamgalaq di ñam bole ti sqas. A mandam tamo naŋgo ŋamgalaq di ñam bole ti sqasai.

1 Korin 11:19

Di kiyaqa? E endegsi are qalonum. Niŋgi pupoabqa dena niŋgi poiŋgwas, nuŋgo ambleq di tamo yai naŋgi Qotei aqa kumbra bole tiŋtiŋ dauryeqnub.

1 Korin 4:5

Qotei na tamo naŋgo une qa peginjrqa bati brantosaiunu deqa niŋgi na tamo qudei naŋgi une ti qa minjraib. Niŋgi mati tariŋesoqnibqa mondoŋ Tamo Koba Yesus a bosimqa a segi na iŋgi iŋgi kalil ambruq di uliejunub qaji di suwaŋoq di atqas. Osim tamo kalil naŋgo areqalo dego boleq atqas. Yim bati deqa Qotei a gago segi segi kumbra geregere pegiyosim mergwas.

2 Korin 10:12

Tamo qudei naŋgi diqoqnsib naŋgo segi ñam soqteqnub qaji iga naŋgi unub dego sai. Gago kumbra ti naŋgo kumbra ti kerekere unub iga degsi marqa keresai. Tamo naŋgi di naŋgo segi kumbra na naŋgo kumbra laŋa pegiyeqnub. Osib tamo qudei naŋgo kumbra na dego naŋgo segi kumbra olo pegiyeqnub. Tamo naŋgi kumbra degyeqnub qaji naŋgi tulaŋ powo saiqoji.

2 Korin 13:7

O was qu, niŋgi kumbra uge yoqnaib deqa iga niŋgi qa Qotei pailyeqnum. Niŋgi iga nugsib iga Kristus aqa wau tamo bole degsib are qalqajqa iga deqa pailyosai. Niŋgi iga gisaŋ wau tamo degsib are qalqab di uŋgum. Gago areqalo qujai agiende. Niŋgi kumbra bole tiŋtiŋ yoqnqajqa deqa iga Qotei pailyeqnum.

2 Korin 3:1

Iga gago segi ñam olo soqteqnum e? Sai. Tamo qudei naŋgi kumbra endegyeqnub. Naŋgi tamo bei minjib a naŋgi qa anjam endegsi neŋgreŋyqas, “Naŋgi tamo bole.” Yim niŋgi anjam di sisiyosib naŋgo ñam soqtetnjrqajqa deqa. O naŋgi niŋgi merŋgib niŋgi naŋgi qa anjam endegsib neŋgreŋyqab, “Naŋgi tamo bole.” Yim tamo qudei naŋgi anjam di sisiyosib naŋgo ñam soqtetnjrqajqa deqa. Tamo qudei naŋgi kumbra degyeqnub. Ariya iga kumbra degyosaieqnum.

2 Korin 5:12

Gago anjam dena iga na niŋgi walawalaiŋgosai. Yim niŋgi are qalqab, iga tamo bole. Iga degosai. Niŋgi gago kumbra qa tulaŋ areboleboleiŋgwajqa deqa iga anjam di neŋgreŋyonum. Tamo qudei naŋgi tamo naŋgo ñam qa laŋa areboleboleinjreqnu. Naŋgo kumbra naŋgo are miligiq di unu qaji naŋgi deqa areboleboleinjrosaieqnu. Deqa gago areqalo agiende. Niŋgi na kamba tamo naŋgi di ŋiriŋtnjriye.

2 Korin 6:4

Iga Qotei aqa wau tamo deqa iga gaigai tamo uŋgasari kalil naŋgo ŋamgalaq di kumbra bole yeqnum. Gulube bei bei gagoq di branteqnaqa iga siŋgila na tigeloqnsim gulube di qoboiyeqnum. Tamo qudei naŋgi na iga ugeugeigeqnab iga naŋgi qa ulaosaieqnum. Une bei bei na iga padaltgwa laqnaqa iga na olo gotraŋyeqnum.

2 Timoti 2:15

Ni Qotei aqa wau tamo boledamu sqajqa siŋgilaoqnim Qotei a nuŋgo wau qa tulaŋ arearetoqnqas. Deqa ni Qotei aqa anjam bole geregere palontoqne. Ni degyqam di ni aqa ŋamgalaq di jemaimqasai.

1 Pita 1:7

Niŋgi gulube eqnub dena Qotei a nuŋgo areqalo uneqnu. Niŋgi Kristus qa nuŋgo areqalo bole siŋgilateqnub kio sai kio di Qotei a uneqnu. Iga qalie, gol a iŋgi tulaŋ boledamu. Ariya tamo naŋgi ŋamyuo na gol koitoqnsib dena qalieeqnub, gol di bole kio sai kio. Dego kere nuŋgo areqalo Kristus qa siŋgilateqnub qaji di tulaŋ bolequja. Areqalo dena gol tulaŋ buŋyejunu. Di kiyaqa? Gol a ugeosim koboqas. Deqa gulube bei bei niŋgi qa boqnsim dena niŋgi osorŋgwas, niŋgi Kristus qa nuŋgo areqalo bole siŋgila-teqnub. Niŋgi bole siŋgilatqab di mondoŋ diŋo batiamqa Yesus Kristus a boleq dosim bati deqa a niŋgi qa tulaŋ areboleboleiyim ñam kobaquja niŋgi eŋgwas.