2 Korin 10:1 - Yesus Aqa Anjam Bole

¹ Tamo qudei naŋgi e qa yomuosib endegsib mareqnub, “Pol a iga koba na sosiqa a aqa segi ñam aguq atoqnsiqa laesoqnej. Ariya a sawa isaq di sosiqa a anjam siŋgila na neŋgreŋyosiq iga qa ŋiriŋeqnu.” Tamo qudei naŋgi e qa degsib yomueqnub. Ariya niŋgi mati Kristus aqa kumbra qa are qaliye. A aqa segi ñam aguq atoqnsiqa tamo uŋgasari naŋgi lawo kumbra osornjroqnej. Deqa niŋgi ijo anjam endeqa geregere are qaliye.

2 Korin 10:1 ပူးပေါင်းရင်းမြစ်များ

Matyu 11:29

Niŋgi e qa geregere qalieosib ijo anjam aqa sorgomq di soqniye. Di kiyaqa? E na tamo naŋgi lawo kumbra enjroqnsim ijo segi ñam aguq ateqnum. Deqa niŋgi e qa qalieabqa iŋgi bei na niŋgi gulube eŋgwasai. Niŋgi aqaratqab.

Matyu 21:5

“Niŋgi na nuŋgo medabu waqtosib Saion qure qaji naŋgi endegsib minjriye, ‘Niŋgi uniye. Nuŋgo Mandor Koba a nuŋgoq beqnu. A are lawo na beqnu. A areqalo minjiŋ saiqoji. Deqa a donki du quraq di awoosiq beqnu.’”

Aposel 8:32

Tamo di a Qotei aqa anjam endegsi sisiyoqnej, “A kaja du bul qalqajqa marsib osi gilqab. Kaja naŋgi juŋgum joqetnjreqnab mequmosib unub dego kere a mequmosim sqas.

Rom 10:20

Agi Aisaia a dego nami anjam endegsi siŋgila na marej, “Tamo naŋgi e qa ŋamosaioqneb qaji naŋgi e itbeb. Tamo naŋgi e qa marosaioqneb qaji naŋgi qa e brantonam naŋgi e nubeb.”

Rom 12:1

Ariya was qu, Qotei a iga qa are tulaŋ boleiyosiq eleŋej deqa e niŋgi siŋgila na endegsi merŋgwai. Niŋgi nuŋgo segi jejamu osib Qotei atraiyiye. Osib deqa niŋgi ŋambile sosib Qotei aqa segi tamo uŋgasari tiŋtiŋ sqab. Deqa niŋgi kumbra Qotei a tulaŋ areareteqnu qaji di yoqniye. Niŋgi degyoqnqab di niŋgi Qotei aqa kumbra na bole louoqnqab.

Rom 15:15

Ijo anjam mutu qudei e neŋgreŋyonum qaji endi anjam siŋgila. Qotei a e qa are boleiyonaq wau ebej niŋgi deqa olo are walŋgaim deqa e anjam endi neŋgreŋyonum.

1 Korin 2:3

Ariya e nuŋgo ambleq di sosimqa e siŋgila saiqoji soqnem deqa e ulaugetosim ginda gindaŋoqnem.

1 Korin 4:10

Iga Kristus aqa ñam osi laqnum deqa iga nanari tamo bul unum. Ariya niŋgi Kristus aqa kumbra qa tulaŋ qalie unub. Iga siŋgila saiqoji unum. Ariya niŋgi siŋgila ti unub. Iga ñam saiqoji unum. Ariya niŋgi ñam ti unub.

1 Korin 4:21

Nuŋgo areqalo kie? E niŋgi qa bosiy ŋiriŋtŋgsiy tingitŋgwai kio e bosiy niŋgi qalaqalaiŋgosiy lawo na gereiŋgwai kio? Niŋgi segi mariye.

2 Korin 10:10

Bole, tamo qudei naŋgi e qa endegsib yomueqnub, “Pol a anjam siŋgila na neŋgreŋyosiq iga qa qariŋyeqnu. Ariya a iga koba na sosim anjam mergoqnsim iga a unoqnem di a siŋgila saiqoji. Anjam palontqajqa wau di dego a qaliesai bolesai.”

2 Korin 10:2

Ijo anjam agiende. E niŋgi qa bqai di e niŋgi qa bosiy anjam siŋgila na merŋgwasai. E laesqai. Ariya e are qalonum, nuŋgo ambleq di tamo qudei naŋgi iga qa endegsib mareqnub, iga mandam tamo naŋgo kumbra dauryosim laqnum. Naŋgi iga qa degsib mareqnub deqa e niŋgi qa bosiy tamo naŋgi di anjam siŋgila na minjrqai. E laesqasai.

2 Korin 10:7

Niŋgi laŋa babaŋ na tamo naŋgo kumbra unsib tenemtaib. Niŋgi geregere tenemtiye. Tamo bei a endegsi marqas, “E Kristus aqa tamo bole.” Ariya a endegsi poiyem, a Kristus aqa tamo qa marqo deqa iga dego Kristus aqa tamo. A degsi poiyem.

2 Korin 11:21

O was qu, iga siŋgila saiqoji unum deqa kumbra naŋgi niŋgi eŋgeqnub qaji di iga niŋgi eŋgwa keresai. E gago une deqa niŋgi merŋgonum deqa e jemaibqo. Ariya tamo qudei naŋgi naŋgo segi kumbra ubtsib marqajqa siŋgilaeqnub deqa e kamba dego ijo segi kumbra ubtsiy marqai. O was qu, e nanari tamo bulosim deqa anjam mareqnum.

2 Korin 11:30

E gam bei saibqas di e ijo segi ñam soqtqai. Ariya gulube kalil e qa beqnub qaji dena niŋgi osorŋgeqnu, e siŋgila saiqoji. E deqa marqai. Osiy ijo ñam soqtqai. E iŋgi bei qa ijo ñam soqtqasai.

2 Korin 12:5

E tamo di aqa ñam soqtqai. Ariya e ijo segi ñam soqtqasai. E siŋgila saiqoji unum deqa segi marsiy ijo ñam soqtqai.

2 Korin 3:12

Riaŋ di bosim gaigai gagoq di sqajqa deqa tariŋoqnsim unum. Deqa iga ulaosaieqnum. Iga riaŋ deqa mare mare laqnum.

2 Korin 5:20

Deqa iga Kristus aqa medabu osim aqa anjam marsim laqnum. Qotei a gago medabu na tamo kalil naŋgi metnjreqnu. Iga na tamo kalil naŋgi Kristus aqa anjam palontosim endegsi minjreqnum, “Niŋgi jeu kumbra uratosib Qotei ombla are qujaitosib soqniye.”

2 Korin 6:1

Iga Qotei ombla waueqnum deqa iga niŋgi siŋgila na endegsi merŋgwom, “Qotei a niŋgi qa are boleiyeqnu aqa kumbra di niŋgi osib olo laŋa urataib.”

2 Korin 7:4

E qalieonum, niŋgi tamo bole deqa e anjam bei ulitqasai. E anjam kalil boleq na merŋgwai. E niŋgi qa tulaŋ areboleboleibqo. Ijo are miligi niŋgi qa tulaŋ laejunu. Iga gulube koba eqnum di uŋgum, e niŋgi qa are qaloqnsim dena ijo are miligiq di e tulaŋ areboleboleibqo.

Galesia 4:13

Niŋgi are qaliye. E nami maibonaq deqa e niŋgi qa bosim Kristus aqa anjam bole utruq na merŋgem.

Galesia 5:2

E Pol e na niŋgi endegsi merŋgit quiye. Niŋgi muluŋ aiqab di Kristus na niŋgi olo aqaryaiŋgwa keresai.

Efesus 3:1

Qotei na niŋgi kumbra tulaŋ boledamu eŋgej anjam di e marsim laqnem deqa jeu tamo naŋgi na e ojsib tonto talq endia ateb unum. E Pol. E na niŋgi sawa bei bei qaji tamo niŋgi aqaryaiŋgwa osim deqa Kristus Yesus aqa wau di ojeqnum. Utru deqa e tonto talq endi unum.

Efesus 4:1

E Pol. E Tamo Koba Yesus aqa wau ojeqnum deqa e tonto talq endi unum. Qotei na niŋgi a dauryqa osiq metŋgej deqa e na nuŋgo are tigeltetŋgitqa niŋgi kumbra a tulaŋ areareteqnu qaji di dauryosib walweloqniye.

Filipai 4:5

Niŋgi lawo kumbra dauryoqnibqa tamo kalil naŋgi nuŋgo kumbra bole di unoqnqab. Niŋgi are qaliye. Sokiñala Tamo Koba Yesus a olo bqas.

Kolosi 1:23

Ariya une bei na niŋgi titŋgimqa Kristus aqa anjam bole niŋgi nami queb qaji di nuŋgo areqaloq di olo siŋgilatqa urataib deqa niŋgi nuŋgo areqalo Yesus qa bole siŋgilatoqnsib siŋgila na tigelesoqniye. E Pol. E Yesus aqa wau tamo deqa e anjam bole di tamo uŋgasari kalil mandamq endi unub qaji naŋgi minjroqnsim laqnum.

2 Tesalonaika 3:17

E Pol. E ijo segi baŋ na kaiye anjam endi neŋgreŋyosim niŋgi qa qariŋyonum. E ijo anjam kobotoqnsim qariŋyqa laqnsimqa e degyeqnum. Di ijo kumbra.

Filemon 1:19

E Pol. Anjam endi e ijo segi baŋ na neŋgreŋyonum. Ni na e merbimqa Onesimus a ino silali bei yaimej qaji di e na kamba olo ni emekritqai. Ariya ni que. Nami e Kristus aqa anjam ni mermonam qusim are bulyem. E ino qunuŋ qa aqaryaimem. Deqa e na ni endegsi mermqa kere, ni na kamba e olo aqaryaibe. Ariya e degsi ni mermqa uratonum.

Filemon 1:9

Deqa e ni anjam tulaŋ siŋgila na mermqasai. Aqo ombla qalaqalaiyo kumbra dauryeqnum deqa e ni lawo na anjam mermqai. E Pol. E Kristus Yesus aqa anjam marsim laqnum qaji tamo. E Kristus aqa wau di ojeqnum deqa jeu tamo naŋgi na e ojsib tonto talq endia waibeb unum.

1 Pita 2:11

O ijo kadoi bole, nuŋgo qure bole agi laŋ goge di unu. Deqa niŋgi mandamq endia yauŋ tamo bulosib unub. Deqa e na niŋgi endegsi merŋgwai. Niŋgi nami nuŋgo areqalo namij dauryqajqa are prugŋgoqnej. Ariya areqalo namij di nuŋgo qunuŋ ti ombla qoteqnub. Deqa niŋgi nuŋgo areqalo namij di uratosib qoreiyiye.

Uli Anjam 1:9

E nuŋgo was Jon. E ti niŋgi ti Yesus aqa tamo unum deqa iga kalil gulube koba qoboiyoqnsim jaqatiŋ eleŋeqnum. Qotei a gago Mandor Koba sosiq iga taqatgeqnu. Deqa iga kalil koba na siŋgila na tigeloqnsimqa gulube qoboiyejunum. E Qotei aqa anjam ti Yesus aqa anjam ti palontsim laqnem deqa jeu tamo naŋgi na e taqal waibosib nui ñam Patmos endia e ateb unum.