2 Korin 1:1 - Yesus Aqa Anjam Bole

¹ E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e merbej, “Ni ijo Aŋgro Yesus aqa wau oje.” Onaqa e Qotei aqa areqalo di dauryosim agi e Yesus aqa wau ojeqnum. Niŋgi Korin qureq dia Qotei qa loueqnub qaji. Aqo gago was Timoti wo anjam endi neŋgreŋyosim niŋgi ti Qotei aqa segi tamo uŋgasari kalil Akaia sawaq di unub qaji naŋgi qa ti qariŋyonum.

2 Korin 1:1 ပူးပေါင်းရင်းမြစ်များ

Aposel 16:1

Onaqa bati bei naŋgi aiyel walwelosib Derbe qureq di branteb. Dena tigelosib Listra qureq gileb. Dia tamo bei soqnej aqa ñam Timoti. A Yesus qa aqa areqalo siŋgilatej qaji. Timoti aqa aniqali a Juda qaji uŋa. A dego Yesus qa aqa areqalo siŋgilatej qaji. Timoti aqa siqali a Grik qaji tamo.

Rom 15:26

Qotei aqa tamo uŋgasari Masedonia sawa ti Akaia sawa ti di unub qaji naŋgi na Kristen tamo uŋgasari Jerusalem dia iŋgi iŋgi qa truqueqnub qaji naŋgi aqaryainjrqa marsib silali koroiyeb unu.

Rom 16:21

Ijo wau qujai Timoti a na niŋgi kaiyeiŋgwo. Lusius na Jeson na Sosipater na naŋgi qalub dego niŋgi kaiyeiŋgonub. Naŋgi qalub ijo leŋ naŋgi.

Rom 16:5

Niŋgi na ijo kaiye anjam endi osib Kristen tamo uŋgasari kalil Prisila wo Akwila wo naŋgo talq dia koroosib loueqnub qaji naŋgi dego minjriye. Osib Epainetus dego ijo kaiye anjam endi minjiye. A ijo kadoi bole. A Esia sawa qaji. Nami tamo kalil Esia sawaq di unub qaji naŋgi are bulyosaisonabqa Epainetus a namoqna are bulyosiq Kristus qa aqa areqalo siŋgilatej.

1 Korin 10:32

Niŋgi na Juda tamo ti Grik tamo ti Qotei aqa segi tamo uŋgasari naŋgi ti kumbra uge bei enjraib. Yim naŋgi dena ululoŋosib uneq aio uge.

1 Korin 16:10

Ariya Timoti a niŋgi qa bamqa niŋgi a osib geregereiyiye. Yim a ulaqasai. A niŋgi koba na are lawo na sqas. Niŋgi quiye. Timoti a e ombla wau qujai. Aqo aiyel Tamo Koba Yesus aqa wau ojeqnum.

1 Korin 16:15

O was qu, niŋgi tamo uŋgasari Stefanas aqa talq di unub qaji naŋgi qa qalie bole. Naŋgi tamo kalil Akaia sawaq di unub qaji naŋgi qa namoosib nami are bulyeb. Naŋgi naŋgo segi areqalo na Qotei aqa tamo uŋgasari naŋgi qa waueqnub. Deqa e niŋgi siŋgila na endegsi merŋgwai.

1 Korin 16:24

E Kristus Yesus aqa ñam na niŋgi kalil qalaqalaiŋgeqnum.

1 Korin 6:11

Nami niŋgi qudei tamo deqaji soqneb. Ariya bunuqna niŋgi are bulyeb deqa Qotei na nuŋgo are miligi yansetŋgosiqa niŋgi aqa segi kumbra boleq di atsiqa Tamo Koba Yesus Kristus aqa ñam na ti gago Qotei aqa Mondor aqa siŋgila na ti niŋgi gereiŋgej. Deqa bini niŋgi aqa ŋamgalaq di tamo bole une saiqoji unub.

2 Korin 1:19

Nami e na Sailas na Timoti na iga qalub Qotei aqa Ŋiri Yesus Kristus aqa anjam palontosim niŋgi merŋgoqnem. Niŋgi qalie, Yesus a dego laŋa odoqnsiq olo saidosaieqnu. A gaigai Qotei aqa ñam na odeqnu.

2 Korin 1:23

O was qu, Qotei na ijo anjam siŋgilateqnu deqa e aqa ñam na bole maronum, e niŋgi gulube eŋgaim deqa e olo Korin qureq bosai.

2 Korin 11:10

Kristus aqa anjam bole ijoq di unu deqa e anjam bole endegsi merŋgwai, Akaia sawa kalilq dia tamo bei na e ijo kumbra deqa ijo segi ñam soqtqajqa getentbqa keresai.

2 Korin 9:2

E qalieonum, niŋgi wau di yqajqa are tulaŋ prugŋgeqnu. Deqa e gaigai Masedonia Kristen naŋgo ŋamgalaq dia nuŋgo ñam soqteqnum. Osim endegsi minjreqnum, “Wausau bei nami tamo uŋgasari Akaia sawaq di unub qaji naŋgi silali koroiyqajqa wau di tigeltqa mareb.” O was qu, niŋgi wau di yqajqa tulaŋ siŋgilaeqnub deqa e na Masedonia Kristen naŋgi minjreqnam quoqnsib naŋgi gargekoba dego wau di yqajqa are prugnjreqnu.

Galesia 1:1

E Pol. Yesus Kristus na e qariŋbej deqa e aqa anjam mare mare laqnum. Mandam tamo bei na e qariŋbosai. Tamo bei na e wau ebosai dego. Yesus Kristus naŋgi Abu Qotei agi Kristus subq na tigeltej qaji wo naŋgi aiyel na e wau ebeb.

Galesia 3:26

Niŋgi kalil Kristus Yesus qa nuŋgo areqalo siŋgilatosib a beteryejunub deqa niŋgi Qotei aqa aŋgro tiŋtiŋ unub.

Efesus 1:1

E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e merbej, “Ni ijo Aŋgro Yesus aqa anjam marsim laqne.” Onaqa e Qotei aqa areqalo di dauryosim agi e Yesus aqa anjam marsim laqnum. E na anjam endi neŋgreŋyosim niŋgi tamo uŋgasari Efesus qureq di unub qaji niŋgi qa qariŋyonum. Niŋgi Qotei aqa segi tamo uŋgasari tiŋtiŋ unub. Niŋgi Kristus Yesus geregere dauryeqnub.

Filipai 1:1

E Pol. Aqo Timoti wo Kristus Yesus aqa wau tamo. Aqo aiyel na anjam endi neŋgreŋyosim niŋgi Kristus Yesus aqa segi tamo uŋgasari kalil Filipai qureq di unub qaji niŋgi ti nuŋgo gate ti nuŋgo wau tamo naŋgi qa ti qariŋyonum.

1 Tesalonaika 1:1

Iga Pol na Sailas na Timoti na iga qalub anjam endi neŋgreŋyosim niŋgi tamo uŋgasari Tesalonaika qureq dia Yesus aqa ñam qa koroosib loueqnub qaji niŋgi qa qariŋyonum. Niŋgi Abu Qotei wo Tamo Koba Yesus Kristus wo naŋgi aiyel taqnjrejunub. Qotei a niŋgi qa are boleiyimqa niŋgi lawo na soqniye.

1 Tesalonaika 3:2

Marsimqa Timoti qariŋyonam niŋgi qa bej. Timoti a gago Kristen was bole. A Qotei aqa wau tamo. A Kristus aqa anjam bole maro qaji tamo. Iga na a qariŋyonam niŋgi qa bej. A na niŋgi aqaryaiŋgosim nuŋgo areqalo Yesus qa siŋgilateqnub qaji di olo siŋgilatetŋgwajqa deqa marsim a qariŋyonam niŋgi qa bej.

2 Tesalonaika 1:1

Iga Pol na Sailas na Timoti na iga qalub anjam endi neŋgreŋyosim niŋgi tamo uŋgasari Tesalonaika qureq dia Yesus aqa ñam qa koroosib loueqnub qaji niŋgi qa qariŋyonum. Niŋgi gago Abu Qotei wo Tamo Koba Yesus Kristus wo naŋgi aiyel taqnjrejunub.

1 Timoti 1:1

E Pol. Kristus Yesus na e qariŋbej deqa e aqa anjam marsim laqnum. Qotei agi iga padalo sawaq dena eleŋej qaji naŋgi Kristus Yesus wo naŋgi aiyel na e giltbeb deqa e naŋgo anjam marsim laqnum. Iga Yesus a olo laŋ qureq dena bam unqajqa deqa tariŋeqnum.

2 Timoti 1:1

E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e giltbosiq merbej, “Ni Yesus aqa anjam marsim laqne.” Onaqa e Qotei aqa areqalo di dauryosim deqa e Yesus aqa anjam marsim laqnum. Qotei a nami anjam endegsi marej, “E na tamo uŋgasari Kristus Yesus qa naŋgo areqalo siŋgilateqnub qaji naŋgi ŋambile enjrqai.” A degsi marej deqa e na aqa anjam di tamo uŋgasari naŋgi minjroqnsim laqnum.

Taitus 1:1

E Pol. E Qotei aqa wau tamo. Yesus Kristus na e qariŋbej deqa e aqa anjam marsim laqnum. Tamo uŋgasari Qotei na aqa segi qa giltnjrej qaji naŋgi aqa anjam minjroqnitqa naŋgi Yesus qa naŋgo areqalo siŋgilatqajqa deqa qariŋbej. E na naŋgi aqaryainjritqa naŋgi Qotei aqa anjam qalie boleosib aqa kumbra dauryosib sqajqa deqa ti qariŋbej. Qotei aqa anjam di gisaŋ sai. Di anjam bole.

Filemon 1:1

O Filemon, e Pol. E Kristus Yesus aqa wau tamo deqa jeu tamo naŋgi na e ojsib tonto talq endia waibeb unum. Aqo gago was Timoti wo anjam endi neŋgreŋyosim ni qa qariŋyonum. Ni gago Kristen was bole. Ni iga koba na wau qujai.

Hibru 13:23

E niŋgi endegsi merŋgwai. Gago was Timoti a tonto talq dena uratonab oqedej. Deqa a e qa urur bqas di aqo aiyel ombla na niŋgi qa bosim nuŋgwom.