1 Timoti 6:2 - Yesus Aqa Anjam Bole

² Kaŋgal tamo qudei naŋgo wau qa gate naŋgi Kristen tamo. Deqa ni na kaŋgal tamo naŋgi di minjrimqa naŋgi endegsib are qalaib, “Gago wau qa gate naŋgi gago Kristen was qu. Deqa uŋgum, iga naŋgo anjam gotraŋyoqnqom.” Naŋgi degsib are qalaib. Ni na naŋgi minjrimqa naŋgi endegsib are qalqab, “Gago wau qa gate naŋgi Kristen tamo bole. Deqa iga na naŋgi qalaqalainjroqnqom.” Naŋgi degsib are qalqab di naŋgi naŋgo wau qa gate naŋgi geregere wauetnjroqnqab. O Timoti, ni gaigai Kristen tamo uŋgasari naŋgi kumbra bole dauryqajqa minjroqnsim are tigeltetnjroqnimqa naŋgi kumbra bole kalil e nami mermonum qaji di yoqnqab.

1 Timoti 6:2 ပူးပေါင်းရင်းမြစ်များ

Matyu 23:8

Ariya tamo qudei naŋgi na niŋgi endegsib merŋgaib, ‘O Qalie Tamo.’ Tamo qujai a segi nuŋgo qalie tamo. Niŋgi kalil was qu.

Matyu 25:40

“Naŋgi na e degsib nenembibqa e na kamba minjrqai, ‘Niŋgi quiye. E bole merŋgwai. Niŋgi na ijo was naŋgi sougetejunub qaji geregereinjroqneb di agi niŋgi e dego gereiboqneb.’

Matyu 6:24

Osiqa Yesus a olo anjam endegsi minjrej, “Tamo qujai a tamo kokba aiyel naŋgo sorgomq di sqa keresai. A na tamo kobaquja bei qalaqalaiyosim olo tamo kobaquja bei jeutqas. Bei aqa anjam dauryoqnsim olo bei qoreiyoqnqas. Dego kere niŋgi mandam qa iŋgi iŋgi ti Qotei ti turtnjrsib naŋgo sorgomq di sqa keresai.”

Aposel 1:15

Bati bei tamo uŋgasari 120 Yesus qa naŋgo areqalo siŋgilateb qaji naŋgi koroosib sonabqa Pita a naŋgo ambleq di tigelosiqa minjrej,

Rom 11:17

Israel naŋgi ŋamtaŋ oliv qure qaji di bul. Dani qudei Qotei na giŋgeŋnjrsiqa breinjrej. Ariya niŋgi sawa bei bei qaji tamo niŋgi nañu qaji oliv aqa dani bul. Dani di Qotei na olo eleŋosiqa ŋamtaŋ oliv qure qaji di aqa qoboq di beterteleŋej unub. Dani di agi niŋgi segi. Dani Qotei na giŋgeŋnjrsiq breinjrej qaji naŋgo sawa di agi niŋgi na olo eb. Deqa bini niŋgi ŋamtaŋ oliv qure qaji aqa dani naŋgi ti namur bole oqnsib unub.

Rom 8:29

Tamo naŋgi Qotei na nami oqa marej qaji naŋgi di a na giltnjrej dego. Yim naŋgi aqa Aŋgro Yesus a bulosib aqa segi kumbra bole dauryqajqa deqa. Gam dena Qotei aqa aŋgro gargekoba naŋgi brantoqnib Kristus a naŋgo was matu sqas.

Galesia 5:6

Tamo a Kristus Yesus beteryesqas di a marqas, iga muluŋ aiqom di laŋa. Iga muluŋ aiqasai di dego laŋa. Ariya iga Kristus qa gago areqalo siŋgilatosim dena iga qalaqalaiyo kumbra dauryoqnqom di kumbra bole utru ti.

Efesus 1:1

E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e merbej, “Ni ijo Aŋgro Yesus aqa anjam marsim laqne.” Onaqa e Qotei aqa areqalo di dauryosim agi e Yesus aqa anjam marsim laqnum. E na anjam endi neŋgreŋyosim niŋgi tamo uŋgasari Efesus qureq di unub qaji niŋgi qa qariŋyonum. Niŋgi Qotei aqa segi tamo uŋgasari tiŋtiŋ unub. Niŋgi Kristus Yesus geregere dauryeqnub.

Efesus 1:15

E endegsi quem. Niŋgi Tamo Koba Yesus qa nuŋgo areqalo siŋgilatoqnsibqa Qotei aqa tamo uŋgasari kalil naŋgi qalaqalainjreqnub.

Efesus 3:6

Anjam di aqa utru agiende. Niŋgi sawa bei bei qaji tamo uŋgasari niŋgi Kristus aqa anjam bole qusib nuŋgo areqaloq di ateb deqa Qotei na niŋgi ti iga ti turtgosiqa sawa qujaiq di atej. Deqa iga kalil tamo qujaionum. Deqa iga ti niŋgi ti kalil iŋgi bole bole Qotei a nami iga Kristus Yesus aqa baŋ na egwajqa marej qaji di oqom.

Kolosi 1:2

Aqo gago was Timoti wo anjam endi neŋgreŋyosim niŋgi Qotei aqa segi tamo uŋgasari Kolosi qureq di unub qaji niŋgi qa qariŋyonum. Niŋgi gago Kristen was bole. Niŋgi Kristus qa nuŋgo areqalo siŋgilatejunub. Gago Abu Qotei a niŋgi qa are boleiyimqa niŋgi lawo na soqniye.

Kolosi 1:4

Aqo aiyel niŋgi qa anjam bei endegsi quem. Kristus aqa anjam bole niŋgi qa bonaqa niŋgi qusibqa iŋgi tulaŋ boledamu Qotei na laŋ goge dia gereiyetŋgej unu qaji di niŋgi oqajqa deqa nuŋgo areqalo siŋgilateb. Niŋgi deq oqwajqa tariŋoqnsib unub. Utru deqa niŋgi Kristus Yesus qa nuŋgo areqalo siŋgilatoqnsib Qotei aqa segi tamo uŋgasari kalil naŋgi qalaqalainjreqnub. Kristus aqa anjam bole di sawa sawa kalilq gileqnaqa tamo uŋgasari gargekoba naŋgi quoqnsib naŋgo areqaloq di siŋgilatoqnsib dauryoqnsib kumbra bole bole yeqnub. Qotei a iga qa are tulaŋ boleiyosiq Yesus egej anjam bole di niŋgi nami qusib poiŋgej bati deqa kumbra bole deqaji nuŋgo ambleq di dego brantej.

Kolosi 4:1

O wau qa gate, niŋgi dego nuŋgo kaŋgal tamo naŋgi kumbra bole enjroqniye. Niŋgi qalie, nuŋgo Gate dego unu. Agi a laŋ goge di unu.

2 Tesalonaika 1:3

O was qu, iga gaigai niŋgi qa are qaloqnsim deqa Qotei biŋiyeqnum. Iga kere degyeqnum. Di kiyaqa? Nuŋgo areqalo Yesus qa siŋgilateqnub qaji di tulaŋ kobaqujaeqnu. Niŋgi segi segi na nuŋgo Kristen was qu naŋgi qalaqalainjreqnub. Nuŋgo kumbra di dego tulaŋ kobaqujaeqnu.

1 Timoti 4:11

O Timoti, ni na anjam di Kristen tamo uŋgasari naŋgi plaltsim minjroqnimqa naŋgi qusib dauryoqnqab.

1 Timoti 5:1

Ni na tamo qeli naŋgi ŋiriŋtnjroqnaim. Ni lawo na naŋgi tingitnjroqne. Ni naŋgi tingitnjrqa osimqa naŋgi ino abu bul lawo na tingitnjroqne. Aŋgro meli naŋgi ti aŋgro wala naŋgi ti dego lawo na tingitnjroqne. Ni naŋgi tingitnjrqa osimqa naŋgi ino was bul lawo na tingitnjroqne.

Taitus 2:1

Ariya Taitus, ni na tamo uŋgasari naŋgi anjam endegsim minjroqne, “Niŋgi Qotei aqa anjam kalil geregere dauryosib kumbra bole bole yoqniye.”

Taitus 2:15

O Taitus, ni gaigai tamo uŋgasari naŋgi anjam di minjroqnimqa naŋgi qusib dauryoqnqab. Tamo uŋgasari anjam gotraŋyeqnub qaji naŋgi dego siŋgila na minjroqnimqa naŋgi kumbra uge uratoqnqab. Tamo bei na ino anjam di uge qa maraiq.

Taitus 3:8

Qotei aqa anjam di tulaŋ boledamu. Deqa iga anjam di gago areqaloq di siŋgilatqom. O Taitus, ni Qotei aqa anjam di siŋgila na palontoqnimqa tamo uŋgasari Qotei qa naŋgo areqalo siŋgilateqnub qaji naŋgi quoqnsib kumbra bole bole yoqnqab. Kumbra deqaji na tamo uŋgasari naŋgi aqaryainjreqnu. Kumbra di bolequja.

Hibru 3:1

O Kristen was qu, Qotei laŋ qureq di unu qaji a na niŋgi dego metŋgej deqa niŋgi Yesus qa are qaloqniye. Qotei na Yesus qariŋyonaq mandamq aiej. A gago atra tamo kobaquja unu. Deqa iga a qa gago areqalo siŋgilatoqnsim aqa ñam boleq na maroqnqom.

Hibru 3:14

Iga nami siŋgila na Qotei qa gago areqalo siŋgilatem. Ariya gago areqalo di iga olo tulaŋ siŋgila na ojsimqa gilsim gilsim moiqom. Iga degyqom di iga Kristus aqa segi tamo uŋgasari tiŋtiŋ sqom.

1 Pita 5:1

O Kristen gate, e niŋgi anjam endegsi merŋgwai. E dego Kristen gate deqa Kristus a ijo ŋamgalaq dia jaqatiŋ osiq moinaq e unem. Mondoŋ Kristus a olo siŋgila ti ñam koba ti brantimqa bati deqa Qotei na laŋ qure qa iŋgi bole bole e ti niŋgi ti egwas. Deqa Kristen gate, niŋgi wau endegyoqniye.

2 Pita 2:10

Tamo qudei naŋgi awai tulaŋ ugedamu oqab. Tamo naŋgi di sambala kumbra tulaŋ jigat yqajqa are prugnjreqnu. Osib naŋgi endegsib are qaleqnub, “Tamo Koba Qotei aqa anjam di laŋa sa anjam. Deqa iga dauryqasai.” Tamo uge deqaji naŋgi nuŋgo ambleq di tigelosib tulaŋ diqoqnsib naŋgo segi areqalo dauryeqnub. Deqa naŋgi laŋ aŋgro kokba naŋgi misiliŋnjrqajqa ulaosaieqnub.

Jut 1:8

Ariya jeu tamo naŋgi di kumbra endeqaji yeqnub. Naŋgi ŋeiobilqeioqnsib dena naŋgo are tigeltetnjreqnaqa naŋgi naŋgo segi jejamu qa arebolebole-injreqnaqa kumbra uge uge yeqnub. Osib Qotei a naŋgo Tamo Koba unu deqa are qalqajqa uratoqnsib olo diqoqnsib Qotei aqa laŋ aŋgro kokba naŋgi misiliŋnjreqnub.