1 Timoti 6:14 - Yesus Aqa Anjam Bole

¹⁴ Anjam ni nami qusim ojem qaji di ni olo geregere daurye. Osim ni anjam di ugetaim. Ugetqasai di tamo naŋgi ni qa anjam uge bei marqa keresai. Ni anjam di dauryosim gilsim gilsim gago Tamo Koba Yesus Kristus a olo laŋ qureq dena brantim ni unqam.

1 Timoti 6:14 ပူးပေါင်းရင်းမြစ်များ

1 Korin 1:8

Yesus Kristus a na niŋgi siŋgilatŋgoqnqas deqa niŋgi siŋgila na tigelesosib gilsib gilsib diŋo bati itqab. Yimqa gago Tamo Koba Yesus Kristus a olo laŋ qureq na brantimqa bati deqa niŋgi Qotei aqa ŋamgalaq di une saiqoji sqab.

Efesus 5:27

Kristus aqa areqalo agiende. A na aqa segi tamo uŋgasari naŋgi yansnjrimqa naŋgi aqa ŋamgalaq di tulaŋ boledamu soqnib jiga bei naŋgoq di sqasai. Naŋgi aqa segi kumbra boleq di sosib une saiqoji sqab. Utru deqa a naŋgi qa moiej.

Filipai 1:10

O was qu, niŋgi kumbra kalil geregere pegiyosib kumbra tulaŋ boledamu dauryqajqa deqa e niŋgi qa pailyeqnum. Yimqa niŋgi kumbra bole bole yoqnsib une saiqoji soqnib diŋo bati bqas. Diŋo bati deqa Kristus a olo bosim tamo uŋgasari naŋgo une qa naŋgi peginjrqas.

Filipai 1:6

E endegsi qalieonum. Qotei a segi nuŋgo are miligiq di wau boledamu yeqnu. A nami wau di utru atej. Ariya bini a wau di yeqnu dena gilsi gilsim mondoŋ Kristus Yesus olo bqajqa batiamqa a na wau di kobotqas.

Filipai 2:15

Niŋgi kumbra degyqab di niŋgi Qotei aqa aŋgro boledamu une saiqoji sqab. Sosib niŋgi ŋambile gaigai sqajqa anjam ojesosib mandam qa tamo uŋgasari naŋgo ambleq di laqnsib suwaŋ qa kumbra naŋgi osornjroqnqab. Tamo uŋgasari naŋgi di kumbra bole dauryqa uratoqnsib olo kumbra uge uge yeqnub. Deqa mondoŋ Kristus a olo bosim naŋgo une deqa naŋgi peginjrqas. Yim bati deqa e nuŋgo kumbra bole qa tulaŋ areboleboleibim e qalieqai, ijo wau kalil e nuŋgo ambleq di yoqnem qaji di e laŋa yosaioqnem.

Kolosi 1:22

Ariya bunuqna Yesus a ŋamburbasq di moiej aqa kumbra dena Qotei na jeu kobotosiqa niŋgi olo eleŋej. A degyej. Di kiyaqa? A na niŋgi aqa areq joqsim bamqa niŋgi aqa segi kumbra boleq di sosib aqa ŋamgalaq di tamo tiŋtiŋo une saiqoji sqajqa deqa.

Kolosi 4:17

Ariya niŋgi na Arkipus endegsib minjiye, “Qotei a na ni wau emqo deqa wau di ni na taqatosim geregere wauoqne.”

1 Tesalonaika 3:13

Yimqa kumbra dena Qotei a nuŋgo are miligi siŋgilatetŋgimqa mondoŋ gago Tamo Koba Yesus a na Qotei aqa segi tamo uŋgasari kalil naŋgi laŋ qureq dena joqsim bosimqa niŋgi Qotei aqa segi kumbra bole dauryeqnub di a bosim unqas. Bati deqa niŋgi tamo uŋgasari tulaŋ boledamu tiŋtiŋ sosib gago Abu Qotei aqa ŋamgalaq di une saiqoji sqab. Bole.

1 Tesalonaika 5:23

Qotei a are lawo qa utru. A na nuŋgo areqalo tigeltetŋgimqa niŋgi nuŋgo segi jejamu osib a yekritosib aqa segi kumbra boleq di sosib dauryoqniye. Qotei a na nuŋgo mondor ti nuŋgo qunuŋ ti nuŋgo jejamu ti kalil taqatesoqnimqa niŋgi so bole sqab. Sosib mondoŋ gago Tamo Koba Yesus Kristus a olo bqas bati deqa niŋgi torei une saiqoji sqab.

2 Tesalonaika 2:1

O was qu, mondoŋ gago Tamo Koba Yesus Kristus a laŋ qureq dena boqnimqa niŋgi ti iga ti aqa siŋgaq di koroqom. Iga deqa niŋgi anjam kiñala merŋgim quiye.

2 Tesalonaika 2:8

A boleq dimqa Tamo Koba Yesus a riaŋ koba ti bosim aqa me mondor medabuq na puyimqa jagwa koba dosim dal anjam gotraŋyo qaji tamo di qalsim moiotqas. O was qu, Yesus aqa riaŋ dena tamo di tulaŋ padaltougetqas.

1 Timoti 6:20

O Timoti, Qotei na ni wau emej deqa ni wau di geregere taqatesoqne. Tamo qudei Qotei aqa areqalo dauryosai qaji naŋgi anjam uge uge mareleŋeqnub. Deqa ni naŋgo anjam di qoreiyosim naŋgi uratnjrsim isaq gile. Tamo naŋgi di mareqnub, “Iga powo bole ti unum.” Di gisaŋ. Naŋgi Qotei jeutoqnsib aqa areqalo dauryqa uratoqnsib anjam uge uge mareleŋeqnub.

2 Timoti 4:1

Qotei wo Kristus Yesus wo naŋgo ŋamgalaq di e ni siŋgila na endegsi mermqai. Mondoŋ Kristus Yesus a laŋ qureq dena brantosim bati deqa a na tamo uŋgasari kalil ŋambile so qaji naŋgi ti tamo uŋgasari nami moreŋeb qaji naŋgi ti naŋgo kumbra qa peginjrqas. Osim a bati gaigai naŋgo Mandor Koba sqas.

Taitus 2:13

Osim iŋgi tulaŋ boledamu iga mondoŋ oqom qaji di unqajqa areboleboleigoqnimqa tariŋoqnsim sqom. Yesus Kristus a segi Qotei. A siŋgila koba. A na iga eleŋej. Mondoŋ a wala bole ti riaŋ koba ti Qotei aqa siŋgila ti di osim laŋ qureq dena bqas. Iga di unqajqa tariŋoqnsim unum.

Hibru 9:14

Ariya Kristus aqa leŋ na wagme naŋgo leŋ tulaŋ buŋyejunu. Kristus aqa jejamuq di jiga bei saiqoji. Qotei aqa Mondor gaigai sqas qaji a na Kristus siŋgilatonaqa aqa segi jejamu ŋambile sonaqa osiqa Qotei atraiyej. Osiqa aqa leŋ na gago are miligi yansetgej. A gago jejamu segi yansetgosai. A gago une kobotetgej deqa iga qalieonum, iga Qotei aqa ŋamgalaq di une saiqoji unum. Deqa iga olo dal anjam dauryqajqa are qalqasai. Di kiyaqa? Dal anjam dena iga ŋambile sqa keresai. Ariya iga Qotei ŋambile gaigai unu qaji a qa are qaloqnsim wauetoqnqom di iga ŋambile sqom.

Hibru 9:28

Dego kere Kristus a bati qujai qa tamo gargekoba naŋgo une qoboiyetnjrqa marsiqa aqa segi jejamu osiq Qotei atraiyej. Ariya mondoŋ a olo laŋ qureq dena bosimqa a tamo uŋgasari naŋgo une olo kobotetnjrqasai. A bosim tamo uŋgasari a qa tariŋeqnub qaji naŋgi oqas.

1 Pita 1:19

Kristus aqa leŋ aiej qaji dena niŋgi awaiŋgej. Kristus aqa leŋ di tulaŋ bolequja. Kristus aqa jejamuq di une bei saiqoji. Agi kaja du du nami Qotei atraiyoqneb qaji naŋgo jejamuq di yu bei saiqoji dego kere.

1 Pita 1:7

Niŋgi gulube eqnub dena Qotei a nuŋgo areqalo uneqnu. Niŋgi Kristus qa nuŋgo areqalo bole siŋgilateqnub kio sai kio di Qotei a uneqnu. Iga qalie, gol a iŋgi tulaŋ boledamu. Ariya tamo naŋgi ŋamyuo na gol koitoqnsib dena qalieeqnub, gol di bole kio sai kio. Dego kere nuŋgo areqalo Kristus qa siŋgilateqnub qaji di tulaŋ bolequja. Areqalo dena gol tulaŋ buŋyejunu. Di kiyaqa? Gol a ugeosim koboqas. Deqa gulube bei bei niŋgi qa boqnsim dena niŋgi osorŋgwas, niŋgi Kristus qa nuŋgo areqalo bole siŋgila-teqnub. Niŋgi bole siŋgilatqab di mondoŋ diŋo batiamqa Yesus Kristus a boleq dosim bati deqa a niŋgi qa tulaŋ areboleboleiyim ñam kobaquja niŋgi eŋgwas.

2 Pita 2:21

Naŋgi nami kumbra bole qa gam di qaliesai qamu di kere. Ariya naŋgi gam di qalieosib Qotei aqa dal anjam osib olo bunuqna naŋgi qoreiyeb.

2 Pita 3:14

O ijo was bole, niŋgi iŋgi iŋgi di brantqajqa tariŋeqnub deqa niŋgi Qotei aqa ŋamgalaq di tamo bole une saiqoji sqajqa siŋgila na wauoqniye. Osib niŋgi Qotei ombla na areqalo qujaitosib soqniye. Soqnibqa mondoŋ Tamo Koba Kristus a olo bqajqa batiamqa Qotei a nuŋgo kumbra bole kalil di unekritqas.

1 Jon 3:2

O ijo kadoi bole, bini iga Qotei aqa segi aŋgro tiŋtiŋ unum. Ariya mondoŋ iga kiersi sqom di iga qalieosaiunum. Ariya iga qalie, Kristus a olo bamqa iga a unsimqa iga a bul sqom.

Jut 1:24

O was qu, Qotei a na niŋgi taqatŋgoqneme. Yim niŋgi uloŋqasai. Mondoŋ a na niŋgi joqsim laŋ qureq osi oqimqa niŋgi aqa riaŋ unsib une saiqoji sosib tulaŋ areboleboleiŋgim sqab.

Uli Anjam 1:7

Niŋgi uniye. Yesus a laŋbi ambleq na boqnimqa tamo kalil naŋgi a unqab. Tamo kalil nami a qaja na qameb qaji naŋgi dego a unqab. Tamo uŋgasari kalil mandamq endi unub qaji naŋgi a qa are ugeinjrimqa tulaŋ akamugetqab. Od, kumbra di brantqas. Bole.