1 Timoti 5:17 - Yesus Aqa Anjam Bole

¹⁷ Kristen gate naŋgi wau bole yeqnub deqa ni na tamo uŋgasari naŋgi minjrimqa naŋgi na Kristen gate naŋgo ñam soqtetnjroqnsib naŋgi iŋgi iŋgi qa aqaryainjroqnebe. Kristen gate qudei naŋgi Qotei aqa anjam palontqajqa waukobaoqnsib Qotei aqa gam bole tamo uŋgasari naŋgi osornjreqnub. Deqa ni na tamo uŋgasari naŋgi minjrimqa naŋgi na Kristen gate naŋgi di tulaŋ geregereinjroqnebe.

1 Timoti 5:17 ပူးပေါင်းရင်းမြစ်များ

Matyu 24:25

“Niŋgi quiye. Kumbra kalil di brantosaisonaqa agi e namoqna merŋgonum.

Luk 10:7

Niŋgi qure bei beiq di brantoqnsibqa tal qujaiq di soqniye. Olo tal bei bei gogetoqnaib. Naŋgi na niŋgi joqsib iŋgi ti ya ti anaiŋgoqnibqa uyoqniye. Niŋgi Qotei aqa wau tamo deqa nuŋgo awai agi oqniye.

Luk 12:42

Onaqa Tamo Koba Yesus na minjej, “Wau tamo yai a areqalo bole ti sosiqa gaigai wau bole yeqnu? Wau tamo di tal lanja a na minjeqnu, ‘Ni na ijo wau tamo kalil naŋgi geregere taqatnjroqnsimqa naŋgo iŋgi uyqajqa batioqnimqa iŋgi anainjroqnsim soqne.’ Tamo di a wau tamo bole. Deqa tal lanja na a degsi minjqas.

Jon 4:38

E niŋgi qariŋgonumqa gilsib wau niŋgi na wauosai qaji dena iŋgi eleŋonub. Tamo qudei naŋgi waukobaeb. Niŋgi laŋa gilsib iŋgi eleŋonub.”

Aposel 11:30

Silali di naŋgi na Barnabas wo Sol wo enjrnabqa naŋgi na osi aisib Kristen gate Judia sawaq di soqneb qaji naŋgo baŋq di ateb.

Aposel 20:35

Kumbra kalil e nuŋgo ambleq di yoqnem qaji di niŋgi segi unoqneb. Unoqnsib endegsi poiŋgoqnej, ‘Pol aqa kumbra di bole. Deqa iga Pol aqa kumbra di dauryosim siŋgila na wauoqnsimqa tamo uŋgasari siŋgila saiqoji unub qaji naŋgi aqaryainjroqnqom. Iga Tamo Koba Yesus aqa anjam nami marej qaji deqa are qaloqnsim degsi wauoqnqom.’ Agi Yesus a segi nami endegsi marej, ‘Tamo bei na tamo bei aqaryaiyosim iŋgi bei yqas di tamo iŋgi oqas qaji a areboleboleiyqas. Ariya tamo a na iŋgi yqas qaji a olo tulaŋ arebolebolekobaiyqas.’”

Aposel 28:10

Ariya nui deqaji tamo uŋgasari kalil naŋgi iga geregereigoqnsib kumbra tulaŋ boledamu egoqneb. Onaqa bunuqna iga nui di uratqa laqnamqa iŋgi iŋgi kalil iga saigeleŋej qaji di naŋgi na olo egeleŋonab gago iŋgi iŋgi kereej.

Rom 12:8

A na tamo qudei naŋgi aqa segi tamo uŋgasari naŋgo areqalo siŋgilatetnjrqajqa powo enjrej deqa naŋgi naŋgo areqalo geregere siŋgilatetnjroqnebe. A na tamo qudei naŋgi silali iŋgi iŋgi jeisib tamo uŋgasari iŋgi qa truqueqnub qaji naŋgi enjrqajqa powo enjrej deqa naŋgi silali iŋgi iŋgi koba koroiyosib jeisib enjroqnebe. A na tamo qudei naŋgi aqa wau taqatqajqa powo enjrej deqa naŋgi na wau di geregere taqatoqnebe. A na tamo qudei naŋgi aqa segi tamo uŋgasari naŋgi qa dulosib geregereinjrqajqa powo enjrej deqa naŋgi arebolebole na naŋgi geregereinjroqnebe.

Rom 15:27

Naŋgi naŋgo segi areqalo na silali di koroiyeb. Naŋgo kumbra di bole. Di kiyaqa? Naŋgi na kamba iŋgi deqaji olo Juda naŋgi enjrqajqa wau ti deqa. Juda naŋgi na naŋgi Qotei aqa anjam qa aqaryainjreqnub deqa naŋgi na kamba olo Juda naŋgi jejamu qa iŋgi iŋgi qa aqaryainjrqajqa wau ti.

Rom 16:12

Niŋgi Trifina wo Trifosa wo naŋgi aiyel dego ijo kaiye anjam endi minjriye. Naŋgi aiyel Tamo Koba Yesus qa waukobaeqnub. Niŋgi ijo kaiye anjam endi osib Persis dego minjiye. A ijo kadoi bole. A Tamo Koba Yesus aqa wau siŋgila na ojeqnu.

1 Korin 15:10

Ariya Qotei a e qa are boleiyej deqa bini e aqa anjam maro tamo unum. A e qa are boleiyej aqa kumbra di laŋa uloŋosai. E aqa kumbra di osim siŋgila na waukobaoqnsim Qotei aqa anjam maro tamo kalil naŋgi tulaŋ buŋnjreqnum. Ariya e ijo segi siŋgila na wau di yosaieqnum. Qotei a e qa are boleiyej deqa a na e siŋgila ebeqnaqa e wau di yeqnum.

1 Korin 16:16

Niŋgi tamo deqaji naŋgo sorgomq di soqniye. Sosib tamo naŋgi tamo deqaji naŋgi aqaryainjroqnsib waueqnub qaji naŋgo sorgomq di dego soqniye.

1 Korin 3:9

Aqo aiyel Qotei ombla na wau ojeqnum. Qotei aqa iŋgi wau agi niŋgi segi. Niŋgi segi Qotei aqa tal bul a na gereiyej qaji.

2 Korin 6:1

Iga Qotei ombla waueqnum deqa iga niŋgi siŋgila na endegsi merŋgwom, “Qotei a niŋgi qa are boleiyeqnu aqa kumbra di niŋgi osib olo laŋa urataib.”

Galesia 6:6

Kristen gate naŋgi wauoqnsib Qotei aqa anjam palontosib merŋgeqnub. Deqa niŋgi na kamba naŋgi iŋgi iŋgi qa aqaryainjroqniye.

Filipai 2:29

Deqa niŋgi Epafroditus a qa tulaŋ arebolebo-leiŋgim Tamo Koba Yesus aqa ñam na gereiyoqniye. Niŋgi tamo bole deqaji kalil naŋgo ñam gaigai soqtoqniye.

Filipai 4:3

O was, e ni dego endegsi mermqai. Aqo ombla wau qujai deqa ni na uŋa aiyel naŋgi di aqaryainjrimqa naŋgi are qujaitosib sqab. Naŋgi aiyel uŋa bole. Naŋgi e daurbosib ombla na Yesus aqa anjam mare mare laqnub qaji. E na tamo qudei e koba na waueqnub qaji naŋgi ti Klemem ombla na naŋgi dego minjritqa naŋgi na uŋa aiyel naŋgi di aqaryainjrebe. Naŋgo ñam di agi Qotei na ŋambile qa buk miligiq di neŋgreŋyej unu.

1 Timoti 3:5

Tamo bei na aqa segi uŋa ti aqa aŋgro naŋgi ti geregere taqatnjrqasai di a na Kristen naŋgi dego geregere taqatnjrqa keresai. Deqa a Kristen naŋgo gate sqa keresai.

1 Timoti 4:10

Qotei agi ŋambile gaigai unu qaji a na tamo uŋgasari kalil naŋgi oqajqa waueqnu. Od, a na iga tamo uŋgasari a qa gago areqalo siŋgilateqnum qaji iga bole eleŋej koboqo. Mondoŋ a na iga joqsim laŋ qureq oqwas. Iga deq oqwajqa tariŋoqnsim a qa gago areqalo siŋgilate-junum. Utru deqa iga gaigai Qotei aqa wau siŋgila na ojeqnum.

1 Timoti 4:14

Nami Kristen gate naŋgi Qotei aqa ñam na ino gateq di naŋgo baŋ atnabqa Qotei na ni siŋgila emej. Onaqa bunuqna tamo bei na olo Qotei aqa medabu osiq ni qa anjam bei dego babtej. Deqa ni siŋgila di oqnsim wauqa asgimaiq.

1 Timoti 4:16

Ni ino segi kumbra ti ino anjam maro ti geregere taqatosim siŋgila na Qotei aqa wau yoqne. Yimqa ino wau dena Qotei na ni ti tamo uŋgasari kalil ino anjam qusib dauryeqnub qaji naŋgi ti oqas.

1 Timoti 4:6

O Timoti, ijo anjam di ni na Kristen was qu naŋgi olo minjroqne. Ni minjroqnqam di ni Kristus Yesus aqa wau tamo boledamu sqam. Deqa anjam bole ni ino areqaloq di siŋgilatejunum qaji dena ti powo bole ni osim dauryeqnum qaji dena ti ni olo torei siŋgilatmesqas.

1 Timoti 5:19

O Timoti, tamo qujai na ni mermqas, “Kristen gate bei di a une yqo.” Yimqa ni aqa anjam quetaim. Ariya tamo aiyel kio tamo qalub kio naŋgi na anjam di mermibqa ni naŋgo anjam di quetnjre.

1 Timoti 5:3

Nuŋgo ambleq di uŋa qobul naŋgi unub. Naŋgi qudei aŋgro saiqoji unub. Deqa ni na uŋa qobul naŋgi di kumbra bole enjroqne.

2 Timoti 2:6

Tamo bei a wauosim iŋgi yagwas di iŋgi meliamqa a segi osim uyqas. Deqa tamo bei na a buŋyosim bosim iŋgi laŋa oqasai.

2 Timoti 4:2

Deqa ni Kristus aqa anjam palontqajqa siŋgilaoqne. Yimqa tamo qudei naŋgi ino anjam quqwa arearetnjroqnqas. Ariya tamo qudei naŋgi ino anjam quqwa asginjroqnqas. Di uŋgum. Ni gaigai Kristus aqa anjam naŋgi siŋgila na minjroqne. Osim anjam dena naŋgo are qametnjroqnsim naŋgo areqalo tigeltetnjroqne. Yim naŋgi are bulyoqnsib Qotei aqa kumbra dauryoqnqab. Deqa ni gaigai kumbra lawo na naŋgi gereinjroqnsim Qotei aqa kumbra naŋgi osornjroqne.

Hibru 13:17

Nuŋgo Kristen gate naŋgi na nuŋgo qunuŋ taqateqnub. Deqa mondoŋ Qotei a naŋgo wau deqa nenemnjrimqa naŋgi kamba a minjqab. Deqa niŋgi naŋgo medabu geregere dauryoqnsib naŋgo sorgomq di soqniye. Niŋgi degyqab di naŋgi arebolebole na niŋgi taqatŋgwab. Naŋgi are gulube ti niŋgi taqatŋgwasai. Ariya naŋgi are gulube ti niŋgi taqatŋgwab di naŋgi na niŋgi geregere aqaryaiŋgwa keresai.

Hibru 13:24

Niŋgi na ijo kaiye anjam endi osib Kristen gate kalil naŋgi ti Qotei aqa tamo uŋgasari kalil naŋgi ti minjriye. Itali tamo qudei bosib endia unub qaji naŋgi na dego niŋgi kaiyeiŋgonub.

Hibru 13:7

Ariya was qu, niŋgi Kristen gate naŋgi qa are qaloqniye. Nami naŋgi Qotei aqa anjam palontsib niŋgi merŋgoqneb. Osib Qotei qa naŋgo areqalo siŋgilatoqnsib kumbra bole bole yoqnsib laqneb. Deqa niŋgi naŋgo kumbra deqa are qaloqnsib dauryoqniye.