1 Timoti 3:16 - Yesus Aqa Anjam Bole

¹⁶ Iga bole qalieonum, Qotei aqa kumbra nami ulitesoqnej qaji di tulaŋ kobaquja. Kumbra di Qotei na iga osorgonaq unem. Aqa kumbra di agiende. A segi tamo bulyonaqa tamo uŋgasari naŋgi a unoqneb. Mondor Bole a na aqa kumbra bole babtosiq osorgej. Osiq mergej, “Aqa kumbra di tulaŋ tiŋtiŋo.” Laŋ aŋgro naŋgi dego a unoqneb. Tamo naŋgi sawa bei beiq giloqnsibqa aqa anjam mare mare laqneb. Deqa tamo uŋgasari mandamq endi unub qaji naŋgi a qa naŋgo areqalo siŋgilatoqneb. Ariya Qotei na a olo osiq laŋ qureq osi oqnaqa a dia ñam kobaquja osiq unu.

1 Timoti 3:16 ပူးပေါင်းရင်းမြစ်များ

Matyu 1:23

“Niŋgi quiye. Bunuqna duŋgeŋge bei a tamo ombla ŋereŋosaisosimqa a gumaŋosim aŋgro mel oqas. Amqa naŋgi aqa ñam Emanuel waiyqab.” Ñam di aqa damu, “Qotei a iga koba na unum.”

Matyu 13:11

Onaqa Yesus na kamba minjrej, “Qotei a tamo uŋgasari naŋgo Mandor Koba sosiq naŋgi taqatnjreqnu. Anjam di aqa utru uliejunu. Di e na babtitqa ijo aŋgro niŋgi segi utru qalieqab. Ariya Qotei na tamo uŋgasari naŋgi di yawo anjam aqa utru osornjrqasai.

Matyu 28:2

Naŋgi gileqnabqa Tamo Koba Qotei aqa laŋ aŋgro bei laŋ goge dena aisiqa meniŋ kobaquja sub me getentesoqnej qaji di belbeltosiq qalaq di atsiqa meniŋ quraq di awesoqnej. Awesonaqa mimiŋ kobaquja dej.

Matyu 3:16

Yesus yansonaqa a yaq na gogetosiqa bati di a tarosi laŋ goge koqyonaqa laŋ waqej. Laŋ waqonaqa Qotei aqa Mondor binoŋ bulosiq laŋ goge dena aisiq Yesus aqa jejamuq di awoonaq unej.

Matyu 4:11

Degsi minjnaqa Satan a Yesus uratosiq ulaŋej. Onaqa Qotei aqa laŋ aŋgro naŋgi bosib Yesus siŋgilatsib soqneb.

Mak 16:19

Tamo Koba Yesus a na aqa aŋgro naŋgi anjam degsi minjrnaqa Qotei na laŋ qureq osi oqnaqa aqa baŋ woq di awoej.

Mak 16:5

Onaqa naŋgi sub meq aisib aŋgro wala bei baŋ woq di awesonaq unsib tulaŋ ulaugeteb. Aŋgro wala di aqa gara tulaŋ qat.

Luk 2:32

Kristus aqa riaŋ na tamo uŋgasari kalil sawa isa isaq di unub qaji naŋgi suwantnjrqas. Ino segi tamo uŋgasari Israel naŋgi dego a na bosim naŋgi suwantnjrimqa naŋgo ñam kobaqas.”

Luk 20:44

Niŋgi uniye. Devit a segi marej, ‘Kristus a ijo Tamo Koba.’ Deqa Kristus a kiersi Devit aqa ŋiri sqas?”

Luk 22:43

Yesus a degsi siŋgila na Qotei pailyoqnsiqa a are tulaŋ gulube kobaiyej. Onaqa a ŋeskobaiyosiqa aqa ŋes leŋ ti mandamq aioqnej. Deqa laŋ aŋgro bei aisiqa Yesus taqysiqa aqa areqalo olo siŋgilatetej.

Luk 24:4

Deqa naŋgi are tulaŋ kobainjrej. Onaqa tamo aiyel brantosib uŋgasari naŋgo areq di tigelesonab unjrsib tulaŋ ulaugetosib turuosib mandamq di ŋam queb. Tamo aiyel di naŋgo gara tulaŋ minjalo. Onaqa tamo aiyel naŋgi na minjreb, “Niŋgi kiyaqa tamo moreŋo qaji naŋgo sawaq endia tamo ŋambile unu qaji a qa ŋameqnub?

Luk 24:51

Pailyeqnaqa Qotei na a metonaq naŋgi uratnjrsiqa laŋ qureq oqej.

Jon 1:14

Anjam di a tamo yusiqa gago ambleq di soqnej. Onaqa iga aqa ñam koba ti aqa siŋgila ti di unem. Aqa ñam agiende. A segi qujai Qotei aqa Ŋiri. A iga qa are tulaŋ boleiyeqnu. A segi anjam bole qa utru.

Jon 13:3

Ariya Yesus a qalieej, aqa Abu na iŋgi iŋgi kalil aqa baŋq di ateleŋej. A Qotei aqaq dena bej olo puluosim Qotei aqaq oqwas di dego qalieej.

Jon 15:26

“Niŋgi siŋgilatŋgwajqa Mondor a ijo Abu ombla unub. E na a qariŋyit niŋgi qa bqas. A anjam bole qa Mondor. A ijo Abu aqaq dena bqas. Bosim ijo wau qa ti ijo kumbra qa ti anjam babtqas.

Jon 16:28

Nami e ijo Abu ombla sosim dena mandamq aiem. Bini e olo mandam uratosiy aqaq olo oqwai.”

Jon 17:5

O Abu, nami mandam a brantosaisonaqa e ni ombla ñam koba ti soqnem. Ñam di ni na e olo ebimqa aqo ombla ñam koba ti sqom.

Jon 20:12

Tirosiqa laŋ aŋgro aiyel sub miligiq di sonab unjrej. Naŋgi gara qat jigsib Yesus ŋeioteb qaji lumeq dia awesoqneb. Bei gateqsi bei siŋgaqsi awesoqneb.

Jon 6:62

Qure e Tamo Aŋgro nami soqnem qaji deq olo oqitqa niŋgi e nubsibqa kiersib are qalqab?

Aposel 1:19

Bunuqna tamo uŋgasari kalil Jerusalem di soqneb qaji naŋgi anjam di qusibqa mandam di aqa ñam “Akeldama” waiyeb. Di naŋgo segi anjam na ñam waiyeb. Ñam di aqa damu, “Leŋ Aiqajqa Mandam.”

Aposel 10:34

Onaqa Pita a tigelosiqa naŋgi endegsi minjrej, “E Juda tamo. Niŋgi Juda tamo sai. Niŋgi sawa bei bei qaji tamo. Di uŋgum. Qotei a iga Juda tamo iga bole qa maroqnsiq olo sawa bei bei qaji tamo naŋgi uge qa marosaieqnu. Aqa ŋamdamuq di tamo kalil kere kere unub. Endego e degsi qalieonum.

Aposel 14:27

Aisib Yesus aqa tamo uŋgasari naŋgi koroinjrsibqa naŋgi aiyel qure qureq dia laqnsibqa Qotei na naŋgi aqaryainjreqnaqa naŋgi kumbra kalil yoqneb qaji deqa naŋgi sainjroqneb. Sainjroqnsib endegsib minjroqneb, “Qotei na sawa bei bei qaji tamo naŋgi dego gam waqtetnjreqnaqa naŋgi are bulyoqnsib Yesus qa naŋgo areqalo siŋgilateqnub.”

Aposel 20:28

O ijo was niŋgi nuŋgo segi segi jejamu geregere taqatosib Qotei aqa tamo uŋgasari naŋgi dego geregere taqatnjroqniye. Qotei aqa tamo uŋgasari naŋgi kaja bul. Qotei na aqa segi Ŋiri Yesus Kristus aqa leŋ na naŋgi awainjrej. Deqa niŋgi na naŋgi geregere taqatnjroqnsibqa naŋgo mandor bole soqniye. Wau di Qotei aqa Mondor na niŋgi eŋgej.

Rom 10:12

Iga Juda tamo ti Grik tamo ti iga kalil kerekere unum. Tamo Koba Kristus a gago kalil qa Tamo Koba. Deqa a na tamo kalil Kristus metoqnsib pailyeqnub qaji naŋgi tulaŋ geregereinjreqnu.

Rom 10:18

Ariya e niŋgi endegsi nenemŋgwai. Israel naŋgi Kristus aqa anjam bole di nami quosai kio? Sai. Naŋgi quoqneb. Agi Qotei aqa anjam endegsi unu, “Qotei aqa anjam di gilsiq sawa sawa kalil keretonaqa tamo uŋgasari kalil naŋgi quoqneb.”

Rom 16:25

Qotei a siŋgila koba ti unu deqa a na niŋgi siŋgilatŋgwas. Yim niŋgi Yesus Kristus aqa anjam bole e na mare mare laqnum qaji di osib nuŋgo areqaloq di siŋgilatqab. O was qu, tulaŋ nami Kristus aqa anjam bole di uliesoqnej.

Rom 16:26

Ariya bini Qotei na anjam di olo boleq atej. Qotei ŋambile gaigai unu qaji a marnaqa aqa medabu o qaji tamo naŋgi anjam di neŋgreŋyonab sonaqa iga na olo anjam di osim tamo uŋgasari sawa sawa kalilq di unub qaji naŋgi minjre minjre laqnum. Deqa naŋgi uli anjam di quoqnsib poinjreqnu. Qotei na anjam di boleq atej. Di kiyaqa? Tamo uŋgasari sawa bei beiq di unub qaji naŋgi anjam di qusib naŋgo areqaloq di siŋgilatosib dauryqajqa deqa.

Rom 3:4

O was qu, iga degsi marqasai. Iga endegsi marqom. Tamo kalil naŋgi gisaŋ tamo. Ariya Qotei a segi qujai gisaŋ tamo sai. A anjam bole segi gaigai mareqnu. Agi Qotei aqa anjam bei nami endegsib neŋgreŋyeb unu, “O Qotei, ni gaigai kumbra tiŋtiŋ na e pegibeqnum. Ariya tamo qudei naŋgi na ni pegimqa maribqa ni na olo naŋgi buŋnjrsim ni une saiqoji sqam.”

Rom 8:3

Dal anjam na gago une kobotqa keresai. Di kiyaqa? Iga areqalo namijq di unum deqa iga dal anjam dauryqa keresai. Ariya dal anjam na gago une kobotqa keresai deqa Qotei a segi na gago une kobotej. A gam endena gago une kobotej. A na aqa segi Ŋiri Yesus qariŋyonaqa a une tamo bulosiqa gago une kobotqa bonaqa aqa segi jejamuq di Qotei na gago une aqa awai uge atsiqa une aqa siŋgila kobotej.

Rom 9:5

Naŋgo moma utru naŋgi nami ñam koba ti soqneb. Naŋgoq dena Kristus a ŋambabej. Kristus a segi Qotei. A iŋgi iŋgi kalil naŋgo gate. Deqa iga bati gaigai aqa ñam soqtoqnqom. Bole.

1 Korin 15:47

Qotei na Adam namij a mandam na gereiyej. Deqa Adam a mandam qaji tamo. Ariya Adam bunuj a laŋ qureq na bej.

1 Korin 2:7

Iga powo deqa mare mare laosaieqnum. Iga Qotei aqa segi powo qa mareqnum. Qotei a nami mandam atosaisosiqa aqa powo dena a na iga a ombla laŋ qureq di sqajqa gam gereiyetgej. Aqa powo di nami ulitesoqnej.

2 Korin 1:19

Nami e na Sailas na Timoti na iga qalub Qotei aqa Ŋiri Yesus Kristus aqa anjam palontosim niŋgi merŋgoqnem. Niŋgi qalie, Yesus a dego laŋa odoqnsiq olo saidosaieqnu. A gaigai Qotei aqa ñam na odeqnu.

Galesia 2:8

Od, Qotei na Pita siŋgila yej deqa a Juda tamo muluŋ uneqnub qaji naŋgo ambleq di wauoqnsiqa Kristus aqa anjam bole minjre minjre laqnu. Dego kere Qotei na e dego siŋgila ebej deqa e sawa bei bei qaji tamo naŋgo ambleq di wauoqnsimqa Kristus aqa anjam bole minjre minjre laqnum.

Galesia 4:4

Ariya bati Qotei a nami atej qaji di brantonaqa a na aqa Ŋiri Yesus qariŋyonaq mandamq aiej. Aisiq aqa ai na ŋambabtonaqa a tamo brantosiqa dal anjam aqa sorgomq di soqnej.

Efesus 1:9

Nami Qotei a Kristus aqa wau na iga eleŋqa are qalej. Aqa areqalo di ulitesoqnej. Ariya bini a na aqa areqalo di olo boleq atsiq osorgej.

Efesus 6:19

Osib e qa dego endegsib Qotei pailyoqniye, “O Abu, ni na Pol aqa medabu siŋgilatetimqa a ulaqasai. A ino anjam bole nami ulitesoqnem qaji di olo ubtsim tamo uŋgasari naŋgi minjroqnqas.”

Kolosi 1:23

Ariya une bei na niŋgi titŋgimqa Kristus aqa anjam bole niŋgi nami queb qaji di nuŋgo areqaloq di olo siŋgilatqa urataib deqa niŋgi nuŋgo areqalo Yesus qa bole siŋgilatoqnsib siŋgila na tigelesoqniye. E Pol. E Yesus aqa wau tamo deqa e anjam bole di tamo uŋgasari kalil mandamq endi unub qaji naŋgi minjroqnsim laqnum.

Kolosi 1:27

Qotei aqa segi areqalo na uli anjam di boleq atsiqa iga aqa segi tamo uŋgasari iga osorgej. Yim iga endegsi poigwajqa, Qotei aqa uli anjam di tulaŋ boledamu. Anjam dena Qotei na tamo uŋgasari kalil sawa bei beiq di unub qaji naŋgi aqaryainjrqas. Uli anjam di aqa damu agiende. Kristus a nuŋgo ambleq di unu. A na niŋgi eleŋosim laŋ qureq osi oqimqa dia niŋgi aqa iŋgi bole bole oqab.

Kolosi 2:2

E nuŋgo are siŋgilatetŋgosiy nuŋgo areqalo tigeltetŋgitqa niŋgi na Qotei aqa segi tamo uŋgasari naŋgi tulaŋ qalaqalainjroqnsib naŋgi ti are qujaitosib sqajqa deqa are qaloqnsim waukobaeqnum. Ijo areqalo agiende. Niŋgi areqalo bole ti sosib dena niŋgi nuŋgo areqalo Kristus qa bole siŋgilatqab. Osib dena niŋgi Qotei aqa uli anjam aqa utru geregere qalieqab. Kristus a segi uli anjam di aqa utru.

2 Tesalonaika 1:10

Bati Qotei na nami giltej qaji di brantimqa Tamo Koba Yesus a bosim naŋgi degsim ŋolawotnjrqas. Ariya Qotei aqa segi tamo uŋgasari a qa naŋgo areqalo siŋgilateqnub qaji naŋgi kalil a mandamq aioqnim aqa siŋgila unsibqa aqa ñam soqtosib a qa tulaŋ areboleboleinjrim sqab. Niŋgi dego naŋgi ti areboleboleiŋgim sqab. Di kiyaqa? Qotei aqa anjam iga nami niŋgi merŋgoqnem qaji di niŋgi qusib nuŋgo areqaloq di siŋgilatejunub deqa.

2 Tesalonaika 2:7

Niŋgi qalie, bini Qotei aqa dal anjam gotraŋyo qaji tamo di a ulioqnsiq waueqnu. Ariya a wauoqnimqa gam getentejunu qaji tamo di Qotei na taqal waiyim Satan aqa tamo kobaquja di a boleq dqas.

1 Timoti 3:9

Naŋgi Qotei aqa ŋamgalaq di une saiqoji soqnebe. Sosib anjam bole Qotei na nami iga osorgej qaji di siŋgila na ojesoqnebe. Agi iga Qotei qa gago areqalo siŋgilateqnum qaji iga anjam bole di osorgej.

Hibru 1:3

Yesus a na Qotei aqa riaŋ koba iga osorgeqnu. Yesus aqa so ti Qotei aqa so ti ombla kerekere. Aqa anjam siŋgila ti unu deqa anjam dena a na iŋgi iŋgi kalil siŋgilatejunu. A na gago une kobotetgosiqa laŋ qureq oqsiq Qotei siŋgila koba ti unu qaji aqa baŋ woq di awejunu.

Hibru 12:2

Osim iga Yesus koqyoqnqom. Iga Qotei qa gago areqalo siŋgilateqnum kumbra di agi Yesus a segi utru. Bunuqna a na gago kumbra di torei keretqas. Yesus a qalie, a Qotei aqa anjam geregere dauryosim ŋamburbasq di moiqas di bunuqna a olo ŋambile bole osim tulaŋ areboleboleiyqas. A deqa are qalsiq siŋgilaosiq ŋamburbasq di moiej. A nami qalieej, a ŋamburbasq di moiqas di tamo uŋgasari naŋgi a qa maroqnqab, “A tamo tulaŋ uge deqa a moiqo.” Yim a jemakobaiyqas. Ariya Yesus a jemai deqa are qalosai. A Qotei aqa anjam dauryosiq moiej. Ariya bini a olo laŋ qureq dia Qotei aqa awo jaram baŋ woq di awejunu.

Hibru 7:7

Iga qalie, tamo ñam ti unub qaji naŋgi na tamo ñam saiqoji unub qaji naŋgo gateq di baŋ atetnjroqnsib naŋgi qa pailyeqnub.

Hibru 8:1

Ariya ijo anjam di aqa utru agiende. Atra tamo kobaquja deqaji agi unu. Di Yesus qujai. A laŋ qureq oqsiq Qotei siŋgila koba ti unu qaji aqa baŋ woq di awejunu.

1 Pita 1:12

Ariya Qotei a na naŋgi kamba endegsi minjrej, “Anjam niŋgi mareqnub qaji di aqa damu nuŋgo bati qa brantqasai. A bunuqna brantqas.” O was qu, Qotei na niŋgi oqajqa anjam di Qotei aqa medabu o qaji tamo naŋgi maroqneb. Ariya bunuqna Qotei na aqa Mondor Bole qariŋyonaqa laŋ goge dena aisiq Qotei aqa anjam maro tamo naŋgi siŋgilatnjroqnej. Yeqnaqa naŋgi Kristus aqa anjam bole palontoqnsib niŋgi merŋgoqneb. Qotei aqa laŋ aŋgro naŋgi dego kumbra bole kalil Qotei na niŋgi eŋgeqnu qaji deqa geregere qalieqa osib utru ŋameqnub.

1 Pita 1:20

Tulaŋ nami Qotei a mandam atosaisosiqa a Kristus qa qalieosiqa a giltej. Kristus na niŋgi awaiŋgwajqa deqa marsiq a giltej. Ariya bini bati endeqa diŋo bati jojomqo deqa Qotei a niŋgi qa osiqa Kristus qariŋyonaq bej.

1 Pita 1:21

Kristus a na niŋgi aqaryaiŋgej deqa niŋgi Qotei qa nuŋgo areqalo siŋgilatosib unub. Kristus agi moinaqa Qotei na olo subq na tigeltosiqa metonaq a laŋ qureq oqsiq dia ñam kobaquja ej. Utru deqa niŋgi Qotei qa nuŋgo areqalo siŋgilatoqnsib anjam a nami marej qaji di aqa damu brantqajqa deqa tariŋoqnsib unub.

1 Pita 3:18

Niŋgi Kristus qa are qaloqniye. Kristus a tamo tiŋtiŋo. Ariya a na tamo uŋgasari uge uge naŋgo sawa osiq naŋgo une qa osiq moiej. A na niŋgi joqsim Qotei aqaq oqwajqa deqa osiq niŋgi qa moiej. A bati qujai qa moiej deqa a olo moiqa keresai. A tamo bulyosiqa mandamq endi soqnej. Sonaqa jeu tamo naŋgi na a qalnab moiej. Ariya a olo subq na tigelosiqa a mondor ti soqnej.

1 Pita 3:22

Onaqa Kristus a laŋ qureq oqej deqa bini a Qotei aqa baŋ woq di awejunu. Deqa laŋ aŋgro naŋgi ti laŋ qaji mondor kokba ti laŋ qaji siŋgila ti kalil naŋgi Kristus aqa sorgomq di unub.

1 Jon 1:2

Ŋambile di boleq donaqa iga unem. Iga ŋambile deqa mare mare laqnum. Ŋambile di gaigai sqas. Nami ŋambile di aqa Abu wo sosiqa boleq donaqa iga unem. Deqa iga a qa niŋgi merŋgeqnum.

1 Jon 3:5

Niŋgi qalie, Kristus a gago une kobotqa bej. A segi une saiqoji.

1 Jon 3:8

Satan a nami une atsiq boqnej agi bini degsi unu. Deqa tamo a une atoqnqas di a Satan aqa tamo sqas. Ariya Qotei aqa Ŋiri a Satan aqa wau kobotqa bej.

Uli Anjam 17:5

Uŋa di aqa ñam aqa lanjaqsi neŋgreŋyonab soqnej. Ñam di sasir anjam. Aqa ñam bole agiende, “Babilon qure kobaquja. A sambala uŋa kalil naŋgo ai. Kumbra uge uge kalil mandamq di so qaji naŋgo ai agi a segi.” Aqa ñam bole agide.

Uli Anjam 17:7

Onaqa laŋ aŋgro dena e merbej, “Ni kiyaqa are koba qaleqnum? Uŋa de wo wagme juwaŋ wo naŋgo kumbra di sasir anjam. Wagme juwaŋ agi gate 7-pela ti qala 10-pela ti unu. A na uŋa di qolaiyejunu. Naŋgo aiyel sasir anjam di aqa utru uliejunu. Di e na babtitqa ni que.

Uli Anjam 7:9

Onaqa bunuqna e olo ŋam atsimqa tamo uŋgasari tulaŋ gargekoba koroesonab unjrem. Tamo uŋgasari naŋgi di tamo bei na sisiyqa keresai. Naŋgi tulaŋ gargekoba. Naŋgi di kalil leŋ segi segi qaji, sawa segi segi qaji, jejamu segi segi qaji, anjam maro segi segi qaji. Naŋgi Qotei aqa awo jaram ti Kaja Du ti naŋgo areq di tigelosibqa gara jugo qat olekokba jigeleŋosib naŋgo baŋ na tuwom baŋga ojeleŋesoqneb.