1 Timoti 1:9 - Yesus Aqa Anjam Bole

⁹ Qotei a tamo naŋgi kumbra bole bole yeqnub qaji naŋgi qa osiq dal anjam atosai. Tamo naŋgi dal anjam gotraŋyoqnsib diqeqnub qaji naŋgi qa osiq dal anjam atej. Tamo naŋgi di naŋgo kumbra agiende. Naŋgi Qotei qoreiyoqnsib une ateqnub. Osib Qotei aqa kumbra dauryqa uratoqnsib olo mandam qa kumbra uge uge yeqnub. Naŋgi naŋgo ai wo abu wo ñumsib moiotnjreqnub. Osib tamo qudei naŋgi dego ñumeqnub.

1 Timoti 1:9 ပူးပေါင်းရင်းမြစ်များ

Matyu 10:21

“Bati deqa kumbra uge endeqaji branteleŋqas. Tamo qudei naŋgi na naŋgo segi was naŋgi ojeleŋoqnsib jeu tamo naŋgo baŋq di ateleŋoqnibqa naŋgi na naŋgi ñumoqnib moreŋoqnqab. Tamo qudei naŋgi na naŋgo segi aŋgro naŋgi dego degsib ojeleŋoqnqab. Aŋgro qudei naŋgi na naŋgo segi ai wo abu wo naŋgi jeutnjroqnsib ojeleŋoqnsib jeu tamo naŋgo baŋq di ateleŋoqnibqa naŋgi na naŋgi ñumoqnib moreŋoqnqab.

Rom 1:30

Naŋgi gisaŋ na tamo naŋgo ñam ugetetnjreqnub. Naŋgi Qotei jeuteqnub. Naŋgi diqoqnsib laqnsib naŋgo segi ñam soqteqnub. Naŋgi kumbra uge uge bunuj babteleŋeqnub. Naŋgi naŋgo ai wo abu wo naŋgo medabu gotraŋyeqnub.

Rom 4:13

Nami Qotei na Abraham aqa moma naŋgi ti endegsi minjrej, “E niŋgi mandam kalil eŋgwai.” Ariya Abraham a dal anjam dauryej deqa Qotei na anjam di minjosai. A Qotei qa aqa areqalo siŋgilatej gam dena Qotei na a tamo bole une saiqoji qa minjej. Utru deqa Qotei na Abraham aqa moma naŋgi ti minjrej, “E niŋgi mandam kalil eŋgwai.”

Rom 5:20

Tamo naŋgi nami dal anjam eb bati deqa naŋgi dal anjam tulaŋ koba gotraŋyoqneb. Naŋgi une tulaŋ gargekoba yoqneb ariya Qotei a olo naŋgi qa are tulaŋ boleiyoqnej.

Rom 6:14

Deqa une na niŋgi olo taqatŋgwasai. Di kiyaqa? Bini niŋgi dal anjam aqa sorgomq di sosai. Qotei a niŋgi qa are tulaŋ boleiyej kumbra di aqa sorgomq di niŋgi unub.

Galesia 3:19

A laŋa yqa minjej deqa a bunuqna kiyaqa olo dal anjam atej? E marqai. A gago une boleq atqa osiq deqa dal anjam atej. A endegsi are qalej. Dal anjam a soqnim bati deqa Abraham aqa moma qujai a qa nami marej qaji di brantqas. A deqa are qalsiq dal anjam atej. Dal anjam di Qotei na aqa laŋ aŋgro naŋgi enjrnaqa Moses a Qotei ti Israel naŋgi ti naŋgo ambleq di tigelesonaqa laŋ aŋgro naŋgi dena dal anjam di palontosib Moses minjnabqa a na kamba iga egej.

Galesia 5:18

Ariya niŋgi Qotei aqa Mondor aqa kumbra dauryqab di niŋgi olo dal anjam aqa sorgomq di sqasai.

Galesia 5:21

ya uysib nanarioqa, alaŋkobaoqa. Areqalo namij aqa kumbra agide. E nami merŋgem agi olo merŋgwai. Tamo kalil kumbra uge deqaji yeqnub qaji naŋgi Qotei na osim taqatnjrqasai. Osim a naŋgo Mandor Koba sqasai dego.

Galesia 5:23

lawo na soqa, gago segi jejamu taqatosim areqalo namij dauryqa uratoqa. O was qu, iga kumbra bole deqaji yoqnqom di dal anjam na iga getentgwa keresai.

2 Tesalonaika 2:8

A boleq dimqa Tamo Koba Yesus a riaŋ koba ti bosim aqa me mondor medabuq na puyimqa jagwa koba dosim dal anjam gotraŋyo qaji tamo di qalsim moiotqas. O was qu, Yesus aqa riaŋ dena tamo di tulaŋ padaltougetqas.

1 Timoti 4:7

Ariya tamo qudei naŋgi sa anjam uge uge laŋa maroqnsib dena tamo uŋgasari naŋgi nanaritnjreqnub. Deqa ni na anjam di qoreiyosim Qotei aqa kumbra siŋgilatsim dauryoqne.

1 Timoti 6:20

O Timoti, Qotei na ni wau emej deqa ni wau di geregere taqatesoqne. Tamo qudei Qotei aqa areqalo dauryosai qaji naŋgi anjam uge uge mareleŋeqnub. Deqa ni naŋgo anjam di qoreiyosim naŋgi uratnjrsim isaq gile. Tamo naŋgi di mareqnub, “Iga powo bole ti unum.” Di gisaŋ. Naŋgi Qotei jeutoqnsib aqa areqalo dauryqa uratoqnsib anjam uge uge mareleŋeqnub.

2 Timoti 2:16

Ariya tamo qudei Qotei aqa areqalo dauryosai qaji naŋgi anjam uge uge mareleŋeqnub. Deqa ni naŋgo anjam di qoreiye. Naŋgo anjam dena tamo naŋgi are tigeltetnjroqnim naŋgi Qotei qoreiyqa gam dauryoqnqab.

2 Timoti 3:2

Bati di tamo naŋgi naŋgo segi jejamu qa areboleboleinjroqnim sqab. Sosib silali koba oqnqajqa are prugnjroqnqas. Naŋgi naŋgo segi ñam soqtoqnsib diqoqnsib ŋiriŋ anjam koba maroqnsib tamo naŋgi misiliŋnjroqnqab. Naŋgi naŋgo ai wo abu wo naŋgo anjam gotraŋyoqnqab. Tamo uŋgasari qudei naŋgi na naŋgi kumbra bole bole enjroqnibqa di uratoqnsib olo naŋgi qa are boleinjrqasai. Naŋgi Qotei aqa kumbra kalil qoreiyoqnqab.

Taitus 1:10

O Taitus, Krit nuiq dia anjam gotraŋyo qaji tamo gargekoba unub. Deqa ni na tamo bole bole naŋgi unjrsim gate ateleŋ. Anjam gotraŋyo qaji tamo naŋgi di anjam laŋa laŋa maroqnsib dena tamo uŋgasari naŋgi gisa gisaŋnjreqnub. Tamo naŋgi di Juda tamo. Deqa naŋgi tamo muluŋ breinjrqajqa tulaŋ siŋgi-laeqnub.

Taitus 1:16

Naŋgi segi mareqnub, “Iga Qotei qa qalie bole.” Di gisaŋ. Naŋgi kumbra uge uge yeqnub dena iga poigeqnu, naŋgi Qotei qoreiyeqnub. Deqa Qotei a na naŋgi uratnjreqnu. Naŋgi Qotei aqa anjam gotraŋyeqnub qaji tamo. Naŋgi kumbra bole bei dauryqa keresai.

Taitus 1:6

Deqa ni unime. Ni tamo bei a gate atqa osimqa a peleiyosim aqa kumbra kalil unsim di ni a gate ate. Tamo di a tamo uŋgasari kalil naŋgo ŋamgalaq di une saiqoji soqnem. A uŋa aiyeltaiq. Aqa aŋgro naŋgi Kristus qa naŋgo areqalo siŋgilatosib soqneb. Naŋgi kumbra uge uge yoqnaib. Naŋgi diqoqnsib naŋgo ai wo abu wo naŋgo anjam gotraŋyoqnaib.

Taitus 3:3

Ni qalie, iga dego nami areqalo uge ti sosimqa Qotei aqa anjam gotraŋyoqnem. Bati di Satan a na iga gisa gisaŋgeqnaqa iga Qotei aqa gam bole dauryqa uratosim kumbra uge dauryqajqa are pruggeqnaqa gago segi jejamu qa tulaŋ areboleboleigoqnej. Kumbra dena iga siŋgila na ojesoqnej. Deqa iga minjiŋ ti are uge ti sosim walweloqnem. Tamo naŋgi na iga jeutgeqnabqa iga na kamba dego naŋgi jeutnjroqnem.

Hibru 11:31

Ariya bati deqa sambala uŋa Rahap a dego Qotei qa aqa areqalo siŋgilatonaq deqa Israel tamo aiyel naŋgi lumu na Jeriko qure unqa bonabqa a na naŋgi aiyel osiqa lawo na gereinjrsiqa ulitnjrej. Qure deqaji tamo naŋgi Qotei aqa anjam gotraŋyo qaji tamo soqneb. Deqa Qotei na naŋgi kalil padaltnjrsiqa ariya Rahap a segi are bulyej deqa a uratonaq bole soqnej.

Hibru 12:16

Niŋgi na tamo naŋgi saidnjribqa naŋgi sambala kumbra yaib. Osib tamo naŋgi Qotei qoreiyqajqa dego saidnjriye. Agi nami Iso na Qotei qoreiyosiqa a aŋgro matu soqnej deqa are qalosaiosiq iŋgi bole kalil aqa abu na nami a yqajqa minjej qaji di bati qujai qa qariŋyosiq dena iŋgi awaiyosiq uyej.

1 Pita 2:7

O was qu, niŋgi Kristus qa nuŋgo areqalo siŋgilateqnub deqa niŋgi mareqnub, “Tal aqa ai di tulaŋ bolequja.” Ariya tamo naŋgi Kristus qa naŋgo areqalo siŋgilato-saieqnub qaji naŋgi tal aqa ai di uge qa mareqnub. Agi Qotei aqa anjam bei nami endegsib neŋgreŋyeb unu, “Tal gereiyo qaji tamo naŋgi na tal aqa ai di arqsibqa uge qa marsib taqal waiyeb. Onaqa tal aqa ai di Qotei na olo osiq tumaq di tigeltej unu.”

1 Pita 3:20

Noa aqa bati qa tamo naŋgi di Qotei aqa anjam gotraŋyoqneb. Bati deqa kumbra uge tulaŋ kobaej. Ariya Qotei a tamo naŋgo kumbra uge deqa naŋgi urur kambatnjrosaioqnej. A tariŋosiq sokobaiyonaqa Noa a qobuŋ kobaquja gereiyej. Gereiysiq koboonaqa tamo uŋgasari 8-pela segi qobuŋ gogetosib sonabqa awa koba bosiqa ya tulaŋ koba dej. Ariya tamo uŋgasari 8-pela naŋgi di Qotei na eleŋej deqa naŋgi bole soqneb.

1 Pita 4:18

Agi Qotei aqa anjam bei nami endegsib neŋgreŋyeb unu, “Qotei a na tamo naŋgi kumbra tiŋtiŋ yeqnub qaji naŋgi eleŋqajqa wau koba. Deqa iga qalieonum. Tamo naŋgi Qotei qoreiyoqnsib une yeqnub qaji naŋgi a na eleŋqajqa olo tulaŋ wau koba.”

Jut 1:15

Bosim tamo kalil Qotei qoreiyeqnub qaji naŋgo une qa peginjrsim ugeugeinjrqas. Osim naŋgo kumbra uge di naŋgi osornjrimqa naŋgi deqa are qalsib gulube koba oqab. Tamo qudei une yeqnub qaji naŋgi Qotei tulaŋ qoreiyoqnsib a misiliŋyoqnsib kumbra tulaŋ uge uge yeqnub. Deqa Qotei na naŋgi dego naŋgo kumbra uge di osornjrimqa naŋgi deqa are qalsib gulube koba oqab.” Enok a nami degsi marej.

Uli Anjam 21:8

“Ariya tamo naŋgi ulakobaoqnsib Yesus qa naŋgo areqalo siŋgilatosaieqnub qaji naŋgi kalil ŋamyuo kobaq aiqab. Tamo kumbra uge yo qaji, leŋ ojo qaji, sambala kumbra yo qaji, gumaniŋo qaji, quñam qalo qaji, qotei gisaŋ biŋinjro qaji, gisaŋ anjam maro qaji naŋgi kalil ŋamyuoq aieleŋqab. Ŋamyuoq dia meniŋ kalil yusiq ñaŋgaeqnu. Ŋamyuo di moio bunu qaji.”

Uli Anjam 22:15

Tamo naŋgi kumbra uge uge yeqnub qaji naŋgi Qotei aqa qure koba di miligiq gilqasai. Naŋgi oqeq di sqab. Tamo gumaniŋo qaji, quñam qalo qaji, sambala kumbra yo qaji, leŋ ojo qaji, gisaŋ qotei biŋinjro qaji, gisaŋ kumbra dauryqajqa tulaŋ arearetnjro qaji naŋgi Qotei aqa qure koba di miligiq gilqasai. Naŋgi oqeq di sqab.