1 Tesalonaika 5:8 - Yesus Aqa Anjam Bole

⁸ Ariya iga suwaŋ qaji tamo unum deqa iga areqalo bole ti sqom. Sosim iga Qotei qa gago areqalo siŋgilatoqnsim tamo naŋgi qalaqalainjroqnqom. Gago kumbra di iga siŋgilatosim qoto qa gara jugo bul jigsim tigelesqom. Osim iga mondoŋ Qotei na laŋ qureq joqsim oqwajqa deqa tariŋoqnqom. Gago kumbra di dego iga siŋgilatosim qoto qa gate tatal bul atsim tigelesosim ŋam atoqnqom.

1 Tesalonaika 5:8 ပူးပေါင်းရင်းမြစ်များ

1 Korin 13:13

Iga Qotei qa gago areqalo siŋgilateqnum kumbra di a gaigai sqas. Qotei na iga oqajqa deqa iga tariŋoqnsim unum kumbra di dego gaigai sqas. Qalaqalaiyo kumbra di dego gaigai sqas. Ariya qalaqalaiyo kumbra di tulaŋ bolequja. Qalaqalaiyo kumbra dena kumbra kalil tulaŋ buŋnjrejunu.

2 Korin 6:7

Iga Qotei aqa anjam bole segi mareqnum. Iga Qotei aqa siŋgila oqnsim waueqnum. Iga gago baŋ wo na baŋ qonaŋ na qoto qa iŋgi iŋgi ojoqnsim dena kumbra bole tiŋtiŋ dauryoqnsim waueqnum.

Galesia 5:5

Ariya iga degyosaieqnum. Iga Qotei aqa Mondor aqa siŋgila na Qotei qa gago areqalo siŋgilatoqnsim mondoŋ a na iga tamo bole une saiqoji qa mergwajqa deqa tariŋoqnsim unum.

Efesus 6:11

Osib qoto qa iŋgi iŋgi Qotei na iga egeqnu qaji di jigeleŋosib siŋgila na tigelosib Satan aqa gisaŋ anjam ti aqa uli kumbra ti gotraŋyoqnsib qotoqniye.

Efesus 6:23

O Kristen was qu kalil, Abu Qotei wo Tamo Koba Yesus Kristus wo naŋgi aiyel na nuŋgo are latetŋgebe. Osib niŋgi aqaryaiŋgibqa niŋgi naŋgi aiyel qa nuŋgo areqalo siŋgilatoqnsib qalaqalaiyo kumbra dauryoqniye.

1 Tesalonaika 5:5

Niŋgi kalil puloŋ aqa aŋgro. Niŋgi suwaŋ aqa aŋgro. Iga qolo qaji tamo sai. Iga ambru qaji tamo sai dego.

2 Tesalonaika 2:16

Gago Tamo Koba Yesus Kristus wo gago Abu Qotei wo naŋgi aiyel na iga tulaŋ qalaqalaigeqnub. Qotei a iga qa are boleiyoqnsiq deqa a gaigai gago are boletetgeqnu. Osiqa a na iga siŋgilatgeqnu. Deqa mondoŋ a na iga boletgwajqa deqa iga tariŋoqnsim unum.

Hibru 6:19

Iŋgi bole bole Qotei na iga tariŋqa mareqnu qaji di iga tariŋesosim oqom. Iga deqa are qaloqnsim dena gago are miligi tulaŋ siŋgilatejunum. Gam dena iga Warum Tulaŋ Getento Koba gara gaiŋejunu qaji di torei miligiq giloqnqom.

1 Pita 1:13

Deqa niŋgi gaigai ijo anjam di dauryqajqa are qaloqnsib nuŋgo walwel geregere taqatosib soqniye. Sosib Yesus Kristus qa nuŋgo areqalo siŋgilatoqnsibqa mondoŋ a olo laŋ qureq dena brantosim kumbra tulaŋ boledamu niŋgi eŋgwajqa deqa tariŋoqnsib soqniye.

1 Pita 2:9

Ariya Qotei na niŋgi giltŋgej deqa niŋgi aqa segi tamo uŋgasari tiŋtiŋ unub. Niŋgi aqa atra tamo dego sosib a ombla mandor kokba tigelejunub. Osib niŋgi aqa segi kumbra boleq di sosib walweleqnub. Niŋgi aqa segi tamo sqa marsiq giltŋgej deqa niŋgi aqa kumbra bole kalil deqa mare mare laqnub. Nami niŋgi ambruq di soqneb deqa Qotei na niŋgi metŋgonaqa niŋgi ambru uratosib suwaŋoq beleŋeb. Suwaŋ di tulaŋ bolequja.

1 Jon 1:7

Qotei a suwaŋoq di unu dego kere iga dego suwaŋoq di walwelqom di iga Qotei aqa tamo uŋgasari kalil naŋgi ti areqalo qujaitosim sqom. Soqnimqa Qotei aqa Ŋiri Yesus aqa leŋ aiej qaji dena gago une kalil kobotetgoqnimqa iga aqa ŋamgalaq di tamo bole une saiqoji sqom.