1 Tesalonaika 5:2 - Yesus Aqa Anjam Bole

² Niŋgi segi qalie, Tamo Koba Yesus bqajqa bati di bajiŋ tamo bul brantqas. Bajiŋ tamo naŋgi qolo beqnub dego kere Yesus bqajqa bati di lumu bosim tamo naŋgi pruqtnjrqas.

1 Tesalonaika 5:2 ပူးပေါင်းရင်းမြစ်များ

Matyu 25:13

Yesus a na aqa aŋgro naŋgi yawo anjam degsi minjrsiqa olo minjrej, “Dego kere niŋgi geregere ŋam atsib soqniye. Di kiyaqa? Ijo bqajqa bati niŋgi qaliesai deqa.”

Luk 21:34

Osiqa Yesus a olo anjam endegsi minjrej, “Niŋgi geregere ŋam atsib soqniye. Niŋgi ya uge uyoqnsib nanarioqnqajqa are prugŋgoqnaiq. Nuŋgo segi jejamu qa iŋgi iŋgi qa areqalo kobaiyoqnaib. Niŋgi kumbra uge kalil deqaji yoqnibqa e urur mandamq aisiy niŋgi pruqtŋgo uge.

1 Korin 1:8

Yesus Kristus a na niŋgi siŋgilatŋgoqnqas deqa niŋgi siŋgila na tigelesosib gilsib gilsib diŋo bati itqab. Yimqa gago Tamo Koba Yesus Kristus a olo laŋ qureq na brantimqa bati deqa niŋgi Qotei aqa ŋamgalaq di une saiqoji sqab.

1 Tesalonaika 5:4

Ariya was qu, niŋgi ambruq di sosai deqa bati di bqas dena niŋgi pruqtŋgwasai. Bajiŋ tamo naŋgi boqnsib tamo naŋgi pruqtnjreqnub dego kere bati di bqas dena niŋgi pruqtŋgwasai.

2 Tesalonaika 2:2

Tamo qudei naŋgi gisaŋoqnsib endegsib merŋgeqnub, “Tamo Koba Yesus a olo bqajqa bati brantqo.” Osib tamo qudei naŋgi endegsib mareqnub, “Qotei aqa Mondor na degsi babtosiq iga mergwo.” Olo tamo qudei naŋgi mareqnub, “Gago anjam di Qotei aqa anjam.” Olo tamo qudei naŋgi mareqnub, “Pol aqa wau qujai naŋgi ti anjam di neŋgreŋyonab iga sisiyem.” O was qu, naŋgo anjam di gisaŋ. Deqa niŋgi naŋgo anjam di qusibqa niŋgi urur prugugetosib are gulubeiŋgaiq.

2 Pita 3:10

Ariya diŋo bati brantimqa Tamo Koba Yesus a bajiŋ tamo bul urur boqujatqas. Bamqa bati deqa laŋ a poŋosim koboqas. Iŋgi iŋgi kalil dego ŋamyuo na tulaŋ kaŋkaŋam yusib koboqab. Deqa mandam ti aqa iŋgi iŋgi ti kalil olo bunu sqasai.

Uli Anjam 16:15

Onaqa Yesus a marej, “Niŋgi quiye. E bajiŋ tamo bul niŋgi qa boqujatqai. Deqa tamo bei a ŋam sosim aqa gara tigsim sqas di a areboleboleiyqas. Di kiyaqa? A yosi laqasai. Deqa tamo uŋgasari naŋgi aqa jemai unqasai.”

Uli Anjam 3:3

Anjam bole ni nami qusim dauryem qaji deqa olo are qale. Are qalsim anjam di geregere dauryosim are bulye. Ni ŋam sirosim tigelqasai di e bajiŋ tamo bul ni qa boqujatqai. Bati gembu e inoq bqai di ni qalieqa keresai.