1 Tesalonaika 5:15 - Yesus Aqa Anjam Bole

¹⁵ Ariya tamo qudei naŋgi na niŋgi kumbra uge eŋgibqa niŋgi na kamba olo naŋgi kumbra uge enjraib. Niŋgi gaigai siŋgilaoqnsib Qotei aqa tamo uŋgasari naŋgi ti tamo uŋgasari kalil naŋgi ti kumbra bole bole enjroqniye.

1 Tesalonaika 5:15 ပူးပေါင်းရင်းမြစ်များ

Matyu 5:39

Ariya e na dal anjam di buŋyosiy niŋgi endegsi merŋgwai. Tamo bei na ni kumbra uge emimqa ni kamba kumbra uge yaim. Tamo bei na ula poŋmimqa belosim waliŋe bei osoryimqa poŋyem.

Luk 6:35

Deqa niŋgi ijo anjam endi quiye. Tamo qudei naŋgi na niŋgi jeutŋgoqnibqa niŋgi na kamba naŋgi jeutnjraib. Niŋgi naŋgi qa olo boleoqnsib naŋgi gereinjroqniye. Osib iŋgi bole bole enjroqnsib naŋgi na kamba olo eŋgwajqa minjroqnaib. Niŋgi kumbra degyqab di niŋgi Qotei laŋ goge di unu qaji aqa aŋgro bole sqab. Sosibqa awai tulaŋ boledamu oqab. Niŋgi qalie, tamo qudei naŋgi Qotei biŋiyosaieqnub. Tamo qudei naŋgi kumbra uge uge yeqnub. Ariya tamo naŋgi di Qotei na kamba kumbra uge uge enjrosaieqnu. A na olo naŋgi kumbra bole bole enjreqnu. Deqa niŋgi dego Qotei aqa kumbra di dauryosib tamo bole ti tamo uge ti naŋgi turtnjroqnsib kumbra bole bole enjroqniye. Niŋgi kumbra degyqab di niŋgi Qotei aqa aŋgro bole sqab.

Rom 12:9

O was qu, niŋgi na tamo uŋgasari naŋgi bole qalaqalainjroqniye. Niŋgi gisaŋ na naŋgi qalaqalainjraib. Niŋgi kumbra uge kalil torei uratosib kumbra bole segi beteryosib yoqniye.

Rom 14:19

Deqa iga kalil lawo na sqajqa ti gago Kristen was naŋgo are siŋgilatetnjrqajqa ti deqa are qaloqnsim wauoqnqom.

1 Korin 14:1

Deqa was qu, niŋgi gaigai qalaqalaiyo kumbra dauryosib soqniye. Sosib wau kalil Qotei aqa Mondor na niŋgi eŋgeqnu qaji di dego yqajqa tulaŋ siŋgilaoqniye. Wau boledamu bei agiende. Qotei aqa Mondor na niŋgi siŋgila eŋgimqa niŋgi Qotei aqa medabu oqnsib anjam palontoqniye. Osib wau di yqajqa tulaŋ siŋgilaoqniye.

1 Korin 16:10

Ariya Timoti a niŋgi qa bamqa niŋgi a osib geregereiyiye. Yim a ulaqasai. A niŋgi koba na are lawo na sqas. Niŋgi quiye. Timoti a e ombla wau qujai. Aqo aiyel Tamo Koba Yesus aqa wau ojeqnum.

1 Korin 6:7

Niŋgi nuŋgo Kristen was naŋgi qa anjam soqnim naŋgi oqnsib anjam pegiyo tamo naŋgi qa gileqnub nuŋgo kumbra di uge. Nuŋgo kumbra dena niŋgi Kristus aqa kumbra dauryqajqa olo uratoqnsib uloŋeqnub. Niŋgi nuŋgo Kristen was bei qa anjam soqnim, uŋgum, niŋgi a uratib une eŋgem. Niŋgi a uratib nuŋgo iŋgi iŋgi bajiŋem.

Galesia 6:10

Deqa bati soqnimqa iga na tamo kalil naŋgi kumbra bole bole enjroqnqom. Ariya iga na olo Kristus aqa tamo uŋgasari naŋgi kumbra tulaŋ boledamu enjrqajqa siŋgilaoqnqom.

Efesus 5:15

Deqa was qu, niŋgi nuŋgo segi walwel gereiyosib soqniye. Niŋgi nanari tamo bulosib walwelaib. Niŋgi powo ti sosib walweloqniye.

Efesus 5:33

Ariya anjam di Kristus a niŋgi tamo qa dego marej. Niŋgi nuŋgo segi jejamu qalaqalaiyeqnub dego kere niŋgi na nuŋgo uŋgasari naŋgi dego qalaqalainjroqniye. Ariya uŋgasari, niŋgi kamba dego nuŋgo tamo naŋgo sorgomq di geregere sosib naŋgi kumbra bole enjroqniye.

1 Tesalonaika 2:12

Iga na nuŋgo areqalo tigeltetŋgosim nuŋgo are miligi siŋgilatetŋgwajqa deqa osim anjam merŋgoqnem. Osim niŋgi anjam endegsi merŋgoqnem, “Niŋgi Qotei aqa kumbra keretosib walweloqniye. Qotei agi a na niŋgi endegsi metŋgej, ‘Niŋgi ijoq babqa e nuŋgo Mandor Koba sosiy niŋgi taqatŋgosiy joqsiy laŋ qureq oqitqa dia niŋgi so bole gaigai sqab.’”

1 Tesalonaika 5:21

Anjam kalil niŋgi queqnub qaji di niŋgi geregere quoqnsib tenemtoqnsib pegiyoqniye. Osib kumbra kalil dego pegiyoqnsib kumbra bole segi siŋgilatosib ojesoqniye.

1 Timoti 6:11

Ariya Timoti, ni Qotei aqa tamo deqa ni kumbra uge kalil deqaji torei qoreiyosim taqat ate. Osim ni kumbra tiŋtiŋ yoqnsim Qotei aqa kumbra dauryoqnsim a qa ino areqalo siŋgilatoqnsim tamo naŋgi qalaqalainjroqne. Osim ni gulube kalil qa siŋgila na tigeloqnsim tamo uŋgasari naŋgi lawo kumbra enjroqne.

2 Timoti 2:24

Ni na Tamo Koba Qotei aqa wau tamo naŋgi minjrimqa naŋgi anjam na qotoqnsib ŋiriŋoqnaib. Naŋgi na tamo kalil naŋgi kumbra bole enjroqnebe. Tamo qudei naŋgi na bosib naŋgi gulube enjribqa naŋgi deqa ŋiriŋaib. Naŋgi kamba olo Qotei aqa kumbra bole naŋgi osornjroqnebe.

Taitus 3:2

Niŋgi tamo qudei naŋgi misiliŋ anjam minjroqnaib. Osib anjam na qotoqnaib. Gaigai lawo na sosib tamo uŋgasari kalil naŋgi kumbra bole enjroqniye.” O Taitus, ni na tamo uŋgasari naŋgi anjam degsim minjroqne.

Hibru 12:14

Niŋgi tamo kalil naŋgi ti koba na geregere lawo na sqajqa wauoqniye. Ariya kumbra bei dego niŋgi dauryiye. Kumbra agiende. Niŋgi nuŋgo segi jejamu Qotei yekritosib aqa segi kumbra boleq di sosib dauryoqniye. Tamo a Qotei aqa kumbra ti sqasai di a Tamo Koba Qotei unqa keresai.

1 Pita 1:22

Niŋgi nami Qotei aqa anjam bole dauryoqneb. Kumbra dena niŋgi Qotei aqa ŋamgalaq di tamo bole une saiqoji soqneb. Utru deqa bini niŋgi na Qotei aqa tamo uŋgasari naŋgi tulaŋ qalaqalainjreqnub. Ariya kumbra di niŋgi olo torei siŋgilatosib nuŋgo Kristen was naŋgi siŋgila na qalaqalainjroqniye.

1 Pita 2:17

Osib niŋgi tamo kalil naŋgi kumbra bole enjroqniye. Osib Qotei aqa tamo uŋgasari naŋgi qalaqala-injroqniye. Niŋgi Qotei ulaiyoqnsib aqa sorgomq di soqniye. Sosib mandor kokba naŋgo ñam soqtoqniye.

1 Pita 3:9

Ariya tamo qudei naŋgi na niŋgi kumbra uge eŋgibqa niŋgi na kamba naŋgi kumbra uge enjraib. Naŋgi na niŋgi misiliŋgoqnsib anjam uge merŋgibqa niŋgi na kamba anjam uge minjraib. Niŋgi kamba naŋgi qa oqnsib Qotei pailyoqniye. Qotei a niŋgi kumbra degyqa osiqa niŋgi metŋgej. Deqa niŋgi kumbra bole degyibqa Qotei a na kamba niŋgi kumbra bole eŋgoqnqas.

3 Jon 1:11

O ijo was bole Gaius, ni kumbra uge dauryaim. Ni kumbra bole segi daurye. Tamo a kumbra bole yqas di a Qotei aqa tamo sqas. Ariya tamo naŋgi kumbra uge uge yeqnub qaji naŋgi Qotei unqa keresai.

Uli Anjam 19:10

Laŋ aŋgro na e degsi merbonaqa e aqa areq di siŋga pulutosim a biŋiyqa laqnamqa a na merbej, “Ni e biŋibaim! E ni bul. E ni ti tamo kalil Yesus aqa anjam qa naŋgo areqalo siŋgilateqnub qaji naŋgi ti iga koba na wau qujai. Iga kalil was. Deqa ni Qotei segi biŋi-yoqnime. Iga qalie, Qotei aqa Mondor a na qujai Qotei aqa medabu o qaji tamo naŋgi qariŋnjreqnaqa naŋgi Qotei aqa anjam marsib laqnub. Deqa naŋgi Yesus aqa ñam dego marsib laqnub.”

Uli Anjam 22:9

“Ni e biŋibaim! E ni bul. E ni ti ino was naŋgi ti Qotei aqa medabu o qaji tamo naŋgi ti iga koba na wau qujai. Tamo kalil anjam ni buk endia neŋgreŋyonum di dauryeqnub qaji naŋgi dego iga ti koba na wau qujai. Deqa ni Qotei segi biŋiyoqnime.”