1 Tesalonaika 4:6 - Yesus Aqa Anjam Bole

⁶ Niŋgi na Kristen was qu naŋgi kumbra uge bei enjraib. Osib naŋgi gisaŋnjrsib naŋgo ŋauŋ ugetnjraib. Tamo Koba Qotei a na tamo naŋgi kumbra deqaji yeqnub qaji naŋgi awai uge enjrqas. Iga nami niŋgi siŋgila na degsi merŋgoqnem.

1 Tesalonaika 4:6 ပူးပေါင်းရင်းမြစ်များ

Mak 10:19

Ariya ni Qotei aqa dal anjam qalie unum. ‘Ni tamo bei qalsim moiotaim. Ni tamo bei aqa uŋa jejamu ojetaim. Ni bajiŋaim. Ni tamo bei aqa jejamu laŋa gisaŋyaim. Ni was bei aqa iŋgi bei laŋa gisaŋ na yaiyaim. Ni ino ai wo abu wo naŋgo sorgomq di geregere sosimqa naŋgo anjam dauryoqne.’”

Luk 12:5

Tamo niŋgi ulaiyqab qaji agi deqa merŋgwai. Qotei a segi nuŋgo jejamu moiotosim bunuqna nuŋgo qunuŋ dego ŋamyuoq waiyqa kere. Deqa niŋgi a segi ulaiyiye.

Rom 1:18

Iga qalie, Qotei a laŋ goge di sosiqa aqa minjiŋ boleq ateqnu. A na tamo uŋgasari a qoreiyoqnsib kumbra uge uge yeqnub qaji naŋgi awai uge enjreqnu. Naŋgo kumbra uge dena naŋgi Qotei aqa anjam bole olo tenteqnub.

Rom 12:19

O ijo was bole, tamo qudei naŋgi na niŋgi gulube eŋgibqa niŋgi na kamba naŋgi gulube enjraib. Uratosib Qotei aqa baŋq di naŋgi atib a segi naŋgi qa minjiŋ oqim gulube enjrqas. Agi Tamo Koba Qotei aqa anjam bei nami endegsib neŋgreŋyeb unu, “Une kambatqajqa wau di ijo segi wau. E segi na tamo naŋgo une qa naŋgi kambatnjrqai.

Rom 13:4

Sawa taqato qaji mandor kokba naŋgi Qotei aqa wau tamo bul. Naŋgo wau qujai agi naŋgi na niŋgi aqaryaiŋgoqnsib geregereiŋgeqnub. Ariya niŋgi kumbra uge uge yoqnqab di niŋgi naŋgi qa ulaqab. Niŋgi qalie, sawa taqato qaji mandor kokba naŋgi sebru ojejunub. Naŋgi sebru laŋa ojosai. Naŋgi Qotei aqa wau tamo unub deqa naŋgi na tamo uŋgasari kumbra uge uge yeqnub qaji naŋgi sebru dena awai uge enjreqnub.

2 Korin 7:11

Niŋgi geregere are qaliye. Are gulube Qotei na niŋgi eŋgej qaji dena niŋgi siŋgilatŋgej deqa niŋgi are bulyosib agi kumbra bole bole yeqnub. Are gulube dena Qotei na nuŋgo are tigeltetŋgonaqa niŋgi nuŋgo une gereiyosib tamo qujai une yej qaji di a ŋiriŋteb. Osib niŋgi Qotei ulaiyosib aqa sorgomq di soqneb. Qotei na nuŋgo are tigeltetŋgej deqa niŋgi iga qa are koba qaleqnub. Osib niŋgi tamo qujai une yej qaji di aqa une olo gereiyetqa dego are qaleqnub. Niŋgi segi na nuŋgo une di gereiyqajqa are qaleqnub. Nuŋgo kumbra dena iga qalieonum, bole, niŋgi une saiqoji.

Galesia 5:21

ya uysib nanarioqa, alaŋkobaoqa. Areqalo namij aqa kumbra agide. E nami merŋgem agi olo merŋgwai. Tamo kalil kumbra uge deqaji yeqnub qaji naŋgi Qotei na osim taqatnjrqasai. Osim a naŋgo Mandor Koba sqasai dego.

Efesus 4:17

Deqa e Tamo Koba Yesus aqa ñam na niŋgi siŋgila na endegsi merŋgwai. Niŋgi sawa bei bei qaji tamo naŋgo kumbra uge uge olo dauryosib walwelaib. Di kiyaqa? Naŋgo areqalo tulaŋ niñaqejunu deqa.

Efesus 4:28

Bajiŋ tamo naŋgi olo bajiŋaib. Naŋgi naŋgo segi baŋ na wauoqnsib dena iŋgi iŋgi oqnsib tamo iŋgi qa truqueqnub qaji naŋgi aqaryainjroqnebe.

Efesus 5:6

Niŋgi geregere ŋam atiye. Tamo qudei naŋgi na niŋgi kumbra uge deqaji yqajqa titŋgoqnsib anjam laŋa laŋa merŋgoqnibqa niŋgi naŋgo anjam di qusib naŋgi daurnjraib. Tamo uŋgasari Qotei aqa anjam gotraŋyeqnub qaji naŋgi kumbra deqaji yeqnub deqa Qotei a naŋgi qa tulaŋ minjiŋ oqeteqnu.

1 Tesalonaika 2:11

Niŋgi qalie, abu naŋgi na naŋgo aŋgro naŋgi tingitnjroqnsib dalnjreqnub dego kere iga na niŋgi dego tingitŋgoqnsim dalŋgoqnem.

2 Tesalonaika 1:8

Ariya Yesus a mandamq aisim tamo naŋgi Qotei qaliesai qaji naŋgi ti tamo naŋgi gago Tamo Koba Yesus aqa anjam bole dauryqa urateqnub qaji naŋgi ti ŋolawotnjrqas.

Hibru 13:4

Tamo a uŋatqajqa di kumbra bole. Uŋa a tamotqajqa di dego kumbra bole. Deqa niŋgi kumbra di ugetaib. Niŋgi kumbra di geregere taqatosib dena niŋgi Qotei aqa ŋamgalaq di jiga saiqoji sqab. Niŋgi qalie, tamo uŋgasari sambala kumbra yeqnub qaji naŋgi Qotei na awai uge enjrqas.

Hibru 2:6

Ariya Qotei aqa anjam mutu bei tamo bei na nami endegsi neŋgreŋyej unu, “O Qotei, ni kiyaqa tamo naŋgi qa are qaleqnum? Osim naŋgi qa duloqnsim aqaryainjreqnum?

Jems 2:6

O was qu, nuŋgo kumbra di uge. Niŋgi na tamo iŋgi iŋgi saiqoji unub qaji naŋgo ñam aguq ateqnub. Niŋgi are qaliye. Tamo yai naŋgi na niŋgi ugeugeiŋgoqnsib nuŋgo jejamuq di une eŋgoqnsib niŋgi joqoqnsib anjam pegiyo tamo naŋgo ulatamuq dia niŋgi tigeltŋgeqnub? Tamo silali koba ti unub qaji naŋgi segi na kumbra di yeqnub.

Jems 5:4

Niŋgi quiye. Nuŋgo wau tamo naŋgi nuŋgo wau miligiq dena iŋgi meli gentosib nuŋgo baŋq di ateqnab niŋgi na kamba olo naŋgi gisaŋnjroqnsib awai oto nuŋgo segi qa getentoqnsib oto segi naŋgi enjreqnub. Deqa naŋgi endegsib Qotei pailyeqnub, “O Tamo Koba Qotei, naŋgi iga kumbra uge degsib egeqnub deqa ni na kamba naŋgi awai uge enjrime.” Yeqnaqa Qotei siŋgila koba ti unu qaji a naŋgo pail di queqnu.