1 Tesalonaika 4:13 - Yesus Aqa Anjam Bole

¹³ Ariya was qu, tamo uŋgasari nami moreŋeb qaji naŋgi mondoŋ kumbra kie turqab di niŋgi qalieqajqa deqa merŋgwom. Tamo uŋgasari Qotei qaliesai qaji naŋgi subq na tigelqa bati qa tariŋosaieqnub. Deqa naŋgo was bei a moiqas di naŋgi tulaŋ are ugeinjrqas. Ariya niŋgi degsib tulaŋ are ugeiŋgaim deqa anjam endi merŋgwom.

1 Tesalonaika 4:13 ပူးပေါင်းရင်းမြစ်များ

Matyu 27:52

Onaqa bati deqa Qotei aqa segi tamo uŋgasari gargekoba nami moreŋeb qaji naŋgo sub waqeleŋonabqa naŋgi olo subq na tigeleb. Ariya bunuqna Yesus a dego subq na tigelonaqa tamo uŋgasari naŋgi di Qotei aqa qure koba miligiq gilnabqa tamo uŋgasari gargekoba naŋgi na unjreb.

Jon 11:24

Onaqa Marta na kamba minjej, “E qalie, diŋo batiamqa tamo uŋgasari kalil naŋgi subq na tigelabqa ijo jaja dego ombla tigelqab.”

Aposel 13:36

Niŋgi qalie, Devit a mandor koba sosiqa Qotei aqa areqalo dauryoqnsiqa Israel tamo uŋgasari naŋgi geregere taqatnjroqnej. Bunuqna a moinaqa aqa jejamu osib subq ateb. Aqa moma naŋgi nami subq ateleŋeb a degsib subq ateb. Onaqa aqa jejamu subq di qusaej.

Aposel 7:60

Degsi pailyosiqa siŋga tombol na awoosiq tulaŋ koba maosiq marej, “O Tamo Koba Yesus, naŋgi e lubonub naŋgo une deqa marsim kambatnjraime. Naŋgo une di kobotetnjrime.” A degsi pailyosiqa moiej.

Rom 1:13

O was qu, niŋgi endegsib qalieoiye. Bati gargekoba e bosiy niŋgi nuŋgwajqa are qaleqnum. Ijo areqalo agiende. Tamo uŋgasari sawa bei beiq di unub qaji naŋgo ambleq dia e waueqnamqa naŋgi are bulyoqnsib Yesus qa naŋgo areqalo siŋgilateqnub dego kere nuŋgo ambleq dia dego wauoqnitqa niŋgi qudei are bulyoqnsib Yesus qa nuŋgo areqalo siŋgilatoqnqab. Ariya wau gargekoba na gam getentetbeqnu deqa agi unum.

1 Korin 10:1

O was qu, niŋgi ijo anjam endeqa geregere poiŋgem. Nami Moses aqa bati qa gago moma kalil naŋgi wadau sawaq di sonabqa Qotei a laŋbi na naŋgi gam osornjroqnej. Bati di naŋgi Yuwal Lent di gentosib mandam boleq aisib walwelosib gileb.

1 Korin 12:1

Ariya was qu, Qotei aqa Mondor a na iga siŋgila segi segi egeqnaqa iga wau ojeqnum. E deqa niŋgi merŋgit quiye.

1 Korin 15:6

Osiqa bunuqna bati qujai qa a Kristen tamo 500 naŋgoq di dego brantonaq uneb. Naŋgi gargekoba bini unub. Ariya naŋgi qudei moreŋeb.

2 Korin 1:8

O was qu, iga Esia sawaq di sosimqa gulube kobaquja item. Gulube dena iga ugeugeigosiqa gago siŋgila tulaŋ buŋyej. Deqa iga endegsi are qalem, gulube dena iga moiotgwas. O was qu, niŋgi di qalieqajqa deqa e anjam endi neŋgreŋyonum.

Efesus 2:12

bati deqa niŋgi Kristus aqaq di sosai. Niŋgi isaq di soqneb. Niŋgi Israel tamo uŋgasari naŋgi ti sosai dego. Qotei na Israel naŋgi iŋgi bole bole enjrqa minjrsiqa aqa anjam di siŋgilatosiq soqnej. Ariya anjam di a na niŋgi merŋgosai. Deqa iŋgi bole bole mondoŋ brantqas qaji deqa niŋgi tariŋosaioqneb. Niŋgi mandamq endia laŋa Qotei qaliesai soqneb.

Efesus 2:3

Nami iga kalil dego tamo naŋgi di koba na laqnem deqa iga gago areqalo namij dauryoqnem. Iga gago jejamu qa areqalo uge uge dauryosim laqnem deqa Qotei aqa minjiŋ tamo uge uge naŋgoq di unu qaji di gagoq di dego soqnej.

1 Tesalonaika 4:14

Yesus a moisiqa olo subq na tigelej anjam di iga gago areqaloq di siŋgilatejunum. Deqa iga qalieonum, mondoŋ Qotei a Yesus aqa siŋgila na Kristen tamo uŋgasari nami moreŋeb qaji naŋgi olo subq na tigeltnjrqas. Yimqa naŋgi Yesus dauryosib koba na olo mandamq aiqab.

1 Tesalonaika 4:15

Iga Tamo Koba Yesus aqa anjam niŋgi endegsi merŋgwom. Mondoŋ Tamo Koba Yesus a olo mandamq aioqnimqa iga tamo uŋgasari mandamq endia ŋambile unum qaji iga na tamo uŋgasari nami moreŋeb qaji naŋgi buŋnjrsim namo oqsim Yesus itqasai.

1 Tesalonaika 5:10

Yesus a iga qa moiej deqa iga ŋambile sqom kio iga moiqom kio di uŋgum. Iga Yesus koba na ŋambile gaigai sqom.

1 Tesalonaika 5:6

Deqa iga tamo naŋgi ŋereŋo ani naŋgi bul sqasai. Iga ŋam atoqnsim areqalo bole ti sqom.

2 Pita 3:4

“Qotei a nami marej, ‘Mondoŋ Kristus a olo bqas.’ Ariya a qabi unu? A bqa keresai. Niŋgi uniye. Gago moma utru naŋgi nami moreŋoqneb bosi bosiq agi bini iga degsi unum. Qotei a nami mandam atej agi bini mandam a degsi unu. Deqa Kristus a olo bqa keresai.”

2 Pita 3:8

O ijo was bole, niŋgi ijo anjam bei endi geregere qusib olo are walŋgaiq. Qotei aqa areqalo agiende. Bati qujai a wausau 1,000 dego kere. Wausau 1,000 a bati qujai dego kere. Bati qujai ti wausau 1,000 ti naŋgi ombla kerekere. Qotei aqa areqalo agide.