1 Tesalonaika 3:3 - Yesus Aqa Anjam Bole

³ Yimqa gulube ti jaqatiŋ ti niŋgi eqnub qaji dena nuŋgo areqalo olo ugetetŋgaim deqa. Niŋgi qalie, Qotei a nami iga gulube deqaji oqajqa marsiq giltgej.

1 Tesalonaika 3:3 ပူးပေါင်းရင်းမြစ်များ

Luk 21:12

“Ariya kumbra kalil di brantosaisoqnibqa namoqna tamo qudei naŋgi na bosib niŋgi jeutŋgoqnsib ugeugeiŋgoqnsib ojeleŋoqnqab. Ojeleŋoqnsib Juda gate kokba naŋgo ulatamuq dia niŋgi tigeltŋgoqnibqa naŋgi na nuŋgo jejamuq di anjam gargekoba qametŋgoqnsib niŋgi tonto talq di breiŋgoqnqab. Niŋgi ijo ñam ejunub deqa naŋgi na niŋgi joqsib Rom naŋgo mandor kokba ti naŋgo gate kokba ti naŋgo ulatamuq dia niŋgi tigeltŋgoqnqab.

Jon 16:2

Juda tamo kokba naŋgi na niŋgi taqal waiŋgosib niŋgi olo Qotei tal miligiq gilqa saidŋgwab. Yimqa bunuqna bati bei bamqa tamo naŋgi niŋgi liŋgoqnsib moiotŋgeqnub qaji naŋgi endegsib are qalqab, ‘Iga Qotei aqa wau bole yeqnum.’

Jon 16:33

Niŋgi na e beterbosib are lawo na sqajqa deqa e na anjam endi niŋgi merŋgonum. Niŋgi mandamq endia sosib niŋgi gulube koba oqnqab. Deqa uŋgum. Niŋgi are siŋgilatiye. E segi na mandam endeqa siŋgila kalil gotraŋyosim tigelejunum.”

Aposel 14:22

Naŋgi aiyel degsib giloqnsibqa tamo uŋgasari Yesus dauryoqneb qaji naŋgo are siŋgilatetnjroqnsib minjroqneb, “Niŋgi Yesus qa nuŋgo areqalo siŋgilatosib soqniye. Bole, niŋgi gulube gargekoba iteleŋoqnqab. Di uŋgum. Gulube nuŋgoq boqnibqa Qotei a nuŋgo Mandor Koba sosim niŋgi taqatŋgoqnqas.”

Aposel 2:25

Agi Devit a nami Yesus qa endegsi marej, ‘Ijo Tamo Koba a bati gaigai ijo ulatamuq di sonaq uneqnum. A ijo baŋ woq di unu deqa e padalqasai.

Aposel 21:11

Bosiqa Pol aqa alalag yaiyosiqa qombilgej. Qombil aqa utru agiende. Agabus na Pol aqa alalag osiq aqa segi baŋ ti siŋga ti alalag dena qosej. Osiqa mergej, “Qotei aqa Mondor na e endegsi merbqo, ‘Jerusalem qureq dia Juda naŋgi na tamo alalag endi tigeqnu qaji aqa siŋga ti baŋ ti endegsib qosqab. Osib tamo di osi gilsib sawa bei bei qaji tamo naŋgo baŋq di atibqa naŋgi na a ugeugeiyqab.’” Dena qombil osorgej.

Aposel 21:13

Onaqa Pol na iga mergej, “Niŋgi kiyaqa akamoqnsib are gulubetetbeqnub? E Tamo Koba Yesus aqa ñam qa tonto talq waibqab di kere. Aqa ñam qa e lubib moiqai di dego kere. E gulube di uratqasai. E itqai.”

Aposel 9:16

A ijo ñam qa gulube gargekoba itoqnqas. Gulube di e na osoryoqnitqa itoqnqas.”

Rom 5:3

Ariya iga deqa segi areboleboleigosai. Iga gulube oqnsim unum deqa ti areboleboleigeqnu. Di kiyaqa? Iga qalieonum, gulube dena gago are siŋgilatetgeqnaqa iga siŋgila na tigeleqnum.

1 Korin 15:58

Deqa ijo was bole, niŋgi siŋgila na soqniye. Sosib niŋgi Tamo Koba Yesus qa waukobaoqniye. Niŋgi wau di urataib. Niŋgi qalie, niŋgi Tamo Koba Yesus aqa wau ojeqnub di uloŋqa keresai. Deqa niŋgi gaigai Tamo Koba Yesus aqa wau siŋgila na yoqniye.

1 Korin 4:9

E endegsi are qalonum. Iga Yesus aqa anjam maro tamo unum deqa Qotei na gago ñam tulaŋ aguq atej unu. Deqa iga tonto tamo bulonum. Tonto tamo naŋgi agi anjam pegiyo tamo naŋgi na une ti qa minjroqnsib tamo kalil ti laŋ aŋgro naŋgi ti naŋgo ŋamgalaq dia naŋgi ñumoqnsib moiotnjreqnub. O was qu, iga tamo naŋgi di bul.

Efesus 3:13

Deqa e niŋgi endegsi merŋgwai. E niŋgi aqaryaiŋgoqnsim dena e gulube koba eqnum niŋgi deqa are koba qalaib. Niŋgi are koba qalqab di niŋgi uloŋqab. Deqa niŋgi ijo gulube deqa areboleboleiŋgem. Di kiyaqa? Ijo gulube dena niŋgi aqaryaiŋgimqa niŋgi Qotei ombla so bole gaigai sqab.

Filipai 1:28

E endegsi qalieqai. Niŋgi nuŋgo jeu tamo naŋgi qa ulaosaieqnub. Niŋgi siŋgila na Yesus aqa wau ojeqnub. Nuŋgo jeu tamo naŋgi nuŋgo kumbra di unsibqa naŋgi endegsib qalieqab, “Bole, iga padalqom.” Ariya niŋgi padalqasai. Qotei na niŋgi olo eleŋam niŋgi so bole gaigai sqab.

Kolosi 1:23

Ariya une bei na niŋgi titŋgimqa Kristus aqa anjam bole niŋgi nami queb qaji di nuŋgo areqaloq di olo siŋgilatqa urataib deqa niŋgi nuŋgo areqalo Yesus qa bole siŋgilatoqnsib siŋgila na tigelesoqniye. E Pol. E Yesus aqa wau tamo deqa e anjam bole di tamo uŋgasari kalil mandamq endi unub qaji naŋgi minjroqnsim laqnum.

1 Tesalonaika 5:9

Qotei na iga aqa minjiŋ turqajqa deqa giltgosai. Gago Tamo Koba Yesus Kristus a na iga oqajqa deqa marsiq giltgej.

2 Tesalonaika 1:4

Utru deqa iga qure kalilq di laqnsimqa tamo uŋgasari Qotei louqa koroeqnub qaji naŋgi niŋgi qa sainjroqnsim nuŋgo ñam soqteqnum. Kumbra uge kalil jeu tamo naŋgi na niŋgi eŋgeqnub qaji deqa ti gulube kalil niŋgi qa branteqnu qaji deqa ti iga na naŋgi sainjroqnsim endegsi minjreqnum, “Tesalonaika Kristen naŋgi Yesus qa naŋgo areqalo tulaŋ siŋgilatoqnsib deqa naŋgi gulube ti jaqatiŋ ti kalil di qoboiyoqnsib siŋgila na tigelejunub.”

2 Timoti 1:8

Deqa ni gago Tamo Koba Yesus aqa anjam marsim laqajqa jemaimaiq. E segi Yesus aqa anjam marsim laqnem deqa jeu tamo naŋgi na e ojsib tonto talq endia e waibeb unum. Deqa ni e qa dego jemaimaiq. Ni Qotei aqa siŋgila osim Yesus aqa anjam bole marsim laqne. Osim dena ni e ombla gulube oqnsim sqom.

1 Pita 2:21

Qotei a niŋgi kumbra degyqa osiqa niŋgi metŋgej. Di kiyaqa? Kristus a segi dego niŋgi aqaryaiŋgwa osiqa jaqatiŋ qoboiyosiq moiej. Niŋgi kamba aqa kumbra di dauryosib jaqatiŋ oqnsib sqajqa deqa are qalsiqa aqa kumbra di niŋgi osorŋgej.

Uli Anjam 2:10

Bunuqna ni jaqatiŋ koba oqam. Ni deqa ulaaim. Ni que. Satan a na niŋgi qudei ojeleŋosim tonto talq breiŋgwas. Breiŋgimqa niŋgi ijo ñam geregere ojqab kio ijo ñam uratosib uloŋqab kio di Satan a nuŋgo areqalo unsim qalieqajqa deqa niŋgi tonto talq breiŋgwas. Niŋgi bati 10-pela gulube ti jaqatiŋ ti sqab. Ariya niŋgi e qa nuŋgo areqalo siŋgilatosib soqniye. Sosib sosib gilsib jeu tamo naŋgi na niŋgi liŋgib moreŋqab. Amqa e na niŋgi ŋambile eŋgwai. Ŋambile di nuŋgo awai boledamu.

Uli Anjam 2:13

Qure ni di unum qaji naŋgo kumbra e geregere qalieonum. Qure di Satan a na taqatejunu. Aqa awo jaram koba qure dia unu. Ariya e qalie, ni ijo ñam siŋgila na ojesosim e qa ino areqalo siŋgilateqnum. Ino areqalo di ni na ulitosaieqnum. Nami ijo anjam palonto tamo Antipas a niŋgi koba na wauoqnej. Antipas a ijo anjam geregere dauryoqnej deqa jeu tamo naŋgi nuŋgo qureq dia a qalnab moiej. Moinaqa ni di unsimqa deqa ni e qoreibosai. Qure dia agi Satan a unu.