1 Tesalonaika 2:9 - Yesus Aqa Anjam Bole

⁹ O was qu, niŋgi qalie, iga niŋgi koba na sosim Qotei aqa anjam bole niŋgi merŋgoqnem bati deqa iga waukobaoqnem. Iga na niŋgi gulube eŋgwa uratosim deqa iga gago segi baŋ na qanam ti qolo ti tulaŋ siŋgila na wauoqnsim dena gago segi iŋgi iŋgi awaiyosim uyoqnem. Niŋgi na iga silali qa aqaryaigwajqa iga deqa merŋgosaioqnem.

1 Tesalonaika 2:9 ပူးပေါင်းရင်းမြစ်များ

Luk 18:7

Qusib are qaliye. Qotei a tamo bole. A tamo uge sai. Deqa aqa segi tamo uŋgasari nami giltnjrej qaji naŋgi qolo ti qanam ti pailyoqnqab di a naŋgo pail qusimqa tariŋsokobaiyqasai. A naŋgi urur aqaryainjrqas.

Luk 2:37

Aqa gumbuluŋ moinaqa a segi qobul soqnej. Aqa wausau kalil 84. A qobul sosiqa a bati gaigai qolo ti qanam ti atra tal miligiq giloqnsiqa iŋgi ti ya ti uratoqnsiqa Qotei pailyoqnej. A atra tal uratosaioqnej.

Aposel 18:3

Pol a naŋgi ti wau qujai. Deqa naŋgi koba na Korin qureq di sosibqa silali qa wauoqneb. Naŋgo silali wau agi naŋgi gara na tal gereiyoqneb.

Aposel 20:24

“Di uŋgum. E ijo segi jejamu qa are qalosaieqnum. Wau kalil Tamo Koba Yesus na ebej qaji di yosiy kobotqajqa are qaleqnum. Wau di endegsi unu. E siŋgila na Yesus aqa anjam bole tamo uŋgasari naŋgi minjre minjre laqnqai. Anjam bole di aqa damu agiende. Qotei a tamo uŋgasari naŋgi qa are boleiyoqnsiqa naŋgi eleŋeqnu.

Aposel 20:31

Deqa niŋgi geregere ŋam atsib sosibqa ijo kumbra e bati gaigai nuŋgo ambleq di yoqnem qaji deqa are qalsib dauryoqniye. Agi wausau qalub e niŋgi koba na sosimqa niŋgi padalaib deqa qolo ti qanam ti Qotei aqa anjam niŋgi merŋgoqnsim akamoqnem. E wau di uratosaioqnem. Niŋgi ijo kumbra deqa geregere are qalsib dauryoqniye.

Rom 1:1

E Pol. E Kristus Yesus aqa wau tamo. E aqa anjam maro tamo sqajqa deqa metbej. Osiqa e Qotei aqa anjam bole marsim laqajqa deqa giltbej.

Rom 15:16

E Kristus Yesus aqa wau tamo deqa e sawa bei bei qaji tamo naŋgo ambleq dia wauoqnsim Qotei aqa anjam bole naŋgi minjreqnum. E na naŋgi osiy Qotei aqaq dia atrainjrobulitqa a naŋgi eleŋqajqa deqa waueqnum. Qotei aqa Mondor na naŋgi siŋgilatnjrimqa naŋgi Qotei aqa segi tamo uŋgasari sosib kumbra bole yoqnqajqa deqa e naŋgi qa waueqnum.

1 Korin 4:12

Iga ŋes ti gago segi baŋ na ti wauoqnsim unum. Tamo qudei naŋgi na iga misiliŋgeqnub. Ariya iga kamba naŋgi qa olo pailyeqnum. Tamo qudei naŋgi na iga ugeugeigeqnab iga na kamba naŋgi ugeugeinjrosaieqnum. Iga medabu getentosim gulube di qoboiyeqnum.

1 Korin 9:15

Ariya e nuŋgoq dena awai oqa uratem. E nuŋgoq dena awai oqajqa are qalsim anjam endi neŋgreŋyosai. Tamo Koba Qotei a na e merbej, “Ni wau dena awai oqa kere.” Ariya e uratem. Degsi soqnim e moiqai. E ijo kumbra deqa tulaŋ areboleboleibeqnu. Deqa tamo bei na ijo kumbra di olo getentaiq.

1 Korin 9:18

Deqa e awai kie oqai? Ijo awai agiende. E Yesus aqa anjam bole maroqnsiy dena silali oqnqasai. Ijo awai bole agide. Bole, e silali oqa kere. Ariya e oqa uratem. E tamo uŋgasari naŋgi Qotei aqa anjam qa laŋa aqaryainjroqnqai. Ijo awai bole agide.

1 Korin 9:4

“Iga Yesus aqa wau ojeqnum dena iga awai osim gago segi iŋgi ti ya ti uyqa kere e?

2 Korin 11:27

E ŋes na ti jaqatiŋ na ti waukobaoqnem. Qolo gargekoba e waukobaoqnsim ŋeiosaioqnem. E mam ti laqnem. E ya qarboqnej. Bati gargekoba e iŋgi saiqoji soqnem. Bati gargekoba e yorbeqnaqa e ijo jejamu kabutqajqa gara saiqoji soqnem.

2 Korin 11:9

E nuŋgo ambleq di sosimqa e iŋgi iŋgi qa truquoqnsimqa e deqa tamo bei gulube yosaioqnem. Kristen was qudei Masedonia sawaq dena Korin qureq beleŋeb qaji naŋgi na e taqatbosib iŋgi iŋgi qa aqaryaiboqneb. E niŋgi gulube eŋgwajqa tulaŋ uratoqnem agi bini e degsim unum.

2 Korin 6:5

Gago jeu tamo naŋgi toqoŋ na iga lugoqnsib tonto talq di breigeqnub. Osib murqumyoqnsib iga qa anjam uge uge mareleŋeqnub. Iga gaigai ŋes na ti jaqatiŋ na ti waukobaeqnum. Iga geregere ŋeiosaieqnum. Iga bati gaigai mam ti laqnum.

Filipai 4:16

Agi e Tesalonaika qureq di sonamqa niŋgi e silali qa aqaryaiboqneb.

1 Tesalonaika 1:3

Niŋgi Kristus qa nuŋgo areqalo siŋgilateqnub deqa niŋgi kumbra bole bole yeqnub. Agi niŋgi na tamo kalil naŋgi tulaŋ qalaqalainjroqnsib naŋgi qa wau bole yeqnub. Mondoŋ gago Tamo Koba Yesus Kristus a olo bqas anjam di niŋgi nuŋgo are miligiq di siŋgilatoqnsib a qa tariŋeqnub. Iga nuŋgo kumbra deqa are qaloqnsim deqa iga nuŋgo ñam maroqnsim gago Abu Qotei biŋiyeqnum.

1 Tesalonaika 2:2

Niŋgi qalie, iga niŋgi qa bosaisosimqa bati deqa iga Filipai qureq di sonamqa tamo naŋgi na iga jaqatiŋ egoqnsib ugeugeigoqneb. Ariya bunuqna iga nuŋgo qureq bonamqa gago Qotei na iga are siŋgilatetgej deqa iga jeu tamo naŋgi deqa ulaosai. Iga siŋgila na tigeloqnsim Qotei aqa anjam bole niŋgi merŋgoqnem.

1 Tesalonaika 2:6

Iga wauoqnem di niŋgi ti tamo uŋgasari qudei ti na gago ñam soqtetgwajqa deqa iga wauosai.

1 Tesalonaika 3:10

Iga qanam ti qolo ti endegsi Qotei pailyeqnum, “O Abu, ni na iga odgimqa iga Tesalonaika Kristen naŋgi qa gilsim unjrqom. Unjrsim naŋgo areqalo Yesus qa siŋgilateqnub qaji di truquinjrimqa iga na olo siŋgilatetnjrqom.” Iga degsim Qotei pailyeqnum.

1 Timoti 1:11

Qotei aqa anjam di gisaŋ sai. Di Yesus aqa anjam bole Qotei na e marsiy laqajqa ebej qaji. Anjam bole di aqa utru agiende. Qotei a riaŋ koba ti siŋgila koba ti unu. Anjam di tulaŋ boledamu. Anjam di iga areboleboleigwajqa utru.

1 Timoti 4:10

Qotei agi ŋambile gaigai unu qaji a na tamo uŋgasari kalil naŋgi oqajqa waueqnu. Od, a na iga tamo uŋgasari a qa gago areqalo siŋgilateqnum qaji iga bole eleŋej koboqo. Mondoŋ a na iga joqsim laŋ qureq oqwas. Iga deq oqwajqa tariŋoqnsim a qa gago areqalo siŋgilate-junum. Utru deqa iga gaigai Qotei aqa wau siŋgila na ojeqnum.

1 Timoti 5:5

Ariya uŋa qobul qudei naŋgi aŋgro saiqoji unub. Naŋgi segi unub deqa naŋgi Qotei qa naŋgo areqalo siŋgilatoqnsib a na naŋgi geregereinjrqajqa deqa tariŋoqnsib qolo ti qanam ti pailyoqnsib unub.

2 Timoti 1:3

Ijo moma utru naŋgi nami kumbra tiŋtiŋ na Qotei aqa wau ojoqneb dego kere e bini kumbra qujai dena Qotei aqa wau ojeqnum. Ijo are miligiq di e qalieonum, e Qotei aqa ŋamgalaq di une bei saiqoji. E qolo ti qanam ti Qotei pailyoqnsim ni qa are qaloqnsim Qotei biŋiyeqnum.