1 Tesalonaika 2:4 - Yesus Aqa Anjam Bole

⁴ Qotei a segi gago are miligi peleiyoqnsiq une bei unosai deqa a na iga wau egsiqa mergej. “Niŋgi ijo anjam bole mare mare laqniye.” Deqa iga endegsi are qalosaioqnem, “Iga Qotei aqa anjam maroqnimqa tamo naŋgi na iga nugoqnsib gago ñam soqtetgoqnqab.” Iga degsi are qalosaioqnem. Gago areqalo agiende. Qotei a segi na gago are miligi peleiyoqnsim gago wau qa areboleboleiyoqnqajqa deqa are qalem.

1 Tesalonaika 2:4 ပူးပေါင်းရင်းမြစ်များ

Luk 12:42

Onaqa Tamo Koba Yesus na minjej, “Wau tamo yai a areqalo bole ti sosiqa gaigai wau bole yeqnu? Wau tamo di tal lanja a na minjeqnu, ‘Ni na ijo wau tamo kalil naŋgi geregere taqatnjroqnsimqa naŋgo iŋgi uyqajqa batioqnimqa iŋgi anainjroqnsim soqne.’ Tamo di a wau tamo bole. Deqa tal lanja na a degsi minjqas.

Luk 16:11

Niŋgi mandam qa ñoro geregere taqatqasai di laŋ qure qa ñoro dego niŋgi geregere taqatqa keresai. Deqa tamo yai na laŋ qure qa ñoro nuŋgo baŋq di atqas? Tamo dego bei sosai.

Jon 21:17

Osiqa olo nenemyoqalubtej, “O Saimon, Jon aqa ŋiri, ni e qalaqalaibeqnum e?” Yesus na Pita anjam di nenemyoqalubtej deqa Pita a are gulubeiyonaq minjej, “O Tamo Koba, ni iŋgi iŋgi kalil qa qalie. Deqa ni qalieonum, e ni qalaqalaimeqnum.” Onaqa Yesus na olo minjej, “Deqa ni na ijo kaja naŋgi geregereinjroqnime.

Rom 8:27

Qotei a tamo naŋgo are miligi unoqnsiq deqa a Mondor aqa areqalo dego qalieeqnu. Di kiyaqa? Mondor a Qotei aqa segi areqalo dauryosiq deqa aqa tamo uŋgasari naŋgi qa pailyeqnu.

1 Korin 7:25

Ariya e na tamo naŋgi uŋa ti sosai qaji naŋgi Tamo Koba Qotei aqa dal anjam bei minjrqasai. E ijo segi areqalo na naŋgi anjam bei endegsi minjrqai. Tamo Koba Qotei a e qa tulaŋ dulej deqa e qalieonum, ijo anjam endi bole.

1 Korin 9:17

E ijo segi areqalo na Yesus aqa anjam marsim laqnum qamu e dena awai eqnum qamu. Ariya e ijo segi areqalo na wau di yosaieqnum. Qotei na wau ebej deqa e wau di yoqnsim laqnum.

2 Korin 2:17

Ariya iga tamo gargekoba naŋgi bul sai. Agi tamo gargekoba naŋgi Qotei aqa anjam mareqnub di naŋgi silali oqajqa deqa osib waueqnub. Ariya iga degyosaieqnum. Qotei na iga wau egej deqa iga gisaŋ na wauosaieqnum. Iga Kristus koba na areqalo qujaitosim Qotei aqa ŋamgalaq di aqa anjam bole geregere marsim laqnum.

2 Korin 4:2

Kumbra uge uge kalil tamo naŋgi ulitosib yeqnub qaji di iga qoreiyeqnum. Iga gisaŋ kumbra na walwelosaieqnum. Iga Qotei aqa anjam bulbulyo-saieqnum. Iga boleq di anjam bole segi mareqnum. Yim tamo kalil naŋgi gago kumbra di unsib naŋgo are miligiq di qalieqab, bole, iga Qotei aqa ŋamgalaq di wau bole yeqnum.

2 Korin 5:11

Ariya iga Tamo Koba Yesus qa ulaoqnsim aqa sorgomq di unum deqa iga tamo uŋgasari naŋgo are bulyetnjroqnim naŋgi Yesus qa naŋgo areqalo siŋgilatqajqa deqa waueqnum. Iga wau di ugetosaieqnum. Qotei a segi gago areqalo ti gago kumbra ti qalie. Ariya e niŋgi qa qalieonum, nuŋgo are miligiq di niŋgi dego qalieonub, iga wau bole yeqnum.

2 Korin 5:16

Deqa bini iga areqalo namij dauryosim tamo uŋgasari naŋgo kumbra qa peginjrosaieqnum. Bole, nami iga areqalo namij na Kristus aqa kumbra qa pegiyoqnem. Ariya bini iga olo kumbra dena a pegiyosaieqnum.

Galesia 1:10

Niŋgi kiersib are qaleqnub? E anjam endi neŋgreŋyonum di mandam tamo naŋgi e qa boleqajqa kio Qotei a e qa boleqajqa kio deqa neŋgreŋyonum e? Mandam tamo naŋgi e qa boleqajqa deqa e waueqnum e? Niŋgi quiye. Mandam tamo naŋgi e qa boleqajqa deqa e waueqnum qamu e Kristus aqa wau tamo bolesai qamu.

Galesia 2:7

Pita aqa wau agiende. A Juda naŋgo ambleq di wauoqnsiqa Kristus aqa anjam bole naŋgi minjre minjre laqnu. Qotei na wau di Pita yej. Dego kere e dego wau ti. Ijo wau agi e na tamo uŋgasari sawa bei beiq di unub qaji naŋgo ambleq di wauoqnsimqa Kristus aqa anjam bole naŋgi minjre minjre laqnum. Wau di Qotei na e ebej. Tamo ñam ti naŋgi degsib unsib ariya naŋgi e kamba olo anjam bei merbosai.

Efesus 3:8

Qotei aqa tamo uŋgasari kalil naŋgi na e tulaŋ buŋbejunub. Ariya Qotei a e qa are boleiyosiq wau ebej. E na sawa bei bei qaji tamo naŋgi Kristus aqa anjam bole minjre minjre laqajqa deqa osiq e wau ebej. Anjam bole di aqa utru agiende. Kristus na iga laŋ qaji iŋgi bole bole egeqnu. Iŋgi bole bole di aqa utru iga na ubtsim marqa keresai.

Efesus 6:6

Niŋgi gisaŋ kumbra na nuŋgo wau qa gate naŋgo ŋamgalaq dia laŋa wau bole yobulaib. Niŋgi Kristus aqa kaŋgal tamo unub deqa nuŋgo are miligiq na Qotei aqa areqalo dauryosib naŋgi qa wau bole yoqniye.

Kolosi 3:22

O kaŋgal tamo, niŋgi gaigai nuŋgo wau qa gate naŋgo anjam dauryoqniye. Niŋgi gisaŋosib nuŋgo wau qa gate naŋgo ŋamdamuq di laŋa wau bole yobulaib. Niŋgi Tamo Koba Kristus qa ulaosib deqa gaigai are bole na wau bole yoqniye.

1 Timoti 6:20

O Timoti, Qotei na ni wau emej deqa ni wau di geregere taqatesoqne. Tamo qudei Qotei aqa areqalo dauryosai qaji naŋgi anjam uge uge mareleŋeqnub. Deqa ni naŋgo anjam di qoreiyosim naŋgi uratnjrsim isaq gile. Tamo naŋgi di mareqnub, “Iga powo bole ti unum.” Di gisaŋ. Naŋgi Qotei jeutoqnsib aqa areqalo dauryqa uratoqnsib anjam uge uge mareleŋeqnub.

2 Timoti 1:14

Qotei na aqa anjam bole ino baŋq di atej. Qotei aqa anjam di tulaŋ bolequja. Deqa ni na anjam di geregere taqatesoqne. Qotei aqa Mondor Bole agi gago are miligiq di unu qaji a na ni aqaryaimoqnimqa ni Qotei aqa wau di geregere ojsim laqne.

2 Timoti 2:2

Anjam kalil e tamo gargekoba naŋgo ŋamgalaq di palonteqnam ni quoqnem qaji di ni na osim olo tamo qudei Qotei aqa anjam siŋgila na ojeqnub qaji naŋgi di minjroqne. Yimqa naŋgi kamba anjam di olo tamo qudei naŋgi dego minjroqnqab.

Taitus 1:3

Ariya bati a nami atej qaji di brantonaqa a na tamo qudei naŋgi wau enjrsiqa minjrej, “Niŋgi ijo anjam marsib laqniye.” Kumbra dena Qotei na aqa segi anjam boleq atej. Qotei agi iga eleŋej qaji a na e dego merbonaqa e aqa wau di ojsim aqa anjam marsim laqnum.

Hibru 4:13

Iŋgi bei a Qotei qa uliqa keresai. Iŋgi iŋgi kalil Qotei na gereinjrej qaji di a na ŋam atsiq geregere uneqnu. Deqa mondoŋ a na qujai gago kumbra kalil qa iga pegigwas.

1 Pita 4:11

Nuŋgo ambleq di tamo bei a anjam palontqa wau osimqa a Qotei aqa anjam geregere palontoqneme. Nuŋgo ambleq di tamo bei a tamo naŋgi aqaryainjrqajqa wau osimqa Qotei na a siŋgila yimqa a siŋgila dena wauoqneme. Yimqa wau kalil niŋgi yeqnub qaji di tamo naŋgi unsibqa Yesus Kristus aqa ñam na Qotei aqa ñam tulaŋ soqtoqnqab. Yesus Kristus a bati gaigai ñam koba ti siŋgila ti sqas. Bole.

Uli Anjam 2:23

Aqa aŋgro naŋgi dego ñumit moreŋqab. Amqa tamo uŋgasari qure kalilq dia ijo ñam qa koroosib loueqnub qaji naŋgi qalieqab, e tamo kalil naŋgo are miligi ti areqalo ti geregere unsim peleiyeqnum. Deqa niŋgi quiye. E na nuŋgo kumbra kalil geregere keretosiy nuŋgo awai dego segi segi eŋgwai.