1 Tesalonaika 2:14 - Yesus Aqa Anjam Bole

¹⁴ O was qu, tamo uŋgasari Judia sawaq dia Kristus Yesus beteryesosib Qotei aqa ñam qa koroosib loueqnub qaji naŋgo kumbra agi niŋgi dego degsib dauryeqnub. Agi Juda naŋgi na Qotei aqa tamo uŋgasari Judia sawaq di unub qaji naŋgi gulube koba enjroqneb dego kere niŋgi dego nuŋgo segi leŋ naŋgi na gulube koba eŋgeqnub.

1 Tesalonaika 2:14 ပူးပေါင်းရင်းမြစ်များ

Aposel 11:19

Nami Juda tamo kokba naŋgi na Stiven qalsib moiotsibqa bati deqa tamo uŋgasari kalil Yesus qa naŋgo areqalo siŋgilateb qaji naŋgi dego ugeugeinjroqnsib gulube koba enjroqneb. Deqa naŋgi segi segi jaraiosib Fonisia sawa ti Saiprus nui ti Antiok qure ti deq gileleŋeb. Gilsib dia Qotei aqa anjam mare mare laqneb. Laqnsibqa Juda tamo uŋgasari naŋgi segi Qotei aqa anjam minjroqneb. Sawa bei bei qaji tamo naŋgi anjam minjrosaioqneb.

Aposel 13:50

Onaqa Juda tamo qudei naŋgi Pol wo Barnabas wo naŋgo kumbra di unsibqa naŋgi tulaŋ minjiŋ oqetnjrnaqa uŋa kokba qudei Qotei qa louoqneb qaji naŋgi ti qure deqa gate kokba ti naŋgo are ugetetnjrnabqa naŋgi tigelosib Pol wo Barnabas wo naŋgi tulaŋ ugeugeinjrsib naŋgi aiyel qure dia sqajqa siŋgila na saidnjrsib naŋgi winjrnab gileb.

Aposel 14:19

Onaqa Juda tamo qudei naŋgi Antiok dena ti Aikoniam dena ti walwelosib Listra qureq beb. Bosib dia tamo uŋgasari naŋgo are ugetetnjrnabqa naŋgi tigelosib Pol meniŋ na qaleb. Osib a giriŋyosib gilsib qure qalaq di ateb. Naŋgi are qaleb, “A moiqo.”

Aposel 14:2

Ariya Juda tamo qudei Pol wo Barnabas wo naŋgo anjam quqwa urateb qaji naŋgi na sawa bei bei qaji tamo naŋgo are ugetetnjrnabqa naŋgi tamo uŋgasari Yesus qa naŋgo areqalo siŋgilateb qaji naŋgi qa ugeosib misiliŋyoqneb.

Aposel 14:4

Ariya Aikoniam qureq dia tamo uŋgasari naŋgi Pol wo Barnabas wo naŋgo anjam quoqnsib poeleŋeb. Qudei naŋgi Juda naŋgi daurnjreb. Qudei naŋgi Pol wo Barnabas wo naŋgi daurnjreb.

Aposel 14:5

Onaqa Grik tamo qudei ti Juda tamo qudei ti naŋgo tamo kokba ti naŋgi aiyel qa minjiŋ oqetnjrnaqa maroqneb, “Iga naŋgi aiyel meniŋ na ñumsim moiotnjrqom.”

Aposel 17:13

Onaqa Juda tamo uŋgasari Tesalonaika qureq di soqneb qaji naŋgi Pol a Beria qureq gilsiq dia dego Qotei aqa anjam maroqnej di qusibqa minjiŋ oqetnjrnaqa mareb, “Iga Pol qalqom.” Degsib marsibqa Beria qureq bosib dia tamo uŋgasari naŋgo are ugetetnjreb.

Aposel 18:12

Ariya Pol a Korin qureq di sonaqa Rom naŋgo gate koba bei aqa ñam Galio a Akaia sawa taqatoqnej. Bati deqa Juda naŋgi Pol qa minjiŋ oqetnjrnaqa a ojsib koro sawaq osi gilsib Galio aqa awo jaram namoq di tigelteb.

Aposel 8:1

Naŋgi Stiven qalnab moinaqa Sol a unsiqa tulaŋ areboleboleiyej. Osiqa marej, “Keretosib Stiven qalnub moiqo.” Onaqa tamo qudei Qotei aqa kumbra dauryoqneb qaji naŋgi Stiven moiej deqa are ugeinjrnaqa akamosib bosib aqa jejamu osib subq ateb. Bati deqa Juda tamo kokba naŋgi Jerusalem dia tamo uŋgasari Yesus qa naŋgo areqalo siŋgilateb qaji naŋgi qa tulaŋ minjiŋ oqetnjrnaqa ugeugeinjroqneb. Deqa naŋgi segi segi jaraiosib Judia sawa ti Samaria sawa ti deq giloqneb. Ariya Yesus aqa aŋgro 12-pela naŋgi segi Jerusalem di soqneb. Naŋgi jaraiosai.

Aposel 8:3

Sol a dego tamo uŋgasari Yesus qa naŋgo areqalo siŋgilateb qaji naŋgi qa tulaŋ minjiŋ oqnaqa ugeugeinjroqnej. Deqa a naŋgo segi segi talq giloqnsiqa tamo ti uŋa ti ojeleŋoqnsiqa naŋgi joqsi aioqnsiqa tonto talq di breinjroqnej.

Aposel 9:1

Sol a na tamo uŋgasari Tamo Koba Yesus dauryoqneb qaji naŋgi ugeugeinjrsim moiotnjrqajqa siŋgila na maroqnej. Deqa bati bei a atra tamo gate aqaq gilsiqa minjej,

Aposel 9:13

Onaqa Ananaias na kamba Yesus minjej, “O Tamo Koba, tamo gargekoba naŋgi e merbeqnub, ‘Sol a na Jerusalem dia Yesus aqa tamo uŋgasari naŋgi tulaŋ ugeugeinjreqnu.’ Naŋgi e degsib merbeqnub.

Aposel 9:31

Bati deqa Judia sawaq dia, Galili sawaq dia, Samaria sawaq dia dego tamo uŋgasari Yesus qa naŋgo areqalo siŋgilateb qaji naŋgi geregere lawo na soqneb. Naŋgi bati gaigai Tamo Koba Qotei aqa ñam biŋiyoqnsibqa aqa anjam dauryeqnabqa Qotei aqa Mondor na naŋgo are siŋgilatetnjreqnaqa tamo uŋgasari tulaŋ gargekoba are bulyoqnsib naŋgo miligiq aieqnab naŋgi tulaŋ kobaoqneb.

1 Korin 10:32

Niŋgi na Juda tamo ti Grik tamo ti Qotei aqa segi tamo uŋgasari naŋgi ti kumbra uge bei enjraib. Yim naŋgi dena ululoŋosib uneq aio uge.

1 Korin 7:17

Gam Qotei na iga segi segi dauryqa marsiq giltgej qaji di iga dauryosim sqom. Iga nami gam kie dauryosim sonamqa Qotei na iga metgej degsim olo dauryosim sqom. Anjam di agi e na Kristen tamo uŋgasari sawa sawa kalilq dia koroosib loueqnub qaji naŋgi minjre minjre laqnum.

Galesia 1:22

Ariya bati deqa Kristus aqa tamo uŋgasari Judia sawaq di soqneb qaji naŋgi ijo ulatamu poinjrosaisoqnej.

1 Tesalonaika 1:1

Iga Pol na Sailas na Timoti na iga qalub anjam endi neŋgreŋyosim niŋgi tamo uŋgasari Tesalonaika qureq dia Yesus aqa ñam qa koroosib loueqnub qaji niŋgi qa qariŋyonum. Niŋgi Abu Qotei wo Tamo Koba Yesus Kristus wo naŋgi aiyel taqnjrejunub. Qotei a niŋgi qa are boleiyimqa niŋgi lawo na soqniye.

1 Tesalonaika 1:6

Niŋgi Qotei aqa anjam eb deqa gulube gargekoba nuŋgoq di branteleŋej. Ariya bati deqa niŋgi gago kumbra ti Tamo Koba Yesus aqa kumbra ti dauryqa uratosai. Niŋgi dauryoqneb. Qotei aqa Mondor na nuŋgo areqalo tigeltetŋgej deqa niŋgi tulaŋ areboleboleiŋgoqnej.

1 Tesalonaika 3:4

Agi iga nuŋgo ambleq di sosimqa endegsi merŋgoqnem, “Gulube gargekoba gagoq boqnqas.” Deqa niŋgi endegsib qalieoiye. Gulube oqajqa bati agi brantqo.

2 Tesalonaika 1:1

Iga Pol na Sailas na Timoti na iga qalub anjam endi neŋgreŋyosim niŋgi tamo uŋgasari Tesalonaika qureq dia Yesus aqa ñam qa koroosib loueqnub qaji niŋgi qa qariŋyonum. Niŋgi gago Abu Qotei wo Tamo Koba Yesus Kristus wo naŋgi aiyel taqnjrejunub.

2 Tesalonaika 1:4

Utru deqa iga qure kalilq di laqnsimqa tamo uŋgasari Qotei louqa koroeqnub qaji naŋgi niŋgi qa sainjroqnsim nuŋgo ñam soqteqnum. Kumbra uge kalil jeu tamo naŋgi na niŋgi eŋgeqnub qaji deqa ti gulube kalil niŋgi qa branteqnu qaji deqa ti iga na naŋgi sainjroqnsim endegsi minjreqnum, “Tesalonaika Kristen naŋgi Yesus qa naŋgo areqalo tulaŋ siŋgilatoqnsib deqa naŋgi gulube ti jaqatiŋ ti kalil di qoboiyoqnsib siŋgila na tigelejunub.”