1 Tesalonaika 2:13 - Yesus Aqa Anjam Bole

¹³ Iga Qotei aqa anjam niŋgi merŋgeqnam niŋgi quoqnsib endegsib marosaioqneb, “Anjam di mandam tamo naŋgo anjam.” Niŋgi degsib marosaioqneb. Niŋgi quoqnsib maroqneb, “Bole, anjam di Qotei aqa anjam tiŋtiŋ.” Niŋgi degsib maroqneb deqa Qotei aqa anjam di nuŋgo are miligiq di siŋgila na waueqnu. Di kiyaqa? Niŋgi Kristus qa nuŋgo areqalo siŋgilateqnub deqa. Deqa iga gaigai niŋgi qa are qaloqnsim Qotei biŋiyeqnum.

1 Tesalonaika 2:13 ပူးပေါင်းရင်းမြစ်များ

Matyu 10:20

Di kiyaqa? Niŋgi segi na anjam minjrqasai. Nuŋgo Abu aqa Mondor na nuŋgo medabu siŋgilatetŋgim niŋgi anjam marqab.

Matyu 10:40

Osiqa Yesus a olo anjam endegsi minjrej, “Tamo bei na niŋgi osim geregereiŋgwas di a na e dego osim geregereibqas. Tamo a e oqas di a na ijo Abu e qariŋbej qaji di dego oqas.

Luk 11:28

Onaqa Yesus na kamba minjej, “Ijo ai a segi sai. Tamo naŋgi Qotei aqa anjam qusib dauryeqnub qaji naŋgi dego tulaŋ areboleboleinjrim sqab.”

Luk 5:1

Bati bei Yesus a Genesaret ya aguq gilsiqa alile dia tigelesonaqa tamo uŋgasari tulaŋ gargekoba naŋgi Qotei aqa anjam quqwajqa are qalsibqa Yesus aqa areq bosib koroeb.

Luk 8:11

Osiqa Yesus a olo anjam endegsi minjrej, “Saga yago qa yawo anjam maronum di aqa utru e na babtitqa niŋgi quiye. Saga yago di Qotei aqa anjam.

Luk 8:21

Onaqa Yesus na kamba minjrej, “Tamo uŋgasari Qotei aqa anjam qusib dauryeqnub qaji naŋgi ijo ai bole. Naŋgi ijo was bole dego.”

Jon 15:3

Ijo anjam e nami merŋgoqnem qaji dena niŋgi gereiŋgwo. Deqa niŋgi torei milalejunub.

Jon 17:17

Ino anjam kalil bole. Ni na ino anjam bole di naŋgi minjroqnimqa naŋgo are miligiq di wauoqnimqa dena naŋgi ino segi tamo uŋgasari tiŋtiŋ sqab.

Jon 17:19

E niŋgi qa osiy ijo segi jejamu osiy ni emekritqai. Ijo kumbra dena naŋgi ino segi tamo uŋgasari tiŋtiŋ sosib ino anjam bole dauryoqnqab.

Aposel 10:33

Laŋ aŋgro na e degsi merbonaqa e urur tigelosim tamo qudei naŋgi qariŋnjrnam Jopa qureq aisib inoq di branteb. Brantonabqa ni na naŋgi daurnjrsim agi ijo talq bonum. Deqa e ni qa tulaŋ areboleboleibqo. Endego iga kalil endia koroosimqa Qotei aqa ŋamgalaq di awejunum. Deqa anjam kalil Tamo Koba Qotei na ni mermej qaji di mergimqa iga quqwom.” Kornilius na Pita degsi minjej.

Aposel 13:48

Onaqa sawa bei bei qaji tamo naŋgi Pol aqa anjam di qusibqa naŋgi tulaŋ areboleboleinjrnaqa Tamo Koba Yesus aqa anjam biŋiyeb. Deqa qure dia tamo uŋgasari kalil Qotei na nami ŋambile gaigai sqajqa giltnjrej qaji naŋgi are bulyosib Yesus qa naŋgo areqalo siŋgilateb.

Aposel 16:14

Naŋgo ambleq di uŋa bei soqnej aqa ñam Lidia. A gara lent oqnsiq qariŋyeqnaqa tamo naŋgi na awaiyoqneb. Di aqa silali wau. Aqa qure utru Taiataira. A Qotei qa louoqnej qaji uŋa. A ya qalaq di sonaqa Pol na bosiq itej. Bati deqa Qotei na aqa areqalo waqtetonaqa a Pol aqa anjam qusiq poiyonaqa are bulyosiqa aqa areqalo Yesus qa siŋgilatej.

Aposel 17:11

Juda tamo uŋgasari Beria qureq di soqneb qaji naŋgo kumbra tulaŋ boledamu. Tesalonaika qureq di soqneb qaji naŋgi ti keresai. Juda tamo uŋgasari Beria qureq di soqneb qaji naŋgi Qotei aqa anjam quqwajqa tulaŋ areboleboleinjreqnaqa bati gaigai Qotei aqa anjam nami neŋgreŋyeb qaji di geregere peleiyoqneb. Pol wo Sailas wo naŋgo anjam bole kio sai kio di naŋgi qalieqa marsib deqa bati gaigai naŋgo aiyel anjam ti Qotei aqa anjam nami neŋgreŋyeb qaji de ti geregere tenemtoqneb.

Aposel 17:32

Pol a Atens qureq dia tamo uŋgasari naŋgi anjam degsi minjrnaqa naŋgi Yesus subq na tigelej anjam di qusibqa naŋgi qudei Pol kikiyeb. Ariya naŋgi qudei na Pol minjeb, “Anjam di bunuqna ni na olo mergim iga quqwom.”

Aposel 2:41

Onaqa tamo uŋgasari kalil Pita aqa anjam di qusib naŋgo are miligiq di ateb qaji naŋgi yansnjreb. Bati deqa tamo uŋgasari 3,000 naŋgi Yesus qa naŋgo areqalo siŋgilatosib tamo uŋgasari nami Yesus qa naŋgo areqalo siŋgilateb qaji naŋgo miligiq aisib koba na soqneb.

Aposel 8:14

Bati deqa Samaria tamo uŋgasari gargekoba naŋgi Qotei aqa anjam osib Yesus qa naŋgo areqalo siŋgilateb. Deqa Yesus aqa aŋgro 12-pela Jerusalem qureq di soqneb qaji naŋgi degsi qusibqa Pita wo Jon wo qariŋnjrnab Samaria naŋgoq gileb. Gilsib Samaria naŋgoq di brantosib naŋgi qa endegsib Qotei pailyeb, “O Abu, ni na Samaria naŋgi ino Mondor enjrime.” Degsib Qotei pailyeb.

Rom 10:17

Ariya was qu, iga qalie, iga Qotei aqa anjam di quoqnsim gago areqaloq di siŋgilateqnum. Anjam iga queqnum qaji di Kristus aqa medabuq na branteqnu.

2 Korin 3:18

Deqa gago ulatamu olo kabuesosai. Iga kalil Tamo Koba Qotei aqa riaŋ di ya jeqiloq di unobuleqnam riaŋ di gagoq di tulaŋ kobaqujaeqnaqa dena iga Qotei a segi buloqnsim unum. Tamo Koba Yesus a na kumbra di iga egeqnu. Tamo Koba a segi Qotei aqa Mondor Bole.

Galesia 4:14

Bati deqa ijo jejamu siŋgila saiqoji soqnej dena niŋgi gulube koba oqneb. Ariya niŋgi deqa e qoreibosai. Niŋgi e gereibqa asgiŋgosai. Qotei aqa laŋ aŋgro bei kio Kristus Yesus a segi kio niŋgi qa bqas di niŋgi a osib gereiyqab dego kere niŋgi e osib gereibeb.

Hibru 4:12

Qotei aqa anjam a ŋambile ti unu. A siŋgila na waueqnu. A serie bul tulaŋ qalat. Deqa a na tamo naŋgo are qametnjroqnsiqa naŋgo qunuŋ ti tanu ti siŋga ti jejamu ti kalil miligiq aioqnsiq naŋgo areqalo ti naŋgo are miligi ti geregere pegiyeqnu.

Hibru 4:2

Iga Qotei aqa anjam bole quoqnem. Agi Israel tamo naŋgi Qotei aqa anjam bole nami quoqneb dego kere. Ariya naŋgi aqa anjam di laŋa qusib deqa naŋgo areqaloq di siŋgilatosai. Deqa anjam dena naŋgi yala aqaryainjrosai.

Jems 1:18

A aqa segi areqalo na iga gereigej. Deqa a gago Abu. A aqa segi anjam bole na iga gereigej. Yim iga na iŋgi iŋgi kalil a gereinjrej qaji di buŋnjrsim naŋgo namoq di sqajqa deqa.

1 Pita 1:23

Niŋgi iŋgi meli bunuj bulosib ŋambile bunuj eb. Iŋgi meli ugeqas qaji dena niŋgi ŋambile osai. Iŋgi meli gaigai sqas qaji dena niŋgi ŋambile eb. Iŋgi meli bunuj di Qotei aqa anjam. Anjam di ŋambile ti. A gaigai sqas.

1 Pita 1:25

Ariya Tamo Koba Qotei aqa anjam a bati gaigai sqas.” O was qu, Qotei aqa anjam bole di agi aqa anjam maro tamo naŋgi palontoqnsib niŋgi merŋgoqneb.

1 Pita 2:2

Iga qalie, aŋgro mom naŋgi muŋgum qaq uyqajqa qarnjreqnu. Dego kere niŋgi muŋgum qaq boledamu Qotei aqaq dena beqnu qaji di oqajqa are qaloqniye. Muŋgum qaq di agi Qotei aqa anjam. Muŋgum qaq di jiga bei saiqoji. Muŋgum qaq dena nuŋgo qunuŋ aqaryaiyimqa niŋgi tulaŋ boleosib siŋgilaqab. Yim Qotei na niŋgi oqas.

1 Jon 3:3

Tamo kalil Kristus qa tariŋeqnub qaji naŋgo kumbra dena naŋgi naŋgo segi une olo uratoqnsib Qotei aqa ŋamgalaq di jiga saiqoji unub. Agi Kristus a segi jiga saiqoji unu dego kere.