1 Tesalonaika 1:5 - Yesus Aqa Anjam Bole

⁵ Iga nami Kristus aqa anjam bole nuŋgoq osi bem. Iga laŋa anjam maro na osi bosai. Iga Qotei aqa siŋgila na ti aqa Mondor Bole aqa kumbra na ti osi bem. Bati deqa iga gago areqalo Kristus qa siŋgilatonamqa niŋgi di uneb. Iga nuŋgo ambleq di sosimqa niŋgi aqaryaiŋgoqnem. Gago kumbra di niŋgi segi qalie.

1 Tesalonaika 1:5 ပူးပေါင်းရင်းမြစ်များ

Mak 16:20

Onaqa aqa aŋgro naŋgi jaraiosib sawa sawa kalil keretosib Yesus aqa anjam bole minjre minjre laqneb. Laqnabqa Tamo Koba Yesus a naŋgi koba na wauoqnsiqa maŋwa gargekoba yeqnaqa dena naŋgo anjam siŋgilaoqnej.

Luk 1:1

O Tamo Koba Tiofilus, nami kumbra kalil Qotei a gago ambleq di yoqnej qaji di aqa wau tamo naŋgi unoqnsib iga saigoqneb. Deqa tamo gargekoba naŋgi qusib neŋgreŋyeleŋeb.

Aposel 11:21

Naŋgi Tamo Koba Yesus aqa siŋgila ti wauoqnsib anjam mareqnab tamo uŋgasari tulaŋ gargekoba naŋgi Tamo Koba Yesus qa naŋgo areqalo siŋgilatoqnsib are bulyoqneb.

Aposel 16:14

Naŋgo ambleq di uŋa bei soqnej aqa ñam Lidia. A gara lent oqnsiq qariŋyeqnaqa tamo naŋgi na awaiyoqneb. Di aqa silali wau. Aqa qure utru Taiataira. A Qotei qa louoqnej qaji uŋa. A ya qalaq di sonaqa Pol na bosiq itej. Bati deqa Qotei na aqa areqalo waqtetonaqa a Pol aqa anjam qusiq poiyonaqa are bulyosiqa aqa areqalo Yesus qa siŋgilatej.

Aposel 2:33

A laŋ qureq oqsiq ñam kobaquja osiq Qotei aqa baŋ woq di awesoqnej. Osiq Qotei aqa Mondor niŋgi nami eŋgwa marej qaji di aqa Abu aqaq dena yaiyosiqa qariŋyqo aiqoqa niŋgi unsib nuŋgo dabkala na dego quonub.

Rom 1:16

E Yesus aqa anjam bole di marqajqa jemaibosaieqnu. Di kiyaqa? Anjam bole di Qotei aqa siŋgila ti unu. Siŋgila dena Qotei na tamo kalil Yesus qa naŋgo areqalo siŋgilateqnub qaji naŋgi padalqa gamq dena olo eleŋeqnu. A namoqna Juda naŋgi eleŋej. Ariya a na olo tamo uŋgasari sawa bei beiq di unub qaji naŋgi dego eleŋqas.

Rom 15:13

O was qu, Qotei a nami iŋgi bole bole di iga egwajqa marej deqa iga bini tariŋoqnsim unum. Niŋgi a qa nuŋgo areqalo siŋgilateqnub deqa a na nuŋgo are boletetŋgimqa niŋgi tulaŋ areboleboleiŋgim lawo na sqab. Yim Qotei aqa Mondor na niŋgi siŋgilatŋgimqa niŋgi iŋgi bole bole a na eŋgwa marej qaji deqa tariŋoqnsib sqab.

1 Korin 1:24

Ariya tamo uŋgasari Qotei na metnjrej qaji agi Juda ti Grik ti naŋgi qalieonub, Kristus a Qotei aqa siŋgila ti unu. A Qotei aqa powo ti dego unu.

1 Korin 10:33

E dego tamo uŋgasari kalil naŋgi kumbra bole bole enjreqnam naŋgi ijo kumbra di unoqnsib arearetnjreqnu. E ijo segi jejamu qa are qalosaieqnum. E tamo uŋgasari gargekoba naŋgi qa are qaloqnsim aqaryainjreqnum. Yim Qotei na naŋgi oqajqa deqa.

1 Korin 3:16

Niŋgi Qotei aqa segi tal bul. Qotei aqa Mondor a nuŋgo miligiq di unu. Di niŋgi qaliesai kio?

1 Korin 3:6

E wauq di iŋgi yagem. Apolos a na wau taqatoqnej. Ariya Qotei a segi na iŋgi boleteqnu.

1 Korin 4:20

Di kiyaqa? Qotei a gago Mandor Koba sosiq iga taqatgeqnu di a laŋa anjam maro na iga taqatgosaieqnu. A aqa siŋgila kobaquja na iga taqatgeqnu.

1 Korin 9:14

Dego kere Tamo Koba Yesus a endegsi marej, “Tamo naŋgi Qotei aqa anjam bole mareqnub qaji naŋgi dena awai oqnsib naŋgo segi iŋgi awaiyoqnsib uyoqnqab.”

2 Korin 3:6

Gago wau agiende. Iga Kristus aqa anjam bunuj aqa leŋ na siŋgilatej qaji di palontosim laqnum. Qotei a segi na iga siŋgilatgeqnu deqa iga wau di ojeqnum. Kristus aqa anjam bunuj di a dal anjamq di neŋgreŋyosai. Anjam bunuj di Qotei aqa Mondor Bole aqa segi anjam. Tamo naŋgi dal anjam dauryqa marqab di naŋgi moreŋqab. Ariya tamo naŋgi Qotei aqa Mondor dauryqab di a na naŋgi ŋambile enjrqas.

Galesia 2:2

Qotei a segi na merbej deqa e Jerusalem aiem. Ariya e Jerusalem di sosimqa e Kristen naŋgo gate naŋgi segi koba na anjam maroqnem. E sawa bei beiq dia laqnsimqa Kristus aqa anjam bole palontoqnem ijo wau di ubtsim minjrem. E tamo laŋa laŋaj naŋgi minjrosai. Di kiyaqa? Wau e nami yoqnsim agi bini yeqnum qaji di laŋa uloŋo uge.

Galesia 5:5

Ariya iga degyosaieqnum. Iga Qotei aqa Mondor aqa siŋgila na Qotei qa gago areqalo siŋgilatoqnsim mondoŋ a na iga tamo bole une saiqoji qa mergwajqa deqa tariŋoqnsim unum.

Efesus 2:10

Kristus Yesus aqa wau na Qotei na iga tamo uŋgasari bunuj gereigosiqa ŋambile egej. Di kiyaqa? Kumbra bole qa gam a na nami iga gereiyetgej qaji di iga dauryosim walweloqnqajqa deqa.

Efesus 3:20

Qotei aqa siŋgila a gago are miligiq di waueqnu. Aqa siŋgila dena gago areqalo kalil tulaŋ buŋyejunu. Gago pail kalil dego aqa siŋgila de ti keresai. A na tulaŋ buŋyejunu.

Filipai 2:13

Iga qalie, Qotei a nuŋgo are miligiq di waueqnu. A segi na nuŋgo are tigeltetŋgeqnaqa niŋgi kumbra a tulaŋ areareteqnu qaji di yeqnub. A na niŋgi siŋgilatŋgeqnu deqa niŋgi kumbra di yeqnub.

Filipai 4:9

Qotei aqa anjam kalil e nami niŋgi merŋgeqnam quoqneb qaji di niŋgi dauryosib soqniye. Ijo kumbra kalil e nami nuŋgo ambleq di yeqnam niŋgi unoqneb qaji di dego niŋgi dauryosib soqniye. Yimqa Qotei a niŋgi ti sqas. Agi Qotei a lawo kumbra qa utru.

Kolosi 2:2

E nuŋgo are siŋgilatetŋgosiy nuŋgo areqalo tigeltetŋgitqa niŋgi na Qotei aqa segi tamo uŋgasari naŋgi tulaŋ qalaqalainjroqnsib naŋgi ti are qujaitosib sqajqa deqa are qaloqnsim waukobaeqnum. Ijo areqalo agiende. Niŋgi areqalo bole ti sosib dena niŋgi nuŋgo areqalo Kristus qa bole siŋgilatqab. Osib dena niŋgi Qotei aqa uli anjam aqa utru geregere qalieqab. Kristus a segi uli anjam di aqa utru.

1 Tesalonaika 2:13

Iga Qotei aqa anjam niŋgi merŋgeqnam niŋgi quoqnsib endegsib marosaioqneb, “Anjam di mandam tamo naŋgo anjam.” Niŋgi degsib marosaioqneb. Niŋgi quoqnsib maroqneb, “Bole, anjam di Qotei aqa anjam tiŋtiŋ.” Niŋgi degsib maroqneb deqa Qotei aqa anjam di nuŋgo are miligiq di siŋgila na waueqnu. Di kiyaqa? Niŋgi Kristus qa nuŋgo areqalo siŋgilateqnub deqa. Deqa iga gaigai niŋgi qa are qaloqnsim Qotei biŋiyeqnum.

2 Tesalonaika 2:14

Qotei aqa areqalo agiende. Niŋgi gago Tamo Koba Yesus Kristus aqa riaŋ koba ti aqa siŋgila ti unqajqa. Deqa a na aqa anjam bole iga nami niŋgi merŋgoqnem qaji dena niŋgi metŋgej.

2 Timoti 2:10

Deqa e na ijo are miligi siŋgilatoqnsim gulube kalil di qoboiyoqnsim unum. E tamo uŋgasari Qotei na aqa segi qa giltnjrej qaji naŋgi aqaryainjrqajqa deqa osim gulube di qoboiyeqnum. Yimqa Qotei na naŋgi eleŋamqa naŋgi dego Kristus Yesus aqa ñam na ŋambile osib a ombla gaigai sqajqa deqa.

2 Timoti 2:8

Ni gaigai Yesus Kristus qa are qaloqne. Yesus Kristus a moisiq olo subq na tigelej. A Mandor Koba Devit aqa leŋ. Aqa anjam bole agi e palontosim laqnum.

Hibru 10:22

A na aqa segi leŋ bilentonaqa gago are miligiq aiej. A gago kumbra uge kalil qa are qalsiqa gago une kobotetgej. Deqa iga qalieonum, iga Qotei aqa ŋamgalaq di une saiqoji unum. A gago jejamu ya na yansetgej deqa kumbra gisaŋ kalil gago are miligiq di unu qaji di iga taqal waiyqom. Osim Qotei qa gago areqalo siŋgilatosim aqa areq giloqnqom. Utru deqa Yesus a na aqa segi leŋ bilentonaqa gago are miligiq aiej.

Hibru 6:11

Ariya gago areqalo agiende. Niŋgi kalil degsib siŋgila na wauoqniye. Osib mondoŋ Qotei na niŋgi olo boletŋgwajqa deqa tariŋoqnsib soqniye.

1 Pita 1:12

Ariya Qotei a na naŋgi kamba endegsi minjrej, “Anjam niŋgi mareqnub qaji di aqa damu nuŋgo bati qa brantqasai. A bunuqna brantqas.” O was qu, Qotei na niŋgi oqajqa anjam di Qotei aqa medabu o qaji tamo naŋgi maroqneb. Ariya bunuqna Qotei na aqa Mondor Bole qariŋyonaqa laŋ goge dena aisiq Qotei aqa anjam maro tamo naŋgi siŋgilatnjroqnej. Yeqnaqa naŋgi Kristus aqa anjam bole palontoqnsib niŋgi merŋgoqneb. Qotei aqa laŋ aŋgro naŋgi dego kumbra bole kalil Qotei na niŋgi eŋgeqnu qaji deqa geregere qalieqa osib utru ŋameqnub.

1 Pita 1:3

Iga gago Tamo Koba Yesus Kristus aqa Abu Qotei aqa ñam soqtoqnqom. Qotei a iga qa tulaŋ dulosiqa Yesus Kristus olo subq na tigeltej. Gam dena Qotei na iga ŋambile bunuj egej. Ŋambile bunuj dena iga siŋgilatgejunu deqa iga iŋgi bole bole Qotei na mondoŋ egwas qaji deqa tariŋoqnsim unum.

1 Pita 5:3

Niŋgi na Qotei aqa tamo uŋgasari naŋgi siŋgila na taqatnjraib. Qotei na naŋgi joqsiqa nuŋgo baŋq di atej unub deqa niŋgi kumbra bole na naŋgi taqatnjriye. Yimqa naŋgi nuŋgo kumbra di unsib niŋgi daurŋgwab.

2 Pita 1:10

O was qu, Qotei a nami niŋgi giltŋgosiq metŋgej deqa niŋgi aqa segi tamo tiŋtiŋ sqajqa siŋgilaoqniye. Niŋgi degyqab di niŋgi uloŋqa keresai.

2 Pita 1:19

Deqa iga bole qalieonum, Qotei aqa medabu o qaji tamo naŋgi nami anjam maroqneb di naŋgi anjam bole maroqneb. Deqa niŋgi dego naŋgo anjam di torei ojiye. Niŋgi ojqab di bolequja. Naŋgo anjam di waŋal bul sawa ambruq di puloŋesosiqa nebe qa burbas oqeqnu dego kere nuŋgo are miligiq di suwaŋejunu.